ባስዳ ጄፍ

ታደለ አጋጀ

አማኻሪ ክልልዳ ፌዩንኩ አሜትካዳ ኬሴትስትኹ ጋቻስ እምፕልታቕ ቲኑሳ አግልግሎቴ አግፃቲንታ ኬፍቴኔ ቻኒስቶ ታምፃ:: እምፕል ስፍሪዴስ እሊው ስፍሪሾ ካስጝስ እክምኒውሳ አግልግሎቴ አግፃቲንታ ፄውጝስ፣ ቹትካውስታ ስራስሪው ክርጝ ዴሜካታስታ ፌያፌይጛንትካ ቑንዝካ እሳንጛንታ ኬፍቲኔ ቻኒስቶ ሲፍፃ:: እክምኒው ኾት ጉዲስትጝስ፣ እጆ ዲግስጝጚው ችግርስታ እክምኒው አክኽካ ሌግስ ድጙስትጝስ እምፕልታቑ ቲን ባስኹ ችግርዳ ታምባታ ፄውስታ:: እንስኪላ ሚንችካ ቹትካ ዳድዳ ካሜናንታ ፄውስታ:: ምንድራሺው ወረርሽስ ሚንችካ እምፕልታቕ እምስትካ:: አዩ ጉዋጉሲ ወረዳ አምቢሊ ኬቤሊ ክልልዳ ኬሴትስትኹ ጋቻስ ሚንች ችግር ታምብኹ ዙራሙሪያኽ:: ዙራሙሪኩ ዝኩዋንትካ እሺኑ ስፍሪዴስ ፌኔኬልጜካማ እምፕል አሜትዴስ ጃላ እሊው ስፍሪዳ እጂካ::

ስልኪስ ካንቴ ታምፁንኩ ክቻዴስ እምቢያለ ጋሺ ዙሙኑውስታ አምቢሊስታ ዙራሙሪኩ ዝኩዋንትካ 2016 ም/አታዴስ ጄሜርካማ ማልጛ ቺጊርፂ ስላሙስታ ፄትቲው ችግራኻዳኽ:: ጋቻ ፌቴርስትኹ ዎክትዳ ሚንች አብት ሌግስ ድኻ፣ ሚንችካ እምፕልታቕ ዴሜካ ክርካ::  ፌኔኬልጜካማ እሊው ዙራሙሪዳ እጂንኩ እምፕልታቕ ዙራሙሪሾ ዙሩኒዴስ ፋሌንጋ ቲኑሳ አግልግሎቴ አግፅጝስ ማልጛ ቼጌርስትⶓ ድኹዌካ::

አቶ እምቢያለ ኑኑውስታጊ ሰላሙስታ ፄትቲው ችግር ካሜናንታ እክምኒውሳ አግልግሎቴ አግፃቲታ ፄውስታ:: ዶንጌቱንኩ አይልካ ታምፁኑ ጉዳት ማልጛ ኬፍቲኒያኽ::

አምቢሊ ኬቴምኩስታ ዎሌን ኬቤሊኩ ዝኩዋንትካስ አግልግሎቴ እያሺኹ ቲኑ ኬላ ሌግስ ድጙስታማ እክምኒኩ ሜሳርካጊ ትክምዴስ ሴጋ ያኼካ:: እምፕልታቕ እክምኒውሳ አግልግሎቴ አግፅጝስ ሚንቾ ዳዶ እንዜጝጝስ አዚኒሾ አኹኪ ሌማሾ ካሳና:: ቹትካ ዲጊዳ እክምኔ አግፅጝ ቱስታው ያኹኒውላ እክምኔ አግፅጝስ ዳዶ ፉኑ ሜካ ሚንችካ ቹትካ ክርⶓ ዙሜካ::

ታክሲሉ ኬሴት ታምብኹ አቒ እክምኒውሳ ኾቶ ታምባውላስ ብሪ ክቤማ ክሬ:: አምቢሊዴስ ሌማሾስታ አምቢሊዴስ አዚኒሾ ቑንዳስቴንካዋ ያኻ ሼርካ ኹኖ ኻግስ ቡጝስ እክምኒው ኾትሾ ታምፅጝስ ጌዴድስታንኩ አኽⶓ ዙሜካ::

እንዴስ ፍና ቹትካ ክምንቱሳ ሲፋሲፍጜ ፄዋኑ ቲኑ ኬላ ሌግስ ድጙስታ:: ፍሪጅስታ እሊኩ እክምኒኩ አክኽካ ትክምዴስ ሴጋ ያኼካ:: ቲኑሳ ኬላዋ ክራይትጝስ እንፅኼ ጄሜሩኒውላ እክምኒው ሜሳርካ ዋኽትጛኑላ ይጉጝስ እምፕልታቕ ቼጌርስትካማጊ አኽⶓ ቶኬምካ::

