ሰላሙ ችግርስ አቲንኹ አብት

ታደለ አጋጄ

ይቶፒያዳ ሚንችካ አቓ ግብርካስታ ፍትሬትኩ ቱሪስቱ ጉስፅካ ስፍርካ አግስታና:: ቱሪስቱ ጉስፅካ ስፍርካዋ ቱስታው ዳድስ አንኬባኬባማ እሚጝስ ሚፂው አግፅፃ ፄውጝስ ቴኬምስታንኩ ዝኩና:: እሊውሾስ ዴሜካ እይስትኹሳ ፍትሬቱሳ አብቶ ቱስቲስ እሚጝዳስታ ሚፂዉ አግፃ ፄዉጝስ ቼጌርስታንኩ ልቓ ጋቲንኩዊያኽ:: ዋሺኒኪ ይቶፒያው ቤንዳ ዝኩኽሳ ፍትሬቱ ቱሪስታ ጉስፄ ስፍሬ ጉድጛ አንኬባኬባማ እሚጝስ ፋይታውሳ ልማቶ ዋኽትጝፅጝስ አብቱ አግፃ ፄዋማ እሚጝ ፋይፃንቲያኽ:: አዊ ብሄረሰቡ ቺፅጝፂዳ ሚንችካ ቱሪስቱ ጉስፅካ ስፍርካ አግስታና:: እኒጛ ክቻዴስ ቻግኒ ኬቴምዳ አግስታው ዶንዶር ፉዋፉዋቲ እምፕልያኽ::

ፉዋፉዋቲ ቻግኒ ኬቴምዴስ እምፕሎ ኪሎ ሜትሮ እንዜጙኒዴስ ፋሌንጋ “መተለይ” እስታማ እቑስታው ስፍሪዳ አግስቴ:: ቻግኒዴስ ልኩስ፣ ብሽክሊሊታስ አኹኪ መኪናስ እንዜጝጝስ ፉዋፉዋቲሾ ታምብጝስ ካሊስቴ:: ዶንዶር ፉዋፉዋቲ ዶንዶር ብንዴስ ጁዋማ ፌቴርስታው አኽጝስ ዶንዶር ናውሳ እቑፄ አግፃ:: ዶንዶር ችኹ ዎክትዳ ፉዋፉዋቲዴስ ጌማው አኹ ትሼ ፌቴርጝስ “ሿ” ናውሳ ድምፆ እንኮኽፅጝስ ጌሜ:: 35 ሜትርዴስ ጃላ ዋውርስታማ ጌሜ:: ችኹ ዎክትዳ ቱሪስትካ ዶንዶሮ ካንትጝስ አንኩሌ ፍትኽፃና:: ጌሬምፃውሳ ፉዋፉዋቲውሳ ፍትሬቶ ጌሬምስትጝሰ እንፅኺስ ቼኔክስትኹሳ አንኩሌ ዴስፃና::

ዶንዶር ሜስኬሩምዴስ ዳር አርፌኺስታ ሚንችካ ቱሪስትካስ ጐቤንስታው ስፍሪያኽ:: ሳኑ ዋክትዳ ኩፅኒ አኹ ሜቴን አኹዋቲስ አሬሳቻንትካ ቴኬምስታኑ አኽጝስ ፉዋፉዋቲው ሜቴን ማልጛ ኔኬታው አኽጝስ ጐቤናንትካ ስፍሪሾ እንዜጛላ::

ዶንዶር ብኑ ዙራሙሪ ሳኑዳ አኹዋቲስ ሾፌንስታው ስፍሪ ያኹስ ዙራሙሪኩ ዝኩዋንትካ ብኑሳ አኾ ቴኬምሰትጝስ ሊሊትጙንኩሳ ሴብልካዋ አሜሬታና::

