ኪሴ ሜዜጌብፅኹ እንፅኺ

ንግስቴ ተስፋ

ኽብፄስታ አኾ አንኬባኬብጙስታ ማንዲጙ ቴግባር አማኻሪ ክልልዳ ይስጛማ ሲፉታኽ:: 2018 ምርቱ ዝቤንዳኪላ ቴሳስ 20ዴስ ጉሽፃማ ትኩትስ አኮሜችስታማጊ አግስታው ፍትሬቱሳ አብቶ ማንዲጙ እንፅኺ ክልልታ 9 ሻይ 206 ቴፋስስካ ጎሌልስቱንኩ ያኻኒስ 456 ሻይ ሄክታር ብቴኪላ ሾፌናው አኽⶓ ክልሉ ግብርኒው ቢሩዴስ አግፅንኹ ንቫር ቶኬማ:: ሴዛ ትኩሚ አንኩዋ ሚሊዮን እምፕልታቑ ቤንካ ዴሜካ እንፅኺዳ አሴቴፍጜካማጊያኽ::

እንፅኺዳ አሴቴፍጜካማጊ አግስታንኩ አዊ ብሄረሰቡ ቺፅጝፂ ዳንግሊ ወረዳ ዱቪሲኒ ኬቤሊው ዝኩዋንቲ አቶ አያና ጋሼ ፍትሬቱሳ አብቶ ማንዲጝስ ጜዋንቱ እንኩዋኽስትስ አኮሜቹኑ ቴግባር ኪሴ ሜዜጌብፅⶓ ስልኪስ ንቫሮ እይካ::

እዝቡ ቴሳትፉስ አሜት ቺፋ አኮሜችስታው ፍትሬቱሳ አብቶ ማንዲጙ እንፅኺ ሚንች አሜትካስ ኬፍቲኒ ኩሪስ ሺሽርስታማ ኽብፂ ካፅስታማጊ ጋኻ አኽጝስ አቔ፣ ክሜ፣ ፋይፃላ ናሺኹ ውታኺ አኹኪ ሻዋቲስታ ካዌን ናካዳ አምሎ ሴያማ እልስ ሳሲፃ ያኻማ እሺኹ ግድሾ ዙራማጊ አኽⶓ እንክርፄካ::

ሺሽርስትኹ ካና ጋሚዴስ ጌማው ኩሪኪላ ሙሪሾ ቱዋማጊ አቒዳ፣ እንሴስካዳስታ ጝንዳ ታምፃሺኹ ጉዳት ናካዳ እላቲው አኽⶓ ጉሽካ:: አሜት ቺፋ እንፃኽስስታውሳ እርኬኖ ዊዳፊስ ፍትሬቶ ማንዳታ ፄውጝስ ቴኬልስታው ችግኝስታ ክይኪላ ክምካው ኬሌብስ አጌላጌላማጊ ይኮኖሚው ቴኬምስታንትሾ ኪስጝስ ካሊⶓ ድኹዌካ::

ፍትሬቶ ማንዲጝስ አግፁኑ ትክም አሬሳቻንትካው ዝኩዊኒዳ ኪሴ ሜዜጌብፅኹ አኽጝስ ጛው ፋይስ ትኩትስ ፍትሬቱሳ አብቶ ማንዲጝስ አሴቴፍጛንኩ አኽⶓ ዲብስካ:: እንፃኽስስቱኑ ተፋስሱ እንፅኺስኪላ ዋጉኽሳ ክዮ ስታ ችግኞ ዋይጝስ እንቲታኪ ትክምዳ እሽፅጝስ ኬቤሊኩ አሬሳቻንትካ ዝኩዊኒውሳ ኪሴ ሜዜጌብፅካማጊ አኽⶓ ቶኬምካ::

አሜት ቺፋ እንፃኽስስታው እርኬኑስታ ተፋሰሱ እንፅኺስ ያኻንኩ አዶሚስታ ባዲሊ ናካዳ ጌቤልዳ ክብሪስታ አግፅጝስኪላ ቺጊርፂ አኽጝስ ምንግስት ልማቱሳ ሜሳሬ ዲግሳያታ አቶ አያና ካሴ ዲግስካ:: ፍትሬቱሳ አብቶ ማንዲጙ እንፅኺዳኪላ ኽሳንቴ ጁትጜ ፌቴርጝስ ካላው ናው እምኔት ዝኩክ አኽⶓ ጉሽካ::

