ታደለ አጋጄ
ሊሊትጙንኩ ኬፍቴንካ ክንቲኩ ኾትካዴስ ዳቔርስትካማጊ ፋንኩ ዎታትካስ አጌርታ እምስትኹ እክድ ስሬታስ እንፅኺው ድል ፌቴርስታታ ፄውስታማጊ አኽⶓ ድሉ ቴኬምስታንትካ ዙሙና::
እንፅኺው ድል ፌቴርስታይኩ ዎታትካ ክቻዴስ እምፕል ዎታት ታደለ በላይነህያኽ:: ዎታት ታደለ 12 ቤኖ አሌዱኒዴስ ፋሌንጋ እንፅኻ ጋቲታ እጄ:: አዮ ጉዋጉሲ ወረዳው እንፅኺውስታ ስልታኒው ፅፌት ጝና ሊሊትጙንኩ እርዳታንትካ አችትካሊ ፄውስትኹ እርዳቲስ እንፅኺው ድል ፌቴርስታይⶓ ዙማ::
እንሴስካዋ ሌፍፅጙ እንፅኺዳ አሴቴፍጝጙ ፋይ ዝኩንኩ ዎታትካሊ እምፕልትስ አችትጙኒዴስ ፋሌንጋ ታይካዋ ሌፍፅጙ እንፅኺሾ ቱⶓ ጉሻ::
11 አባልካ አኽጝስ ጛራጛራ 25 ታፋ ያኻውሳ ጌንዜቦ ፍሹኒዴስ ፋሌንጋ ኤፍ ኤስ አርፒ እስታው አችት ዴሜካ 1 ሚሊዮን 3 ሊኻ ሻይ ብርዴስ ጃላ ፄውኽ እርዳቲስ እንፅኺሾ ቱⶓ ዙማ:: እንስኪላ ፍሹኑ ጌንዜብስስታ አግፁኑ ጌንዜቡ እርዳቲስ 81 ታይካዋ ጄውጝስ ሌፍፅጙሳ እንፅኼ እንፃኽስታና:: ሹኻ አርፋሳኺስታ ታይካዋ ሌፍፁኒዴስ ፋሌንጋ ጌቤልስ ዲግስካማ ዋያንኩ አኽⶓ ቶኬማ:: እንሴስካው ውማይቴንካ ፄዋኑ እርዳቲስ እንሴስካስ አሜቻውሳ ጝኖ ግቢትጝስስታ ፋይፃውሳ ምግቦ ዲግስጝስ ቱስታው ዳድስ አንኬባንኬብጜ ፄዌካማጊ አኽⶓ ዲብሳ::
እሊት እንፅኺው ድል ፌቴርስታይት ማስተዋል ታደሰ ኮሌጅዳ ዳቔርስቴታ እንፅኻ ጋቲታ እጂቴ:: እንፅኼ ፋይጝዴስ ኪቻ እንፅኼ ፌቴርጝስ እንፃኽስትጝሾ ትይት ማስተዋል እንፅኼ ጄሜርፅጝስ ካላውሳ 36 ሻይ ብሮ እሚጝስ እሊኩ ዎታትካሊ ማቢሪስ አችትጝትኾ:: ፅክራ እምፕላ ያኼካማ ዎታትካሊ እምፕልትስ አችትጝቱኒዴስ ፋሌንጋ ታይካዋ ሌፍፅጙ እንፅኺዳ አሴሜርጝታ:: አሴሜርጙኑ እንፅኺው ዜርፍዳ ይስካማ እንፃኽስትጝስ እሊኩ ዎታትካስ እንፅኺውሳ ድሎ ፌቴርጝስ እንፃኽስቴት አኽⶓ ድኹታ:: ታይካዋ ሌፍፃኒሳ ጝኖ ማንዳውሳ ዚቢኔ ኬፄርጝስ አቕፄ ፍሽⶓ ዲብስታ::
ታይካስ ያኻው ዳላውሳ ምግቦ ዲግስⶓ ቶኬምቱት ዎታታ ማስተዋል ታይካዋ ሌፍፅጙሳ እንፅኼ እሳንጝፅጝስ ክምካዋ ሌፍፅጝሾ ቱጝስ እክዶ እሚⶓ ዙሜ::
አዮ ጉዋጉሲ ወረዳው ኤፍ ኤስ አርፒ ምግብ ቴርቱ ይስጝፂው ፕሮግራሙ ቴቬቬርጝፃንቲ መንግስቱ አለማየሁ ወረዳታጊ 2015 ም/አታዴስ ጄሜራማ ዎታትካዋ ኢንተርፕራይዝስ አችትጝፅጝስ ዎታትካስ እንፅኺውሳ ድሎ ፌቴርጝስ 75 ታፋ ያኻው ጌንዜቡ ካፒታል አችትጙንኩ ዎታትካስ እይስትጝስ እንፅኺው ድል ፌቴርስታታ ፄውስታማጊ አኽⶓ ጉሽካ:: እንዴስ ፍና አችትጙንኩ ዎታትካ ኬሽኹስ ቴኬምስታንታ አኽⶓ ቶኬሙንኩ አቶ መንግስቱ ኢንተርፕራይዝዴስ ሌጌስጝስ አብትዌንካ ያኻንታ ፄውጝስ እንፃኽስስታማጊ አኽⶓ ጉሽካ::
5ዴስ 15 አባልካዋኺስታ ዎታትካ አችትጛኒ እንፅኺሾ ሚፅጝስ 25 ታፋሳ ክብሳኒ 75 ታፋሳ ጌንዜቡሳ ካፒታሎ እያው አኽⶓ ዙሜካ::
አዮ ጉዋጉሲ ወረዳው እንፅኺውስታ ስልታኒ ፅፌት ጝናሱ አላፊ ዘለከ አምሳል እንፅኺ እላቲኩ ዎታትካስ እንፅኺውሳ ድሎ ፌቴርጝስ ዙራሙሪውሳ ፄጌ /አብቶ/ሺሽጝስ ዎታትካ እንፅኺሾ ቱዋንታ ፄውⶓ ጌሌፅካ:: ዴኑ ልማትስ፣ ፅኻራዋ እሩብፅጝስስታ እንሴስካው አብትስ ወረዳ ኬሽኹ አብት ዝኩኽ አኽጝስ ሊሊትጙንኩ እንፅኺኩ ዜርፍካዳ ዎታትካ አሴሜርጜካማ እንፃኽስታንታ ፄውⶓ እርዳትፅካ::
ሊሊትጙንኩ ክንቲኩ ኾትካዴስ ዳቔርስቱንኩ ዎታትካስ 1 ትኩሚ 7 ሚሊዮን ብሩ ካፒታልስ ታይካዋ ሌፍፅጙ እንፅኺዳ አሴሜርጛንታ ፄውⶓ ቶኬምካ::
ኤፍ ኤስ አርፒ ፄውኽ ብሩ እርዳቲስ 11 ዎታትካ ታይካዋ ሌፍፅጙ እንፅኺው ድል ፌቴርስትⶓ እርዳትፅካ:: ዎታትካ ጉዳጋቲው ስፍሪዳ እሼቲንታ ውላጊ ታምቦ ፊትጝጝ ቱስታው አኽⶓ ጉሽካ:: 7 ሻይዴሰ ጃላ እንፅኼ ፋያንትካ ዎታትካ ዝኩⶓ ቶኬምካ::