ችግሮ ኽያው አቕፂ

ንግስቴ ተስፋ

ፋይዳ ብሄራዊ አቕፂ አካላዊስታ እዝቡ ዝኩፂው ንቫሮ አጌር አቕዴስ ኩፕፅጝስ እምፕል አቒ ሊሊቲ አኺኒስ ሺሽስታው፣ አይቶ ቼሜትጝፃውስታ ዝቤናዊ ቴክኖሎጂስ አግልግሎቴ እይጝስስታ አግፅጝስ ካሊፃው አምንስታንት ያኹኽ ዲጂታል አይቱ ምዝጋቢው ቴርትያኽ::

ይቶፒያዳ ብሄራዊ ዲጂታል አቕፂውሳ እንፃኽስትጜ ቴግባርዳ እሽፅጝስ አጌር አቑ አቕስትጙ ሜብት ቼሜትጛታ፣ ሜብትዳ እንኩርስትኹሳ ድሎ እሳንፅጝስ፣ አግልግሎቴ እያንቲውስታ ቻቤላንቲው ክችዳ ዝኩኽ ታምትጚዳ እምኔት ዝኩዋታ፣ ግልፄንት ካሲስታንትስታ እሊውጊ ፍታዊ እንፃኽስትጚ ዝኩዋታ ካሊፃው አኽጝስ ይቶፒያው ዲጂታል አቕፄ ካንትኹስ ነጋሪት ጋዚታዳ አዋጅ ቼፍ 1284/2015 እንኩርስታ::

ዝቤናዊ ዳድስ አጌራውሳ ልማቶ ቱስቲስ አኬድጝስ፣ ክርፄ ቺፅጝፄ ቴግባራዋ ፄውጝስ፣ አብቱሳ ብክኔቶ ኔኬትጝስ እንቲታኪ ፖሊሲስታ ልማቱ እንፅኺ ፍታዋ ያኻታሰታ ውላዋ አሴቴፍጝፃታ ካሊፅጝስ ብሄራዊ ዲጂታል አቕፂው ትክም ኬፍቱኒ አኽጝ አዋጅዳ ቶኬምስታ:: እንጚስኪላ እዝቡ ኩስጚ ጝና አምናማ ሜጋቢት 21 ጌርክ 2015 ምሬት አሜታዳ ካስጝፁኽ ሚዲቢኒ ኩፕቲዳ ዲጂታል መታዋኪው /አቕፂው/ አዋጅ ቼፍ 1284 /2015ዳ ፄዴክፃ:: እንጚኪላ አጌራው አችስ ቴግባራዋ ያኻማጊ አግስቴ::

አዊ ብሄረሰቡ ቺፅጝፂ አዩ ጉዋጉሲ ወረዳዳኪላ አጌር አቕ ፋይዳ ብሄራዌ አቕፄ አግፃንታ ይሴን እንፅኺ አኮሜችስታማጊ አግስቴ:: አቶ አቢ ሙሉነህ ወረዳው ዝኩዋንቲ ያኻኒስ ፋይዳ ብሄራዊውሳ አቕፄ ፍሹንኩዴስ እምፕልያኽ:: ፋይዳውሳ ትክሞ እርዳትስትካማ ሜዜጌብስትካማ አቕፄ አግፄካ::

አቶ አቢ ናኑውስታጊ አጌርዳ እሳንጛማጊ ይንቱኽሳ ዳዴኾስታ አትሌልፅⶓ ሳሴርስ ካላካልጝጝስስታ ወንጄሌኖ ቼፍጝጝስ ፋይዳ ዲጂታል አቕፂው ፍሺ ኬፍንኹ አኽⶓ ጉሽካ:: ጋያኪ ጛ ዝኩኑ ዙራሙሪታጊ ጌንዝብ ዝኩኽ አቒ ፂኒስስታማጊ አንጌራጌርጝስ ብሮ ኬያታ ፄውስታው ጉዳይጊ ፋይዳ ቴግባርዳ እሺኒዴስ ይጉዌ ንካማ አምኔካ::

ባንክዴስ ጉሼ አግፅጝስ ፄውⶓኪላ አንጌሌትስትⶓ ይጉፅጝስ እምቢትንኹሳ አግልግሎቴ አግፅጝስ ካላንታ ፄዋው አኽⶓ ዲብስካ:: ሚፂው ፅፌት ጝናዳ፣ ብቲዳ፣ ካርቲስታ ፕላንዳ፣ ጌንዜብሊጊ እምትጛማ ጁዋሺኹሳ ችግሮስታ ክችክቻ ያኻያሱሳ እንፃኽስትጜ ይጉፅጝስ ካሌ ናው ካንቲኪላ ዝኩⶓ ጉሽካ::

