ስኹፃንቲ

“ዝኬኽ ኒካማኪ አምኔንኪ እላኽ ኒካማኪ ቴስፌ አቴንኪ  ፄውቴካማኪ ይውላዴስ ፊኬንኪ” ኒኹ ፅኻራ እስታው ምሳሊ ዙማታጊ ናካዳ አግስትናው ትክምቲ አርፊ አኽጝታጊ ፅኻራ አቒ ይሪስ ይታው ኽሳንቲ ምርት ጛርጊ ኬውስታው ዎክትያኽ::

እን አጌራ ይቶፒያ ፅኻራው አብት ልማትስ አፍሪካዴስ አቫላምቲ አችዳ አግስቲ:: እንጚስኪላ አሜቶ ዋኾ አቬቫው ፅኻራው ካናኻፂስታ ትክልቲ ዝኩጝ፣ ኬፍቲኒ ፅኻራው አብት፣ ፅኻራስ አስሜምጛው አይር እግልታስታ ብቲው ፍንት ዝኩጙ ምክንያትስ እን አጌራዳ ኬፍቲኒ ጛርጊው ምርት ዝኩኽ አኽⶓ ግብርኒው ሚኒስቴርዴስ አግፅኑኽ ንቫር ቶኬሜ::

ፅኻራው ፍትሬት ጛርጌ አሜሬትጝ ይቪቺ ያኻውላ ፍትሬቱሳ ሚንዛኖ ማንዲፅጝስ እንቲታኪ ካናኻፅካውሳ ይውቶ ሲፍፅጝስኪላ ኬፍቲኔ ታምቦ ፊትጝቴ::

እንዴስ ድምክና ፅኻራ ምግቡሳ ዋስትኔ ቼሜትጝፅጝስ እንፅኺውሳ እድሎ ፌቴርጝስ ይኮኖሚው ልግስስኪላ ፋይፃንታኽ:: አጌርታ 2 ሚሊዮንዴስ ጃላ ፅኻራዋ ስኹፃንትካ አግስታና::

2018 ምሬት አሜታዳ ግብርኒው ሚኒስቴር ፍሽኹ ንቫርታጊ 500 ሻይ ቶንዴስ ጃላ ጛርጊውሳ ምርቶ አሜሬትጝስ ካሊፃው አክም ዝኩኒውላ አሜሬትስታማጊ ዝኩኽ ኩፅኒ ዜሬቕቲኒ አኽጝስ ምርቶ ሌጌፅጝስ ካሊፃው ቴግባርዳ ትኩቶ እይጝ ፋይፃው አኽⶓ ግብርኒ ሚኒስቴሩ ንቫር ቶኬሜ::

ፍትሬቱሳ እይስቴስታ ዙራሙሪስ አሜቻውሳ አጋታሜ ቴኬምስትካማ ፅኻራዋ ስኹፅጝዳ አሴሜርጙንኩ ዚጋሚ ወረዳው አሬሳቻንትካዴስ ወርካየሁ ሽቱ እንፅኼ ጄሜሩኑ ፅካ አሜታዴስ ቤዴራኽ:: ግብርኒው እንፅኺዴስ ኬምፕስ ኬምፖ አኮሜቻኑ ፅኻራዋ ስኹፅጙ ቴግባርዴስ አግፃኑ ሚፂዴስ ድምክና ምግቡ ዋስትኒስስስታ እጁስኪላ ቴኬምስታና:: እንፅኼ ጄሜሩኑ ጝኑ ዝንቡዳስታ ካዌንዳ ካኒዳ አንኪሜ ስኹፃኑ ባይላዊ ዋልታ አንኪሚስያኽ::

