እጚው ጌቤልትጚ

አለሚቱ የኔት

እጚ ኬንያዳ ቹዋ ዙሚትጝፃንቲ ያኹኒዴስ ሴኔቤታ:: እሪው ጊዝዳ ጊልጊሎ ኮንኩ አጌሩ ዙራሙርካዳ እጝካ ሚንችትስ ልቕልቓና::

ሻይስ ቼፍስታንኩ እጚውሳ ክምብሮ ካንትጝ ዴስስቱኺያኽ::

ጊልጊል አሬሳቻንትካ ሚንቻኑ ሪፍት ቫሊው ዙራሙሪያኽ:: እጋፊ እጚው ዚዊዊርጚው ማይኬላኪላ ያኻ:: ጝርጃ እጝካዳ ፅልካ ምኩኪላ አካላትዳ ካንትስቴ:: ኹን እጝካ እንኩላሎ ፋላፋላኑ ወክትኪላኽ:: እንጚ ወክትኪላ ንግስትካ እጝካዋ ካቻኑ እጋፊ ዜዌዌርጝፃንትካኪላ አሴሜርጛኑውያኽ:: እጋፊ እጝካው ዋይጚ ኪላ አሌም አቩቑ ታምትጚው ዳድ ዝኩኽያኽ::

ንግስትካስ ጉስስታንኩ እጝካ እንፅኼ አኮሜቻኑስታ ዝኩዊኔ ሺንካኑኪላ ጛው ያኹኽ ማቤራዊ ሜዋክር ዝኩኪያኽ:: እስጜ ፍትሬቱሳ ትይንቶ ካንትⶓ ፋያንኩ አቕኪላ እጋፊ ጌቤልስ እጝካዋ ሾሜታና::

እጝካ እምስቱኒዴስ ፋሌንጋ ቴርሙሱ እንኩርፃኻዳ እጄንታ ፄውስቴ:: ቴርሙስዳ ዝኮስኩስኪላ ማቤራዌ ሜዋክሮ አድርፃኒስ ካንትስታና::

አፍሪካዳ ዝኩዋንኩ ድንጉልካ እጝካው ንግስትካ ድሚ ኬሌም ዌናኽ:: አሌም አቩቑ ጌቤልዳ እሳንስ ፋይስታንታ ያኹንኩ ክቻዳኪላ ቶኬምስታና::

ፃርኪ ጌቤልዳኪላ እምፕላ ንግስታ እጛ 2 ሊኻ 20 ዶላሮኺስታ ዋይስቲ:: እምፕላ እንኩላሎ ድርብታት ንግስታ ውላዋ እጝካውሳ ማቤራዌ ሜዋክሮ አድርፅጝስ ካሊ:: እምፕል ወክትዳ እጜ ዋይጚው ደላሊ እሺኹ አቒ “እጋፌ አኽⶓ አቓያላኪ እሽቱኻ” ናማ ቢቢሲስ ዙማ::

ባርኾቼ አጌርካው ሾሜታንትካዋ አጌራኻስኩ እጜ ካቻንትካሊ ታምትጝፃሺኾ:: ምስራክ አፍሪካዳ ይቢቻ አግስታንኩ እጚው አይኔትስ ሊሊትስ አቕስታኑ ታራታርጜ ኩችፅጝስያኽ:: እጜ ኩችፃንትካዋ ትኩቶ ጉሱኑኪላ እንጚስያኽ:: ቢቢሲ ዙሚትጝፅኹ ቤዴራሱ ደላሊ “እምፕል ባርኾቼው አጌርአቕ ንግስትካ እጝካዋ ኬፍቲኒ ዋይሚስ ጄዋማጊ አኽⶓ ዙማ:: እንጚ ዙራሙሪዳ ዴሜካ ሳሴርስ አግስታናኪላ” ና::

ስግልዳ እጝካውሳ ክብምሮ አግፅጝስ ካሊስታው አኽⶓኪላ ዙማ:: ባርኾቼ አጌርካው አጌር አቕ ስፍሬኺስታ ይንቴካማ እጝካዋ ኩችፅጝኪላ ማንዲስታላኪ:: ኬቴሙ ዙራሙሪዳ ያኼካማ ሆቴሎ ክራይትጝስ እጝካዋ ያጌካይኒምባኺስታ ልሻና:: እጝካዋኪላ ፅልካ ቱቦ ፄጌራንኩ ዲብካኻዳ ፄዌካማ ካፅካያንኩ አኽⶓኪላ ቶኬማ:: እምፕላኒ እምፕላኒ ዴሜካ እጝካዋ እንኩራኑሳ ሜርፊውሳ ሲሪንጆ እያንኩ አኽⶓኪላ ዲብሳ:: ፌይኹ አሜትዳ ጊልጊል ዙራሙሪዳ አግስታው ናይቫቫ ኬቴሙ ዙራሙሪዳ 5ሻይ ንግስትካ እጝካ እምፕል ሆቴሉ ቤንዳ አግስቴካ:: እጋፊ እጝካው ዚዊዊርጚ ዋሳላካ ስሮ ካፅፅኹ አኽጝ አቕስትኹኪላ እንጚ አጋታሚስ አኽጝ ቶኬምስታ::

ኬንያው ካዌን እንሴስካው ማንዲጚ ዙሙኽስታጊ ታራታርስታንትካ ቤልጂም፣ ቤትናሙስታ ኬንያው አጌር አቕያኽ::