ፊፊ ባይላዊ እንክሪ ኬፍናማ ኬቤርስታታ ፄውጝ ቱስቴ

ኽታዌን ታብል አርቤንካውሳ ጄግንቶ ታክስፃው፣ ወታትካስታ አንቓ አንቕ እምፕልትስ ኬቤርፃኑ ቹትካ ዴሜካ ግዲካማ አደባባያ ፌካማ ኬቤርፃኒ ክምንቱ ሙሲሲኒ ያኹኽሳ ፊፊውሳ እንክሬ ኬፍፃማ ኬቤርፅጝስ ካሊፃውሳ ድጋፎ ፄውጝ ማንዲስቴ እስትኾ::

ፊፊውሳ እንክሪ ክምንትስ ወሬስፅጝስኪላ እንፅኽስስታማጊ አኽⶓ ባይል ቱሪዝምስታ ስፖርት ሜምሪ አቕፃ:: እምፕልታቕኪላ ባይሎ ትንካኪስ ማንዳንታ ፄውጝ ማንዲስቴ እስታ::

ፊፊው ባይላዊ እንክሪ ቤሬኺት ጌኔታ ታኹት ስሊትስታ ለውዝ፣ አኩሪ አቲሪስታ ኩፓኩፒ እሳንስ አሜሬትስታው አቒይሪ እንካንጚስ ዝኪዋኑ ጃዊ ወረዳዳ ኬፍናማ ኬቤርስቴ::

ፊፊ ባይላዊ እንክሪው ታሪኩ ጉሽፂኪላ እዝብካው  ሰላሙ እንካንጚውስታ ጄግንቱ ጊሊፅፂያኽ:: ፊፊ ባይላዊ እንክራዴስ ጃላ ማይቤራዊ ታምትጚ ካንትስታው ኽሳንቲ እምፕልታቑ ታክስጚውስታ እምፕልቱ ካንትፂታኪላ ቶኬምስቴ::

ፊፊ ባይላዌ እንክሬ ካንትኹስ ጅሚውሳ ግትሞስታ ዜማዋ ቴርስጝስ ባይሉስታ ኪነ ትቬቬ ኬችሊ ያኻማ ኽሳንትካ ሜንድሬኽካዳ ጅምጝስ አቕስታው አርቲስት ወልደ ማርያም ጌታሁን ባይሉ ኬች አዊዳ አግስታንኩ ባይላውካ፣ ታሪካውካስታ ሊሊትጙንኩሳ አኼንካዋ አቕትጝፅጝስ እንፃኽስታው ኬች አኽጝታጊ ፊፊውሳ እንክሬኪላ እዝብ ክችክቺስ ያቓማ ክምንትስ እጂፃታ ፄውጝስ ታምቦ ፊትጛማጊ አኽⶓ ጉሻ:: ፊፊውሳ እንክሬ ባቲ፣ አንባሰል፣አንቺ ሆየስታ ትዝታ እስታንኩ ዜማኩ አይኔትካስ እንክሬካማጊ አቒውዳ ሼውዳ ይጉዋታ ፄውጝስ ሞኬርካማጊያኽ::

አርቲስት ወልደማርያም እይኹ አሳብዳ ፊፊ ናው ካል ፊ ፍንስ አኹኪ “ውጣ እንውጣ” ናውሳ ታሪካዊ ኽዮ እሜስኩኹ አኽጝ እንክርፃ:: እንጚሱ ትሪኩ ጉሽፂኪላ ኽታዊኒ ጊዝዳ ዙራሙሪኩ አቕዳ ወሬም አኹኪ ጋቻዋ አዌጃውሳ አይሉ ካላካልጚስ ቴኬምስታሺኑዊያኽ::

ባላንጋሪስ ድምቤር ዎሬስፃላ ንካማ፣ ሰላም አቲሳውስጊ እምፕልትካማ አችትጝጚስ ማንዳሺኑ ፊፊ ባይላዊ ታሪኩሳ አላሜ እሜስኹያኽ:: እቑትጚስ ቴኬምስታሺኑ ዜሚው ምልኻትኪላ እሼ:: ፊፊው ባይላዊ እንክሪስ እሼው ባይላዊ ዜማው ሜሳሪኪላ ቤሬኺው ሼምቤኩ ላጜታዴስ ሶኼታዋ ኺስታ ቑቺ ዝክኹ ማሌፍስታማ ፋው አኽⶓ አርቲስት ወልደ ማርያም እንክርፃ ፊፊው ባይላዊ እንክሪስ ቴርስኽ  ግትምዴስኪላ ችልላው ድምፅስ፦

