ቴክኖሎጂስታ ቴኬምስትጚ

አለሚቱ የኔት

ቴክኖሎጂ ቴክኒኩ፣ ካሊጝቱስታ እንፃኽስትጚ ሴልካው ኩፕታ ያኹንኩ ምርትካዋ፣ አግልግሎትካዋ፣ ሳይንሱ ምርምርካውሳ አላሜ ፌፄምፅጝስ ካሊፃው ሜሳሪያኽ:: አቒያ ጂሚሬ ካኔ ቴኬምስታማ ጋቺትጝፅጝስ ሌጐ አግፅጝስ ካላ:: ምግቦኪላ ካርጝዳ እንጂፅⶓ ኬፄላ:: እንዜጝትጝፂስ ጛሬ  አጌላጌልስትጝስኪላ ቴክኖሎጄ ትክምዳ እሽፅⶓ ጄሜራ:: ልቡናማጊኪላ እትሜቱ ሜሳርካዋ፣ ስልኬስታ ፄጌርጙንኩሳስታ ኢንተርኔቶ ፌቴርጝዳጊ ታምባ:: እን ዴሜካ ቴክኖሎጄ ቴኬምስትጙ ፋይስታ ልግስ ዴሜካታ ካሊፃ::

አማኻሪ ኢኖቤሽንስታ ቴክኖሎጄ ቢሩ ፍንዳ “ሳይንስስታ ቴክኖሎጂው እንዳርትስታ ታምትጚ” ናው ጛሪስ አንቤብፅኹ ፁፍስ ጌሌፁኽስታጊ ቴክኖሎጂ ናው ካል “ቴኬማንቲ ትቤብ” ናውስ እሺኾ አቕስታው:: ሳይንስስታ ቴክኖሎጂ ሚንች ጊዛይ ቲኪስትጝጚስ ትክምዳ እሼና፤ ዲብኩፅኒ ሳይንሱ ግብ ካሌቕቶ ፌያፌይጝፅጝ ያኹስ ቴክኖሎጂው ግብ ዴሜካ ችግርካዋ ኽይጝ፣ ምርቶ ፌቴርጝስታ አቒያሱ ይወቱ ኬሽጝጚስ ትኩታ ፄዋማ እንፃኽስታዊያኽ::

አቒያሱሳ ዝኩዊኔ ኬሽጝፅጝስ ካላውሳ ቴክኖሎጄ ቱስቲስ ቴኬምስታውላ ይጉጝስ ምግባር ፅንታው ጉዳትካ ታምብካማጊያኽ:: ማቤራዊ ሚዲያዳ ዙራዙራንኩ አሱ ንባርካው እሳንጝጝስታ ፍችትጚው ዙሚትጝጝካ እንሰ ቶኬምስታንትካ ያኻና::

ስራስሪ ጌምካዋ እንክራኑሳስታ ቴክኖሎጂው ዋይምካውሳ ምስልካዋ ስክሪንዳ ካንታኑሳ ጊዞ ወሴንጝስ ካሊስታውላስ ይጉኒ ስራስሪው አንኩሊው ልግስዳ ፉሪስ ስራስሪ ሊጊሲሜ ሳቶ እንጅኩካማ ፌይፃንታ ፄውጝስ ቻኒስቶ ሲፍፄ:: ክንቴ ቱስቲስ ፂኒሳቲንታስታ ዳላውሳ ሳቔናዋ አግፃቲንታ ፄዋ:: ስራስሪ እኒ ችግርካስ ፂኪስታንካ ያኻቲንታ ዴሜካ ቴክኖሎጂው ዋይምካዴስ አግፃኑ ትክምዳ ስርትኹ ቴኬምስትጙሳ ሴሎ ቹዋ ታብል ስራስሪስ እርዳትፅጝ ኩልፍ ኽይ ያኼ::

ቴክኖሎጂውሳ እሳንጝⶓ ሲፋማ አሌም እምፕሎ ሙሬ ፄጌርምባኺስታ ታምባ:: እንኪላ ዜርፋ ሚንቼ ትክሞ አግፅፃ:: ምሳሊስኪላ ኢኖቬሽንስታ ቴክኖሎጂው ካይጝጚ አሌም አቩቑሳ ንባሮ፣ ካሌቕቶስታ ቴክኖሎጂውሳ ታምብስታንቶ አሬኽፃ:: እንሊ ኬምፕስ ኬምፖ ዴሜካ ባይሉሳ አይቶ አቲⶓ ታምፃማጊያኽ:: እን ችግርኪላ ምራባውያንካውሳ ወጐስታ ባይሎ ዴስጝናታ ጌዴድፃማጊያኽ:: ዙራሙሪውሳ ወጐስታ ባይሎኪላ አዲጊዳ ታምፃ:: ቴክኖሎጂ ታምፃማጊ ዝኩኽ ባይሉ ስንክርስትኹ ወረርሽኝ ዴስ ኬሽጝስ ጛርቱሳ ማንዳማ እጂፅጝስ ክምንትዴስ ክምንቶ ካይጝፅጝ ይቪቺ ኬሽፂ ዳድያኽ:: ንቫሮ አግፅንኹኪ በኩር ጋዚቲዴስያኽ::