ዎንጀሎ ካላካልጝጝስ ታምቦጊ ፊትጝጝ ቱስቴ እስትኾ

ንግስቴ ተስፋ

ወረዳዳ ፌፄምስታንኩ ዎንጄልካዋ ካላካልጝጝስ ታምቦጊ ፊትጜካማጊ አኽⶓ ፋግቲ ለኮማ ወረዳው ዝኩዋንትካ ዙሙና::

ሳሴር እስታው ወንጄልዴስ ውትኽትኼ ዎንጄሎ ኺስታ እምፕልታቕዳ፣ አጌራው ሰላምዳስታ ልግስዳ ኽሳንቴ ችግሮ ታምፃማጊ ዝኩኽሳ ዎንጄሎ ካላካልጝጝስ ፖሊሲ፣ ስትራቴጂ፣  እግ እንቲታኪ ኾትካዋ አችትጝፅጙ ይሴን እንፃኽስትጚ ፋይፃንቲ አኽⶓ ፍትህ ሚኒስቴርዴስ አግፅኑኽ ንቫር ቶኬሜ::

ወንጄሎ ካላካልጝጝስ ታምቦ ፊትጜካማጊ አግስታንኩ ፋግቲ ለኮማ ወረዳ ጊዚኺሪ ኬቤሊው ዝኩዋንታ ዊዛሮ አብዮት መላኩ ኑኑውስታጊ ወረዳዳ ፌቴርስትኹ ሰላሙ ችግር ወንጄል ባስጛታስታ ወንጄሌን እግስ ካሲስታቲንታ ፄዋሺኹ አኽⶓ ጉሽካ:: እንጚስኪላ ጛው ኬቤሊታጊ ዳዴኽ፣ ዝራፊ፣ አኹዳስታ ድንቤርዳ ፌቴርስታው ጋቻስ ድባዳቢው ወንጄል ቼጌርፃሺኹ አኽⶓ ዲብስካ::

2018 ም/አሜታዳ ዴሜካ እምፕልታቕስታ ፄትቲኩ አይልካ ቴቬቬርጜካማ እንፃኽስቱኑ ካላካልጚው እንፅኺስ ታራታርስታንትካ ወንጄሌን እግስ ካሲስታንታ ትኮሜ እይካማጊ አኽⶓ ዊዛሮ አቢዮት ድኹዌካ:: ኹንዳ ታምባሺኹ ድባዳቢውስታ ዝራፊው ወንጄልኪላ ናካዳ ኔኬታማጊ አኽⶓ ቶኬምካ::

እንዴስ ቤዴራ ኬቤሊ ቺፋ እሺኹ እምፕልታቕ አቩቑ ፖሊስ እላቲው ያኹኒውላ ወረዳታ ሰላሞ ኬቤርፅጝስ ሜዴብስትኹ ፃምሪ አይል ኩፅኒ ኬቤሊ ቺፋ ዝኩኽሳ ወንጄሉሳ ፂዌ እምፕልታቕሊ ቲቪቪርጚስ ካላካልጛማጊ አኽⶓ ጉሽካ::

ዊዛሩ አብዮት እዩኑ ካንቲዳ ወንጄሉ ፂዊ እምፕልታቑ ማቤራዊስታ ይኮኖሚያዊ ልቕልቕቲዳ ቺፃውሳ ቻኒስቶ ካላካልጝጝስ ኬቤሊኩ ዝኩዋንትካ ታምቦ ፊትጜካማጊያኽ  ምንግስት ዴሜካ እዝብ ትኮሚስ እምፃኩ ታራታርስታንትካ ዎንጄሌንካዳ ቱስቴ እርምጄ ካፅጝስ እጎ ኬቤርፅⶓ  ሲፋታ ፋያንኩ አኽⶓ ካንቴ ዲግስካ::

