አምቦረስስታ ፌል (ችግኝ

ንግስቴ ተስፋ

አዩ ጉዋጉሲ ወረዳ ኩል፣ ኩላዲሪኺ፣ ቤሬኺስታ ዴሬኽ አይር እግልታስ አዴልስቱንኩ አዊ ብሄረሰቡ ቺፅጝፂዳ አግስታንኩ ወረድካዴስ እምፕልያኽ::

ወረዳዳ አግስታው አይር እግልታሳ ቴኬምስትካማ ወረዳው ዝኩዋንትካ ቤርቤሮ፣ ሹምቤ፣ ታፌ፣ ዳጉፄ፣ ጉባሬ፣ ዱኒዜ ትክልቴስታ ኩፓኪፔኪላ እሳንስ አሜሬትጝስ ጛጛርትጛዴስ ፊቴካማ ጌቤልሰ ዲግስጝስ ታምቦ ፊትጜካማጊ አግስታኑ ወረዳኽ::

ወረዳዳ አግስታንኩ ኬቤልካዳ አስሜምጛው አይር እግልታው አይኔታጊ ትክልቲስታ ኩፓኪፒ እሳንስ አሜሬትስታማጊ አግስታው አኽⶓ ወረዳው ግብርኒ ፅ/ጝናሱ ንቫር ቶኬሜ::

ድኩኒ ዴሬብ ኬቤሊው አሬሳቻንቲ ገነቱ አለማየሁ ሴብሎ አሜሬትጙ እንፅኺዴስ ኬምፕስ ኬምፖ ትክልቴስታ ኩፓኪፔ አሜሬታና:: አግስታኑ ዙራሙሪው አይር እግልታ ኩላዲሪኺ አኽጝታጊ አኹዋቲስስታ ችኻ እሪስ አሜሬታኑ ትክልቲስስታ ኩፓክፒስ አግፃኑሳ ሚፄ ኬፍፅጝዴስ ኪቻ ቲንስ  አስሜምጛውሳ ኩፓኩፔ ቴኬምስታንኩ አኽⶓ ጉሽካ::

ሴብልዳ ይቪቺዳ ትኩቶ ፄውጝዴስ ኪቻ ሊሊትጙኽሳ ችግኞ ቴኬልጝስ ኬሻንቴ ሚፄ አግፅጝስ ካሊስታው አኽⶓ ዲብስካ:: ፃዩኑሳ ብቴጊ ፁሞ ቺፃቲንኩስታ ኬሻንቴ ምርቶ እያውሳ ትክልቴስታ ኩፓኩፔ ቴኬልካማ ይኮኖሚስ ቼጌርስታኑላ ሜቴቴንጙኽሳ ዝኩዊኔ ሲፋንኩ አኽⶓ አቶ ገነቱ ድኹዌካ::

ቴኬልጝ ይቪቺ ያኻውላ ቱስቲስ አንኬባኬብጝ ፄዴክጙሳ ሜቴኖ ኬፍፃውስታ አግፃኒሳ ምርቶ ኬሽጝፃው አኽጝስ ቱስቲስ አንኬባኬብካማ ችግኝ ትክሞ እያታ ፄዋንኩ አኽⶓ አቶ ገነቱ ጉሽካ::

ፅክራ ላጛ አሜትዴስ ጃላ ቡኖ ቴኬልካማ ኬሻንቴ ምርቶ አግፄካማጊ አኽⶓ ጉሹንኩ አቶ ገነቱ 2018/2019 ምርቱ ዝቤንዳኪላ ኬቤሊታ ምስሊስ ሊማው ቡኑ ቴክልስ እምፕሎ ኩፆ ብቴ ቴርስⶓ ድኹዌካ:: አምቦረስ ችግኙ ፊልፂ ኾትዴስ ፌሎ አግፃሺኑ ወክት እሺⶓ ታክሱንኩ አቶ ገነቱ ላጛ አሜታዴስ ናቴ ኩፅኒ ዙራሙሪዳ ፌቴርስትኹ ሰላሙ ችግር ምክንያታስ ፌሎ አግፅጝስ ቼጌርስታኒ ባይላዊ ዳድስ ጛጂ ቴርሱኑሳ ኬቴብስታያሱሳ ፌሎ ቴኬላኒ ቑንዚስ ፂኪስታማጊስታ ፄዴክጙ ሜቴን ኔኬታማጊ አኽⶓ ዙሜካ::