አቶ ለውቴ ተሾመ ቻግኒ ኬቴሙ ዝኩዋንትካኽ:: ዶንዶር ፉዋፉዋቲ አምፕዴስ ሌትናማ ጌሙኒዴስ ፋሌንጋ ኩክሪዳ ጌሬምፃውሳ ፉዋፉዋቴ ፌቴራው ስፍሪ አኽⶓ ድኹዌካ:: ፉዋፉዋቲው ናቕትዳ ካዌን  ዝኮ:: ፉዋፉዋቲ ችኹ አርፊዴስ ጄሜራማ ዊንቲኬ ኺስታ ማልጛ ዴስፃው ዙራሙሪ አኽⶓ እንክርፄካ::ሊሊትጙንኩ ዙራሙርካዴስ ይንታንኩ ጎቤናንትካ ስፍሪሾ ይንቴካማ ጎቤናሺና:: ጐቤናንትካስ ሻየስታ ቡኖ  አችትጜካማ ዋያሺንኩ  ዎታትካ እሺና ኑንኩ አቶ ለዉቴ ናካ ኩፅኒ ጐቤናንትካው ቼፍ ኔኬታማጊ አንትⶓ ዙሜካ:: ሻየስታ ቡኖ ዋያሺንኩጊ ቲሪፅካ:: ፉዋፉዋቲው ዙሪዳ ሰላሙስታ ፄትቲው ችግር ሲጊፃማጊ አኽጝስ ስፍሪ ማልጛ ቓቔፃማጊ አኽⶓ ቶኬምካ::

ዶንዶር ፉዋፉዋቲዳ ኻሱሳ ፕሮግራሞ ቴርሳንኩ ካስካማ ፍትኽናና፣ ፎቶ ጁዋና:: ቪዲዮ ኬሬፅስታና:: ቻግኒ ኬቴሙ ዙሪዳ አግስታንኩ ክንቲ ጝናዳ ያኻ እሊውዴስ ይንታንኩ ክንታንትካጊ ፉዋፉዋቴ ጎቤናሺኑ አኽⶓ ዙሜካ::

አቶ ለውቴ ዙሙኑውስታጊ ፉዋፉዋቴኺስታ ታምፃው ዳድ ኮብልስ ግቢትስታ:: ፋይስታው ስሩ ልማት ዋኽትጛ፤ ያኼስጉ ፉዋፉዋቲ ናቕታዳ አብትዌንካስ እይስታማ ኬሽኹ ፍትኽፂ እንፃኽስትጝ ቱስታው አኽⶓ ጉሽካ:: ዶንዶር ፉዋፉዋቴ ጐቤንጝስ ፋያንኩ ስፍሪሾ ይንቴካማ ጐቤናንታ እንፅኼንቶ ፌያፌይጝፅካ::

እሊው ቻግኒ ኬቴሙ ዝኩዋንቲ ዳንኤል ያዘው ዶንዶር ፉዋፉዋቴ ቻግኒ ኬቴሙ ቺፅጝፂ ትኩቶ እያማ ሊሚፅጝ ቱስታው ስፍሪ አኽⶓ ዙሜካ:: እንዴስ ቤዴራ  ፉዋፉዋቲው ዙሪዳ ፍትኽፂ እሺኾ:: ሚንችካ ጐቤናንትካ ስፍሪሾ ካስጝስ ጐቤናሺኑ ስፍሪ እሺኹ ናካ ኩፅኒ ጐቤናንትካው ቼፍ ኔኬታማጊ አንትⶓ ድኹዌካ::

“ፉዋፉዋቲ ፃንኩትስ እምስታያ” ኑንኩ አቶ ዳንኤል ፉዋፉዋቲው ናቕትዳ ዎታትካ እችትጜካማ ሻይውሳ ክቤቦ እንፃኽስታሺንኩ ባይካማ ፊጝስ ጐቤናንትካው ቼፍ ኔኬታማጊ አንትⶓ ዲብስካ:: ቻግኒ ኬቴምዳ አግስታንኩ ቱሪስቱ ጉስፅካ ስፍርካዳ ኬሽኹ ዶንዶር ፉዋፉዋቲ አኽⶓ ቶኬምካ:: እንሳ ፍትሬትስ  ጌሬምፃውሳስታ እንካንስታውሳ ዙራሙሬ ማልጛ ግዲትፃማ እሚጝስታ አንኬባንኬብጝ ቱስታው አኽⶓ ጉሽካ:: ፉዋፉዋቴ ፃንኩትስ እሚጝስታ ትኩቶ እይካማ እንፃኽስትጝስ ኬቴሙ ኽሳንቲ ቱሪስታ ታምብፃ ስፍራ ፄውጝስ እንፃኽስትጝ ማንዲስታው አኽⶓ ዲብስካ::