ኤሄ  ኤሄሄ ኤሄ ኤሄሄ

ወይ አገር ወይ አገር

እን አጌራ ጃዊ

ችኩኽጊ ብቲዳ ግዴማ ዋጋዊ ኤሄ ኤሄሄ

ፊቺ ወርክዌና

ጀፃንኽሊ ውጂሊ ጃይኹዋ

አዋላይ ድኩሊ እሻሳ ቡያታ

ሚቓያ ጛርጋሳ ኻታታ……

ናማጊ ዜምፅጝስ ብይሎ አቕትጝፅጝስ ባይሉ ኬችካሊ እንፃኽስስታማጊያኽ:: ጛጂ ጄሜሩኑሳ ይስጝፄካማ ሲፍፃንኩ አኽⶓ እንክርፁኽ አርቲስት ወልደ ማርያም ፊፊውሳ ባይላዌታ ታሪካዌ አኺኔ ኬቤርፃማጊ ክምንትስ ታሪኮ ክንትፂታ ቴኬምስትጝ ፋይፄ:: ፊፊው ባይላዊ እንክሪውሳ ምሳሌ፣ ዋኒ፣ ዋዳስታ ዋትጛ እንክርስቴ ናውሳጊ ትኩታው ቤን ፂኒሳማ ኬፍናማ ኬብርፃስታ ፄውጝ ፋይፄ ናውሳ ካንቴ እያ::

ፊፊውሳ ባይላዌስታ ታሪካዌ እንክሬ ክምንትስ እጄታ ፄውንኩሳ ዴሜካማ ሜስኬሩም 18ዴስ ሜስኬሩም አሊዴ ኺስታ ባሉ ጜዋንካ ያኼካማ ኬቤርፃንኩሳስታ አሴቴፍጛንኩሳጊ እንኩዋ ታምፁናስ ና አርቲስት ወልደማርያም::

ፈንድካ ኬቴሙ ቺፅጝፂዳስታ ጃዊ ወረዳዳ ኬፍናማ ሜስኬሩም አርፊዳ ኬቤርስታው ፊፊው ባይላዊ እንክሪ እዝብስ አቕትጛታኪላ ፅናቱ ፁፍካ ዲግካማ  ኩስጚ ካስጛማጊያኽ:: ኹን፣  ወታታካ፣ ባይሉ ኬችካ ሙሁራንካስታ ምንግስቱ እንፅኺው አላፍካ አግስቴካማ ኩስጜካ::

ኩስጚዳ አግስቱንኩ አቶ ንጋቱ ዋሴ ፊፊ ቹዋ ታብል ባላንጋሬ ካላካልጝጝስ እቑትጝጚስ ቴኬምስታሺካ፤ ቲቪቪርጚውስታ ጄግንቱ ሚስኪሪፂ ካሊያኽ ንካ::

ፊፊው ባይላዊ ድምፁ ሜሳር ላጜታ ጝርጃ ዳጉልጜካማ ዙሬ ዙርካማጊ እንክራኑ ያኹስ ኹን ዴሜካ ዙሬ ዙርክማጊ “ኢዮ ናን እዮ አሃሃ” ናው ዜሚስ እልል ንካማጊ አጄባኑ አኽⶓ አጌር ሹማጌላ አቶ ንጋቱ ድኹዌካ::

ፊፊ ኽታዋኔ ታራኮ እሚኹ ያኹኒኪላ ናኮኪላ ሰላሙ፣ እንካንጚውስታ ልማቱ ድምፃ ያኻማ እምፕልታቑላዳ ሲፍⶓ ጉሽካ::

