ማኺቲው እንኩርፂ

እምፕል እዝቡ ታሪክ፣ ባይልስታ ኮንኪ ክምንትዴስ ክምንትሾ ፌያፌይጛው ፃፊስታማ እንኩርስትኹ ታሪክስ ይቪቺስ ጋቲዊያኽ:: ምንጊስኩ ቹዋ ታብል ቴኬምስታኒስ እጂንኩ ኮርሻ ማርሽካዋ ትቬቭኩ እንፅኽካዋ ታሪኩ ንቫርካዋስታ ሊሊትጙንኩ ማኼትካ ሙዝየምዳ እንኩርስታኒስ እምፕል እዝቡሳ አይቶ፣ ባይሎስታ ታሪኮ ካንትፄ:: አዊው እዝቡ ታሪክ ባይልስታ ኮንኪ ሌጌሳታ እንጂቢሪ ዩንቨርስቲዳ ቲሪትጙኽ አገው ፅናቱ ኢንስቲቲዩት ኬፍቲኔ ታምቦ ፊትጛማጊ አግስቴ::

አገው ፅናቱ ኢንስቲቲዩት ቲሪትጙኽ ጊዝዴስ ጄሜራማ ሚንችካ እንፅኽካዋ እንፃኽስታ:: እኒጛዴስ እምፕል አዊው ባይል፣ ታሪክስታ ኮንኪ ሌጌሳታ ፅናቶስታ ምርምሬ ካስጝፅጝስ ዩንቨርስቲዳ ሙዚየሞ ቲሪትጝጛ:: ሙዝየማኻዳ ምንጊስኩ ቹዋ ታብል ቴኬምስታኒስ እጂንኩ ሊሊትጙንኩ ኮርሻማርሽካ፣ ስይካ፣ ታሪኩ ንቫርካ፣ ባይሉ ጌሌፅካዋስታ እሊኩሳጊ አቩቓማ እሜ:: ሙዚየሙ ቲሪትጝጚዉ ቹዋ አላሚ ምንጊስኩ ቹዋ ታብል ቴኬምስታኒስ እጂንኩ ማኼትካ ክምንትዴስ ክምንትሾ ፌያፌይጛንታ ፄውጝዴስ ድምክና ክንትጝ ክንትፅጙሳ ካስቶ ይስጝፅጝስያኽ:: ሊሊትጙንኩ ክንቲው አይኔትካዋ ክንታንኩ ክንታንትካ ሙዚየምሾ ካስጝስ ቤንዳ ክንቱኑሳ ቴግባርስ ካንታንታ እርዳታ::

እንጃቢሪ ዩንቨርስቲዳ አገው ፅናቱ ኢንስቲቲዩቱ ቹዋ ዳይሬክተር እርዳታንቲ ፕሮፌሰር ብርሃኑ አሳዬ ሙዝየሙ ቲሪትኹሳ ቹዋ አላሜ ጌሌፃኒስ አገው እዝቡሳ ኮንኬ፣ ባይሎስታ ታሪኮ አቺትጝፃማ ሙዝየምዳ እንኩርጝ ፅናቶስታ ምርምሬ ካስጝፃንኩስ እርዳቴ ፄውጝደስ ድምክና ክንታንትካውሳ ክንትጝ-ክንትፅጙሳ ካስቶ ይስጝፃውያኽ:: ሙዝየማኻዳ እንኩርስቱንኩ ሊሊትጙንኩ ዲብካ ሳይንሱ ዳድስ ፅናትስታ ምርምሪስ እንፃኽስቱኒዴስ ፋሌንጋ ሙዝየምስታ ኢግዝቢሽን ማይኬልዳ እንኩርስቱንኩ አኽⶓ ዲብስካ::

አገው እዝቡ ባይል፣ ኮንኪስታ ታሪክ ፅናትስታ ምርምሪስ እንፃኽስስቱኒዴስ ፋሌንጋ ሜፃፍስ አቴምስትⶓ ጉሽካ:: ዩንቨርስቲው ድህረ ገፅዴስ ዴሜካ ሊሊትጙንኩ ምርምሪኩ እንፅኽካዋ አግፅጝስ ካላንኩ አኽⶓ ቶኬምካ:: ሙዝየም ታሪኩ፣ ፎክሎሩስታ ሶሻል አንትሮፖሎጂው ክንቲው ዜርፍስ ክንትጝ ክንትፅጙ ካስትዳ ክንታንትካ ድምክኔ አቕቶ እሚጝስ እርዳታው አኽⶓ ጉሽካ::

