ቱስታ ጋቲታ ፄውስታው ዋይሚው ክብርናቲ እግስ ካሲፃውያኽ

ንግስቴ ተስፋ

ወክታዌ ችግሮ ፌይጝስ  ብብራንቴ  ክብሳማ ቴኬምስትጝ ሜሜሪታ እንኩርስታ:: ትራንስፖርቱስታ እሊኩ አገልግሎቴ አግፅፅካ ኾትካዳ ፄውስታው ዋይሚው ድምክኒ እግስ ካሲፃው አኽⶓ ብሄረሰቡ ጌቤሉስታ ጊፅ ልማቱ ሜምሪ አቕፁኻ::

ምንግስት  ብብራንቴ ክብስጝስ ቴኬምሰታን ንስጉ ብብራንቲ እላኽስታ ክብርያኽ ናው ምክንያቲስ ኩፅኒ እምፕልታቕዳ ይኮኖሚውስታ ማቤራዊው ቻኒሰት ታምባማጊ አኽⶓ ብሄርስቡ ቺፅጝፂው ዝኩዋንትካ ክሬቴ ዲግስካ::

ወክታዊ ንቫር ካንትፃውስታጊ እምፕል በርሚል ድፍድፍ  ብብራንቲ ዘይት ሊኻ ፅክራ እምፕላ ዶላርዴስ ጃላ ያኻ:: እን ዋይሚው ኪሲ ሹኻ አሜታዴስ ናቴ አቫላምቲ ጊዝስ ኬፍቲኔ ድምክኔ ካንትፅኹ አኽጝ ጌሌፅስታማጊያኽ::

አዊ ብሄረሰቡ ቺፅጝፂዴስ ጉዳዮ ካንትኹስ ስልኪስ ዙሚትጝፅኑክ ክቻዴስ ዊዛሩ ይቶፒያ እርኪሁን ብብራንቲው   ጉዳይ ሚንች ይኮኖሚው ቻኒስትካዋ ሲፍፅⶓ ጉሽካ::

አሴሜርጙኑ እንፅኺው ዜርፍ ብብራንቲስ  አገልግሎቴ አግፃኑስታ እያኑ አኽጝሊ እምትጛማ ነዳጅ ድስጙስታ ኬቤርጙ ምክንያቲስ ኩፅኒ እንፅኼ ቲሪፅጝስ ጌዴድስትⶓ ዊዛሩ ይቶፒያ ዲብስካ::

ቻግኒዴስ ዚጋሜ እንቲታኪ ዚጋሚዴሰ ቻግኔ ጊፁ እንፅኺስ ትራንስፖርቶ ቴኬምስታንኩ ዊ/ሩ ይቶፒያ ቻናኑ አክኺስ እፅፍዴሰ ጃላ ኬያንኩ አኽጝስ ፊቲዴስ ኪሳሪ ሚንዛናኒ እንፅኼ እንፃኽስትጝስ ቼጌርስትⶓ ጉሽካ::

አግስታኑ ዙራሙሪዳ ሜብራት ሼውታ አግስታቲውስታ ሜብራቱ አይልስ እንፃኽስስታንኩ ውፍቺ ጝንካ ልቓ አኽጝስ  ብብራንቲስ እንፃኽስስታንኩ ውፍቺ ጝናዳኪላ እምፕሎ ኪሎ ላጜታ ብርስ ፍቻሺኹ ናካዳ 25 ብርዴስ ጃላ ታምብⶓ ዲብስካ::

እሊው ካንቴ እያንቲ አቶ መሰረት ሽታውኪላ ምንግስት ክብስትካማ ቴኬምስታን ናውሳ ሜሜሬ እይስጉ እምፕልታቑላዳ ኩፅኒ ብብራንቲ  ክብርያኽ ናው ምክንያቲስ ይኮኖሚውስታ ማቤራዊ ልቕልቕቲዳ ጉዳት ታምባማጊ አኽⶓ ጉሽካ::

አቶ መሰረት ናኑውሰታጊ ትራንስፖርቶ ሼውታ አግፃቲንኩ አኽጝስ አግስታኑ ዙራሙሪዴስ አዩ ጉዋጉሲ ወረዳዋ ታምብጝስ 4ሳታዴስ ጃላ ልኩስ እንዜጛንታ ጌዴድስትⶓ ዙሜካ:: አዩዴስ አዚኔ ኬቴሞ ታምብጝስኪላ 50 ብሮ  ቤዴራ ኬያሺንኩ ናካዳ 200 ብሮ ኺስታ ኬየካማጊ አኽⶓ ቶኬምካ::

ስም ጌሌፅስታታ ፋያያሱ እንዝርፃንቲ ዴሜካ ናኪኒ ወክትስ ማደይካዳ ብብራንቴ ጄውጝስ ካሌካያስኩ አኽጝስ እንፅኼ ቲሪፃኑዴስ እጋፊስ ቻራቻራንኩዴስ ክብሪስ ጄዌካማ ታሪፍዳ ድምክኔ ፄውጝስ ጌዴድስታንኩ ሹፌርካ ዝኩⶓ ዲብሳ::

ሹፌር ናኑውስታጊ ብብራንቴ  እጋፊ ዳድስ ቻራቻራንኩ ጛርት አቕዴስ ጄውጝስ ትራንስፖርቱሳ አግልግሎቴ እይጝ ዴሜካ ኬፍቲኔ ይኮኖሚውሳ ቻኒስቶ እምፕልታቕዳ ፌቴራማጊ አኽⶓ ቶኬምካ::