ቱሪስትካ እምፕሎ ዙራሙሬ ጐቤናኒስ ዋኽትጝጝ ቱስታው ስሩ ልማት ማልጛ ፋይፃንቲ አኽⶓ አቶ ዳንኤል ጉሽካ:: ዙራሙሪው ዝኩዋንትካ ጜዋንቶ ካፅካማ ስፍሬ ማንዲጝስ ጐቤናንትካዋ ኬፄርካማ እንፃኽፅጝ ፋይፃው አኽⶓኪላ ቶኬምካ:: ቻግኒ ኬቴሙ ዝኩዋንትካስታ እሊኩ ዙራሙሪኩ እምፕልታቕስ ማልጛ ጐቤንስትጝስ ፋይስታው ስፍሪ አኽጝሰ ፋይስታውሳ ዲቦ ዋኽትጝፅጝስ ኬሽኹ ቱሪስቱ ታምብፂ ስፍሪ አኽጝ ቱስታው አኽⶓ ድኹዌካ::

ሚዲያው ውማይቴንካ  ቱሪስታ ጉስፅካ ስፍርካዋ አቕትጝፅጝስ ኬፍቲኔ ታምቦ ፊትጝጝ ቱስታው አኽⶓ ዲብስካ::

ኬቴሙ ቺፅጝፂው ባይልስታ ቱሪዝሙ ፅፌት ጝና ፉዋፉዋቲስ ሊሊቴ ትኩቶ እይጝስ እንፃኽስትጝ ቱስታው አኽⶓ ጉሽካ:: ባይልስታ ቱሪዝሙ ፅፌት ጝና ፉዋፉዋቲው ዙሪዳ ፌፄምስታንኩ ችግርካስ ዙራሙሪው እምፕልታቕስ ሼውቴ ፌቴርጝስ ማንዲስታታ ፄውጝስ ችግርስ ኽዮ ፋይጝ ቱስታው አኽⶓ ጉሽካ::

እሊት ቻግኒ ኬቴሙ ዝኩዋንታ ዊዛሩ ውበቴ ካሳሁን ዶንዶር ፉዋፉዋቲ ሚንችካ እምፕልታቕስ ጐቤንስታሺኹ ስፍሪ አኽⶓ ዙሜካ::

ፉዋፉዋቲው ዙሪዳ ሻየስታ ቡኖ ዋያሺንኩ ባይካማ ፉኒዴስ ፋሌንጋ ጐቤናንትካው ቼፍ ኔኬትⶓ ድኹዌካ:: ኮግሚውስታ ሜስኬሉ ጊዝዳ ሚንችካ ኬቴምኩ ዝኩዋንትካ ስፍሪሾ ካስጝስ ጐቤናኑ ስፍሪ አኽⶓ ቶኬምካ::

ዶንዶሮ ኬሽኹስ ቱሪስቱ ጉስፃ ፄውጝስ እፄ እፄካማ ፃንኩት ማንዲስታማ አንኬባንኬብስትጝ ቱስታው አኽⶓ ድኹዌካ::

ቻግኒ ኬቴሙ ቺፅጝፂው ባይልስታ ቱሪዝሙ ፅፌት ጝናዳ ቱሪዝም ልማቱ ውማይቲ ተሰማ ያዘው ዶንዶር ፉዋፉዋቲ ፄትቲው ችግርስ ጐቤናንትካ ስፍሪሾ ካስካማ ፍትኽናቲንታ ፄውስትⶓ ዙሜካ:: ዎታትካ አችትጜካማ ሻየስታ ቡኖ ዋያሺንኩ ፌቴርስትኹ ፄትቲው ችግርስ አግልግሎቴ እይⶓ ቲሪፅካ:: ግቢትስትኹ እፂጊ ፌሬሳማ ፉዋፉዋቲ አግልግሎቴ ዴስ ሴጋ ያኻ ንካ::

ቱሪዝም ፅፌት ጝና ዳዶ ክችሳማ፣ ሜብራቶ ሚፃማ እንፃኽስታሺኹ አኽⶓ ቶኬምካ:: ዙራሙሪዳ ዝኩኽ ፄትቲው ችግርስ ፍትኽንጝስ ካሊስታያሱ አኽⶓ ጌሌፅካ:: ዙራሙሪኩ እምፕልታቕስ ሼውቲ ፌቴርስታማ ጐቤናንትካ ስፍሪሾ ካስካማ ጐቤናንታ ፄውስታው አኽⶓ ጉሽካ:: ናካዳ ኩፅኒ ፄትቲው ችግር ዝኮ:: ፍንሾስ ብቴ ቱስታው ዳድስ ሊሚፅጝስ አችትጜካማ እንፃኽስታንኩሳ ኬፄርጝስ ቱሪስቱ ጉስፂ ስፍሪ ፄውጝስ እንፃኽስታንኩ አኽⶓ እርዳትፅካ::