አጌራዊ ኩስጝጚ እምፕላ አጌራኻዳ አግስታንኩ ፖለቲካው ጉሳንትካ ምንግስትስታ እምፕልታቑ ጉሳንትካ ክቻዳ ፌቴርስታንኩ ቱትጜ አቲጝዳ ኩስጝጚስ ኽዬ ቴርስጝስ ካስጛው ዲሞክራሲው ካስቲያኽ:: ካስጚኪላ ዝቤንካስ ክንባብላኒስ እጂንኩ ክሬትካዋስታ ቱትጜ አቲⶓ ዙሚትጚስ ኽይስታንታ ፄውጝስ ቤዴራማ እንፃኽስቴ::
አጌራዊ ኩስጝጚው ኮሚሽኑ ማቤራዊ ፍንዴስ አግፅንኹ ንባር ቶኬማውስታጊ አጌራዊ ኩስጝጚ ፍትሬትስ አቓ አኽⶓ ቤዴርፅጝስስታ አምንጝጜ ስራ ፄውጝስ እሊኩሱሳ ችግሮ እርዳትስትጝስ ግግሬ ሼዎ ፋየ:: አኽጝስኪላ ኩስጝጚው ካስጝጚ እሊኩስታጊ ቺፅጝፂው አኼንካታ ፃፊስቱንኩ እጋውካ ማይኬፍካስ ልቕልቕንጝዴስ ኪቻ አቒ ይሪሱሳ ክችክችቶ አምንጝስ ዋሺኒኪ አጌር አቕ ጛርትስስታ ኬችስ አጌርስ ፄውጝስ ካላውሳ ፍሼ ጉዋልፃማ ካንትፅጝስኪላ እንፃኽስታውያኽ::
አጌራዊ ኩስጝጚው አኼናኻዳ ፌዩንኩ እምፕልካ እምፕልካ አጌርካው ዴስ ክንትፃው ካስጝጚ አሌምስቱኽሳ ግቦ ሳኪትጛቲታ ፄዋንኩ ቶኬምስታንትካዴስ እንፕል ታንብዌን አካልካው ቴሳትፉ ዜርቕንጝስታ ካስጚስ አሜቻቲው አኽጝያኽ::
አጌራዊ ኩስጝጚ ውላዋጊ እምፕልታቑ ቤንካዋ አሴቴፍጝፅጝስ እምፕልታቑሳ አሳቦስታ፣ ዝኩኽሳ ክሬቴስታ ቱትጜ አቲⶓ ፌቴሩንኩ ጉዳይካዋጊ ጉሻንታስታ አሳቦ እምፃንታ ፄውጙሳ እንፅኼኪላ እንፃኽስቱስ እጂጝ ታክስስቴ:: እን አጌራዊ ኩስጝጚ አጌራው ሰላሙ ዳንጉዊኒዳ ጌጌውስትጝስ ካላቲውሳ ፄጌርሳማ ታክስጝስኪላ ፅንጋኽስጝስ ሞኬራኒስ እሺንኩ እምፕልታቑ ቼፍ ልቓ እስታቲውያኽ:: እንፃኽስሰታው እንፅኺውሳ ዋይሜ ካንትጝስ ኩፅኒ ሚንችካ ካንቴ ኪስጝስኪላ ካሌካ:: አጌራውሳ ሰላሞ አግጝስ ካሊስታው ዴሜካ ኽቴናቴ ክሬቴ ፌቴራውሳ ዙሚትጜ ዙሚጝስ ያኻውላስ ኩስጝጚስያኽ:: እንሳ እርዳትስትጝስ ዴሜካ አጌራዊ ኩስጝጚስ ካሊስታው ቴሳትፉዳስታ እርዳቲዳጊ እንግርግራ ንጝ ቱስታላኪ::
አጌራዊ ኩስጝጚ ላንቡሳኺስታ እዝብውላዳ ክሬቴ ፌቴራንኩስታ ቱትጜ አቲሳንኩ ጉዳይካዋጊ ዎኬልስታንትካሾስ ንባሮ ኩፕፁስ እጂጝ አቕስቴ:: ታምብስታንታ ያኼካያስኩ ዙራሙርካ ዴስኪላ ዋኾ ንባሮ ኩፕፅጝስ ካሊስታታ ታክስጝስ ይካቲት 11/2018 ም/አ እዝብ ወኬልስታንትካው ኩስጚ ጝና ካስጝፁኽ እምቢትንኹ ኩችቲዳ ኮሚሽን ካስጝፃያስኩ ቴግባርካዋ አሌድጝስ እንፅኺውሳ ዝቤኖ ሶኼታ አፍሪካስ እጄታ ካሲኹ ስሬታስኪላ ፌኬድስታያ:: እኒ ፌኬድስቱንኩ ጊዝካስኪላ እምፕልታቕዴስ ማንዲስታውሳጊ ቴሳትፎ ፄውጝስ ኮሚሽኑ እንፅኺ ሳኪትጛማ አጌራው ሰላም ቼሜትጛታስታ እምፕልታቕኪላ ፉሬ አግፃንታ ፄውጝ ቱስቴ::