ወረዳታጊ ላጛ ማይኬልዳ ይቪቺዳ አግልግሎቱ እይስትጝ ኩፅኒ ፋይዳ ብሄራዌ አቕፄ ፍሽጝስ ፋያንኩ አጌር አቕዳ ቻኒስቶ ፌቴርⶓ ዲብስካ:: እዝብ ሚንቺቱ ልክስ ማይኬል እሳንጛማ አጌር አቕ ፋይዳ ብሄራዊ አቕፄ ግርቦ፣ ጊዞስታ ጌንዜቦ ባኬንፃኑላ ወክትስ አግፅጝስ ካላኑ ሴል አሜችጛታ ካሴ ዲግስካ::

አዚኒ ኬቴሙ ዝኩዋንታ ዊዛሩ አጀቡሽ አስራቱ ኪላ ፋይዳ ብሄራዌ አቕፄ አግፅጝስ እይስታው ማይኬልሾ ሹኻ ጌርካዴስ ጃላ ቴሮ ማንዴካማ ፍሽጝስ ካሊⶓ ዲብስካ:: ላጛ ማይኬልዳ ይቪቺዳ አግልግሎቲ እይስታው አኽጝ ቻኒስቶ ፌቴሩኒውላ ፋይዳ ብሄራዊ መታዎኪ /አቕፂ/ ቴግባርዳ እሺጝስ ኩፅኒ ዴስቴንካ አኽⶓ ጉሽካ::

አጌርዳስታ እዝብዳ አሱቲኒ ንቫርስ ታምባሺኹ አትሌልፅጝስታ ሙስኒውሳ እንፃኽስትጜጊ ካላካልጝጝስ ካላው ንካማ እርዳትስትⶓ ድኹዌካ:: ዋሺኒኪ አጌራው ቤንዳ ልቕልቕ ናንኩ አጌር አቑ አቕፂ ሳሴርስ ቼሜትጝጝ አጌር አቑ አቕቱ ሜብትኪላ ኬቤርስታታ፣ ውላ ይቶፒያዊያንካ ክቻ ካንትስታንታ ሜብቶ እያው አኽጝስ ቴግባርዳ እሺጝ ዜርፋ ሚንቺ ትክም ዝኩኽ አኽⶓ ዙሜካ:: ኹኑ ውላቱዊ ቴኬምስታንትስኪላ ፍሺ ዝኩኽ አኽጝስ ኹን ቻናካ ናኑላ ፋይዳ ብሄራዌ አቕፄ ፍሻንታ አሳቦ ዲግስካ::

አዩ ጉዋጉሲ ወረዳ ብልፅግኒ ቻፊ ፅ/ጝናዳ ፖለቲካ ዜርፍ አችትጝፂው አላፊ አቶ ሙሉአለም በከለ ጛሾስ ፋይዳ ብሄራዌ አቕፄ እሊኩዴስ ሊሊታው ጊሊፂ ዝኩⶓ ጉሽካ:: እምፕል አቒ እምፕል አቒ አኽⶓ አቕፃው አኽጝስ ሺሽፄ ቼፎ ስልኪስ፣ ወሬኬትስ አኹኪ ካርድስ ካንፅፅጝስ አግልግሎቴ አግፅጝስ ካሊስታው አኽⶓ ጌሌፅካ::

አቶ ሙሉአለም ኑኑውስታጊ ፋይዳ ብሄራዊ አቕፂ አጌር አቕትስ ይቶፒያዋ ያኻኪ ባያ አጌራዳ ዝኩዋንቲ አኽጝታጊ ዝኩፄ አኹኪ እንፅኺውሳ አግልግሎቴ ካንትጝስ ፋይዳዋ አግፃንታ ፄውስያኽ::