ምድራሺ ቑንዚ ወረርሽኝ ሰላሙስታ ፄትቲው ችግርሊ እምትጛማ እምፕልታቖ ቼጌርፃማጊያኽ:: ምድራሺው ቑንዚስ ሚንችካ እምስትጝስ ችኽዳ ግብርኒውሳ እንፅኼ አኮሜቻቲንታ ፄዋማጊ አኽⶓ ቶኬምካ::ጄሜርስትኹ አምቢሊ ቲኑ ጉትፕ እምቢታ አሌድስታማ አግልግሎቴ እያታ ካሲካ:: ቲኑ ጉትፕ አሌድስታማ እክምኒው ውማይቲኒ ሜዴብስታማ እንፅኼ ጄሜሩኒጊ እምፕልታቑ ቲኑ ችግር ኽዮ አግፃው አኽⶓ ቶኬምካ::

እሊት አምቢሊ ኬቤሊዉ ዝኩዋንታ ዊዛሩ አለም ደረሱ ዲጊዳ እክምኒዉ ኾት እላቲዉ አኽጝስ ካሜናንትካዳ ጉዳት ታምባማጊ አኽⶓ ዙሜካ::ቹትካ ክምንቱሳ አግልግሎቴ አግፅጝስ ሌማ ቲኑ ጉትፕሾስታ ግምጃ ቤት ሆስፒታልሾ ካስጝስ አኽⶓ ቶኬምካ:: ዊዛሩ አለም ሼርካ እክምኒዉ ኾትሾ ታምባኑላስ ክርጝካማጊ አኽⶓኪላ ዲብስካ::ስራስሪ ክትባቲዉሳ አግልግሎቴ አግፃኑ ጛርቱ ክሊኒክዳ ሚንቾ ጌንዜቦ ኬይጝስ አኽⶓ ቶኬምካ:: ምንግስት እምፕልታቑሳ ችግሮ እርዳትስታማ ቲኑ ጉትፕ እምቢታ አሌድስታማ እንፅኼ ጄሜራያታ ካሲካ::

እሊው አምቢሊ ኬቤሊዉ ዝኩዋንቲ አቶ ደመላሽ ዳኛው ክልልታ ኬሴትስትኹ ሰላሙስታ ፄትቲው ችግርሊ እምትጛማ ስራስሪ ክትባቴ ዎክትስ አግፃቲንታ ቻኒስቶ ታምፅⶓ ዲብስካ:: ስራስሪ ካሜንስቱንታ ፌያፌይጛንትካ ቑንዝካዋ ካላካልጝጝስ ስራስሪስ እይስታው ክትባቲ ውላ ሰራስሪስ ታምባማጊ ጋቲው አኽⶓኪላ ድኹዌካ:: ቲንኩ ውማይቴንካ ምንግስትስ እይስታውሳ ክትባቴ ዝማቺስ ታምፅጝስ ማልጛ ቼጌርስታንኩ አኽⶓ ጉሽካ::

ስራስሪዳስታ ቹትካዳ ኬሴትስታውሳ ክርⶓስታ እምፕልታቑሳ ቲኑሳ አግልግሎቴ ቼሜትጝፅጝስ ወረዳ ሊሊቴ ትኩቶ እያማ እንፃኽስትጝ ቱስታው አኽⶓ ዙሜካ:: እክምኔ አቲጝስ ክራንኩ አቑሳ ቼፎ ኔኬትጝስ ጄሜርስትኹ ቲኑ ጉትፕ እምቢታማ አሌድስታታ ካሲካ::

ዊ/ሩ ማንተግቦሽ ልክኒ አምቢሊ ኬቤሊዳ ቲኑ ውማይቴናኽ:: እምፕልታቕ ፄትቲው ችግርስ እክምኒውሳ አግልግሎቴ አግፃቲንታ ፄውስትⶓ ጉሽካ:: ስራስሪስ ያኻ ቹትካስ እክምኒውሳ አግልግሎቴ እይጝስ ዋኽትጙኽ እክምኒው ሜሳሪ እላቲው አኽⶓ ቶኬምካ:: አኽጝስኪ ስራስሪስ ዋኽስ ዋኾ ክትባቲ እይስታቲው አኽⶓ ዙሜካ:: እምፕልታቕ ቲኑ ችግርስ  ጄሜርስትኹ ቲኑ ጉትፕ እምቢታማ አሌድስታውላ ይጉጝስ ማልጛ ቼጌርስትካማጊ አኽⶓ ጌሌፅካ:: ሼርካ ሼርቱሳ ሲፋሲፍጜ ፄውጝስ ሞተርስስታ ባጃጅስ እሊውሳ ስፍሬ እንዜጝስ ካሳና:: ጛርቱ ክሊኒክዳ አክምዴስ ጃላ ጌንዜቦ ኬይጝስ እክምኔ አግፃና:: እንታኮው ችግራኻዳ ዝኩንኩ እምፕልታቕስ እምቢትንኹ ኽይ ፋይፃው አኽⶓ ዲብስካ::