እንዴስ ቤዴራስኩ ማኼትካዳ ቴክኖሎጂ ታምፅኹሳ ቻኒስቶ ካንትኹስ ምርምሬ እንፃኽስታንኩስ እርዳታው አኽⶓ ጉሽካ::

ሙዝየም እንጃቢሪ ዩንቨርስቲው ክንታንትካስታ ክንትፃንትካዴስ ሴጋ ዝኩንኩ እምፕልታቕስ ጎቤንስታታ ፄዋንኩ አኽⶓ ጌሌፅካ::

እንጃቢሪ ዩንቨርስቲዳ ሹኻንቲ አሜቱ ሶሻል አንትሮፖሎጂው ክንታንቲ አይተነው በሪሁን አውጚው ቴሌቪጅንስ እይኹ ካንቲዳ ጚ ክንታው ክንቲው ዜርፍ ባይሎ ፂኒሳው አኽጝስ ሙዚየም  አዊውሳ ባይሎ፣ ታሪኮስታ ኮንኬ እምፕልዳ እሚኹ አኽጝስ  ክንቲስ አቕቶ አግፃንታ ፄውኹ አኽⶓ ዲብሳ::

“ሙዝየማኻዳ አዊውሳ ባይሎ ካንትፃንኩ ሚንችካ ዲብካ ዝኩና:: ክንቴ ሳሴርስ እርዳትስትናታ ክንትፃንቲ ሙዚየምሾ ካፅጝስ ጎቤንፃና” ኑስ ሙዝየም ክንቴ ሳሴርስ እርዳትስታንታ ካሊፅኹ አኽⶓ ድኹዋ::

እሊት እንጃቢሪ ዩንቨርስቲዳ ሶሻል አንትሮፖሎጂው ክንታንታ ትህትና ጌታቸው ሙዝየም ክንታኑ ክንቲስ ማልጛ እርዳታው አኽⶓ ዲብስታ:: ሙዚየማኻዳ ባይሎ ካንትፃንኩ ሚንችካ ዲብካ እንኩርስቱንኩ አኽጝስ አሳይመንት እይስታኒ ሙዝየምሾ ካስጝስ ሳሴርስ ክንቴ እርዳትስታንታ ፄውኹ አኽⶓ ዲብስታ::

እንጃቢሪ ዩንቨርስቲዳ ሶሻል አንትሮፖሎጂው ክንቲው ዜርፉ ክንትፃንቲ ብርሃኑ ማተቤ ሶሻል አንትሮፖሎጂው ክንቲ አቖስታ እዝቡሳ ባይሎ ፂኒሳው ክንቲው ዜርፍ አኽጝታጊ ሙዝየሙ ቲሪትጝጝ ክንታንትካ ቤንዳ ክንቱኑሳ ቴግባርስ ካንታንታ እርዳታው አኽⶓ ዙሜካ:: ክንታንትካ ዳቒርፄ ፁፎ እንፃኽስታኑ ጊዝዳ ንቫሩ አሊ ያኻማ አጌላጌልጝስ ካላው አኽⶓኪላ ቶኬምካ::

ሙዝየም አዊው እዝብ ምንጊሱ ጊዝዳ ቴኬምስታሺኑ ኮርሻማርሽካ ናካዳ ዋዴስ ዋታሾ ታምብⶓ  ባይሉሳ ልግሶ ካንትፃዊያኽ ንካ::

እምፕል እዝቡ አይት ሲፋው ጁፂ ዝኩዋኒ አኽⶓ ቶኬሙንኩ ክንትፃንቲ ብርሃኑ ሙዚየሙ ቲሪትጝጝ እምፕልታቕስ ክችክቼ አኺኔ ካንትፅጝዴስ ድምክና ምርምሪስ ኽሳንቲ ትክም ዝኩኽ አኽⶓ ዲብስካ:: ሙዚየማኻዳ እላቲንኩሳ ማኼትካዋ፣ ኮርሻማርሽካዋ፣ እንዴስ ቤዴራ ቺፅጝፃሺንኩ ጉሳንትካውሳ ፎቶስታ ፄጌርጛንኩሳ ፅናትስታ ምርምሪስ እንፃኽስስቱኒዴስ ፋሌንጋ አግስታው ስፍሪዴስ ፋያማ ሙዝየምዳ እንኩርታታ እንፃኽስታንኩ አኽⶓ ዲብስካ::

እንጃቢሪ ዩንቨርስቲው አገው ፅናቱ ኢንስቲቲዩትዳ ሙዝየሙስታ ኢግዚቢሽኑ ውማይቲኒ እንግዳየሁ እሱነህ አገው ፅናት ኢንስቲቲዩት ዳሴስታንኩሰታ ዳሴስታቲንኩ ማኼትካዋ ሳይንሳዊ ዳድስ ