ዎታትካስ እንፅኺው ድል ፌቴርስታማጊያኽ እስቱኻ

እንፅኺ ድል ፌቴርስታይጝስ ቴኬምስታንትካ ያኼካማጊ አኽጞ አንኪሺ ጉዋግሲ ወረዳዉ  ወታትካ ዙሙና::

ዎታት ሽባባው ደመላሽ ቤኬፍቲ ኬቤሊው ዝኩዋንቲ ያኹስ እንፅኺው ድል ፌቴርስታይኩ ዎታትካ ክቻዴስ እምፕልያኽ::ዎታት ሽባባዉ እሊኩ 15 ዎታትካሊ አኽጝስ  ዱርካ እሩብፅጙሳ እንፅኼ   እንፃኽስቴ:: ጛራ ጛራ ዎታትካ 35 ሻይ ብሮ ክብሱኒዴስ ፋሌንጋ ኤፍ ኤስ አር ፒ ምግቡ ቴርቱ ይስጝፂው አችቱ  እርዳቲስ እንፅኺው ድል ፌቴርስታይⶓ ዙማ:: ኤፍ ኤስ አር ፒ ምግቡ ቴርቱ ይስጝፂው አችት 75 ታፋ ጉሼ ዎታትካስ እይጝስ 800 እንኩላሎ ድርባንኩሳ ዱርካዋ እሩብፅካማጊ አኽⶓ ዲብሳ:: ናካሱ ዎክትዳ ዱርካ እንኩላሎ ድርብጝስ ምልኻቶ ካንትፅካማጊ አኽⶓ ቶኬማማ እንፅኺውሳ ድሎ ፌቴራይኹ ምግቡ ቴርቱ ይስጝፂው ፕሮግራምስ ምስጋኔ ዲግሳ::

ዎታት ሽባባው እንፅኺው ድል ፌቴርስታይጝዴስ ቤዴራ ኬሽኹሳ እንፅኼ ፋይጛ ዙራሙሬ ባይፃማ ካስጝስ ችግር ታምባሺ አኽⶓ ቶኬማ::

እሊኩ ዎታትካስ እንፅኺውሳ ድሎ ፌቴርጝስ እንፃኽስታማጊ አኽⶓ ዲብሳ::እንፃኽስታኑ እንፅኺው ዜርፍዳ እንፅኼ ይስጝፃማ ሲፍጝስ ይኮኖሚስ ጛሬ ካሊጝስ ፅሬቶ ፄዋማጊ አኽⶓ ዙማ::

ዎታት ሽባባው ዎታትካዳ አላሚስታ ቴስፊ ዝኩዋኒ ዝኩዊኔ ኪስጝስ ካሊፃው እንፅኺ ዝኩኽ  አኽጝስ እሊኩ ዎታትካኪላ ዙራሙሪዳ ዝኩኽሳ አብቶ ሺሽጝስ እንፅኺዳ አሴሜርጝጝ ፋይፃው አኽⶓ ዲብሳ። ዎታትካ እምፕልትስ አሴሜርጜካማ እንፃኽስታኑ እንፅኺ እሊኩ ዎታትካስ ምሳላ አኽጝስ ካላው አኽⶓኪላ ቶኬማ::

እሊው ቤኬፍቲ ኬቤሊው ዝኩዋንቲ አላምነህ መኩሪያውኪላ እሊኩ ዎታትካሊ አኽጝስ ዱርካዋ እሩብፅጝዳ አሴሜርጝጝስ እንፃኽስታው ዎታትያኽ:: ኤፍ ኤስ አርፒ ምግቡ ቴርቱ ይስጝፂው አችት ዎታትካስ እንፅኺውሳ ድሎ ፌቴርጝስ እንፃኽስታማጊ አግስቴ:: ዱርካዋ አችትጜካማ እሩብፃኑሳ ስፍሬ ኬቤሊ እይጝስ ምስጋኔ ዲግስኹ ዎታት አላምነህ 800 ዱርካዋ አንኬባኬብካማ እሚጝስ ኬሽኹሳ ሚፄ አግፃንኩ አኽⶓ ዙማ::

