ሆስፒታል ቹትካስ እያው አግልግሎቲ ኬፍቲኒያኽ

አለሚቱ የኔት

አገው ግ/ቤት አባላምቲ አች ሆስፒታል ቹትካስ እያው አግልግሎቲስ ቴኬምስታንት ዴሜካማጊ አኽⶓ ቹትካ ዙሙና::

አገው ግ/ቤት አባላምቲ አች ሆስፒታል ዋልቲ አርፋኻዳ አግልግሎቴ ኬሽጝፃማ አኬምስታንትካዋ ቴኬምስታንታ ፄዋማጊ አኽጝኪላ ጌሌፅስታ::

ሆስፒታልዳ ስፔሻሊስት አኪምካ ዝኩጝስታ ነርስካ ስታ እሊኩ ውማይቴንካ ቲቢቢርጚስ እንፃኽስታኑ እንፅኺኪላ አግልግሎቲው እይጚ ኬሽጛታ ፄውጝስ ዝኩኽ ፍሺ ኬፍቲኒያኽ::

ሆስፒታልዳ አግልግሎቴ አግፂት ቹዋ ዊ/ሮ እመቤት አያናው አባላምቴ ጄሮ ካሜንቱስ ችግር ጌቴማሺት አኽጝስ ቤዴርታታ ሆስፒታልሾ አንትⶓ ዙሜ:: ቤዴራ ምርማሪዴስ ጄሜርታታ ሆስፒታልዳ አግልግሎቴ አግፂስ እጂⶓ ዲብስታ:: ሆስፒታልዳ አይስታው አግልግሎቲ ዴሜካ እምቢትናማ ሌንጌድፅጝዴስ ጄሜራማ ዝኩኽጊ ማልጜ ዴስፃውስታ ይሳን እፃው አኽⶓ ድኹታ::

ዊዛሮ እመቤት ሼርካ ቹትካስኪላ ሼርት ጄሜሩኒዴስ ጉሻማ ሆስፒታልሾ ካስጝስ ትክላሊ ቲንዳ ዝኩኽሳ አኺኔጊ ሲፋሲፉጝጜ ፄውጝ ቱስታኩ አኽⶓ ካንቴ እይካ::

እሊት ሆስፒታልዳ አግልግሎቴ አግፂት ዊዛሮ ገነት ትላሁን ዴሜካ ላጚኒ ካሜንቱት ታኹስ አባላምቲዳ ብሪው ክቪጝ ጌቴማማጊ ቺጊርስቲስ እሺቲት አኽⶓ ዙሜ:: እንሳ ጌቴማሺኹ ብሪ ክቪጙሳ ችግሮ ኩፅኒ ጉድጛ እክምኒስ ስፍጜካማጊ እያኑ አግልግሎቲስ ናካዳ ይዎትስ  ዝኩጝስ ካሊⶓ ድኹታ:: ውማይቴንካ እዩኑ አግልግሎቲስ ዴሜካ ምስጋኔ ዲግስታ::

አገው ግ/ቤት ሆስፒታሉ አግልግሎቴ እይጚ ኬሻንቲ አኽጝስ ክሪስ ታምፃው እሺኹ ችግርዴስ ፍያታ ጄሮኪ ዳጉልጝስ ጚኪ ይወትስ ፊቲጝስ ካሌታ ፄውጝስ ዴስቴና አኽⶓኪላ ዊዛሮ ገነት ንክርፄ::

አገው ግ/ቤት አባላምቲ አች ሆስፒታሉ ማይፄኑስታ ሽርቱ ስፔሻሊስት ዶ/ር መዝገቡ ጌትነት ጌሌፁኑውሰታጊ ቤዴራ እሺካያስኩ እክምኒው አይኔትካ ናካዳ ጄሜርስትካማ አግልግሎቴ እይካማጊያኽ:: ኬፍቲኔ ሲፋሲፍጜ ፋያንኩ ቹትካ ኻጐ እሚካማ ካሜኒንምባኺስታ ኹሬካማ ሲፋሲፍጜ ፄዌካማጊ አኽⶓስታ አግልግሎቲ ዴሜካ እስካዊ አኽⶓኪላ እርዳትፅካ:: እይስታው አግልግሎቲስ ምፅስታኒስ ማይፄን ታራታርስታማ ይንታንኩ ቹትካዋጊ  አኬምጝስ ዴክስ ካሜንካማ ጝንሾ ይወትስ ዙራንታ ፄዌካማጊ አኽⶓኪላ ዶ/ር መዝገቡ ኽይትጝፅካ::