አቶ ጌታቸው ምንግስትኪላ ፋግቲ ለኮማ ወረዳው ዝኩዋንቲያኽ:: ወረዳዳ ሰላሞ አቲጙ ምክንያታስ ወንጄል ባስጛታ ያኻማ አጌር አቕዳ ኬፍቲኒ ቻኒስት ታምባሺኹ አኽⶓ ዲብስካ:: ወረዳ ዋኽስዋኾ ሰላማ ያኻውላ ይጉኒውላ ጛው ኬቤሊዳ ኩፅኒ ሰላሞ እዝብስታ ምንግስት ቴቬቬርጜካማ ኬቤርፅጝስ ኬሴትስታሺኹ ዎንጄል ኔኬታማጊ አኽⶓ ጉሽካ::

“እንፃኽስስታማ ኪስስትጝስስታ ንብሬቶ አፌርጝስ ዳዴኹስታ ዝራፊው ታራታርስታንትካ ስጋታ ያኻሺኑ ወክት እሺኾ” ናንኩ አቶ ጌታቸው እዝብ ኩርፄንትስ ካላካልጝጙ እንፅኺዳ አሴሜርጛማ ወንጄሉ ፂዊ ኔኬታማጊ አኽጞ ድኹዌካ:: ሰላሙሳ ዳንጉዋኔ ቴኬምስትካማ እዝቦ ዜሬፋሺንኩ ወንጀሉ ታራታርስታንትካኪላ ማቤራዊስታ እምፕልታቑ ውላቱዊ ዝኩዊኑዴስ አግሌልስትካማ ፄዊዴስ ክብስስትካማጊ አኽጞ ቶኬምካ::

ሚንችካ አጌር አቕ አጌሮ ባይፅካማ ሴዴድስታንታ ወንጄሌን ምክንያታ ያኼካማጊ አኽጝስ ምንግስት እጎ ኬቤርፅጙሳ እንፅኼ ይስጝፃማ ሲፉታኪላ አሳቦ ዲግስካ::

ጊፅሳማኪ ያኻ አሬሳማ ዝኩዊኔ ኬሽጝፅጝስ እንፃኽስታው ማቤር አቕዳ ስጋታ ያኻንኩ ወንጄሉ ታራታርስታንትካ ፂዊዴስ ክብስስታንታ ፄውስታው እንፃኽስትጚዳ እምፕልታቑ ታምብኪላ ኬፍቲኒ አኽⶓ ጉሽካ ትኮሜ እይጝስስታ እግስ ካሲስታንታ ፄውጙ እንፅኺስ ታምቦ ፊትጛንኩ አኽⶓ ዲብስካ::

ፋግቲ ለኮማ ወረዳ ፖሊስ ፅ/ጝናሱ አዜዛንቲ ትክትሊ ኢንስፔክተር ገብሩ አያልነህ ወንጄሎ ካላካልጝጙ ቹዋ አላሚ እዝብካውስታ አጌራው ሰላምዳስታ ዴክትዳ ፊፄምስታው ቹዋ ስጋታ ያኹንኩ ዎንጄልካዋ ካላካልጝጝስስታ ኔኬትጝስ አጌር አቑሳ አቕቱሳስታ ዲሞክራሲውሳ ሜብቶ ኬቤርፅጝ አኽⶓ ጌሌፅካ::

እንጚስኪላ ወረዳታ ሰላሙ ስጋት ዝኩኒውላ ወንጄሎ ካላካልጝጝስ ፄውስታው ፅሬት ኩፅኒ ይስጛማ ሲፍⶓ ጉሽካ:: ወንጀል አጌር አቑሳ ይዎቶ አቲስጝዴስ አጌራው እልውኒውስታ ማቤራዊው ፅንጋኻ አኻቲታ ቤዴራማ ካላካልጝጙ እንፅኺዳ ትኩት እይስታማ እንፃኽስስታማጊ አኽⶓ ቶኬምካ::

ትክትሊ ኢንሰፔክተር ገብሩ እይኑ ኽይትጝፂዳ ወንጄል ዜር፣ ፄጌር፣ አይማኖትስታ ፆቲ እንቲታኪ ድንቤር ጌዴባውላ ዋሺኒኪ ብቲዳስታ ጊዝስ ፌፄምስታው ማቤራዊ ኬሴት አኽጝስ እምፕልታቕ ቤዴራማ ካላካልጚዳስታ ቴንኬክጝዳ ታምቦ ፊትጛንታ ፄውስታማጊ አኽⶓ ጉሽካ::

