ታደለ አጋጄ
ኦማር አብዱልካድር አርታን አፍሪካው ልኩ ኩታው ዳኝትዳ ስም ኬፍናማ እቑስታው ጐቤዝ ዳኚያኽ:: አውሮፓው ዝቤን ቼፍታ 1992 ሶማሊያዳ ካሜንስትኹ አርታን ፖለቲካውሳ አሪጊጜ አቲትስታ ጋቻስ ሊጊሲሚ አሜትካስ ችግራኻዳ አግስቴት ሶማሊያዳ ልኩ ኩታው ዳኚ አኽጝስ ጚውሳ ውማዮ ሌጌፃ::
አርታን 2018 ፊፋስ ፕሮፌሽናል ዳኚ ያኻማ ጎሌልስትጝዴስ ቤዴራ ሶማሊያዳ ሊሊትጙንኩ ልኺትጝካዋ ዳኚጝስ እንክርፃ:: አንዴስ ፋሌንጋ ኩፅኒ አሌማ አቡቑ አችስ ጐቤዝ ዳኚ አኽጝስ ካሊፃውሳ አክሞ ሌጌፃ::
አፍሪካው ልኩ ኩታው ፌዴሬሽን /ካፍ/ ቴርሳው ልኺትጚዳ ካስጝፅኹ ዳኝትስ ጐቤዝ ዳኚ አኽጝስ አቕስቶ አግፅጝስ ጚው ስም ኬፍናማ እቑስታታስታ ቴስፊ እንኩርስትኹ ዳኚ ያኻታ ፄዋ::
አርታን አፍሪካው ክሌብካው ልኺትጚዳ እንቲታኪ አሌማ አቡቑ ልኺትጚዳ ሚንችካ እንክርካዋ ዳኚጝስ ካላ:: አሌሙ ዎታትካው ሻምፒዮና ዴሜካማ አፍሪካው ዋንቺው ልኺትጜስታ እሊኩ ልኺትጝካዋ እንክርፅኹ ዳኚያኽ::
አውሮፓው ዝቤን ቼፍታ 2025ዳ አፍሪካው ልኩ ኩታው ፌዴሬሽን /ካፍ/ ጝርጃው ጐቤዝ ዳኚ ንጝስ አቕስቶ እያ::
2026 አውሮፓው ዝቤን ቼፍታ ፊፋ አሜሪካ፣ ካናዳስታ ሜክሲኮዉ ሌንጌድፃንትስ አሌሙ ዋንቺው ልኺትጚዳ እንክርፃንታ አኽጝስ ጎሌልስቱኒውላ ጚውሳ ዳኚጙሳ አክሞ አሌምስ ካንትፅጝስ ካላያ:: ፊፋው አሌሙ ዋንቺው ልኺትጚዳ እንክርካዋ ጉስጝስ አቫላምቲ ሶማሊያው ዳኚ አኽጝስ ቴርትኹ ጊዝዳ ኩፅኒ ታክስስታያሱ ዲብ ኬሴትስትስታ::
አርታን እጋዊ ቱፄ ቪዛዋ እሚጝስ ማያሚ አሌማ አቡቑ ሩምቢሊው ፉሪፄ ስፍሬ ታምባኒ አሜሪካዋ ቱዋቲታ ፄውስትኹ አርታን እንዳርማኪ ዎንጄሉ ክስ ያኻ ዎንጄላ ጋቲታ ፊፋስ ጐሌሌስታማ አሌሙሳ ዋንቼ እንክርፃንቲ አኽጝስ ጎሌልስትኹሳ ዳኜ አሜሪካ ሚፅፃላ ኔታ ካላካልትኾ:: እንሱ ምክንያቲስ ፊፋ ልኺትጚዳ አሴቴፍጛቲው አኽⶓ ቼሜትጝፅኾ:: 2026 አሌሙ ዋንቺዳ ኬሴትስቱንኩ ቹዋ ጉዳይካዴስ እምፕል ያኻ:: ያኼስጉ እን ችግርስ አሌሙሳ ዋንቼ እንክርፅጝስ ካላያሱ አርታን ፓሪሴንት ጄርሜንስታ አስቶንቪላ ክቻዳ ካስጛው ሱፐር ካፑሳ ልኺትጜ እንክርፃዊያኽ እስታ::
ንቫርኪ ቢቢሲ ስፖርትዴስያኽ