ጉላሊውሳ ካርዶ ፍሽጝስ ምንግስቶ ጐሌልጙሳ ሜብቶ ቴኬምስትጝ ቱስቴ እስቱኻ

ንግስቴ ተስፋ

ጉላሊውሳ ካርዶ ካፅካማ አጌራ ምንግስቱ ግንባቲዳ ታምቦ ፊትጝጝስ ቴርቴካማጊ አኽⶓ አዊ ብሄርሰቡ ቺፅጝፂው ዝኩዋንትካ ዲብሱና::

አውጚው ራዲዮንስ ካንቴ እዩንኩ ካርዶ ፍሽካማ ጉላሊውሳ ጌርኮ ማንዲትጜካማጊ አግስታንኩ ፋግቲ ለኮማ ወረዳ አንኩሪ ኬቤሊው ዝኩዋንቲ አቶ አምሳሉ አባይ ጛው ድሚዳ ሹኻንቲ ጊዝስ ምንግስቶ ጎሌልጙሳ እድሎ አግፄካማ ሜብቶ ቴኬምስትⶓ ድኹዌካ::

አቶ አምሳሉ ናኑውሰታጊ ብሽታንዳ፣ ሊሊትጙኽ ማቤራዊስታ ይኮኖሚያዊ ኩፕቲዳ ጎላሌ ካንትኹስ እይስትኹ ክንቲዴስ ሼውቴ አግፄካማ ጉላሊውሳ ካርዶ ፍሽጝስ ካሊⶓ ጉሽካ::

ጎሌልጝ ሜብት ያኹኒውላ ሜብቶ ኬቤርፃውሳ አጌራስኪ ያኻ አጌር አቕስ ፋይፃውሳ ቴግባሮ አኮሜቻውሳ ምንግስቶ ጎሌልጝስ ታምቦ ፊትጝጝ ዴሜካ እምፕልታቕዴስ ማንዲስታው አላፍት አኽⶓ ሼው ንካማ ቤዴርካማ ጉላሊውሳ ካርዶ እሚⶓ ዲብስካ::

ጉላሊኪላ ፍታዊስታ ኔፃ ያኼ ናው ካንቲ ዝኩክ አኽⶓ ካንቴ እይካ:: አንኩዋ አሜታዴስ እምፕላኒ እይስታውሳ ዲሞክራሲውሳ ሜብቶ ቴኬምስትካማ ጛ አምናኑሳስታ ኬሼ ናኑሳ ምንግስቶ ጎሌልጝስኪላ ቴርትⶓ ድኹዌካ:: አግስታኑ ኬቤሊዳ ሰላሙ ችግር ፌያፌያማ ካንትስታው አኽጝስ ጉላሌ ፅንጋኽፃቲታ ምንግስት ትኩትስ እንፃኽስታታኪላ አሳቦ ዲግስካ::

አንኪሺ ጉዋጉሲ ወረዳው ዝኩዋንታ ዊዛሩ አበባየሁ አየን ኹኑ ሜብት ኬቤርስታታስታ ፍታዊ አብቱ ቴኬምስትጚ ዝኩዋታ ካሊፃውሳ ምንግስቶ ጎሌልጝስ ሜዜጌብስትካ ካርዶ ፍሽካማ ጉላሊውሳ ጌርኮ ማንዲትጜካማጊ አግስታና::

ሚንቾ ጊዞ “ኹን ቴክሾ” እስታው ታክስጚ ጌፄሩ ዙራሙሪዳ ሼውስታሺኹ ያኹኒላ ናካዳ ኩፅኒ አደባባይሾ ፌካማ ቺፅጝፃውሳ ምንግስቶ ጎሌልጝስ ካሊፃውሳ ጉላሊውሳ ካርዶ እሚጝስ ዴስቴንካ አኽⶓ ዙሜካ:: ድማሚ ኬቤሊው ዝኩዋንቲ አቶ ያረጋል ሰለሞንኪላ ጉላሊውሳ ካርዶ ፍሽጝ ፋያኑሳ ምንግስቶ ጎሌልጝስ ቹዋ ጉዳይ አኽጝስ ቤዴርካማ ካርዶ ፍሽⶓ ቶኬምካ::

ምንግስቶ ዲሞክራሲው ዳድስ ጎሌልጝስ ካሊፃውሳ ጉላሊውሳ ካርዶ ካፅጝ እምፕልታቑ አላፍትስታ ሜብት አኽጝስ ጛሾስ ታምቦጊ ፊትጜካማጊ አኽⶓ ጉሽካ:: ኬሻንቴ ፖሊሴ ዲግሳውሳ ሼውናማ እርዳትስትጝስ አጌራስ ቴኬማውሳ ምንግስቶ ጎሌልጝስ ቴርትⶓ ዲብስካ:: “ጎሌላ ባታ እያዋ እንዳር ሚፄ” ናው ካንቲዴስ እምፕልታቕ ፌካማ አጌራዊ ሰላምሾስታ ልግስሾ ካይፃውሳ ምንግስቶ ጎሌልጝ ማንዲስታው አኽⶓ ካንቴ ዲግስካ::

አማኻሪ ማዲያ ኮርፖሬሽንዳ እጉ አግልግሎቲው ዳይሬክተር አብየ ካሳሁን አጌራዋ ቺፅጝፃውሳ ምንግስቶ ዲሞክራሲያዊ ዳድስ ጎሌልጝስ አጌር አቑ ሜብት ያኻማ ዴንጌግስቱኒውላ እምፕልታቕዳ ኩፅኒ ሜብቶ ቴኬምስትጙ አላፍት ዝኩክ አኽⶓ ቶኬምካ::

