ትኩት እይስታያሱ ካን

ታደለ አጋጄ

ቱሪዝም ሚፂው አግፂ አኽጝዴስ ፌይኹስ አጌራዋ እሊኩ አሌምኩ አጌርካስ አቕትጝፅጝስ ኬፍቲኔ ታምቦ ፊትጛዊያኽ:: እን አጌራኻዳ ሚንች ፍትሬትኩስታ አቓ ግብርካ ቱሪስትኩ ጉስፅካ አግስታና::

ባርኾቼስኩስታ አጌራኻስኩ ቱሪስትካ ሊሊትጙንኩ ቱሪስታ ጉስፅካ ስፍርካዋ ጎቤናና:: ፅናቶስታ ምርምሬኪላ ካስጝፃና:: ስርኩ ልማትካ ዋኽትጜካያስኩስታ እሳንስ ሚዲያስ አቕስትካያስኩ ቱሪስቶ ጉስጝስ ካላንኩ ስፍርካ ሚንችካኽ:: እኒጛ ክቻዴስ አዊ ብሄረሰቡ ቺፅጝፂ አንኪሺ ጉዋጉሲ ወረዳ አይሲስታ ኻርሺ ኬቤሊዳ አግስታው ፉዲ ካን እምፕልያኽ:: ፉዲ ማልጛ ጌሬምፃው ካንያኽ:: ሹኻ ሻይ ሜትሮ ሌጌሴምቴ:: ካንዳ ሊሊትጙንኩ እንሴስካስታ ካናኻፅካ አግስታና::

አይሲስታ ኻርሺ ኬቤሊዳ ካሜንስታማ ሌጌስኹ ዎታት አስማማው ቢያድግልኝ ፉዴ ካኖ ሊሊትጙንኩ ማይቤራዊ ታምትጝፂው ፍንካስ አቕትጝፄ::

ማልጛ ዴስፃውስታ ታሪካዊ ያኹኽ ካን እሳንስ ሚዲያስ አቕትጛውላስ ይጉጝ ጛርትስ አቕትጝፃታ ጉሽጝፁኽ አኽⶓ ዙሙኽ ዎታት አስማማው ፉዲ ኽሳንቲስታ እምፕላንቲ ያኹኒውላ ቱስታውሳ ላካ አቕትጛያሱስታ ስሩ ልማት ዋኽትጛያሱ አኽⶓ እንክርፃ::

ዎታት አስማማው ካኑ ዙራሙሪዳ ካሜንስታማ ሌጌስኹ አኽጝዴስ ጁኽሳ ፉዲ አምፓዳ ማቻማ ካንታ:: ዎታት ዙሙኽስታጊ ካንሾ ማቺጝስ ማልጛ ቼጌርፄ::

“ካን አምፓዳ ፍናና ካንትናኒ ዴስፃው እንኮኽስቶ ፌቴሬ::  ዙማኑውስታ አምፕዳ ዝኩኽ ዲብ ማልጛ ሊሊትጜ:: ካን አምፓዳ እሳን ውታኺ ዝኮ:: ሊሊትጙንኩ ካናኻፅካስታ ካዌንኩ እንሴስካ አግስታና:: አኹ ጁዋው ስፍሪ ዝኮ” ኑስ ፉዲ ካንዳ ማቻማ ካንትኹሳ እንክርፃ::

ፉዲ ካን አምፓ ማቺጝስ እምፕል ሳትዴስ ጃላ ካፅኹ አኽⶓ ቶኬምኹ ዎታት አሰማማው ላጛ ስፍራዳ ማቺጝስ ቼጌርፃው ያኹኒውላ ማቺፂ ግቢትስታማ ትኩትስ እንፃኽስስቱኒጊ አብቶ አግፅፃው አኽⶓ እንክርፃ::