አጌርታ ሊሊትጙኽ ጊዝስ እዝቦ ቴኬማውሳስታ ኪሴ ሜዜጌብፃውሳ ቴግባሮ ታምባስታንታ ፄውጝስ ምንግስት ትኩትስ እንፃኽስስታማጊያኽ:: ቲንዳ፣ ክንቲዳ እንቲታኪ ስር ልማትዳ አኮሜችስታው ቴግባር ዲጂታልስ ዝቤንቲያስጊ ሳኪትጝጝስ ካላው ሴል ፅባብ አኽⶓ አቶ ሙሉአለም ኽይትጝፄካ:: እንጚስ ዴሜካ ፋይዳ ብሄራዌ አቕፂ ኽዮ እሚኹ አኽⶓ ቼሜትጝፄካ::

አጌራዳ ዝኩኽ አብትዴስ ቹዋ እዝብያኽ:: አኽጝስኪ አጌርታ ዝኩኽሳ አብቶ ሜዜጌባማስታ ያቓማ አግልግሎቴ እይጝ ፋይፃንቲ አኽⶓ ጉሽካ:: ፋይዳ ዴሜካ እምፕሎ አቔ እምፕል አቒታ ቼሜትጝፃው ቴክኖሎጂ አኽጝስ ትክም ኬፍቲኒ አኽⶓ ጌሌፅካ::

አቶ ሙሉአለሙ ኽይትጝፂታጊ ፋይዳ አቕ አግልግሎቲሊ እምትጙኽስ ቴኬምስታንትካ ያኻንታ ፄውጝስ አንጌሌትስትⶓ ይጉፅጝስ ካሊፃዊያኽ:: አይቶ ቼሜትጝፅጝስ ፋይፃንኩ እሺንኩ ሴኔድካዋ ፋይⶓ ይጉፃማ አግልግሎቲስ አሜቻውያኽ::

ጋያኪ ዛንዙኽሳ ኾትካውሳ አግልግሎቴ እይጜ፣ ክችክቻ ያኻያሱሳ ንቫሮ እሚካማ ዲጋንኩሳ ማሊጝስ ሳሴር አኽጝስ ወንጄሎ ካላካልጝጝስ ካሊፃውያኽ ንካ::

ፋይዳ ሚንች ፍቱስታ ቺፅጝፂው፣ ማቤራዊውስታ ይኮኖሚው ትክም ዝኩኽ አኽⶓ ጉሽካ:: አቶ ሙሉአለም ፍንሾስ አጌር አቕ ኾትካሾ ካሳኑላ፣ ግርቦ፣ ጌንዜቦስታ ጊዞ ባኬንፃኑላ ዝኩኑዳ ያኼካማ ስልኪስ አግልግሎቴ አግፅጝስ ካላኑ እንፃኽስትጚ አኽⶓኪላ ቶኬምካ::

ወረዳታኪ አጌርታ ፋይዳ ብሄራዊ አቕፂዳ እይስትኹሳ ትኩቶ ጉሽፃ ፄውጝስ ወረዳው እዝብ አግልግሎቴ አግፃታ ፄውጝስ እንፃኽስስታማጊያኽ:: 55 ሻይ ምሽታርስታ 19ሻይ ኹንስ ትክላሊስ 74 ሻይዴስ ጃላ ዝኩዋንትካስ ሜጋቢት 30ኺስታ ታምብስታንታ ፄውጝስ እክድ እምስትⶓ ኽይትጝፄካ::

ላምቡሳ ኺስታ 64ሻይዴስ ጃላ ፋይዳዋ አግፅጝስ ሜዜጌብስትⶓ አቕፄካ:: እንዴስ 81 ታፋ ያኻንኩ ፋይዳዋ ፍሽጝስ ካሊⶓ ጉሽካ:: ላምቡሳ ኺስታ ዝኩኽ ፊፂምጚኪላ ይስጝፃው አኽⶓ ቶኬምካ::

እንጚ ፊፂምጚስኪላ ወረዳታ እዝቡ ካንቲ ኬሻንቲ አኽጝስ እክዶ ሳኪትጝፅጝስ ካሊፃው አችዳ አግስታንኩ አኽⶓ አቕፄካ:: ፋይዳ ብሄራዌ አቕፄ አግፅጝስ እዝቡ ፋይኪላ ኬፍቲኒ አኽⶓ ጌሌፅካ::

አግልግሎቴ እይፂ ማይኬል እንፂጝስ እዝብዴስ ክሬቲ ዲጋታ ፄውⶓ ጉሹንኩ አቶ ሙሉአለም እስጜዋ ችግሮ ኽይጝስ ኩፅኒ ትኩታው ቤንስ አቕፄካማ ዙርሜ ማንዴካማጊ አኽⶓ ቶኬምካ::