ምንግስቶ ጎሌልጙ አላፍት ዝኩክ አኽጝስ ታምቦ ፊትጝጝ አጌራ ምንግስቱ ግንባቲስ ኬፍቲኒ ትክም ዝኩኽ አኽⶓ ሌጌሱንኩ አጌርካው ጉላሊው ካስት ምሳላ አኽጝ ካሊስታው አኽⶓ ጉሽካ::

አጌር አቕ ጉላሌ ካስጝፅጙሳ ሜብቶ ሳሴር ጉዳይታ ካንትጝዴስ ኪቻ ድምፆ እይጝስ አጌራውሳስታ አጌር አቑሳ ውላቱዌ ትክሞ ኬቤርፃውሳ ምንግስቶ ጎሌልጝስ ታምቦጊ ፊትጛንታ እግ ሜብቶ እያው አኽⶓ ኽይትጝፄካ::

ፍታዌ ኔፃዋስታ አሴቴፍጝፁኽሳ ጉላሌ ካስጝፅጝስ ካርዶ እሚጝ ቢዲሪ ጉዳይ አኽጝታጊ ዲሞክራሲው ቴርት ቴግባርዳ እሼማ ይቶፒያስ ሜቴናውሳ ምንግስቶ ቲሪትጝፅጝስ አጌር አቑ አላፍት አኽⶓ ጌሌፅካ::

“ሴሌቴንኹ ዝቤንዳ ምንግስታ ጋቲታ ቺትጛው አጌር እላኽ” ኑንኩ አቶ አብየ አሌም አቡቑሳ ጉላሊውሳ እጎ ጉሽፃ ፄውታታ ጉላሌ ካስጝፄት ይቶፒያዳ አግስታንኩ አጌር አቕ እጉሳ ሜብቶ ቴኬምስታንታ ሼውቴ ፌቴርጝ፣ ሚዲያዴስ፣ ሲቪክ ማቤርካዴስ፣ ሙሁራንካዴስ ልኺትጛንትካ ፖለቲካው ፓርትካዴስ እንቲታኪ ምንግስትዴስ ሚንች ቴግባር ማንዲስታኩ አኽⶓ ኽይትጝፄካ::

አጌር አቕ ጎሌልካያሱ ምንግስት ቺትጝፃውዴስ ጎሌልካማ ስልታኑሳ አዴሮ እዩኑ ምንግስት ቺፅጝፃታ ፋዮ ቴግባርስ ካንትፅጝ እዝብዴስ ማንዲስታው ጉዳይ አኽⶓ ጉሽካ:: እምፕል ፓርቲ እምፕል ድምፅስ ዊፅጝስኪ ያኻ ዊፅስትጝስ ካላው አኽⶓ ሼው ንጝስ ድምፅስ ዋይሜ ኪሳንታ ኩስጜ ዲግስካ::

ልኺትጛንትካ ፓርትካ ዴሜካ ኽቴናቴ ላኹዊስ ትንቑልጚዴስ አጌር አቕስስታ አጌራስ ፋይፃውሳ ፖሊሲውሳ ጉላሌ ዲግስካማ እንቲታኪ ጉላሊውሳ ዴምቦስታ ሜሜሬ ቴግባርዳ እሽፄካማጊ አሳቦ እዝብስ አቕትጝፅጝ ማንዲስታኩ አኽⶓ ቶኬምካ::

አቶ አብየ እዩኑ ኽይትጝፂዳ ምንግስት ጉላሊ ሰላማዊ፣ ዲሞክራሲያዊስታ ጊሊሊቲኒ ያኻታ አላፍቶ ፊትጝጙ ግዴቴ ዝኩኽ አኽⶓ ጌሌፅካ:: ትክላሊስ ምንግስቶ ልውጝስኪ ያኻ ጋሺጝስ ሜብቶ ቴኬምስታማ ጎሌልጝስ አላፍቶ ፊትጝጝ እጎ ኬቤርፅጝ አኽⶓ ቶኬምካ::

አዊ ብሄረሰቡ ቺፅጝፂ ቹዋ ቺፅጝፃንቲ ቴውድሮስ እንዳለው ጛሾስ ብሄረሰቡ ቺፅጝፂታ ፍታዌስታ ሰላማዌ ጉላሌ ካስጝፅጝስ ይስጙኽ ቤዴራ ቴርት ካስጛማጊ አኽⶓ አቕፄካ:: ጉላሊ ቦርዱሰ ሜሜሬስታ ዴንቦ ኬቤርፅጝስ ኔፃስታ ጊሊልቲኒ ጉላሊ ካስጛታ እንፃኽስትጝ ምንግስቱ፣ እዝቡስታ ልኺትጛንትካ ፓርትካው ግዴቲ አኽⶓ ጉሽካ::

ሰላሙሳ ችግሮ አጋታሚታ ቴኬምስትካማ ጉላሌ ፅንጋኽሳንኩ አይልካዋ ካላካልጝጝስ እንፃኽስስታማጊ አኽⶓ ጌሌፅካ::

እዝብ እጎ ኬቤርፃማ ሜብቶ ቴኬምስትጝስ ፋያውሳ ምንግስቶ ጎሌልጝስ ካላታ ሼውቲ ፌቴርስታማጊ አኽⶓ ኽይትጝፄካ:: ብሄረሰቡ ቺፅጝፂው ሰላም ኬቤርስታማ ትክላሊ ጉላሊ ካስጛታ ካሊፃው አችዳ ታምፅጝስ ይስጙኽ እንፅኺ አኮሜችስታማጊ አኽⶓ ቹዋ ቺፅጝፃንቲ ጌሌፅካ::