ፋይስ ያኻውላ ግዴቴ ፊትጝጝስ

አግልግሎቴ እይጚ ቴኬምስታንትካዋ አኹኪ ዴንቤንካውሳ ፋዬ እርዳትስታማ ፋዬ ዋኽትጝፅጝስ ፄውስታውሳ ዋሺኔኪ ፅሬቶ ካንትፃውያኽ:: እንኪላ አግልግሎቴ ፋያንቲ ካሴውሳ ክችክቺስ እርዳትስትጝ፣ አግልግሎቴ ክችክቺስ ዲግስⶓጊ ቴኬሌልጝፃዊያኽ::

ሹኻ አሜታሳ ቼፍፅኹ አማኻሪ ክልልዳ ፌቴርስትኹ ፄትቲው ችግር ቤዴራኪላ ክሬቲ እሺኹሳ ምንግስቱ አግልግሎታ እይፂ ኾትካውሳ አጌላጌልጙሳ ፋዬ ባስጛታ ፄዋ::

ፄትቲው ችግር ዝኩጝ ዴሜካ ግብር ቱስቲስ ኩፓቲታ፣ ምንግስቱ እንፃኽስታንቲ ሼውታ ልቕልቕናማ እንፃኽስታቲታ ፄውጝስ እዝብ ጉሹኩ ክርፂ ቺፅጝፂው ካስካ ዙርሜ አግፃቲንታ ፄዋ:: እን ዴሜካ እዝብ ፋያው ልክስ አግልግሎቴ አግፃውላ ይጉጝስ ምንግስትዳ ክሬቴ ጉሽጝ ይጉዋላኪ:: ናካዳኪላ እሺኹ ሰላሙ ችግር ልቓስኪላ ዙራማጊ ያኼስጉ ሰላማ ያኹንኩ ዙራሙርካዳኪላ አግልግሎቴ እይጙ ችግር ኬሽጛያሱ አኽⶓ ሼውንጝስ ካሊስታ:: ባስጝኑስ ዴሜካ ፄጌሮ ኪሳማ እይስታው አግልግሎቲስ ሙስኔ ካሲጝሾ ቱስታማጊ አኽⶓኪላ እምፕልታቕ ጉሻኒስ ቹኒትስቴ:: እንፅኺውሳ ሳቶ ክችክቺስ ኬቤርፃማ አግልግሎቴ እይጝዳኪላ ኬፍቲኒ ዳንጉዊኒ ዝኩⶓ ሊሊትጙንኩ ኾትካሾ ካኑስ ታዜብጝስ ካሊና:: እን ዴሜካ እምፕልታቕውላዳ ክሬቴ ፌቴሩታ እጂጝ ይጉዋላኪ::

እምፕሎ አግልግሎቴ አግፅጝስ ዝኩኽ ባኬንጝ ቴኬምስታንቲውሳ ክብሬ ጊዞስታ ግርቦ ካፃው አኽጝስያኽ:: እንዴስ ፌይኹስ ዴሜካ ሳትስ አግልግሎቲ እይስታውላ ይጉጝስ ይወቶ አቲⶓኺስታ ታምፃው ኾት ዝኩⶓኪላ ሼውንጝ ቱስቴ:: አግልግሎቴ እይጜ ቱስቲስ ዴንቤንካስ እይጝ ፋይ ይቢቺ ያኻውላስ ግዴቲኪላ አኽⶓ ማላማ አግልግሎቴ እይናው ኬይስታውሳ ደሞዜ አግፅጝስ አኽⶓ እርዳትስትጝ ፋይፄ:: ግዲቲዴስ ፌይኹስኪላ አግልግሎቴ ቱስቲስ ይናኒ ዴንቤንካ ዴስቴና ያኼካማ ካሳኒስ ካንትጝስ አንኩሊውሳ ፉሬ አግፅጝኪላ እምፕል ፊቲያኽ::

ምንግስቱ ኾትካዳ ሚንችካ ሜሬርስታኑ ጉዳይካ ክቻዴስ ቹዋ ጉዳይኪላ አግልግሎቴ እይጚ ዝቤናዊ ያኻውላስ ይጉጝያኽ:: ይቶፒያኪላ ኾትካውሳ ሪፎርም ጄሜርቱኒዴስ እጂቴ:: ሪፎርምካዳ ኬሽጛንታ ትኩት ፄውስቱክ ዜርፍካዴስ ዴሜካ አግልግሎቶ እይጚ እምፕልያኽ::

ሙሱብ እምፕል ማይኬሉ አግልግሎቲ ብስስትኹኪላ እንጚስ እስታማኽ:: ኢቢሲ ዲጂታል ዜጌቡኽስታጊ ሙሱብ ይቶፒያው ባይሉ ጊሊፂያኽ:: ፕሮጀክትኪላ ጝናቕ እምፕል ሙሱቡ ዙሪዳ ኩፔካማ ሜጌብስታኑውስታጊ ውላጊ አግልግሎቴ ፋያንትካ እምፕል ማይኬልዳ አግልግሎትካዋ አግፃንታ ታክስስታማኽ::