ማሴ ቴርስጙ እንፅኺ ሴብሉሳ ምርቶ ሌጌፅጝስ ወሴናንቲ ያኹኽ ሴብሉ አይኔትታስታ ወክትታጊ አኮሜችስታው ግብርኒው ቴግባርያኽ:: ቹዋስኪላ ብቴ አሬስጝ፣ አሪሜ ድፅጝ፣ ዜርስ ቴርስጝስታ ማዳባሬ ዴሜካማ ኽብፄ ዜርስ ቴርስⶓጊ እሜዊያኽ:: ብቴ ወክትስ አሬስጝ ኽብፂ ቑታ አሬስስታማ አይሮ አግፃታ ፄዌ:: እርሼ ቤዴራማ ካቢትጝፃማ አሬስጝ ምርታምቶ ዴሜካታ ፄውጝስ ዝኩኽ ፍሺ ኬፍቲኒ አኽⶓ ግብርኒ ቢሩው ንባር ቶኬሜ:: ግብርኒኩ ውማይቴንካ እያኑሳ ኩስጜ ቻቤላማ እርሺው ብትካዋ ካቢትጚስ አሬስጝስስታ አሪሚዴስ ካላካልጝጝስ ማሴ ፃንኩፅጝ ምርታምት ዴሜካታ ፄውጝስ ዝኩኽ ታምብኪላ ኬፍቲኒያኽ::
ሴብል ኩፑኒዴስ ጄሜራማ ማሴ ካቢትጚስ አሬስጝ አሪሚስ ፂኪስትⶓ ኔኬትጝስ እርዳቴ:: ኽብፂውሳ አሉምቶስታ አኾ ኮፄራማ እሚጙሳ ካሊጝቶ አድርፄ:: ኹዋንቲስ ዝኩፃ ያኻውሳ አኺኔ አሜቻታ ፄውጝስ ኹዋንቲ ድሳታኪላ እርዳቴ ቴክልካው ጉሚቲስታ ኻፂዳ እሺንኩ ሊሊትጙንኩ ቑንዝካዋ ዴዋው አኽጝስ እሊው ማሲስ ፄውስታው እሺኹሳ ኹዋንቲውሳ እሳንጝⶓኪላ ኔኬቴ ሊሊትጙንኩ ኹዋንትካ ንፍሳትካዋ፣ አሪሚው ዜርካስታ ችክችኬንካኪላ አዊስ ድሳንታ ፄዌ::
ግብርኒው ውማይቴንካ ምርታምት ዴሜካታ ፄውጝስ ሊሊትጙንኩ እንፃኽስትጚው ሴልካዋ አሬሳቻንትካ ቴግባራዋ ፄዋንታ ኩስጝፃኒስ ፖለቲካው ካንቲስ ካንትጝስ ቴግባራዋ ፄዋቲንታ ፅንጋኽሳውሳ ታክስጜ ጉሸናኻ ኪላ እስጜ ካንቴ ኪስጝ ቱስቴ::
ጊዝቺፋ ይንታንኩ እስካውካ እንፃኽስትጝካ ዴሜካ አሬሳቻንቲ /ታ/ እንፅኺስ ዋይሚስታ ያኻታ እርዳታዊያኽ:: እስጜኪላ እንግርግራ ናኑውላ ቴግባራዋ ፄውጝ ፋይፄ::
ማሴ ካቢትጝፃማ አሬስጝኪላ ቤዴራሱ ጊዝስ አሬስስታው አርፊ ወሴንስታማ አሬስጙ ባይል ዴስስቱኽ እሺኾ:: እንሳ ዴሶ ኩፅኒ ቤዴላንቲ ባይል አኽጝስ ሴብል ማሲዴስ ጁኒዴስ ጉሽፃማ አርፊስ ጌዴብስታውላ ችኹ ምርት ዜርስ ታምብምባኺስታ ካቢትጚስ አሬስጝ ፋይፄ::
ማሴ ካቢትጚስ አሬስጝስ ምርታምት ዴሜክጝስ ካሊስታው አኽጝ አቕስቱኒዴስኪላ አሬሳቻንትካ አውሳኪ ጉሽጝፃንቴ ማንዳኑላ ቴግባራዋ ፄውጝስ ቴኬምስታንታ አኽጝ ቱስቴ:: ዜርስቱኒዴሰ ፋሌንጋ ግርቦ ካሴንኩ አሪሜ ድፅጙሳ ኮንኩ እንፅኽካዋኪላ ይጉፅጝስ ካላው እንፃኽስትጚ አኽጝስ ቴግባራዋ ፄውጝ ፋይፄ::