ኬቤሊታ ፌቴርስትኹ ሰላሙ ችግር ችግኝ ትክላዳስታ አንኬባኬብጝዳ ቻኒስቶ ፌቴራቲታ ኩፅኒ አጌር ሹማጌልካስታ ታምብዌን አካልካ ኩስጜካማ ችግሮ ኽይጝስ ፄውኑ ፅሬትስ ፌይካፌይካማ ግብርኒው ውማይቴን ድጋፎ እይካማጊ አኽⶓ ድኹዌካ::

ዊዛሩ ጎጃም አባትኪላ ድኩኒ ዴሬብ ቦኮ ዝኩዋንትካኽ:: ኩፅ ኬንዳ ብቲዳ ቡኖ፣ ሙዞ፣ አቮካዶስታ ማንጎ ቴኬልካማ አግፃኑ ሚፂስ ዝኩዊኔ ኬሽጝፄካማጊ አግስታና:: ኬሽጙኽሳ ቴክሎ ቴኬላማ ኬሻንቴ ምርቶ አግፅጝ ኹኑ ይኮኖሚ ኬፍ ናታ እርዳታው አኽⶓ ሼውዴስ አምኔካማ ይሴንትስ እንፃኽስስቴካማጊ አኽⶓ ድኹዌካ::

ዋዚታ ካንታሺኑ ቡኑ ቴክል ቱስቲስ አንኬባኬቡኑ ወክትዴስ ጉሽፃማ ኩፅ ኬንዳዳ ቴኬልስትኹ ቡንዴስ አንኩዋ ኩንታልዴስ ጃላ ሚፄ አግፃንኩ አኽጝስ ኬሻንቴ ዝኩዊኔ ጉሳንታ እርዳትⶓ ዙሜካ:: ቡኑ ቴክላኻዳ ዴሜካ ጀንጅብሌስታ እሊኩ ቴክልካዋጊ ዋግፅካማጊያኽ::

ዊዛሩ ጎጃም እዩኑ ካንቲዳ ቴክሎ ቴኬላን እስታኒ ቴኬልጝ ይቪቺ ያኻውላ ሼውዴስ እንፃኽስስታማስታ አንኬባኬባማ ሚፄ አግፅጝስ ኩርፄና አኽጝ ቱስታው አኽⶓ ዲብስካ:: ኬሽኹሳ ፌሎ አምቦረስ ችግኙ ኾትዴስ ግብርኒ ፅ/ጝና ዲግሳማ ስልታኔ እያኒ ኽስኹስ ቴኬምስትⶓ ቶኬምካ::

ዋሺኒኪ ኩፓኩፒስታ ችግኝ ባይላዊ ዳድስ ያኻውላ ዝቤናዊስታ ሳይንሳዊ ዳድስ ቴርቱኽሳ ቴኬልጝ ኬሻንቴ ምርቶ እያው አኽⶓ ቴግባርስ ቼሜትጝፄካ:: ፌያፌያማ ማንጉ ምርትዳ ካንትስታውሳ ቑንዜ ካላካልጝጝስ ካሊፃውሳ ሴሎ ምንግስት ፋያታ ካንቴ እይካ:: ችግኝ ፌሉ እንፂጝኪላ አሬሳቻንትካው ፋይሊ ሜቴቴንጛቲው አኽጝስ ፌል እሳንስ ዲጋያታ ካሴ ዲግስካ::

ድኩኒ ዴሬብ ግብርኒ ፅፌት ጝናሱ አላፊ አቶ አየነው አለምነው ኬቤሊታ ዝኩኽ አይር እግልታስታ ኽብፂ ኩፓኩፔስታ ሊሊትጙኽሳ ችግኞ ቴኬላማ ይኮኖሚውሳ ትክሞ አግፅጝስ ካሊፃው አኽጝታጊ ኬቤሊው ዝኩዋንትካ ጛው ጁትጚስ ችግኞ ቴኬልካማ አንኬባኬብጝስ ትክሞ አግፄካማጊ አኽⶓ ጉሽካ:: ላምቡሳ ኺስታ ቴኬልስትኹ ችግኝ ፄዴክጙ ሜቴን ይስጝፃው አኽጝስ 2018/2019 ምርቱ ዝቤንዳ 100 ሄክታር ብቲዳ ቡኖ ምስሊስ ሊሚፅጝስ ቤዴራ ቴርት አሌድስትⶓ ጌሌፅካ::