ዎታቱ ዙሚታጊ መኪናው ዳድዴስ ፉዴ ታምፃው ዳድ ግቢትስታያ:: ካን ቱስታው ዳድስ ማንዲስታማጊ ጋቲዊያኽ:: ካዌን ቻፋቻፍስታማ ድኽጛ ያኻ:: ወረዳው ባይሉስታ ቱሪዝም ፅፌት ጝና ኽሳንቲ አብቱ አግፂ ያኹኽሳ ስፍሬ ትኩቶ እያማ እንፃኽስታውላ ይጉጝስ ቱሪስቱ ጉስፂ አኽጝስ ካላያ::

ዙራሙሪኩ እምፕልታቕስታ ወረዳው ባይሉስታ ቱሪዝሙ ፅፌት ጝና ፉዲስ ሊሊቴ ትኩቶ እያማ እንፃኽስትጝ ቱስታው አኽⶓኪላ ዲብሳ::  እምፕልታቕስ ካኑሳ ትክሞ ሼውቴ ፌቴርጝ ፋይፃው አኽⶓ እንክርፃ::

ዎታትካስ እንፅኺውሳ ድሎ ፌቴራው አኽጝስ ኬሌልስታማ ማንዲስትጝ ቱስታው አኽⶓ ዙማ::

አቶ ሙሉነህ አለነ አይሲስታ ኻርሺ ኬቤሊው ዝኩዋንትካኽ:: ፉዲ ካኑ ዙራሙሪዳ ዝኩዋና:: ካን ፉዲ ናውሳ እቑፄ አግፅኹሳ እንክርፃኒስ አቕ ድኪ ጊዝዴስ ይጉጝስስታ ችግርዴስ አሜሌትጝስ ካንሾ ማቻና:: እና ጊዝይ እምፕላ ሼራ ኹና ካንሾ ማቺጝስ ማልጛ ቼጌርስትጝዴስ ጁኽስ “እንዳር ፍዲይ ና” ኒኹሳ ፉዲ እስታማ እቑፄ አግፅⶓ እንክርፄካ::

እንዴስ ቤዴራ ካንዳ ማቺፂ እሺⶓስታ አቕ ሳሴርስ ማቻሺኑ አኽⶓ ቶኬሙንኩ አቶ ሙሉነህ ደርጉ ዝቤንዳ ሌግስ ድጙስታማ ማቺፂ ምስላል ድኽⶓ ዙሜካ:: ፉዲ ካን አርዲ ብኑ፣ ጉችቕፂስታ ዳንዲኒ ብኑ ጁፂ አኽⶓ ዲብስካ:: ካንዳ ሊሊትጙንኩ ካዌንኩ እንሴስካ አግስታንኩ አኽⶓኪላ እንክርፄካ::

ፉዲ ካንዳ ሚንች ታሪክ ዝኩⶓ እንክርፁንኩ አቶ ሙሉነህ ፋዝጋው ፁምዳ ካን አምፓዳ ፆሌታንኩስታ ሴጌዳንኩ አይማኖትኩ ታብል ዝኩዋኑ አኽⶓ ቶኬምካ:: ይንታው ክምንት ካኖ ቱስታው ዳድስ ማንዲጝስስታ አንኬባኬብጝስ ይኮኖሚውሳ ትክሞ አግፃንታ እንፃኽስትጝ ፋይፃው አኽⶓ ዲብስካ::

ሚንችካ ዙራሙሪኩ ዝኩዋንትካ እሌቱሳ ትክሞ ይቢቼ ካንትጝስ ካኖ ማንዳቲንኩ አኽⶓ ጉሽካ::

ኬቤሊው ዝኩዋንቲ አቶ ትሩነህ መለስ ፉዲ ማልጛ ኬቤርስትኹስታ ሊጊሲሚ ካን አኽⶓ ቶኬምካ:: ፉዲ ማልጛ ሊጊሲሚ ካን ያኹኒ ሌጌሴምቱ ልክስ አቕትጛያሱስታ እምፕልታቕስ ትክሞ እያያሱ አኽⶓ ዲብስካ:: ሊሊትጙንኩ ዙራሙርካዴስ ጎቤናንትካ ይንቴካማ ጎቤናኑ ስፍሪ አኽⶓኪላ ጉሽካ::