እክምኒው ውማይቴንካ እምፕልታቑ አክም ፌኬዳውስጊ እርዳቴ ፄዌካማጊ አኽⶓ ጌሌፅጝስ ወባው ቐንዚስስታ እሊኩ ቑንዝካስ ዲጋው እጁ ዲግስጝጚ ችግር ዝኩⶓ ቶኬምካ::

እንዴስ ቤዳራ እምፕልታቕዳ ታምብኹ ሼው ፅንታው ጉዳትዴስ ጃላ እምፕልታቕ ቲኑሳ አግልግሎቴ አግፅጝስ ማልጛ ችግራኻዳ አኽⶓ  ጉሽካ:: እምፕልታቑ ቼፍ ልክስ እምፕልታቕ አግፃኑ ቲኑ አግልግሎቲ ማልጛ ዜሬቕቲኒ አኽⶓ ዲብስካ:: ምንግስት እምፕልታቑሳ ችግሮ እርዳትስትጝስ ቲኑሳ አግልግሎቴ አግፃኑ ዳድ ፌቴርስታታ ካሲካ::

አዮ ጉዋጉሲ ወረዳ ቲን ፅፌት ጝናሱ አላፊ ተመሰገን ፈንታሁን አማኻሪ ክልልታ ፌቴርስትኹ ጋቻስ ቲኑ ዜርፍዳ ሚንች ጉዳት ታምብⶓ ጌሌፅካ::

ዙራሙሪዳ አግስታንኩ ኬቤልካዳ ቲንኩ ኾትካ ሌግስ ታንኬኑንኩስታ ዳዴኽስቱንኩ አክኽካጊ ዝኩⶓ ቶኬምካ::

ስራስሪስ ክትባቲውሳ አግልግሎቴ እይጝስ አጌላጌላውሳ ፍሪጆስታ ሶላሩሳ ፓናሎ ትክምዴስ ሴጋ ፄውጙ ችግር ታምብⶓ ጌሌፅካ:: ፌቴርስትኹ ሰላሙስታ ፄትቲው ችግርስ ስራስሪ ክትባቴስታ ቹትካ እክምኒውሳ አግልግሎቴ አግፃቲንታ ፄውጝስ ጉዳት ታምብⶓ ጌሌፅካ::

ሚንችካ እምፕልታቕ ቲኑሳ አግልግሎቴ አግፃሺኑ ቲኑ ጉትፕዳ ታምብጙ ችግርስ ወባው ወረርሽኝስታ እሊኩ ቑንዝካ ኬሴትስታንታ ምክንያታ አኽⶓ እርዳትፅካ::

ጋቻው ምክኒያቲስ ወረዳዳ 11ዴስ ጃላ ቲኑ ኬላስታ እምፕል ቲኑ ጉትፕዳ ጉዳት ታምብⶓ ቶኬምካ ጉዲስትኹሳ ቲኑሳ ኾቶ ዙርፃማ አግልግሎቲስ ብስታ ፄውጝስ ሊሊትጙንኩ እርዳታንትካ አችትካውሳስታ እምፕልታቑሳ እርዳቴ ፋያው አኽⶓ ጌሌፅካ::

ችግሮ ኽይጝስኪላ ጝኖ ክራይቴካማ እክምኒውሳ አግልግሎቴ እይካማጊ አኽⶓ ጉሽካ:: ስራስሪውሳ ክትባቴ እይጝስ ዴሜካ ሌማ ቲኑ ጉትፕዴስ እክምኒኩ ውማይቴንካዋ እንፃኽጝስ ክትባቴ አግፃንታ ፄውስታማጊ አኽⶓ እርዳትፅካ:: “ፄውስታማጊ ዝኩኽ እርዳቲ ዳላው ጋቲዊያኽ” ኑንኩ አቶ ተመስገን ቲኑ ጉትፕ እምቢታ አሌድስታማ አግልግሎቴ እያታ ፄውጝስ እንፃኽስትካማጊ አኽⶓ ጉሽካ::

ምድራሺ ቑንዚው ወረርሽኝስ ኬሚካል አሬችስታማ  ዙራሙሪው ፃንኩት ማንዲስታታ ፄውስታው አኽⶓ ጌሌፅካ:: ቑንዳስቴንካስ እጆ  ዲግስጝስ እክምኒውሳ ውማይቴኖ ሜዴብⶓ ቶኬምካ::