ቨርሚ ኮምፖስት ምርቶ ሌጌፅጝስ ኬፍንኹ ትክም ዝኩኽ አኽጝ ጌሌፅስትኾ

ቨርሚ ኮምፖስት ቨርሚው ፊፍሬ ቴኬምስትጝስ አሜሬትስታው ፍትሬቱ ማዳባሪ ያኹስ ፃንኩት ዝኩኽስታ ሴብልስ ፋይፃንትካ ያኹንኩ ፄኬስካ ዲብካዋ እሚኹያኽ:: ቨርሚ ኮምፖስቶ ሊሊታ ፄዋው ቨርሚው ፊፍሪ ኹታኹትጝስ ካላው እንሴስካውስታ ቴክልካው ፊቲ ምርትካዋ ሜጌብስትጝስ ኹታኩትጝጙሳ ካስቶ አሬኽፄ::

ግብርኒው ምርትካ ፃንኩቶ ማንዱኽ ዳድስ አሜሬትስታታ፣ ምርት አሌማ አቡቕ አችስ ልኺትጛንቲ ያኻታ ካሊፅጝስ፣ እምፕልታቕስ እንፅኺውሳ ድሎ ፌቴርጝስ፣ ሚፂው አግፃ ፄዉጝስ፣ ፃማ ክብፃ ያኻንኩ ስፍርካዋ ኬሽኹስ ልማትዳ እሼታ ፄውጝሰ፣ ኬሚካል ማዳባሪውሳ ዋይሚስታንቶ ዴሜክጝስታ ኬሚካል ማዳባሪውሳ ፍሼ ኔኬትጝ ቨርሚ ኮምፖስት እያው ትክምካኽ::

አይኪ ቨርሚ ኮምፖስቶ አሜሬትጝስ ቤዴራ ፃንኩቶ ማንዱኽሳስታ ቨርሚዉ ፊፍሬ  አሜሬታንትካዴስ፣ ሞዴል አሬሳቻንትካዴስ፣ አሬሳቻንትካው ማይኬልካዴስስታ ፄጌርጙንኩዴስ አግፅጝስ ስፍሬ ቴርስጝ ቱስቴ:: ቨርሚ ኮምፖስቶ ቴርስጝስ ዳላው ግባት አግስታውሳ ስፍሬ ጎሌልጝኪላ እሊው ሴልያኽ::

አሬሳቻንትካ ቴርስስታዉ እምፕል ኪሎ ግራም ቨርሚ ኮምፖስት 600ብርዴስ ጃላ ጌንዜብስ ዋይስትጝስ ሚፂዉ አግፂ ያኻማጊያኽ::

ቨርሚ ኮምፖስት ምርቶ ሌጌፅጝዴስ ድምክና ሚፂው አግፂ ፄዉጝስ ትክሞ እግፄካማጊ አኽⶓ ፋግቲ ለኮማ ወረዳው አሬሳቻንትካ ዙሜካ::

ግብርኒው ዜርፍዳ አሴሜርጙንኩ አሬሳቻንትካ ሴብል ኬሽኹሳ ምርቶ እያታ ሊሊትጙንኩ ዲብካዋ ቴኬምስታና:: እኒጛ ክቻዴስ እምፕል ቨርሚ ኮምፖስትያኽ:: ቨርሚ ኮምፖስቶ ቴኬምስትጝስ ኬሽኹሳ ምርቶ አሜሬትካማጊ አግስታንኩ ፋግቲ ለኮማ ወረዳው አሬሳቻንትካ ሚፂው አግፂ ፄውጝስ ትክሞ አግፄካማጊ አኽⶓ ዙሜካ::

አሬሳቻንቲ አሳዬ ካሳሁን ፋግቲ ለኮማ ወረዳ እንዳኹዊ ኬቤሊው አሬሳቻንቲ ያኹስ ቨርሚ ኮምፖስቶ ሊሊትጙንኩ ሴብልካዳ ቴኬምስታንኩ አኽⶓ ዙሜካ:: ቨርሚ ኮምፖስቶ ቴኬምስትጝስ ሴብል ኬሽኹስ ዋጋታ ፄውጝዴስ ድምክና  ፊፍሬ አሜሬትካማ ዋይጝስ ሚፄ አግፄካማጊ አኽⶓ ቶኬምካ:: ውላ አሬሳቻንትካ ቨርሚ ኮምፖስቶ ጛው ጎርዳ  እንፃኽስትጝስ ኬሽኹሳ ምርቶ አሜሬትካማጊ ዝኩዊኔ ኪስጝስ ካሉንኩ አኽⶓ እርዳትፅካ::

