እንፅኼ ጐሌልታያስቲ ኹና

ንግስቴ ተስፋ

ዊዛሩ ትግስት ብዙነህ እንጃቢሪ ኬቴሙ ዝኩዋንታኽ:: ትግስት ትዳርዌና ያኻኒስ ቺትጛኑኪላ ጛራስ አርፊስ ኬይስታው ደሞዚስ እሼ:: ኹና ጄራ ታፍ ልኩ፣ ቲንስታ አኬዳው አንኩሊ ዝኮስኩስ ጝንዳ እንጅኩዌታ ጛራሱሳ ታፎ ካንትጝ ኩፅኒ አንኩሊስ ፉሬ እያቲት አኽጝዴስ ጃላ ናካዳ ሌጎ ሴይኹሳ ዝኩዊንውሳ ክብርናቴ ዊፅጝስ ኩፅኒ እንፅኼ ፌቴርጝ ቱስታው አኽⶓ አምንጝስ እንፅኼ ጄሜርታ::

ሴሎስታ ትቤቦ ቲኪምስቴታ ሚትሚታዋ ካርጝስ ዶኬስታታጊ ዴንቤንካዋ ፋይጝፅጝስ እንፅኼ ጉሽፃ ፄውⶓ እንክርፄ:: ቺዊ ካርጛስ ዶኬስታታጊ ዲግስታው ምርትኪላ ሚንችካውላዳ እንካንስቶ አግፅⶓ ዙሜ:: አግፄው ፊቲስኪላ ዝኩዊኒስ ፋይፃውሳ ዋኽትጝፅጝስ ድሎ ብሳ::

ዊዛሩ ትግስቱ እንፅኼ ፌቴርጙ አክም ኩፅኒ ሚትሚታዋ ዶኬሳታታ ዋይጝስ ጄሜርስትስጉ ናካዳ ማሽኖ ዋኽትጝፅጝስ ሳሴርስ እንፃኽስቴታጊ ሚትሚታዋስታ አዋዜ ጌቤልስ ዲግስታታጊያኽ:: ፍንሾስኪላ ባርኾቼዋ ኺስታ እንፃኽጙ እክድ ዝኩት አኽⶓ አላሚታ እንኩርታ::

“ሼው ካንታኒ እል ካንቴ” ናኒስታጊ ዊዛሩ ትግስት እንፅኼ ፌቴርጙ አክም ኩፅኒ ሚትሚታዳስታ አዋዜ ቴርስጝዳ ቲሪያ:: እንፃኽስትⶓ ዴስኹ ታፍስታ አንኩሊ ኩፅኒ ዙራሙሪዳ አግስታውሳ ምርቶ ቴኬምስትጝስ ዙራሙሬ ኻሪፃውሳ፣ ቲንዳ ችግሮ ታምፃውሳ ክምካውሳስታ ታይካ ፍያልካውሳ አዮ /አጎዜ/ ኩፕፅጝስ እሊውሳ እንፅኼ ፌቴርታ::

ባይላዊስታ ዝቤናዌ እንፃኽስትጜ ቲኪምስቴታ ሌዘርሾ  ኪስጝስ አዩሳ ስዮ፣ ቦርሳዋ፣ ቻሞስታ እሊኩስጊ ቴርስታታ ጚጛርትጛሳ ይኮኖሚስ ሊጊፄስታታጊያኽ:: እንፅኼ ፌቴርጙሳ አክሞ ምንግስት ካንታማ ዊዛሩ ትግስትስ ጉሼስታ እንፃኽፄ ብቴ አሜሜችጝፅጝስ እንፅኼ ይስጝፄታስታ እሳንስ እንፃኽስቴታ ካሊፃ::

ዊዛሩ ትግስት እንፅኼ ፌቴርጙሳስታ ይኮኖሚሾ ኪስጙሳ ካሌቕቶ ቲኪምስቴታ “Start up” እስታው ክልል አቡቑስታ አጌር አቡቑ አችስ ካስጙኽ ልኺትጚዳ አሴቴፍጝጝስ ልኺትጜ ዊፅጝስ ሼሌምስትጝስ ካሌ:: እንሱ ምክንያቲስኪላ ክንቲውሳ ድሎ ባህርዳር ዩኒቨርስቲዴስ አግፄታ እንፃኽስቴታጊ አግስቴው ውማይስ ክንቴታጊ አግስቲ::

