ግዲታሚ ፓርክ

አለሚቱ የኔት

ሳቮ ምራብ ብሄራዊ ፓርክ ኬኒያ ታይታ ታቪያ ክምዳ አግስታዊያኽ:: ፓርክ 1948 አ.ዝ.ቼ ቲሪትጙኽ ያኹስ ዋልዳ አግስታው ሳቮ ምስራክ ብሄራዊ ፓርክ ናይሮቢ ሞምባሳዳ ቴርትኹ ኤ 109 አውራ ዳዶስታ ባቡሩሳ ሀዲዶ ላጛሰ ቤናንኩዴስ እምፕልያኽ:: ሳቮ ምራብ ብሄራዊ ፓርኩ እሳንትኪላ 9 ሻይ 65 ስኩዌር ኪሎሜትርያኽ::

ፓርክ ብቲ ፍንታው እንኩሪ ማዚማው አሊስታ ሳቫ ብኑ ዳሪዳ ዝኩንኩ እንዜጝፅካ ዳድካ ጐቤናንትካዋ ጉሳንትካስ ጐሌላንታ ፄዌካ::

ፓርክዳ ካዌንኩ እንሴስካዴስ ፃርኪ አውራሪስ፣ ጐሽ፣ እኒ፣ ፃንኽ፣ ውዥ፣ ካዌኑ ግሴጝስታ ከችኔዋ ፄጌርጙንኩሳ እሜ፤ ብንካዳኪላ አዙስታ ጉማሪ አግስታና::

ቻኽካዴስኪላ 400ዴስ ጃላ ዜርካ ዝኩካ እኒ ክቻዴስኪላ ልቓ ወክትታጊ ዎሌንካሾ ሴዴድስታንኩ አኽⶓ ንባር ቶኬማ::

ካናኻፅካዴስኪላ እምፕል ሻይዴሰ ጃላ ዜርካዋ፣ ውታኺው ክይ፣ ድብ ካዌን ብኑ ዳሪ ዳራዳስታ ዋልኽ ዙራሙሪዳ ሊሊትጙንኩ አቤብካስ ግዲትኹ ክይስታ ኻፂስ ሾፌንስትጝስ ካዌኑ እንሴስካ፣ ክዩ ኹዋንኩ እንሴስካስ እሽፄታ ቺፄ ፍትሬት አሜችጝፃይኹ ስፍሪኪላኽ::

ፓርኩ ኬቴኒዳ ዜዌዌርጜካማ ጐቤንጝሰ ፋያንኩ ጐሌልስታንቲ ካጊ ወክት ያኹስ ሴኒ አሊዲዴስ ትክምቴ እንቲታኪ ትርስታ ይካቲት አርፍካ ጐሌልስታንትካ አኽⶓ ውማይቴንካ ኩስጝፃና::

ፓርኩ ኬቴኒዳ ቤፍትስ ማንዳንትካዴስ ሴዌርጝሰ ዝኩዋንትካ ካቻኒሰ ማንዳንትካኪላ ቼፍጝጚስ ጊጝትጛኒስ ካንትጝስ አሜቻውያኽ:: እንዴስ ድምክና አንዴፌንስትኹ ሳተ ጐመራ ፌቴርኹ ኩርዳ ያኻማ ዙሬ ካንትጝስ ካሊፄ::

ፓርክሾ እንዝርናንቲስኪ ያኻ አይርስ እንዜጝጝስ ፋይታጊ ጐቤናንትካ ታምብጝስ ካላና:: ፉሪስኪላ ዳላንኩ ሌንጌድፅካ ብትካ ዝኩና:: ንባሮ አግፅጝስኪላ አፍሪካ ስትሪፕ፣ ኬደብሊዋ፣ አሎይስሳፈሪ ቴኬምስታማ በኩር ጋዚቱ ዜጌባ::