ዱቪሲኒ ኬቤሊው ዝኩዋንታ ዊዛሩ ሽታ ፈንቴ ጛሾስ ፍትሬቱሳ አብቶ ማንዲጝስስታ አንኬባኬብጝስ ኹኑ ቴሳትፉ ኬፍቲኒ አኽⶓ ድኹዌካ:: ጛው ኬቤሊታጊ እንዴስ ቤዴራ ብቲ ካዳማ ሺሽርስትጝስ ጋኺሾ ኪስስታማ ሼርካ ቹትካስታ ማልጅካ ፋይታ ኽቴናቴ ያኼካማ ግብርኒውሳ እንፅኼ አኮሜችጝስ ካላቲንኩ እሺንኩ አኽⶓ ዲብስካ::

“ብቲ ካዱኽ እንዳራ እሽናኒይ እናና ሜሬርፅናሽኑኽ ጊዝ ፌያ” ናንኩ ዊዛር ሽታ ጄር ጄራስ ቴኬማውሳ ፍትሬቱሳ አብቶ ማንዲጙሳ እንፅኼ አኮሜችጝስ ኩፅኒ አሬሳቻንትካው ዝኩዊኒው ሴል ኪስስታማጊ አኽⶓ ጉሽካ::

ፍትሬቱሳ አብቶ ሊሚፅጙስታ ማንዲጙ እንፅኺ ኽብፂውሳ አሉምቶ ዴሜክጝዴስ ፌይኹስ አሬሳቻንትካ እንሴስካዋ ሌፍፅጝስ፣ ፅኻራዋ ስኹፅጝስስታ ዴኖ ሊሚፅጝዳ አሴሜርጝጝስ አኮሜችስታው ቴግባርዳ ኹን ቴኬምስታንትካ አኽጝስ ጛው ኬቤሊታጊ ዝኩኽ ልቕልቕቲ ይስጝፃው አኽⶓ ጉሽካ::

ዊዛሩ ሽታ ስጋትስስታ ሲኪኪኒስ ካንታሺኑ ዙራሙሪ ናካዳ ይሴን ፍትሬቱሳ አብቶ ሊሚፅጙ እንፅኺስ ኪሴ ሜዜጌብፃማ አሬሳቻንትካው ዝኩዊኒዳ ኬሻንቴ ቴስፌ እይⶓ ቶኬምካ:: ኬቤሊኩ ዎታትካኪላ ሊሙኽ ፍትሬቱ አብትዳ እንፅኺውሳ ድሎ ፌቴርጝስ ይኮኖሚው ቴኬምስታንትካ አኽⶓ ዲብስካ::

ዲቪሲኒ ኬቤሊው ግብርኒ/ፅ/ጝናሱ አላፊ ደርበው በላይነህ ኬቤሊታ ጉዲስትኹሳ ብቴ አንኬባኬብጝ፣ ሺሽርስትኹሳ ብቴ እፃማ አቒውስታ እንሴስካው ኔክትጚዴስ ኔፃ ፄውጝ ትኩትስ አኮሜችስታው ቴግባር አኽⶓ ጌሌፅካ::እንዴስ ቤዴራ እንፃኽስስትኹሳ እርኬኖ ኬሽጝፃማ ግቢትጝስ ሴስታ ትኩሚ አንኩዋ ኪሎ ሜትሮ አኮሜችⶓ ጉሽካ:: ኬቤሊዳ አግስታው ተፋሰስዳ 280 ያኻንኩ ዎታትካ አችትጜካማ እንፅኼ ፌቴርካማ ቴኬምስታንትካ  አኽⶓ ጌሌፅካ::

2018 ምርቱ ዝቤንዳ እንፃኽስስትኹ ፍትሬቱሳ አብቶ ማንዲጙ ቴግባር አኮሜችስትኹ 28 ሄክታር ብቲዳ ይንታው ችኹ ወክትዳ ሊሊትጙኽሳ ችግኙሳ አይኔቶ ቴኬልጝስ ቴርትⶓ ኽይትጝፄካ::