ዊዛሩ ትግስት ብዙነህ ዙሜውስታጊ ታፎ ናኺሴ እሜማ እንዳራ እንፃኽስቴሲ ንጝዴስኪቻ ዋሺኔኪ እንፅኼ ድፍሬትስ ጄሜሩኒጊ ዋይሚስታ አኽጝስ ካሊስታው አኽⶓ ካንቴ ይታ::

ዊዛሩ ትግስቱ እንፅኺ ሳኪትጛታ አርቴ ናው፣ እንፅኼ እርዳታው ጛራስስታ ዲግስታውሳ ምርቶ እንካኔካማ ቴኬምስታንኩ ዴምቤንስኪላ ምስጋኔ ዲግስታ::

እንጃቢሪ ኬቴሙ ልግስኒኪላ እንፅኼ እሳንስ እንፃኽስቴታ ኬፍቲኒ ታምብ ዝኩኽ አኽⶓ ጉሽታ:: እንጚስኪላ ምርቶ ዲግስታታጊ ዋኒዴስኪ ጃላ ቴኬምስታንታ አኽጝስ እክዶ እሚⶓ ቶኬምታ:: ላምቡሳኺስታ ዝኩኽ ምንግስቱ ድጋፍ ክርፂ አኽⶓ ጉሽታ:: ያኼስጉ እንፅኼ እሳንፃማ ቢዝነሶ ሌጌፅጝስ ኩፅኒ ዳላውሳ ጉሼ አግፃኑ ሴል አሜችጛታ አሳቦ ዲግስታ::

ዊዛሩ ትግስትስ ጜራ አቶ ባይህ መንግስቱ ናኑውስታ ኹን ብላትዌንስታ ሚንች እንፅኺው አሳብ ዝኩክ አኽⶓ ጛቓ ምስክራ አኽⶓ ጉሽካ:: ዴፌርታታ እንፅኼ ናኬውላ ጄሜርትኹ እንፅኺ ናካ ይኮኖሚስ ሌጌሳንታ ፄውⶓ ቶኬምካ::

አቶ ባይህ መንግስቱ እንፃኽስታንቲ አኽጝታጊ እንፅኺው ሳት አሌድስቱታ ጛቓሳ እንፅኺስ እርዳትጝ ኹሉቺፋሱ ግዴቲ አኽⶓ ጉሽካ::

“ምሽታር ኹንስ ድሎ እይጝ፤ ኬቴምዳ ዝኩኽሳ እንፅኺውሳ ፄጌ ጎሌላማ እንፅኺሾ ኪሳማ ይኮኖሚስ ኪስስትጝ ማንዲስቴ” ናንኩ አቶ ባይህ እንጚስኪላ ጛቓ ዴፌርታታ እንፃኽስቴታ እክዶ ፍሽጝዴስ ጄሜራማ አቭርታ እንፃኽስትⶓ ኺስታ እሺኹ ጁትጚ ትግስቱ እንፅኺው ሳኪትጚስ ኬፍቲኒ ታምብ ዝኩኽ አኽⶓ ዲብስካ::

ፍንሾስኪላ እንጃቢሪ ኬቴም ሌጌሳማጊ አኽጝስ እንፅኼ ፌቴራንታ ትግስት ሌጌስቱት ኬቴማዳ ዝኩንኩ አጌር አቕስ ሜቴናውሳ ምርቶ ዲግስጝስ ፄውታውሳ ፅሬቶ ዴጌፍጝስ እክድ ዝኩኽ አኽⶓ ዲብስካ::

ሚንች ምንግስቱ እንፃኽስታንትካስ ጛቓ ጝርጃውሳ ታፎ ካንትካማጊ ይኮኖሚው ዳንቴና ያኻኒስ ካንትስቴ:: እንጚ ቴግባር ኩፅኒ ክችክቻ ጋቲዊያኽ:: ኪቻካ ኹኖ ቹኒትጝ፣ እንፅኼ ፌቴራንታ ጁትጝፅጝ እንቲታኪ ኬምፕዳ ያኻማ አብርታ እንፃኽስትጝ ምሽታርዴስ ማንዲስታው ግዴቲ አኽⶓ አቶ ባይህ ጉሽካ::

