ግባቶ ወክትስ

ኽብፂው ማዳባሪ አሉምቶ ዴሜክጝስስታ ቴክልካውሳ ልግሶ አሬኽፅጝስ ኬፍቲኔ ምርቶ አግፅጝስ እርዳቴ:: ያኼስጉ ኽብፂው ፄጌርታስታ ሴብሉ አሜልታ፣ ቱስታው ሜቴንስሰታ ጊዝስ ቴኬምስትⶓ ካሲ:: አቓ ግብሪስታ ፍትሬቱሳ ማዳባሬ ቴኬምስትጝስ ካሊስታው ያኹስ ፍትሬቱ ማዳባሪ ኽብፂውሳ አሲዳምቶ ካላካልጝጚስ ኬሻንቲ ዊዳፋ አኽጝ ዝኮ::

ግባቱ ዲግስጚስታ ቴኬምስትጚ ይቶፒያዳ ግብርኒውሳ ምርታምቶ ሌጌፅጝስ ትኩት እይስታው ቹዋ ቴግባርያኽ:: ሊሊትኑስኪላ ማዳባሪው ዲግስጚስታ ታምብስታንትዳ ትኩትስ እንፃኽስስታማጊያኽ:: ኽብፂ ማዳባሪው ዲግስጚው እንፂጝ ዝኩጝስ አሬሳቻንትካ ናካዳ ቼጌርስታኒስ ካንትጝስታ ቹኒትጝኪላ ኹሉቺፋሱ ጉዳይ ያኻ:: እንሳ ችግሮ ኽያማ ኽብፂውሳ ማዳባሬ ካንታንኩ አሬሳቻንትካስ ታንባታ ፄውስታውላስ ይጉኒጊ ምርታምትዳ ኬፍቲኒ ዳንጉዊኒ ጌቴምጝስ ምርኪሾ ቱጝ ይጉዋላኪ:: እን ችግርሾ ቱስትጝዴስ ቤዴራማኪላ ችግሮ ጌጌውጝስ አጌር አቩቑ አችስ እንፃኽስስታማጊያኽ:: ኢዜአው ንቫር ቶኬማውስታጊ ማዳባሪው ዲግስጚ ይቶፒያዳ ሊሊትኑስኪ ግባቱ ቼፍጝጚው ቴርት ግብርኒው ሚኒስቴርዴስ ተክላይ ሚኒሰትሩ ቢሩሾ ዜዌዌርጛማ ቻይናውሳ ማዳባሬ ዴሜካማ ቤንጝፅጙ እንፅኺ አኮሜችስታማጊያኽ:: ቹዋስኪላ አማኻሪ ክልልዳ 82 ቢሊዮን ብር ድጐሚ ፄውስታማ እምፕል ኩንታል ማዳባሪ 8 ሻይብርዴስ ኽሳቲታ ፄውስትኹ ያኹስ እምፕልት እንፅኻ ማቤርካሾስ አሬሳቻንቲ ውላ ታንባታ ፄውስታማጊያኽ::

አማኻሪ ክልልዳ 2018/19 ምርቱ ዝቤንዳ ኽብፂ ማዳሪው ዲግስጚኪላ 8 ሚሊዮን 640ሻይ ኩንታል አቓ ግብሬ ማዳባሬ ዲግስጝስ እክድ እምስታ:: ፌይኹ አሜት ምስሊ ወክትሊ 6 ትኩሚ 7 ሚሊዮን ኩንታልዴስ ጃላ ኽሳው እክድ እምስትⶓኪላ አሚኮው ንባር ቶኬማ:: እምስትኹ እክድዴስኪላ 2 ትኩሚ 6 ሚሊዮን ኩንታል ማዳባሪ ክልልዳ አግስታንኩ ዩኒየንካሾ ቱዋ:: እንሳ ቱኽሳ ማዳባሬ ኩፅኒ ቱስቲስ አሬሳቻንትካስ ታንባታ ፄውጝስ ታምባጊ ፊትጝጝ ቱስቴ:: ቱስታ ጋቲታ አድርትⶓ ፋይጝስ አሬሳቻንትካስ ይንቱኽሳ ኽብፂውሳ ማዳባሬ ፌይፃማ ዳላልካስስታ ጌፄንካስ ዋይጝስ ዲግስጚው እንፂጝ ጌቴማታ ፄውናኻ ማቤርካኪላ እን ኬርትዴስ ክብስስትጝ ቱስቴ:: ቱስታቲኩ ቤንካ ኬዜንካማ ፊቴ ታክስጝስ ምርቱ እንፂጝ ጌቴማታ ፄዋንኩሳ ቤንካዋኪላ እግስ ፌይፃማ እይጝ ውላውጊ አላፍትያኽ:: አሬሳቻንትካኪላ አኽኑኒ ጛርትስ ዳላውሳ ጄውጝስ ቴኬምስትጝጉ ፌቴ ጄዋማ ፌይፃማ ጊፂኒስ እይጝ ቱስታ ጋቲውያኽ:: ካሊስታውሳጊ ፅሬቶ ፄውጝስኪላ አሬሳቻንትካስ እስታማ ይንታውሳ ኽብፂውሳ ማዳባሬ ወክትስ ጄዋማ ፋይስታው ጊዝስ ቴኬምስትጝስ ምርታምቶ ዴሜክጝስ እንፃኽስትጝ ፋይፄ::