እምፕልትስ አችትጝጝስ እንፃኽስትጝ እሊኩ ዎታትካስ ምሳላ ያኹንኩ አኽⶓ ቶኬማማ ዎታትካ እሊውሳ አጌሮ እንፅኼ ፋይጛ ካስጝዴስ ጛው ዙራሙሪዳ እንፅኼ ፌቴራማ እንፃኽስትጝ ፋይፃው አኽⶓ ዲብሳ::

አንኪሺ ጉዋጉሲ ወረዳ ግብርኒ ፅፌት ጝናዳ ምግብ ቴርቱ ይስጝፂው ፕሮግራም /FSRP/ዉ ቴቬቬርጝፃንቲ አቶ ቢያድጐ ኮለች ፕሮግራም ወረዳዳ ሊሊትጙንኩ ስርኩ ልማትካዋ ግቢትጝስ፣ ኽብፂውሳ አሉምቶ ማንዲጝስ፣ እስካውካ ቴክኖሎጅካዋ እምፕልታቕስ ካይጝፅጝስስታ ዎታትካስ እንፅኺውሳ ድሎ ፌቴርጝስ እምፕልታቖ ቴኬምስታንታ ፄዋማጊ አግስታው አኽⶓ ዲብስካ::ቤኬፍቲ ኬቤሊዳ እንኩላሎ ድርባንኩሳ ዱርካዋ እሩብፃንኩ ዎታትካስ ምግቡ ፕሮግራሙ ይስጝፂስ እርዳቲ ፄውስትⶓ ጌሌፅካ::

ዎታትካ አሴሜርጙኑ እንፅኺው ዜርፍዳ ዋይሚስታ አኽጝስ ቻስ እቺሳማ ካንትጝ ቱስቴ ኑንኩ ፕሮግራሙ ቴቬቬርጝፂ ይንታውስኪላ ሊሊትጙንኩ ስልታንካዋስታ ውማዩሳ እርዳቴ እያንኩ አኽⶓ ቼሜትጝፄካ::

አንኪሺ ጉዋጉሲ ወረዳው እንፅኺውስታ ስልታኒው ፅፌት ጝናሱ አላፊ  አየነው ዋሲሁን ወረዳዳ እምስትኹ ባጀት አሜትዳ 2 ሻይ 585 ዎታትካስ እንፅኺውሳ ድሎ ፌቴርጝስ አኬድስታማ 3ሻይ 345 ዎታትካስ እንፅኺው ድል ፌቴርስትⶓ ጌሌፅካ::

ዎታትካስ እንፅኺውሳ ድሎ ፌቴርጝስ ዙራሙሪዳ ዝኩኽሳ አብቶ ሺሽጝስታ ቴኬምስትጝ ቱስቴ ኑንኩ አላፊ ዎታትካ እንፅኺዳ ቱዌካማ ዋይሚስታ ያኻንታ ምግቡ ቴርቱ ይስጝፂው ፕሮግራም ኬፍቲኔ ፍሼ ፄዋማጊ አኽⶓ ጌሌፅካ::

ዎታትካዋ አችትጝፃማ እንፅኺሾ ሚፅጝ ይቪቺ ያኻውላስ ዋይሚስታ ያኻንታ እርዳትጝ፣ ስልታኔ እይጝ፣ ጉሼ አሜሜችጝፅጝስታ ጌቤሉሳ ታምትጜ ፌቴርጝ ፋይፃው አኽⶓ ቶኬምካ::ዎታትካ ፌቴርስታይኹሳ እንፅኺውሳ ድሎ ቴኬምስትጝስ ይንታውሳ ጛጛርትጛሱሳ ዝኩዊኔ ኬሽጝፅጝስ ቲጊጝ ቱስቴ ንካ::

ታደለ አጋጄ