ወታት ድረስ አዲሱኪላ ትራካዊ ኽይ ዝክኹሳ ፊፊውሳ እንክሬ ቹዋ ታብልዴስ ቻቤልካማ ሲፍፅጝስ ፅሬቶ ፄዌካማጊ አኽⶓ እንክርፃ::

ፈንድካ ኬቴሙ ቺፅጝፂው ባይል፣  ቱሪዝምስታ ስፖርት ፅፌት  ፅፌት ጝናሱ አላፊ አይማኖት ማሞ  ፍንድካ ኬቴሙ ቺፅጝፂው ኮማኒኬሽንስ እዩኑ  ጊሉፅፂዳ ፊፊው ባይላዊ እንክሪ ቲቪቪርጚስስታ ሰላሞ ኬቤርፅጝስ ታምቦ ፊትጛው አኽⶓ ጉሽካ::

ጄግንካ ታብል ወክትስ ጛውሳ ዴክቶ ማንዲፅጝስ ቴኬምስቱኑ ሴል ናኪኒ ክምንትስ ኬፍንኹሳ ክንቴ እያው አኽጝታጊ ክምንት ፊፊ ባይላዊ እንክሪዴስ ዴሶ ካፃታስታ ባይል ክምንትስ እጄታ ፄውጝስ ፅሬት ፄውስታማጊ አኽⶓ ኽይትጝፄካ::

አዊ ብሄረሰቡ ቺፅጝፂው ባይል፣ ቱሪዝምስታ ስፖርት ሜምሪው አላፊ  ካላአብ ካሃሊው ብሄረሰቡ ቺፅጝፂታ ችኽ አሌድስታማ አዝሜር አፌራው፣ አቪቪ አቬቫው፣ አቒ ኽቴ ናቴ ማቤራዌ ታምትጜ ይስጝፅጝስ ካላው ሜስኬሩም አርፊዳ ኬቤርስታንኩ ባይላዊስታ ታሪካዊ ባልካዴስ እምፕል ፊፊው ባይላዊ እንክሪ ቱስቲስ ኬቤርስታታስታ አቕስቶ አግፃማ ዙራሙሪ ጎቤናንትካው ማይኬል ያኻታ ቤዴራ ቴርት ካስጝⶓ አቕፄካ::

ፊፊ ባይላዊስታ ታሪካዊ እንክሪ ኽታዌን ቹዋ ታብል ባላንጋሬ ድላ ፄውጝስ አዋን  ቴቬቬርጝኔስ ንካማ እቑትጛሺኑ አኽጝታጊ ናኪኒ ክምንትኪላ ጋቻዋስታ ወሬም እንቲታኪ ድኽቶ ድፅጝስ ክንቴ ካፅጝ ማንዲስታው አኽⶓ ጉሽካ:: ትቬቬንካ ቹዋ ታብል እጂፁኑሳ ትሪኮ ወሬሳማ ባኩኒ ቴግባርስ ክምንት እሽፃታ ፄውጝስኪላ እንፃኽስስታማጊ አኽⶓ ቶኬምካ:: ባይሎ ጜዋንትስ አንኬባኬባማስታ አቕትጝፃማጊ ዙራሙሪ ጎብናንትካስ ታምብፃ ያኻማ ይክኖሚውሳ ትክሞ እያታ ፄውጝ ፋይፃው አኽⶓ ኽይትጝፄካ::

ጋያኪ ኹንስታ ምሽታር ወታታካ እስካዊ አሜትስ ሰላሙ፣ ቲቪቪርጚውስታ እንካንጚው ያኻያታ ክርፄ ትምኔቶ እጉስ ዲኒክፂ እንክሪስ እንክራኑ አኽጝታጊ ፂንሳማ  ታሪኮ አቕፅጝ ፋይፃው አኽⶓ ጌሌፅካ:: ሜምሪኪላ ፋይፃውሳጊ ድጋፎ ፄዌማጊ አኽጝስ ጃዊ ወረዳስታ ፈንድካ ኬቴምዳ ሜስኬሩም 18ዴስ ጉሽፃማ ሜስኬሩም አሊዴኺስታ ዋሺኒኪ ጎቤናንቲ ዙራሙሪዳ ኤግስታታ እቐዌ ዲግስካ::

ንግስቴ ተስፋ