አሬሳቻንትካ ቨርሚ ኮምፖስቶ ቴኬምስትጝ አቓ ግብሪ ማዳባሪስ ፍሻኑሳ ጌንዜቦ ይጉፅⶓ ቶኬሙንኩ አሬሳቻንቲ   ቨርሚ ኮምፖስት ኽብፂው አሉምት ዴሜካታ ፄውጝስ ኽሳንቲ ትክም ዝኩኽ አኽⶓ ድኹዌካ:: ቨርሚ ኮምፖስቶ ቴኬምስትጝስ ዜርስትኹ ብቲ እንዳራኪ ቴኬምስታኑላስ ላጛ ሹኻ አሜትካስ ኬሽኹሳ ምርቶ እያው አኽⶓኪላ ዲብስካ:: አቓ ግብሪ ማዳሪ  ዴሜክስታማ ዜርስታው ሴብል  እምፕል አሜትስ ይቪቺ አገልግሎቶ እያው አኽⶓ ዲብስካ::

እሊው ፋግቲ ለኮማ ወረዳ እንዳኹዊ ኬቤሊው አሬሳቻንቲ ጌታቸው በሬ አቓ ግብሪ ማዳባሪው ዋይሚ ኬቤርጝ አሬሳቻንትካ ቨርሚ ኮምፖስቶ ቴኬምስትጝስ ቴጋንኩ ቴክልካስ ያኻ እሊኩ ሴብልካዋ ኬሽኹስ አሜሬታንታ ፄውኽ አኽⶓ  ዲብስካ:: ግብርኒው ውማይቴንካ ካንትፃኑ ስሬትስ አሬሳቻንትካ ኮምፖስቶ ጛው ጐርዳ አሜሬትጝስ ኬሽኹሳ ምርቶ አሜሬትጝስ ቴኬምስታንታ አኽⶓ ዙሜካ:: እንዴስ ቤዴራ ግብርኒው ውማይቴንካውሳ ክንቴ እርዳትስታኑላስ ይጉጝስ ሚንች ትክም ይጉⶓ ቶኬሙንኩ አሬሳቻንቲ ናካዳ አቓ ግብሪ ማዳባሪው ዋይሚ ኬቤርጝስ አሬሳቻንትካ ቨርሚ ኮምፖስቶ ቴኬምስታንታ ፄውⶓ ዲብስካ::

ፋግቲ ለኮማ ወረዳው ግብርኒው ፅፌት ጝናሱ አላፊ አበባው አማረ ፍትሬቱ ማዳባሪ አቓ ግብሪ ማዳባሪዴስ ሊሊታ ፄዋው ኽብፃኻዳ ሊጊሲሜ ጊዞ እጂጝስስታ ኽብፄ ዊዳፊስ ኬሽጝፅጝስ ኬፍንኹ ትክም ዝኩኽ አኽⶓ ጌሌፅካ::

ቨርሚ ኮምፖስቱ ሼድ ፋግቲ ለኮማ ወረዳ እንደኹዊ ኬቤሉዳ ግቢትስትጝ አቓ ግብሬ ማዳባሪው ዋይሚ ኬቤርኹ አኽጝስ ቨርሚ ኮምፖስት ኬሽኹሳ ኽብፂውሳ አሉምቶ ዙርፃው አኽⶓ ዙሜካ::

አዊ ብሄረሰቡ ቺፅጝፂው ግብርኒው ሜምሪው አላፋ ቤዛዊት ጌታሁን ፋግቲ ለኮማ ወረዳዳ ግቢትስትኹ ቨርሚ ኮምፖስቱ ሼድ ፃንኩት ዝኩኽሳ ቨርሚ ኮምፖስቶ አሜሬትጝስ ኽብፂውሳ አሉምቶ ዙርፅጝስ አቓ ማብሪ ማዳባሪስ ፋውሳ ፍሼ ይጉፅጝስ፣ ዊዳፊ ግብርኒውሳ ቴርቶ ይስጝፅጝስስታ አሬሳቻንትካስ ቴግባሩ ስልታኒው ካንፅፂ ያኻማ አጌላጌልጝስ ካላው አኽⶓ ዙሜካ::

ይንታውስኪላ ቨርሚ ኮምፖስቶ ቴርስጙሳ ዴሶ ይስጝፅጝስ አሬሳቻንትካ ፍትሬቱሳ ማዳባሬ ቴኬምስትካማ ኽብፂውሳ አሉምቶ ኬሽጝፅጝስ ሴብሉሳ ምርታምቶ ዴሜካታ ፄውጝስ ኬፍንኹ ትክም ዝኩኹ አኽⶓ ጌሌፅካ::

ፋግቲ ለኮማ ወረዳ እንደኹዊ ኬቤሊዳ 4 ሚሊዮን ብር ዴስ ጃላ ፍሺስ ግቢትስትኹ ቨርሚ ኮምፖስቱ እሩብፂ ሼድ ግቢትስታማ ዳቔርስታ:: አማኻሪ ክልሉ ግብርኒው ቢሩ ባጄቱ እርዳቲስ ግቢትስትኹ ቨርሚ ኮምፖስቱ ሼድ አሬሳቻንትካ ምርቶስታ ምርታምቶ ዴሜካታ ፄውጝዴስ ድምክና ሚፂው አግፂ ያኻማ ትክሞ እያው አኽጝ ቶኬምስታ::

ታደለ አጋጄ