አሬሳቻንቲ ወርካየሁ አግፃኑ ሚፂ ዴሜካማጊ ካስጙ ምክንያትስ ኩፅኒ እንፅኼ ይስጝፄካማስታ ውማይቴንካ እያኑሳ ኩስጜ ቹኒትካማጊ ፅኻራውሳ አንኪሜ አሜውስታ ፅኻራው ቲን ማንዲስታማ ጛርጌ እይጝስ ካላውዳ ፄዌካ:: ባይላዊ ፅኻራዋ እሩብፅጙ ሴልዴስ ፌይካማ ካይጚውሳስታ ዝቤናዌ አንኪሜ ቴኬምስትካማ አግፃኑሳ ሚፄ ሌጌፅጝስ ታኬታኑላ እንፃኽስስቴካ::

“ፅኻራው ጛርጊ ይጉዋማ ሜርዙላ ዋይሜ ፍሻው አኽⶓ አቕና” ናንኩ አሬሳቻንቲ ወርካየሁ ቤዴርካማ እንፃኽስታኑ አንኪሚዴስ አግፃኑ ኬፍቲኒ ምርት 10 ኪሎ ግራምዴስ ኽሳቲው እሺኹ አኽⶓ ድኹዌካ:: ዝቤናዊ እንፃኽስስትጚሾ ቱኒዴስ ኩፅኒ 50 ኪሎግራም ጛርጌ አግፃንኩ አኽⶓ ጉሽካ::

ፅኻራዋ ስኹፅጙ እንፅኺ ኽሳንቲ ይኮኖሚው አግፅፂ ያኹኒውላ  አሪሜ ድፅጝስ እሰታማ አሬችስታው ኬሚካል ኩፅኒ ፅኻራው ዝኩኒዊ ስጋታ አኽⶓ ጉሽካ:: እሊው ዴሜካ ፅኻራዋ ዝቤናዊ ዳድስ ስኹፅጝስ ፋይፃው አንኪሚዴስ ጉሽፃማ ፋይፃንኩ ኮርሻማርሺው ዲግስጚ እንፂጝ ዝኩኹ አኽጝስ ትኩታው ቤን ኽዮ ፋያታኪላ አሬሳቻንቲ ውርካየሁ ካሴ ዲግስካ::

አሬሳቻንታ ፊለጉሽ የኔት ዚጋሚ ወረዳዳ ጊሳይቲ ኬቤሊው ዝኩዋንታ ያኻኒስ ፅኻራዋ ስኹፅጝ ትንካኬ ካሴው እንፅኺ ያኹኒውላ ሳሴርስ ጌንዜቦ አግፅጝስ ኩፅኒ ክቼው እላቲው አኽⶓ ዲብስካ:: ጛርጊዴስ አግፃኒ ሚፂስ አሜቱሳ ልሻኹዋ ቺዊውሳ ፍሼ ሾፌንካማ፣ ጄርካስ አሜቱሳ ስዮ ጄዋኑ እንቲታኪ ጄርካዋ ክንትፃኑ ጌንዜቡ አግፅፂያኽ::

“ፅኻራውሳ እሽፅጝፄስታ ቺፅጝፄ እንቲታኪ ዝኩኑሳ አቾ ክማስግላ ጎቤናውላ ሼው ፉራላ ናንኩ አሬሳቻንታ ቱስቲስ አንኬባኬብጜ ፄዋንኩ አኽⶓ ጉሽካ::

ጋያኪ ዲጊ አሜትካዴስ ናቴ አምሉ አሻሪስ ሊሙኽ ዴንዳ ፅኻርካ ሌኬማኑ ፍትሬቱ አቪቪ ሚንቻታ ካሊፂጝስ ጛርጊውሳ ምርታምቶ ሌጌፅጝስ ክርፄ አጋታሜ ፌቴራ ንካ:: ውማይቴንካ እያኑ ክንቲው ጉሽፂስ ምሱቡ ቢሪኪቲው ቴኬምስታንትካ አኽጝስ ፅኻራዋ ስኹፅጝዳ ትኩቶ ፄዌካማ እንፃኽስቴካማጊያኽ::

አሬሳቻንቲ ስሜነህ በላይ ኪላ ጊሳይቲ ኬቤሊው ዝኩዋንቲ ያኻኒስ ፅኻራዋ ስኹፅⶓ ጄሜሩኑ ዎክትዴስ ጉሽፃማ ፅኻራሊ ሊሊቲ ታምትጚ ዝኩክ አኽⶓ ድኹዌካ:: ፅኻራ ዳራ ፋታት አኽⶓ ስታ ዳማስ ጉዲስቴት አኽⶓ ቴንኬክካማ ሺሼካ::

ናካዳ ሶኼታ ባይላዊ፣ ሹኻ ካይጚው እንቲታኪ 12 ዝቤናዌ አንኪሜ አጌሌካማ ፅኻራዋ ስኹፅጙሳ ቴግባሮ ይስጝፄካማ ሲፍፅካ:: አሜትዴስ ላጚኒ ጛርጌ አሜሬታና::  ፅኻራስ ፋይፃውሳ አቢቢውሳ አይኔቶ ጛው ቴጋናኻዳ ቴኬልካ:: አኾኪላ ዲጊዳ አግፃንታ እንፃኽስስታና::

አሬሳቻንቲ ስሜነህ ናኑውስታጊ ኬሻንቴ ጛርጌ አግፅጝስ ፅኻራውሳ ምግቦ ቴርስጝ አኹኪ ዋኽትጝፅጝዴስ ፌይኹስ ሜስኬሩም አርፊዳ አንኪሜ ቑፅካማ እስካዊስ ፅንኩቶስታ ሚንቺት ዝኩኽሳ ጛርጌ አግፃኑ ሴልኪላ ዝኩኪያኽ::

ቤዴርካ አሜትካዳ ሲስቲ ኪሎዴስ ኽሳያሱሳ ጛርጊያኽ አሜሬታሺኑ:: ናኪኒ ዎክትስ ዴሜካ ዝቤናዊ አንኪሚዴስስታ ካይጚው አንኪሚዴስ ኬሻንቴ ምርቶ አግፄካማጊያኽ:: እምፕሎ ኪሎ ግራሞ 800 ብርዴስ 1ሻዮ ብሮ ኺስታ ዋይካማ ሚፄ አግፃና:: ጛ አግስታኑ ዙራሙሬኪላ ፅኻራዋ ስኹፅጝስ አሜቻው አኽጝሊ እምትጛማ ዜርፍስ ትክቶ እይካማ ግብርኒው እንፅኺዴስ ኬምፕስ ኬምፖ እንፃኽስቴካማጊ አኽⶓ ዲብስካ::

አሪሜ ድፅጝስ እስታማ ሴብልዳ አሬችስታው እጁ ቤዴራስኩ አሜትካዳ ኬፍቲኔ ጉዳቶ ታምፃሺኹ አኽⶓ ጉሽካ:: ናኪኒ ዎክትስ ዴሜካ ኬሽጛማ ይንቱኽ አሪሚው እጁ ፅኻራዳ ጉዳቶ ታምፃቲውስታ ስጋታ አኻቲው አኽⶓ ዲብስካ:: ላምቡስታ ፅኻራው ቲንዳኪላ ታምፅኹ ጉዳት እላኽ ንካ::

አሬሳቻንቲ ስሜነህ ፅኻራዋ ስኹፅጙሳ እንፅኼ ይስጝፄካማ ሲፍፃኑሳ ኽሳንቴ እክዶ እሚካ:: ፌያፌያማ ፅኻራውሳ እንኬ አቲሳውሳ እጜ ድፃው እጁ ዲጋያታኪላ አሳቦ ዲግስካ::

ዚጋሚ ወረዳ እንሴስካው አብት ልማቱ ፅፌት ጝናዳ ፅኻራዋ ስኹፅጙ ልማቱ ውማይቲኒ አልማው አማረ እዩኑ ኽይትጝፂዳ ወረዳዳ አሳን ዴኑ ሽፋንስታ ፅኻርካስ ፋይፃው አቪቪው አይኔት ዝኩኽ አኽጝስ ወረዳኩ ውላጊ ወረድካዳ ጛርጊ አሜሬትስታው አኽⶓ ጌሌፅካ::

