ህዋሾ እንዜጝቱት አካል ጉዳቴና

አለሚቱ የኔት

ጀርመናዋ ማንዲሳ ሚቻላ ቤንቱስ ህዋሾ ካቱት ጄሜራ አካል ጉዳቴናኽ:: ላጚቲ አሜታዴስ ቤዴራ ካን ዙራሙሪዳ ብሽክሊሊታዋ እሽቲስ ታምቡኽ ኬሴትስ ይካም ጛፁ ቑንዚ ጌቴማ::

ተፈሩ ማራማርጛንታ አኽⶓ ቲኹዋ ሳኪትጛው አኽⶓ አቕጝስ ፅሮቲኔ ህዋውሳ ማንዲሶ ኩስጝፄሽቲት አኽⶓ ቢቢሲ ቶኬማ::

ድልዌና ታኻታኪላ ብሉ ኦሪጅን 10 ዴኪኪውሳ እንዝጜ ቴርሳያ:: ብሉ ኦሪጅን ጄፍ ቤዞስ ቲሪትጙኽ ህዋ ቱሪዝሙ አችትያኽ::

ሚቻላስታ እሊኩ አንኩዋ እንዜጛንትካ ቴክሳስዴስ ጁኽ ህዋው መንኮራኩርዳ ማቼካ:: ብቲውሳስታ ህዋውሳ ድንቤሮ አግሌልጝፃውሳ /The karman line/ ታምብካማኪላ ዙርካ::

ብሉ አሪጅን ባይፁኽ ቪዲዬዳ “ማልጜ ዲኒክፂ ሙኪሪያኽ:: አውሮፓው ህዋው ኤጀንሳኻዳ እንፃኽስቴኑ ማንዲሳ ጉዳት ታንቡኒዴስ ፋሌንጋ አሌም አካል ጉዳቴንካስ ዋትጛ ፌቴናንታ አኽⶓ እርዳትስትⶓ ዙሜ::

ሚቻላ ቤንቱስስ ዊልቸርዴስ መንኮራኩርሾ እርዳታ ጋቲታ ቱጝስ አሜቻው ዳድ ቤቴርስታሺኾ:: ፅሮቲኒ ስፔስ ኤክሱ ሀላፊ ሀንስ ኮንግስማንያኽ እንዝጜ አሜችጝፁንኩ ኪላ::

“አቕትጝኑኽ በየነ መረብስያኽ:: ስፔስኤክስ ሚንች አሜቶ እንፃኽስቴ ይጛስታ ዝኩንኩ አቕ ተፈርሾ እንዜጛንኩሳ ፄጌሬማ? ናታ ካስቱኻ ኪላ” ኔ ማንዲሳ::

“ሚቻላ ቤንቱሶ ካንቱስ ኒኪትጙኻ:: ሴግዳ አቓታ ካንታሽቱኽሳ አሌሞ ዲግትስ ካንትጝስኪላ ወሴንኾ” ኑንኩ ዴሜካ ሀንስ ኮንግ ስማንያኽ::

ብሉ ኦሪጅን ማንዲሳውሳ እንዝጜ አሜቻታ ፄውጝስ አካል ጉዳቴንካውሳ እንዜጝትጝፂ መንኮራኩሩ ናቕትዳ ግቢትፃ::

ብሉ አሪጅን ባንኩሳኺስታ 16 ህዋ ቱሪዝሙሳ እንዝጜ ፄዋ:: ማንዲስ ህዋሰ  እንዜጝቱኽሳ ፍሼ ይፋ ፄዋያላኪ::