ካንታን ካንታን ኔት ኬቴማ

አለሚቱ የኔት

ደቡብ አፍሪካዳ አግስቴት ዝምባቢዌ ታሪካዊ ማኼትካስ፣ ባይላውካ አብት ካስስታ ኽታዊኒ ስልታኒስ አቕስቴት አጌራኽ:: እና አጌራዳ አግስታንኩ ታሪካውካ ስፍርካ ክቻዴስ አፍሪካው ታሪካኻዳ ማልጜ ኬፍቲኔ ብቴ እምቴት “ኽሳንታ ዝምባቢዌ” እስቴት ኽታዌና ካርጝቲ ኬቴማኽ::

እን ኽሳንቲ ማኺቲ አፍሪካውያንካ እንፂ ፅንታው ካሌቕት፣ ጊፁ ታምትጚዳ፣ ምንግስታዊ አችትጚዳስታ ባይላዊ ስልታኒዳ ዝኩኽሳ ኬፍቲኔ አቾ ካንትፃው ንባርያኽ:: ኽሳንታ ዝምባቢዌ ናካዳ አሌሙ ታሪኩ ማራማርጛንትካ፣ አርኪኦሎጂው ውማይቴንካስታ ቱሪስትካውላዳ ኽሳንቴ ትኩቶ ጉስታት ብታ ታኻ::

“ዝምባቢዌ” ናው ካል ሾና ኮንኪዴስ “ካርጙ ጝንካ” አኹኪ “ክብርካ ካርጙ እንፅካ” ናው ኽይ ዝኩኽ አኽጝ አምንስቴ:: እንኪላ ብቲውሳ ቹዋ ሺሽፄ ግልፅስ ካንትፄ፤ ምክንያቲኪላ ኬቴም አችትጙኽ ፄጌርስ ክምብርስቱንኩ ካርጙ ክምብርስስታ ኽሳንትካ እንፅካስ አቕስቲ:: ኽሳንታ ዝምባቢዌ 11ንቲ ዴስ 15ንቴ ዝቤን ቤናሳኺስታ ዝኩኽ ጊዝዳ ማልጜ ሌጌስቱት ኬቴማ እሽቲኾ::

ሊሊትጙንኩ አርኪኦሎጂው ፅናትካ ቶኬማኑውስታጊ ኽሳንታ ዝምባቢዌ ምስራክ አፍሪካው ባሩ ዳሪው ኬቴምካሊ ኽሳንቲ ጊፁ ታምትጚ እሺኾ:: አንጚስኪላ አክኽካዋ ቻይናሾ፣ ህንድስታ አሬቡ አጌርካሾ ታምባሺና::

ስፍሪዳ አግስቱንኩ ቻይናው ታምቤት አክኽካ፣ ፋርሱ ምስታውትካ ስታ እሊኩ ባርኾቼው አክኽካ እስጜ ጊፁሳ ታምትጜ ግልፅስ ካንትፄ::

ኬቴማ ሹኻ ቹዋ ቤንካስ ቤንስቲ፣ ጂሚሪኪ ኩሩ እንፂ ያኹስ እንኪላ ኬፍቲኒ ብቲዳ ግቢትስቱኺያኽ:: ሚንችካ ታሪኩ ውማይቴንካው ካንቲስ እን ቤን ንጉስካው አኹኪ አይማኖታውካ ጉሳንትካው ዝኩፂ እሺኹ አኽጝኪላ ታክስስቴ::

ላጛንቲ ቤን ዴሜካ “ኽሳንቲ እፃኻ” እስታማ እቑስታው ያኹስ ኽሳንቲ ካርጙ እፂስ ኬቤብስቱኺያኽ:: እንኪላ አፍሪካዳ አግስታንኩ ኽታዊኒ ካርጙ እንፅካ ክቻዴስ ማልጜ ግዲታሚያኽ::

ሹኻንቲ ቤን ዴሜካ ሼሬንቑ ዙራሙሪ ያኹስ ሚንችካ አቑ ዝኩፂ እሺጝ አምንስቴ::

ኽሳንታ ዝምባቢዌ ዴስስቲት ሙራ አኹክ እንፃንታ ኬቴማ እሽቲያላኪ:: ዝቤንስ ሻይስ ቼፍስታንኩ አቕ ዝኩዋንቲ እሽቲኾ:: እንኪላ አችትጙኽ ማቤር አቕ ቴርትኹ ቺፅጝፂስታ እሳንጙኽ ይኮኖሚ እሺት አኽጝኪላ ቶኬምስቴ::

ናካ ኽሳንታ ዝምባቢዌ ዩኒስኮ አሌሙ ማኺቲው ስፍራ እስቴታ ሚዚጊብስቴ:: አሜት ቺፋ ሊሊትጙንኩ አሌሙ ቤንካሰ ይንቱንኩ ጐቤናንትካውሳ አንኩሌ ጉስታት “ኽሳንታ ዙምባቢዌ እፂ” ዝምባቢዊው እዝብስ ብሄራዊ ኩራቱ ምልኻትካዳ ካንትስታው “ዝምባቢዌው ቻኻ” እስቱኽ አቕስኽ ሜሴል እንጚ  ማኺቲዴስ አግስቱኺያኽ:: ንባሮ አግፅንኹኪ በኩርጋዚቲዴስያኽ