ሆስፒታል ግቢትስታማ አሌድስትጝ ዝኩኽሳ ችግሮ ይጉፃዊያኽ

ታደለ አጋጄ

ዚጋሚ አባላምቲ አች ሆስፒታል አሌድስትጝ ቹትካዳስታ ስራስሪዳ ታምባሺኹሳ ክርⶓ ይጉፃው አኽⶓ ወረዳው ዝኩዋንትካ ዙሙና::

ዚጋሚ ወረዳው እምፕልታቕስስታ ዎሌን ወረድካውሳ ቲኑሳ ችግሮ ኽይጝስ እስታማ 2010 ም/አታዳ ግቢትስትⶓ ጄሜርኹ ዚጋሚ አባላምቲ አች ሆስፒታል ሱኺቲ አሜታዴስ ፋሌንጋ አሌድስታ::

ዚጋሚ ወረዳው እምፕልታቕ ቲኑሳ አግልግሎቴ አግፅጝስ 45 ትኩሚ 3 ኪሎ ሜትሮ እንዜጝጝስ ቻግኒ አባላምቲ አች ሆስፒታሎስታ እሊኩሳ ሆስፒታልካዋ አግፅጝስ ማልጛ ቺጊርፂ ያኹኽሳ ዚጋሚ ቻግኒውሳ ዳዶ እንዜጝጝስ ጌዴድስታሺና::

አውጚው ቴሌቪጅንሊ እጂጜ ፄውንኩ ዊዛሩ ብርኬ ትላሁን ዚጋሚ ወረዳው ዝኩዋንትካ ያኻኒስ ሆስፒታል ዲጊዳ እላቲው አኽጝስ ቹትካዳስታ ስራስሪዳ አንጌልትስትጝስ ችግርስ ታንባሺንኩ አኽⶓ ዙሜካ:: ካሜናንትካስታ ስራስሪ ዎክትስ እክምኔ አግፄካማ ኬሽጝስ ካላኒስ ክርጝስ ታምባና:: ኬሽጝስ ካላው አቒ እክምኔ አቲጝስ ማልጛ ቤዴል ታምባሺኹ አኽⶓ ዲብስካ::

ታክሲልስ ኬሴት ታምቡኽ ቑንዳስቲኒ ብሪ ክቢጝስ ይዎቶ አቲጝስ ሚንችካ ኬሽጝስ ካላንኩሳ እምፕልታቖ አቲⶓ ዙሜካ::

ናካዳ ሆስፒታል ዳቔርስታማ ድቕርስ ቢኪጝስ ማልጛ ዴስቴንካ አኽⶓ ጉሹንኩ ዊዛሩ ብርኬ ሆስፒታል ዳቔርስታማ እንፅኺሾ ቱዋኒ ቹትካዳስታ ስራስሪዳ ታምባሺኹሳ ክርⶓ ኔኬታው አኽⶓ ዲብስካ::

እሊው ዚጋሚ ወረዳው ዝኩዋንቲ አቶ አስፈራው የኔአባትኪላ ቲኑ ኾት ዲጊዳ እላቲው ጊዝዳ እምፕልታቕ ቲኑሳ አግልግሎቴ አግፅጝስ ማልጛ ቼጌርስታሺኹ አኽⶓ ቶኬምካ::

ሆስፒታል ግቢትስታው እስትኹ ጊዝዳ እምፕልታቑ እርዳቲ ማልጛ ኬፍቲኒ እሺኹ አኽⶓ ዲብስካ:: ሆስፒታል ሊሊትጙንኩ ምክንያትካስ እንግርቱኒውላ እምቢታማ አሌድስታታ ዙራሙሪኩ እምፕልታቕ ቲቪቪርጜ ፄውⶓ ጉሽካ:: ናካዳ ግቢትስታማ አሌድስትጝ እምፕልታቑ ቲኑሳ አግልግሎቴ ዲጊዳ አግፃንታ እርዳታው አኽⶓ ቶኬምካ:: ክርጝስ ታምባሺንኩሳ አቖ እንኬ ይጉፅጝስ፣ ቱስታ ጋቲታ ፍሽኹሳ ጊዞስታ ግርቦ ይጉፃው አኽⶓ ዙሜካ::

ዚጋሚ ወረዳው ቲን ፅፌት ጝናሱ ትክትሊ አላፊ አብዬ ሽቱ ዚጋሚ አባላምቲ አች ሆስፒታል አሌድስታማ ዳቔርስትጝ እምፕልታቕ እንዴስ ቤዴራ ጉሻሺኑሳ ካሴ ኽይኹ አኽⶓ ጌሌፅካ:: ዲጊዳ እክምኔ አግፃኑ ሆስፒታል እላቲው አኽጝስ እምፕልታቕ እክምኒው አግልግሎቲስ ማልጛ ቼጌርስታሺኑ አኽⶓ ቶኬምካማ ሆስፒታል እምቢታማ አሌድስታታ ኻሮ ጌርኮ እምፕልታቕ ቴቬቬርጝጝስ ሆስፒታል ድቕርስ ቢኪⶓ እርዳትፅካ::

እክምኒው አክኽካ ቱዌካማጊ አኽⶓ ቶኬሙንኩ ትክትሊ አላፊ ሆስፒታል ዲጊስ እክምኒውሳ አግልግሎቴ ጄሜራው አኽⶓ ቶኬምካ::

አማኻሪ ክልሉ ቲን ቢሩ አላፊ ገስት ትላሁን ዚጋሚ አባላምቲ  አች ሆስፒታል ሚንችካ ችግርካዋ ፌያማ ዳቔርስትጝስ እንኩዋን ዴስኒናስ ንካ::ሆስፒታል 260 ሚሊዬን ብርስ ግቢትስትⶓ ቶኬምካማ መንኮረር ኮንስትራክሽኑ አችትስ ፃንኩትስ  ግቢትስታማ አሌድስትⶓ ጌሌፅካ::ሆስፒታሎ እንፅኼ ጄሜርፅጝስ ያኻንኩሳ አክኽካዋስታ አምቡላንሶ ቲኑ ቢሩ ዲግሳማጊ አኽⶓ ጉሽካ:: ቹትካ፣ ስራስሪስታ ሹማጌልካ ቱስታዉሳ አንኬባኬብጜ አግፃኑስታ ሊጊሲሚ ጊዙሳ ካሴ ዙርፅኹ ኾት አኽⶓ እርዳትፅካ::

ኾት ዋኽትጙኽሳ አግልግሎቴ እይጝስ ካላዉ እዝብ እርዳታኒ አኽⶓ ማሊጝስ እምፕልታቕ ቱስታዉ ዳድስ እርዳትጝ ፋይፃዉ አኽⶓ ቶኬምካ:: ቲኑ ቢሩ እምፕልታቕ አግልግሎቲስ ቴኬምስታንታ ያኻንታ እንፃኽስታዉ አኽⶓ ጌሌፅካ::