አዊ ብሄረሰቡ ቺፅጝፂ እንጃቢሪ ኬቴሙ ቺፅጝፂ እንፅኺስታ ስልታኒ ፅ/ጝናዳ ስልታኒውስታ እንፅኺውሳ ድሎ ፌቴርⶓ ኬቹ ጉሳንቲ አቶ አማኑ ገዛኸኝ 2018 በጀት አሜትዳ እንጃቢሪዳ ዝኩኽሳ ፄጌ ቴኬምስታማ 6ሻይ719 እንፅኻ ፋይካስ እንፅኼ ፌቴርጝስ እክድ እምስታማ ቲሬንቲስስታ ጊዝስ እምስትኹ እክድዴስ ሊኽዴስ 50 ታፋ ሳኪትጝፅⶓ ጉሽካ::

እሺንኩ ኢንተርፕራይዝካዋ ይስጝፅጝስታ እስካዊስ ጄሜርፅጝስ ካሊስትⶓ እርዳትፅካ:: 5 አሜታዴስ ጃላ እምስትካማ እጂንኩ ሼድካዋ ባይፃማ እሊኩ እንፅኻ ፋይካስ ፌያፌይጝፅⶓ ቴግባር አኮሜችስትⶓ ጌሌፅካ:: እንጃቢሪ ኬቴሙ ልግስኒሊ እምትጛማ ኮንስትራክሽኑ ግንባቲው ዜርፍዳ እንፅኻ ፋይካ አሴሜርጛንታ ፄውስትⶓ ጌሌፅካ::

እንጃቢሪ ኮሪደር ልማቱ እንፅኺዳኪላ ጛርቱኪ ያኻ ምንግስቱ ፕሮጄክትስ እንፅኻ ፋይካ አቩቕስትካማ ቴኬምስታንታ ፄውጝስ እንፃኽስስታማጊ አኽⶓ አቶ አማኑ ገዛኸኝ ጉሽካ::

ዜርፍዳ ዝኩንኩ ችግርካዴስ ጉሺው ጉላሊ እላ አኽጝስታ እንፂጝ ዝኩዋቲታ ምንግስቱስታ ምንግስታዋ ያኼካያስኩ ኾትካሊ ቲቪቪርጚስ እንፃኽስስታማጊ አኽⶓ ጌሌፅካ:: ጉሺ እይስቱስኪላ 60 ታፋ ሊኽዴስ እስካውካ እንፅኼ ፋያንትካስስታ 40 ታፋ ሊኽዴስ እሺንኩ እንፅኼ ፌቴራንትካስ እይስታው ጉሺው ጌንዜብ ዝኩⶓ አቶ አማኑ ኽይትጝፄካ::

እንፅኺው ድል ፌቴርስታዩክ አጌር አቕስ ቱስታውሳ ውማዩሳ ኩስጜስታ ክንቴ እይካማጊ ኬቴሙ ቺፅጝፂታጊ እንፅኼ ፌቴርጝዳ ዝኩኽ ልቕልቕቲ ይስጝፃው አኽⶓ ጌሌፅካ::

እንጃቢሪ ኬቴም ዝቤን ካሴው ሜቴንስ ሌጌሳማጊ አኽጝስ እንፅኺውሳ ድሎ ፌቴርጞ ዋይሚስታ ፄውጝስ ኽሳንቴ ቴስፌ ኻሳማ ይንቱኽ አኽጝስ ቱስቲስ ቴኬምስትጝስ እክድስ እንፃኽስስታማጊ አኽⶓ ቶኬምካ::

እሊውስ ዴሜካ እንፅኼ ፋያንትካውሳስታ ፌቴራንትካውሳ ፋዮ ዋኽትጝፅጝስ ኢንተርፕራይዝካስ እይስታው ጉሺው ሜሜሪ ኬሽጛታ ትኩታኩ ምንግስቱ እንፅኺው አላፍካ እንፃኽስታንታ ካንቴ ዲግስካ::