ችግር ባስጛታ ፄዋው ምክንያቲዴሰ ዴሜካ እጋፊ ዳድስ ቻኒስትኹሳ ብብራንቲውሳ በርሚሎ እሚካማ እምስታንኩ ጛርት አቕዳኪ ያኻ ብብራንቴ በርሚልስ ዋያኒስ አግስቱንኩዳ ካፅስታው እርምጂ ሳሴር አኽⶓ ቶኬምካ::

አንኪሺ ጉዋጉሲ ወረዳ  ብብራንቲ ማደይው ዎኬልስታንቲ እንፅኼ ፌፄምፃንቲ አቶ አስራት ዘመኑ ግ/ቤትዳ ማደይ ቲሪትጙኒዴስ ሹኻ አሜታሳ ቼፍፅⶓ ጌሌፅካ::

አቶ አስራት ዘመኑ እዩኑ ጊሊፂዳ ግ/ቤት ኬቴምዳ አግስታው ማደይ ብብራንቴ ክብስጝስሰታ ፍታዊ ዳድስ ታምፅጝስ አቕስታው ያኼስጉ ናኪኒ ወክትስ ክቻክቺ ምስራክዳ ፌቴርስትኹ ዎሬም ኩፅኒ ብብራንቴ ዋኽ አክምስስታ ቴኬምስታንትካ ፋያኑ ሜቴንስ ዲግስጝስ ቼጌርስትⶓ አቕፄካ::

ብብራንቴ ዲግስጙ ሜቴን ኔኬትስጉ እምፕል ሊትሩ ዋይሚ ኩፅኒ 142 ብርዴስ ኽሳያሱ አኽⶓ ጉሽካ::

አቶ አስራት ናካዳ ቲኑ ዜርፍስ፣ ውፍቺ ጝናስ፣ ግብርኒው እንፅኺስ እንቲታኪ እዝብስ አገልግሎቴ እያንትካስ ቢዲሪ እይስታው አኽⶓ አቕፄካ::

አዊ ብሄረሰቡ ቺፅጝፂ ጊፁስታ ጌቤል ልማቱ ሜምሪዳ ኤንስፔክሽን ኬቹ ቴቬቬርጝፃንቲ አቶ ዘመኑ አበበ ጛሾስ ብሄረሰቡ ቺፅጝፂዳ 47 ብብራንቲ ዘይቱ ማደይካ ዝኩⶓ ጌሌፅካ::

ብሄረሰብ ቺፅጝፂታ ብብራንቴ ፍታዊስታ እጋዊ ዳድስ ቴኬምስታንትካስ ታምባታ ፄውስታማጊ አኽⶓኪላ ጉሽካ::

እጋፊ ብብራንቲው ዚዊዊርጚዳ አሴሜርጙንኩ 29 ታራታርስታንትካዳ ክስ ጄሜርስታማ ሹኻዳ ውሳኒ እይስትⶓ ኽይትጝፄካ::  27 ታራታርስታንትካ ዴሜካ ውሳኒውሳ ጌርኮ ማንዲትጜካማጊ አኽⶓ ቶኬምካ::

ብሄረሰቡ ቺፅጝፂታ እጋፊ ደድስ ዜዌዌርጛሺኹ 318ሻይ 760 ሊትር ናፍታስታ 51ሻይዴስ ጃላ ቤንዚን ቼፍጚዳ እሼማ ቱስቲ ዳድስ እምፕልታቕስ ዲጋታ ፄውስትⶓ ጌሌፅካ:: 370ሻይ ሊትር ነዳጆ እጋፍካ ጌፄንዴስ ኪሚስታማ እዝብስ ዲጋታ ፄውስትⶓ ቶኬምካ::

አቶ ዘመኑ ጊሊፂታጊ ብሄረሰብ ቺፅጝፂታ ብብራንቲ ጊቢልትጚዳ እጋፊ ቴግባር ፌፄምስታቲታ ውማይቴንካስታ ኮሚቴ ቲሪትጛማ ይሴን ቼፍጝጚ ካስጛማጊ ያኹኒውላ እጎ ኬቤርፅጝስ ኩፅኒ እምፕልታቑ ቲቪቪርጚ ፋይፃንቲ አኽⶓ ሼውፅካ::

አዊ ብሄረሰቡ ቺፅጝፂ ዳዱስታ ሎጂስቲክስ ሜምሪው አላፊ ትላሁን ሰቴ ጛሾስ ብብራንቲ ዲግስጚውሳ ችግሮ አጋታሚታ ቴኬምስትካማ ትራንስፖርቱ ዜርፍዳ ችግሮ ፌቴራንኩሳጊ እርምጄ ካፅጝስ እንፃኽስስታማጊ አኽⶓ አቕፄካ::

ብሄረሰቡ ቺፅጝፂዳ አግስታንኩ 17 መናሃርካዳ ይሴን ሲፍጚ ፄውስታማጊ አኽⶓ ጌሌፅካ:: እንጚስኪላ መኪናዴሰ ቼቼቕፅካማ ዋያኒስ እምስትካማ ኪፅስትⶓ ጉሽካ::

ትራንስፖርቱ ሜምሪ ፌኬዳውዴስ ፌያፌይጛማ አግስታውሳ እንዝርፃንቴ ታርጋዋ ኽይጝዴስ 15 ጌርካሳ እንፅኼ አጌድⶓ ኺስታ ይሴን ቼፍጝጚ ካስጛማጊ አኽⶓ ቶኬምካ::