ውላውጊ ኽይ

ጉላሊ እጋዌ ምንግስቶ ቲሪትጝፅጝስ ካሊፃው ሜሳሪያኽ:: ሊሊትኑስኪላ አምንጝፃንቴ ሰላሞ ቺሚትጝፂኪላኽ:: ሰላማዊ ጉላሊ ካስጛታ እንፅኺ ጄሜራውኪላ ጝንዴስስታ ዋልዴስያኽ::

ጉላሊ ሴሌቴንኹ ዳድስ ስልታን ካይጝጛው ዲሞክራሲ ቴርቱ ሜሳሪ አኽጝስ ዊዳፌ ሰላሞ አድርፅጝስ ዝኩኽ ፍሺኪላ ኬፍቲኒያኽ::

ሊሊቶ ኩስጝጚስ ኽይጝስ ሜሳሪስ ፄውስታው እንግርግራ ይጉዌ ስልታኑሳ ቤንጝጜ ይጉፄ:: ጉላሊ ዲሞክራሲያዊ ስልታኑ እምፕል ጊሊፅፂያኽ:: እዝብስ ጐሌልስቱኽ እጋዊ ምንግስት ዝኩጝኪላ ዊዳፊ ሰላምስ ወሴናንቲያኽ::

ጌቴሙንኩ ችግርካ ኽይስታኑስታ ዊዳፊ ሰላም ቼሜትጛው ጉላሊስ አኽⶓ እርዳትስትጝስ እዝብኪላ ላጜታንቲ ትክላሊ ጉላሊዳ እሳንስ ቴሳትፎ ካንትፅጝ ቱስቴ::

ጉላሊው ዴክትስታ ሰላም ጉላሊው ፍታዋ አኽጝስ፣ አምንስታንት፣ አሴቴፍጝፃንቲስታ ትክላሊስ ጉላሊው ሳኪትጚስ ኬፍንኹ ታምብ ዝኮ:: ምክንያቲኪላ ዴክት ማንዲስትኹስታ ሰላማዊ ያኻያሱ ዲሞክራሲውሳ ሜስፌርቶ ዋኽትጝፄላኪ::

ጉላሊ ዊዳፌ ሰላሞ አድርፅጝስ ወሴናንቲ ያኹኒኪላ እሜማ ይንታኩ ስጋትካ ዝኩና:: እንስኪላ ቤዴራ አፍሪካዳ፣ ኤስያስታ ላቲን አሜሪካ አጌርካዳ ጉላሊ እምትጛማ ኬሴትስቱንኩ ሚንችካ ኬውስካዋ ቶኬምጝስ ካሊስታው አኽⶓ ኢዜአዴስ አግፅንኹ ንባር ቶኬማ::

አጉራ አፍሪካዋ ካንትናኒኪላ አ ዝ ቼ ቴሳስ 2007ስ ዋሌና ኬንያዳ ካስጙኽ ጉላሊዴስ ፋሌንጋ ፌቴርስትኹ ጋቻስ እምፕል ሻይዴስ ጃላ ያኻንኩ አቕ ይወቶ አታኒስ 500ሻይዴስ ጃላ ያኻንኩ ዴሜካ ዝኩፂ ሙሪዴስ ፌኔኬልጛንታ ምክንያታ ያኻ:: እን ዴሜካ ኬንያዳ ላቡሳኺስታኪላ ጉላሊ ይንቱኽ ቺፋ አጌር አቕዳ ስጋት ፌቴርስታታ ፄውኽ አኺኒ ያኻማ ሜዜጌብስታ:: እንታኮው ችግር ጌቴማቲታ እኖጂኪላ ጉንቤት 24/2018 ም/አ ካስጛው ጉላሊ ሰላምስ ካስጛማ አሌድስታታ ታምቦጊ ፊትጝጝ ቱስቴ::

ይቶፒያው ታሪክስ 1997 ም/አ ጉላሊ ሚንች ዳድስ ታሪካዊ እሺኾ እስቱኒ አሱትጝ አኻላኪ:: እን ጉላሊ ልኺትጛንትካ ፓርትካ ክቻዳ ብሩኽ ልኺትጜ ካንትስትኹ አኽጝዴስ ፌይኹስ ሚንችካ አጌር አቕውላዳ ዴዴጝ ጊዝስኪላ ያኹኒ ቴስፌ ካንትፃማ ፌይኹ ጉላሊያኽ:: ጉላሊዴስ ፋሌንጋ ጁኽ ሚዚጊብጚስታ ጋቻው ምክንያቲስ ሚንችካ አጌር አቕ ይወቶ አቱኑስታ እንፂዊስ ታምቡኑ አኺኒኪላ እሺኾ:: ጉላሊ ዲሞክራሲያዊ ያኻማ አሌድስታታኪላ ቤዴራማ ሰላማዊ አኺኒስ ካስጛታ ፄውጝ ፋይፄ:: ታምቦጊ ፊትጝኒዴስ ዴሜካ ሰላም ማንዲስትጝ ይጉዋላኪያኽ::