አለሚቱ የኔት
ኤሌክትራኩ አምፖል አቒ ያሱሳ ታሪኮስታ ዝኩዊኔ ዋኽስ ዋኾ ኪሱንኩ ቴክኖሎጅካው አግስትካ ክቻዴስ እንፕሊያኽ::
እንግሊዛዊ ሳይንቲስት ሀምፍሪ ዴቪ 1802 ም/አ ጄሚሪው ኤሌክትሪኩሳ ብራኖ ፌቴርኹ ሳይንቲስትያኽ:: ኤሌክትሪኩሳ ባትሬ ካርቦንሊ እምትጝፅጝስ ብርሃን ፌቴርስታታ ፄዋ::
እንግሊዛዊ ፊዚክሱ ሊክ ጆሴፍ ሰዋንኪላ 1878 ም/አ ካርቦንዴስ ግቢትስትኹሳ ክሬ ቴኬምስትጝስ እንፃኽስታውሳ አምፖሎ ግቢታ:: ጝናኻዳኪላ ሜብራቶ ብብርፃማ ቴኬምስታ::
አምፖሉ ቹዋ ትክም ልኻኾ ብራንፅጝስ ዙራሙሬ ካንትጝስ ካሊፅጝ ያኹስ አቒ ጄራ እሌት ቺፋሱሳ ምርታምቶ ኪስኹ ኽሳንቲ ቴክኖሎጂው ዋይሚያኽ:: አምፖል አዋው ብራን እላቲውዳ እንፅኼ ኬውጝፃኑውላ እንፃኽስትጝስ ካሊፄ:: ክንታንትካ ኻራስታ ልኻኻ ያኹንኩ ቤንካዳ ሳሴርስ አንቤባንታስታ ፂኒሳንታ እርዳቴ:: ኻራ ዳድዳ ብብራንኩ አምፖልካ ዴሜካ ልኩስ እንዜጛንኩ አቕስት እንዝርናንታካውሳ ዴክቶ ማንዴ:: ጝኑ ዙሪዳ ዙራሙሪዳ ብብራንኩ አምፖልካ ዴሜካ ዳዴኾስታ ወንጀሎ ካላካልጛና::
ካሊፎርኒያ ሊቨርሞር ኬቴምዳ አግስታው እምፕል ሌግ ኬሴቱ ጉትፕዳ “ሴንተኒያል ላይት” /ሌኽ አሜቱ ሜብራት/ እስትኹ አምፖል አግስቴ:: እን አምፖልኪላ አውሮፓውያንካው ዝቤን ቼፋታጊ 1901 ም/አ እንፅኺዳ እሺኹዴስ እሌትዴስ ጉሽፃማ ላንቡሳኺስታ 2026 ም/አኺስታ 125 አሜትካስ ኬውጝፃውላ ብብሩስ እጂጝ ዜጌብስታ::
እን ዲኒክፂ ታሪክ አሌምዳ ሊጊሲሜ ጊዞ ብብሩኽ አምፖል እስትጝስ አሌሙ ዲኒክፂ /ጊነስ ወርልድ ሪከርዱ/ ሜዝጌብዳ ስሞ ፃፊስትጝስ ካላ::
እን አምፖል አዝቼ 1890ው አሊድፂሾዳ ሼልቢ ኤሌክትሪኩ ኩባንያዳ አሜርትስትኹ ያኹስ ጂሚሪዳ ብብሩስ 60ዋቶ ላኬውሳ ኬፍቲኔ ብራኖ እያሺኾ::
ናካዳ ኩፅኒ ብራኑ አይል ድሚ ሺንካማጊ አንትጝስ ሴዛ ዋቶላኬውሳ ዜሬቕናማ ክምፂው ግዲትፂ ሜብራትታ ያኻማ አጌላጌላማጊ አግስቴ::
እን ፌቴሪው ዋይሚ እንፅኺሾ ቱኺ ኽሳንቲ ሳይንቲስት ቶማስ ኤዲስን ዝኒ ዌናሳ አምፖሎ ፌቴርጙሳ ጜዋንቱሳ ሜብቶ አግፅኹ 20 አሜትካው ሊሊታኻዳ አኽⶓ ዴሜካ ታሪኮ ኽስኹስ ጉሳንታ ፄዌ::
ውማይቴንካ ናኑውስታጊ እን አምፖል ሊጊሲሜ አሜቶ እጂጝስ ካሉኽኪላ ኤሌክትሪኩ ቮልቴጁ ጃላ ኩክሪ ንጝ አግፃቲው አኽጝስ እንቲታኪ ወክትስ ፃንኩትስ ዝኩኽ አክኺስስታ ቲንኪክጚስ ታፍስ ግቢትስትኹ አኽጝስያኽ ኑስ ኢቢሲ ዜጌባ::