ክብሪ አቬቫ እንኩርፂ

አለሚቱ የኔት

እምፕል ዙራሙሪው አክኺ ዝኩዋንትካውሳ ባይሎስታ ወጐ አቕትጝፅጝስ ኬፍንኹ ፍሺ ዝኩኽያኽ:: እሊውሾስኪ ኽታዊኒ ጊዝስ እሺንኩ ክማንትካውሳ ንባሮኪላ እሚካማ አግስታንኩ ድሳላኪ:: አክኽካ ኽታዊኒ ጊዙ ንባርካዋ እሚካማ እጂጝስኪላ ክምንትስ ንባሮ ፌያፌይጝፅጝስ ፍሻኑ ጌንዜብኪላ ኬፍቴና ያኼ:: ቻይናው ጝናኻሱ አቪቪው እንኩርፂኪላ 1 ትኩሚ 5 ሚሊዮን ዩሮስ ዋይስትጝስ ካላ::

“ፄጌርስ ሊሊታ ያኹኽ” 18ንቲ ዝቤን ቤናሱ ቻይናው ጝናኻሱ አቪቪው እንኩርፂ 1980ስ ልቓ ሊኽ ፓውንድካስ ጄውስታማ አክኺጝናዳ እንኩርስታማ እጄ:: 60 ሴንቲ ሜትር ሌጌሴምት ዝኩኽ ድቫፂጊሪ  እንፂጝ ንኹ ማሴሮ ፄጌራው አቪቪው እንኩርፂ ኪያንሎንግ ንጉሱ ክሙ ዝቤንስ ግቢትስቱኺያኽ::

ማሴሩኪላ ኻርቻኻውስታ “ክሬን” እስቴት ጉርጉሞ ሌጌሴማ ቻኻው ሜሴልስ ብሩስታ ወርኩ ኬሌምስ ግዲትኹያኽ::

እን አቪቪው እንኩርፂ እምፕል ቔድፃማ አኬማው ውማይቲኒ ጄዋማ ጄርስ ስቶቴ እይኹ ያኻማ አግስታ:: እን ኽታዊኒ አክኺ እንፁኒ 100ሻይ ሚንቹኒ ዴሜካ 150ሻይ ዩሮዋ ፍሼ እስታማ ጌሜትስታሺⶓ ቢቢሲ ዜጌባ:: ዲብኩፅኒ ቻራቲዳ አግስቱንኩ ኽታዊኒ አክኽካው ውማይቴንካ ማሴሩውሳ ታሪኮ ፂኒስካማ ታንባኒስ ዋይሚ ማልጛ ኬፍቴና ያኻ::

አቪቪው እንኩርፂ ስልኪስ ፄውስቱኽ ቻራቲ እምፕል ጛርት አቕስ ትክላሊ ዋይሚ 1 ትኩሚ 5 ሚሊዮን ዩሮስ /78 ሚሊዮን ብርስ/ ዋይስታ:: ቻሬትፃንቲ ኩባንያ ሚንችካ ቻራቴ ቤንጛንትካ ቻይናዴስ፣ አሜሬካዴስስታ ዩናይትድ ኪንግደምዴስ አክኼ ጄውጝስ ሞጌትጛኒስ እሺጝ አቕስታ::

ማሴሩዳ ሳሊስቱንኩ ቻኽካኪላ ሊጊሲሜ ድሜስታ ልግስኔ ካንትፃንኩያኽ:: አቪቪው እንኩርፂዳ 1736-1795ኺስታ እሺኹሳ ኪያንሎንግ ንጉሱ ክሙሳ ምልኻቶ እንኩራ::

ቻሬትፃንቲ ኩባንያኪላ ምስሊ ማሴሩ እንዝቤንስ አግስትጝ ማልጜ ጌሬምፃዊያኽ ንጝስ ጌሌፃ:: እንታኮው አቪቪው እንኩርፂ አንዝቤንዴስ ፋሌንጋ ግቢትስትⶓ ካንትፃው ንባር እላቲው አኽⶓኪላ ቶኬማ:: አቪቪ እንኩርፂው ጜዋናኪላ ማሴሩ እንሳ ላኬውሳ ዋይሜ ፍሻውያኽ ናማ ጌሜታያሱ አኽⶓኪላ ዙማ::