ወረዳታ እንዴስ ቤዴራ ኬቤሊ ቺፋ አችትጛማ እይስታሺኹ እምፕልታቕ አቡቑ ዎንጄሎ ካላካልጝጙ  ሴልስ ላጛ  አሜታዴስ ናቴ አገልግሎቴ እይስታማጊ ጋቲው ያኹኒውላ ፅክራ ላጛ ኬቤልካዳ ኩፅኒ ፃምርትጙኽ ፄትቲው አይል ወንጄሎ ካላካልጝጝዳ እንፃኽስስታማጊ አኽⶓ ጌሌፅካ::

ዳዴኽ፣ ዝራፊ፣ ጌዴድፃማ ዴፌርጝ እንቲታኪ ጊዊው ወንጄል ፌያፌያማ ወረዳታ ካንትስታው ችግር እሺኹ አኽⶓ ጉሽካ:: ወንጄሉ ታራታርሰታንትካ እግስ ካሲስታንታ ወረዳዳ ቲሪትጙኽ ፃምሪ አይል ትኩትስ እንፃኽስስታማጊ አኽⶓ ትክትሊ ኢንስፔክተር እርዳትፅካ::

ፋግቲ ለኮማ ወረዳው ቹዋ ቺፅጝፃንቲ ታገል እጅጉ ጛሾስ ወረዳታ ፌቴርስትኹ ሰላሙ ስጋት ወንጄሉሳ ኬሴቶ ካላካልጝጝስ ቻኒስቶ ፌቴሩኒውላ ሰላሞ ኬቤርፃማ አጌር አቑሳ ዴክቶ ቼሜትጝፅጝስ ትኩትስ እንፃኽስስታማጊ አኽⶓ አቕፄካ::

ሊጊሲሚ ዝቤንስ ኬቤሊ ቺፋ ቲሪትጛማ ወንጄሎ ቤዴራማ ካላካልጝጝስ ካሊፃሺኹሳ እምፕልታቕ አቡቕ ፖሊሱሳ እንፃኽስትጜ ኩፅኒ ቴገባርዳ እሽፅካማጊ ጋቲው አኽⶓ ቶኬምካ::

ዝራፊው ወንጄል እሳንጛማ ቺጊርፂ አችዳ ታምባሺኹሳ ናካዳ ካላካልጝጝስ ፃምሪ ሰላሞ ኬቤርፃንቲ አይል ይስጙኽሳ እንፅኼ አኮሜችጝስ ታራታርስታንትካ ፍርድስ ዲግካማ ካሲስታንታ ፄውጙ ቴግባር ሲፍⶓ አቕፄካ::

ወረዳዳ አግስታንኩ ኬበልካዴስ ዋልታ ኬቤልካ ሰላሙ ቺጊርፂ ስጋታኻዳ አግስታንኩ አኽጝስ ወንጄሎ ካላካልጝጝስ ካሊስታያሱ አኽⶓ ጉሽካ:: ይጉዋንትካ ወረዳኩ ኬቤልካዳ ኩፅኒ ወንጄሎ ካላካልጝጝስ ፄውስትኹ ፅሬትስ ዳዴኻንኩ፣ ዜሬፋንኩስታ አቔ ኩጙ ወንጄልስ ታራታርስቱንኩ እምፕልታቑ ሰጋታ ያኹንኩሳ እግስ ዲገሰጙ እንፅኺ ይስጛማ ሲፋማ አጌር አቕ ፉሬ አግፃንታ ፄውስታማጊ አኽⶓ አቶ ታገል ጌሌፅካ::

ወረዳው ሰላም ኬቤርስቱታ ቤዴራስታ ወንጄሎ ቤዴራማ ካላካልጝጙ እንፅኺዳ ኽሳንቲ ፍሺ እሺኹሳ እምፕልታቕ አቡቑ ፖሊሱሳ እንፃኽስትጜ ቴግባርዳ እሽፅጝስ እክዶ እሚⶓ ቶኬምካ::