ኮሪደር ልማቱ እንፅኺ እምፕልታቖ ቴኬምስታንታ ፄዋውያኽ

ታደለ አጋጄ

አዊ ብሄረሰቡ ቺፅጝፂዳ አግስታንኩ ሊሊትጙንኩ ኬቴምካዳ ኮሪደር ልማቱ እንፅኺ እንፃኽስስታማጊ አግስቴ:: ኮሪደር ልማት ጄሜሩክ ኬቴምካ ክቻዴስ ዳንግሊ፣ እንጃቢሪስታ ቻግኒ ኬቴምካ ቶኬምስታንኩዊያኽ:: ዳንግሊ፣ እንጃቢሪስታ ቻግኒ ኬቴምካዳ አኮሜችስታማጊ ዝኩኽ ኮሪደር ልማት ይሴን እምፕልታቑ ቲቪቪርጚስ እንፃኽስታማጊ ያኹስ ኬቴምካውሳ ፍንቶ ኬሽጝፅጝስ፣ እምፕልታቕስ አሜቻውሳ ዙራሙሬ ፌቴርጝስስታ ዎታትካስ እንፅኺውሳ ድሎ ፌቴርጝስ ኬፍቲኔ ታምቦ ፊትጛማጊያኽ::

ዊዛሮ አበባ አሊጋዝ ቻግኒ ኬቴሙ ዝኩዋንትካ አውጚው ቴሌቪዥንስ ስልኪስ ዙሙኑውስታጊ ኮሪደሩ ልማት ቻግኒ ኬቴምዳ ጄሜርጝ ዙራሙሪውሳ ፃንኩቶ ማንዲፃዉስታ ኬቴማውሳ ልማቶ ቼሜትጝፃው አኽⶓ ጉሽካ:: ኬቴማው ዳዱ ዙሪዳ ፃንኩቶ ማንዲስታያሱስታ ፅባብ ዳድ አኽጝስ እምፕልታቕስ አሜቻውሳ አኺኔ ፌቴርጝስ ቴኬማው አኽⶓ ቶኬምካ:: ኬቴምዳ አግስታንኩ እንፅኼ ፋያንትካ ዎታትካስጊ እንፅኺውሳ ድሎ ፌቴርጝስ እርዳታማጊ አኽⶓ ዙሜካ::

እሊው ቻግኒ ኬቴሙ ዝኩዋንቲ ወልደአምላክ ቢምረው ቻግኒ ኬቴምዳ ኮሪደር ልማት አንትጝስ ዴስቴና አኽⶓ ዙሜካ:: ፄቤብኹሳ ዳዶ እሳንጝፅጝስ፣ ኬቴሞ ግዲፅጝስ፣ ፃንኩቶ ማንዳያሱሳ ዙራሙሬ ፃንኩፅጝስስታ ዋታትካስ እንፅኺውሳ ድሎ ፌቴርጝስ ቴኬማው አኽⶓ ዲብስካ::

ኮሪደር ልማቱ እንፅኺ ዳሬ ታምባታ ውላ እምፕልታቕ ቴቬቬርጜካማ እምፕልትስ እርዳትጝስታ እንፃኽስትጝ ቱስታው አኽⶓ ጉሽካ::

ቻግኒ ኬቴሙ ቺፅጝፂው ትክትሊ ከንቲባስታ ኬቴሙስታ ስር ልማት ፅፌት ጝናሱ አላፊ አቶ ገበየሁ አልማው ቻግኒ ኬቴሙ ኮሪደር ልማቱ እንፅኺ ቤዴራ ቴርት አሌድስታማ ቴግባርሾ ቱⶓ ጌሌፅካ::

ኮሪደር ልማት ታምባውሳ ጝኖ እምፕልታቕ ጛው ታፍስ ፌሬስፅጝስ ኬቴሙ ልማትስ ኬፍንኹሳ ፋዮ ካንትፅካማጊ አኽⶓ እርዳትፅካ::

ቤዴራ ቴርቱ እንፅኺዳ እምፕልታቕስ ሼውቴ ፌቴርጙ ስታ ዲዛይኑ እንፅኺ ቴርታማ ቻራቴ ዊፅኹ ኮንትራክተርሊ ውል እምስትⶓ ቶኬምካ::

ቤዴራ ቴርቱ እንፅኺ አሌድስታማ ቴግባርሾ ቱስታው ጊዝዳ ሜብራት አይል እምቢታማ ፓሎ ጉሻውላስ ይጉጝስ እንግር ትⶓ ኽይትጝፅካ::

ቻግኒ ኬቴሙ ኮሪደር ልማት አባላምቲ ዙሪ ልማቱ እንፅኺዳ 1 ትኩሚ 6 ኪሎ ሜትር 103 ሚሊዮን ብርስ ውል እምስትⶓ ቶኬምካ:: 45 ጌርካኻዳ አሌድስታው እስታማ አኬድስትⶓ ጉሽካ::

ኮሪደር ልማቱ አላሚ ኬቴሙሳ ፍንቶ ኪስጝስ አኽⶓ ቶኬሙንኩ አቶ ገበየሁ ዎታትካስ እንፅኺውሳ ድሎ ፌቴርጝስ ኬፍንኹሳ ታምቦ ፊትጛው አኽⶓ ጉሽካ::

ኮሪደሩ ልማትስ እምፕልታቑ ቴሳትፉ ኬፍቲኒ አኽⶓ ጌሌፅካ::

አቶ ገበየሁ ልማቱ እንፅኺስ እምፕልታቕ ጌንዜቡ እርዳቲስ ፄውኑ ፍሺ ጋሺስታውስታ ኬፍ ንኹ አኽⶓ ቶኬምካ:: እምፕልታቕ ግቢትስታው ልማቱ እንፅኺስ ኬምፕዳ ቲሪጝ ሲፍጝ ቱስታው አኽⶓ ታክስፅካ::

አዊ ብሄረሰቡ ቺፅጝፂው ትክትሊ ቺፅጝፃንቲስታ ኬቴሙስታ ስር ልማቱ ሜምሪው አላፊ አይተነው ታዴ አዊ ብሄረሰቡ ቺፅጝፂዳ ሊሊትጙንኩ ኬቴምካዳ ኮሪደር ልማቱ እንፅኺ አኮሜችስታማጊ አግስታው አኽⶓ ጌሌፅካ::

ኮሪደር ልማቱ እንፅኺስ እዝብ ኬፍንኹሳ ጁትጝጜ ፄዋካማጊ አኽⶓ ቶኬምካ:: ሚንችካ እምፕልታቕ ልማት ታምባው ብቲዳ ጝኖ ጛው ፍካድስ ፌሬስፅጝስ ጛው ልማትታ ካንትጝስ ቴሳትፎ ፄዌካማጊ አኽⶓኪላ ጌሌፅካ::

ኬቴሙ ኮሪደሩ ልማት አቾ ማንዱኽ፣ ልኩስ እንዜጛኑሳ ዳዶ እሚኹ ዝቤናዊ ብሽክሊሊታው ዳድ፣ አምሉ ልማት፣ ዳድቴን ፉራኑሳ እንጅኩፄስታ ፃማ ክብፄ ስፍሬ እሚኹ አኽⶓ ኽይትጝፅካ::