ኬቤሊዳ አኹዋቲስስታ እሪስ ሊማው ብቲ እሳን አኽጝታጊ አሬሳቻንትካ ትኩታ ፄዋኑ ዴሜካ ቡን፣ አቦካዱ፣ ፓፓያ፣ ብርቱካንስታ ማንጉ ቴክልካዳኽ::  ሳይንሳዊ ዳድስ አሜሬትጝስ ካላኑሳ ክንቴስታ ዴሶ እይካማጊ አኽጝስ ቱስቲስ አሜሬታንታ ፄውⶓ ውማይቲኒ ኽይትጝፄካ::

ችግኝ ፌሉሳ እንፅኼ ይጉፅⶓ 2018 ምሬት አሜታዳ አጌር ሹማጌልካስታ ዎታትካ ግብርኒው እንፅኺ ዋሺኒኪ ጉዳይዴስ ኔፃ አኽⶓ እርዳትስትጝስ ውማይቴንካ ኬቤሊዳ አግስቴካማ እንፃኽስታንታ ፄውጝስ ችግር ልቓሱላ ያኹኒ ኽይስታማጊ አኽⶓ ጉሽካ::

አዩ ጉዋጉሲ ወረዳ ግብርኒ ፅፌት ጝናሱ አላፊ አቶ እምቢያለ አማረ ጛሾስ ወረዳዳ አግስታንኩ 17 ኬቤልካዳ ኩፓኩፔ፣ ቡኖስታ ዴኖ ሊሚፅጝስ አሬሳቻንትካ ይኮኖሚስ ቴኬምስትጝስ ካላኑ ቴግባር ይስጛማ ሲፍⶓ አቕፄካ::

ወረዳታ ፓፓያ፣ ሙዝ፣ ቡንስታ አቦካዱ እሳንስ አሜሬትስታው አኽጝስ ፅ/ጝና ኬቴብስትኹ፣ ዴኬልስትኹስታ ዴኬልስታያሱ ሊሊትጙኽ ችግኙ ፌሉሳ አይኔቶ አሬሳቻንትካስ ዲግሳማጊ አኽⶓ ጉሽካ:: ጋያኪ ቡኑ ቴክል ወረዳታ ኽሳንቲ ኪሴ ሜዜጌብፃማጊ አኽⶓ ቶኬምካ::

እንዴስ ቤዴራ ቴኬልስታው ፌል አኾ አቲጝስ፣ ቑንዚስ ፂኪስትጝስስታ ክምካውስታ አቒው ኔክትጚ ምክንያታስ ፄዴክጙ ሜቴን ዜሬቕ ናሺኹ ያኹኒውላ ናኪኒ ወክትስ ኩፅኒ ችግር ይጉዋማጊ አኽⶓ ጌሌፅካ::

ወረዳታ አግስታው ችግኙ ፌልፂ ኾት እምፕል ያኹኒውላ አሬሳቻንትካስ ፋይፃውሳ ፊልፃማ ዲግስጝዳ ኩፅኒ ኬሽኹ ፊፂምጚ ዝኩኽ አኽⶓ ኽይትጝፄካ:: ኩልስ፣ ዴሬኽሰ፣ ኩላዲሪኺስስታ ቤሬኺስ ያኻው ችግኙ ፌል ቱስቲስ ቴርታማ ዲጋማጊ አኽጝስ አሬሳቻንትካ እሳንስ ቴኬልጝስ ካላኑሳ ሴሎ ቴግባርዳ እሽፅጝስ ጄሜርስትኹ እንፅኺኪላ ይስጝፃው አኽⶓ አቶ እምቢያለ ቶኬምካ:: ኩፓኩፔስታ ችግኞ አሬሳቻንትካ ምስሊስ ሊሚፃኒ አግፃኑሳ ትክሞ ሼውቴ ፌቴርጝስ 2018 ምርቱ ዝቤንዳ 100 ሄክታር ብቲዳ ቡኖ ቴኬልጝስ እክድ እምስታማ ቴግባርሾ ቱስትⶓ አቕፄካ::

ወረዳታ 12ሻይ 500ዴስ ጃላ ሊሊትጙንኩ ኩፓኩፒው ችግኙ ፌልካ ቴርቴካማ ችኹ ወክትዳ ቴኬልጝስ እክድ እምስትⶓ ቶኬምካ:: 7 ሚሊዮንዴስ ጃላ ዴሜካ ካዌኑ ችግኝካ ጎሌልስትኹ 911 ሄከታር ብቲዳ ቴኬልስትጝስ ችኹሳ ወክቶ ማንዲትጜካማጊ አኽⶓ ጌሌፅካ::