ልማቱሳ ሜሳሪ ዲጋያታ አሬሳቻንትካ ካሲኑ ካሲስ ዙርሜ እይጝስ ኩስጜካማጊ አኽⶓ ጌሌፅካ::

ዱቪሲኒ ኬቤሊው ፍትሬቱ አብት ጉዲስታማ ትክምዴስ ሴጋ ያኻሺኹ ያኹኒውላ ዙርፃማ ሊሚፅጝስ እንፃኽስስትኹ ቴግባርስ ኩፅኒ ኬፍቲኒ ኪሲ ሜዜጌብስትⶓ ጉሽካ:: ኬቤሊታ ሊሚፅጝስ ካሊስታው ፍትሬቱ አብትዳ ቴኬልስታው ችግኙ እንፂጝ አሜት ቺፋ ጌቴማኩ አኽⶓ ቶኬምካ:: እስጜኪላ ወረዳ ቢዲሪዳ እይጝስ ዳላውሳ ችግኙሳ ፌሎስታ አይር እግልታሊ አስሜምጛውሳ ፌሎ ዲግሳያታ ካሴ ዲግስካ::

ዳንግሊ ወረዳ ግብርኒ/ፅ/ጝናሱ ትክትሊ አላፊ አዲሱ አለሙ ወረዳዳ አግስታንኩ 29 ኬቤልካዳጊ ፍትሬቱሳ አብቶ ሊሚፅጙ ቴግባር አኮሜችስታማጊ አኽⶓ እርዳትፅካ:: ወረዳዳ 64 ተፋስስካዳ ፍትሬቱሳ አብቶ ሊሚፅጙ ቴግባር አኮሜችስታማጊ አግስቴ:: 4 ሊኻ ሄክታር ብቲዳ ኽብፂውሳ እርኬኖ ግቢትጙ ቴግባር አኮሜችስትⶓ ጉሽካ:: ልማቱ ኬችካስ አሬሳቻንትካዋ አችትጝፅጝስ 22 ሄክታር ብቴ ሺሽርስትኹሳ ሊሚፅጝስስታ 22 ሄክታር ብቲዳ ክትሮ ግቢትጝስ አኮሜችስትኹ ቴግባር ይስጝፃው አኽⶓ ጌሌፅካ:: እንሳ ዜጌቤ ቴርስንኹሳ ሳቶኺስታ 163ሻይ 115 አቒው አይል ፍትሬቱሳ አብቶ ማንዲጙ እንፅኺዳ አሴቴፍጝⶓ ቶኬምካ::

ትክላሊስ ዎክታዊስታ ታምብ ታምቡ እንፅኻ ፄውጝዴስ ፊጝስ ትኩትስ ዊዳፊስ ፍትሬቱሳ አብቶ ሊሚፅጝስ አኮሜችስታው ቴግባርዳ ይንታው ችኹ ወክትዳ 39ሻይዴስ ጃላ አቮካዱሳ ፌሎ እንቲታኪ 125ሻይ 300 ቡኑሳ ፌሎ ቴኬልጝስ ቤዴራ ቴርት ፄውስታማጊ አኽⶓ ኽይትጝፄካ:: ኬቤሊ ቺፋ ዝኩኽ ፋይ ኬፍናማ ዳንጉዋውሳ ዴሜካ ግብርኒው ሜምሪኪ ያኻ ምንግስታዋ ያኼካያስኩ አችትካ ፌሎ ዲግሳንታ ካሴ ዲግስካማ ዙርሜ አግፅⶓ ቶኬምካ::

እንዴስ ቤዴራ ሰላሙ ችግር ምክንያታስ ላጛ አሜታስ እጄሺኹ ፍትርቱሳ አብቶ ሊሚፅጙ ቴግባር እንዳ አሜትዳ ኩፅኒ እንዳራኪ ችግራ ጋቲታ ትኩት እይስታማ እንፃኽስስትኹ እንፅኺስ ይስጝፃውሳ ዋይሜ ሜዜጌብፅጝስ ውላጊ ጜዋንትስ እንፃኽስስታማጊ አግስታው አኽⶓ አቶ አዲሱ ቼሜትጝፄካ::