አገው ግ/ቤት አባላምቲ አች  ሆስፒታልዳ ቤዴራ ኬፍቲኒ አግልግሎቴ እይጙ ዳንጉዊኒ እሺⶓ ሆስፒታሉ ስራአስኪያጅ አቶ አትንኩት ይስማው እርዳትፅካ:: እሺኹሳ አግልግሎቴ እይጚውሳ ችግሮ ኬሽጝፅጝስ ዴሜካ ቲኑ ጉትፕካሊስታ ሆስፒታሉ ውማይቴንካሊ ይጋሪስ እሳኖ ኩስጝጜ ፄውጝስ፣ ማይፄኑ ስፔሻሊስት አኪም ሜዴብስታታ ፄውጝስ ስታ ቹትካውሳ ኮንፈረንሶ ካስጝፅጝስ ችግሮ ኽይጝስ ካሊⶓ አቶ አትንኩት ጌሌፅካ:: ቹትካውሳስታ ስራስሪውሳ ክርⶓ ይጉፅጝስኪላ አዚኒ ቲኑ ጉትፕዳ ቔድፃማ አኬምጝ ፌኬድስታታ ፄውጝስ ውማይቴንካዋ ሆሰፒታልዴስ እንፃኽጝስ አግልግሎቴ እይካማጊ አኽⶓኪላ እርዳትፅካ::

እይስታው አግልግሎቲስ ምፅስታኒስ ማይፄን ታራታርስታማ ይንታንኩ ቹትካዋጊ አኬምጝስ ዴክስ ካሜንካማ ጝንሾ ይወትስ ዙራንታ ፄዌካማጊ አኽⶓኪላ ዶ/ር መዝግቡ ኽይትጝፅካ::

አገው ግ/ቤት አባላምቲ አች ሆስፒታልዳ ቤዴራ ኬፍቲኒ አግልግሎቴ እይጙ ዳንጉዊኒ እሺⶓ አቶ አትንኩት እርዳትፅካ::

እሺኹሳ አግልግሎቴ እይጚውሳ ችግሮ ኬሽጝፅጝስ ዴሜካ ቲኑ ጉትፕካሊስታ ሆስፒታሉ ውማይቴንካሊጊ ይጋሪስ እሳኖ ኩስጝጜ ፄውጝስ፣ ማይፄኑ ስፔሻሊስት አኪም ሜዴብስታታስታ ቹትካውሳ ኮንፈረንሶ ካስጝፅጝስ ችግር ኽይጝስ ካሊⶓ አቶ አትንኩት ጌሌፅካ::

ሆስፒታል እያው ቲኑ አግልግሎቲዴስ ድምክና ሊሊትጙንኩ ዙራሙሪዳ አግስታንኩ ቲንኩ ኾትካዋኪላ እርዳቴ ፄዋማጊ አኽⶓ ስራአስኪያጅ ቶኬምካ:: አዚኒ ቲኑሳ ጉትፓኪላ ዝኩኽሳ አቾ ማሊጝስ ላጚኒ እርዳቴ ፄውⶓኪላ ጌሌፅካ:: ግ/ቤቱ ሆስፒታልሾ እቺ ዙራሙሪዴስ አንትጝስ ካሊፃቲው ቲኑ አኺኒ ጌቴማቲታስታ ቹትካውሳስታ ስሪስሪውሳ ክርⶓ ይጉፅጝስኪላ አዚኒው ቲን ጉትፕዳ ቔድፃማ አኬምጝ ፌኬድስታታ ፄውጝስ ውማይቴንካዋ ሆስፒታልዴስ እንፃኽጝስ አግልግሎቴ እይካማጊ አኽⶓኪላ እርዳትፅካ::