አቕ ካዌኖ ቻፋቻፋኑ ክሚ አኽዳ ቱዋማ ኹዌ፣ ኬቤርስትኹ ስፍሪ ያኻታ ፄውስታያሱ አኽጝስ ካንዳ ታምባማጊ ዝኩኽሳ ጉዳቶ ቶኬምካ::

“ፉዲ እንዴስ ጌና ኬሌልስታ ማንዲስታማ ቱሪስቱ ጉስፂ ስፍሪ አኽጝ ቱስቴ” ንካ:: ፉዲ አምፓሾ ማቺፃው ዳድ ግቢትስታማ ጐቤናትካ ማቼካማ ጎቤናንታ ፄውጝስ ትኩትስ እንፃኽስትጝ ፋይፃው አኽⶓኪላ ጉሽካ::

አንኪሺ ጉዋጉሲ ወረዳው ባይሉስታ ቱሪዝም ፅፌት ጝናዳ ውማይቲኒ ከበደ ደመላሽ ወረዳዳ ሚንችካ ፍትሬትኩስታ አቓ ግብርካ ቱሪስትኩ ጉስፅካ ስፍርካ አግስታንኩ አኽⶓ ጌሌፅካ:: ደናትኩዋሽቲ ዋሺ፣ ፅርባ አይክ፣ ወቸፎ ማርያም ብሽታንስታ ፉዲ ካዌኖ ፄጌርጛንኩ ቱሪስታ ጉስፅካ ስፍርካ አግስታኑ ወረዳ አኽⶓ ኽይትጝፅካ::

ባይሉስታ ቱሪዝሙ ፅፈት ጝና እኒ ቱሪስቱ ጉስፅካ ስፍርካዋ ሚዲያስ ፌያፌይጛታ ፄውጝስስታ ሊሊትጙንኩ ማይቤራዊ ሚዲያስ አቕትጝፃማጊ አኽⶓ ጌሌፅካ::

“ፉዲ ካን ወረዳው ይቪቺ አብት ጋቲዊያኽ:: ውላው አብትያኽ አኽጝስኪላ ቱስታው ዳድስ ማንዲስታማ ቱሪስትካ ጐቤናኑ ስፍሪ አኽጝ ፋይፃውያኽ” ንካ:: ፉዲ ካኖ ታምፃው 2 ኪሎ ሜትር ዳድ ግቢትስታያሱ አኽጝስ ወረዳውስታ እምፕልታቑ ቲቪቪርጚስ ግቢትስትጝስ እክድ እምስትⶓ ኽይትጝፄካ:: ካንዳ ስሩ ልማት ዋኽትጛታ ትኩትስ እንፃኽስትጝስ ፅሬቶ ፄዋንኩ አኽⶓ ጌሌፅካ::

ፍትሬቱ ካዌን እምፕልታቕስ ቻፋቻፍስታማጊ እሺኹሳ ይጉፅጝስ ካሊⶓ ቶኬምካ:: ካን ቱሪስቱ ጉስፃ ያኻማ እንፅኺው ድል ፌቴርስታታ ፄውጝስስታ ስርኩሳ ልማትካዋ ዋኽትጝፅጝ ፋይፃው አኽⶓ ጉሽካ::

ፉዲ ካን ማልጛ ታሪካዊ ስፍሪ አኽጝስ ጐቤናንትካ ካን አምፓሰ ፌካማ ጐቤናንታ ፄውጝስ ማቺፂ ዳድ ግቢትስታማ እምፕልታቕ ጐቤናንታ ፄውስታው አኽⶓ ጌሌፅካ:: እኒጛ ስፍርካዋ እምፕልታቕ ይንቴካማ ጐቤናንታ እንፅኼንቶ ፌያፌይጝፄካ::