ዙራሙሪዳ ጛርጊውሳ ምርቶ ሌጌፅጝስ ዴሜካ ምሱቡ ቢሪኪቲው እክድኪላ ኽሳንቴ ፍሼ ፄዋማጊ አኽⶓ ኽይትጝፄካ:: ወረዳዳ 500 ዝቤናዊ፣ 788 ካይጚው  16 ሻይ 788ዴስ ጃላ ባይላዊ አንኪሚ ቴርታማ ፅኻራዋ ስኹፅጙ ቴግባር አኮሜችስታማጊያኽ:: 4ሻይ 757 አሬሳቻንትካኪላ ጛርጌ አሜሬታንኩ አኽⶓ አቶ አልማው ጌሌፅካ::

ጛርጊው ምርትኪላ አንኪሚስ ካንትስታኒ 11 ኪሎ ግራም ባይላዊ አንኪሚዴስ፣ 28ዴስ 30 ኪሎ ዴሜካ ዝቤናዊ አንኪሚዴስ እንቲታኪ ካይጚው አንኪሚዴስ 25 ኪሉዴስ 28 ኪሎ ግራም ጛርጊ አግስታው አኽⶓ ውማይቲኒ ቶኬምካ::

አቶ አልማው ጊሊፂታጊ 2018 ምርቱ ዝቤንዳ ወረዳታ 343 ትኩሚ 75 ቶን ጛረጊ ወረዳታ አሜሬትስትⶓ ጉሽካ:: ቹዋ ፅኻራዋ እሳንጝፅጙ ቴግባርኪላ አኮሜችስታ::

ወረዳውሳ ጛርጊውሳ ምርቶ ላጛ እፅፍስ ሌጌፅጝስስታ አሜሬትስታውሳ ጛርጌ ዴሜካ ፅንኩትስታ ጌቤልስ ፋይስታንቲ ያኻታ ፄውጝስ ይሴን ቴግባር አኮሜችስታማጊያኽ::

አሪሜ ድፅጝስ አሬችስታው እጁ አኹኪ ኬሚካልኪላ ቤዴራስኩ አሜትካዳ ቻኒስቶ ፌቴራሺⶓ ታክስፅካማ ናኪኒ ወክትስ ኩፅኒ አምሉ አሻሪው ልማት እሳንጝጝስታ ምሱቡ ቢሪኪቲው እንፅኺ ጉዳት ኔኬታታ  ካሊፅⶓ ጉሽካ::

እንዴስ ድምክና አሪሚው እጁ አሬችስቱስ ፅኻራ ዝኪኹዴስ 300 ሜትሮ እቼማ አሬችስታታ ኮሚቴ ሲፍጛማጊስታ ኬሚካልኪላ ፂንስስታማ ጉዳቶ ኔኬታው ሜቴንስ ፄውስትⶓ ጌሌፅካ:: ናካዳ አሪሚው እጁ ስጋታ አኻቲው አኽⶓ ቶኬምካ::

እሊውስ ዴሜካ ፅኻራዳ ጉዳቶ ታምፃውሳስታ እንኬ አቲሳውሳ እጜ ካላካልጝጝስ ካሊፃው እጁ አግስታያሱ ያኹኒውላ ባይላዊ ዳድስ ኩፅኒ ካላካልጝስ ካሊስታውሳ ሴሎ ካንትኹስ ስልታኒ አሬሳቻንትካስ እይስታማጊ አኽⶓ አቕፄካ::

ዚጋሚ ወረዳታ 2018/2019 ምርቱ ዝቤንዳ 565 ቶን ጛርጌ አግፅጝስ ካሊፃው ክርፂ አጋታሚ ዝኩⶓ ቶኬምካ::

ንግስቴ ተስፋ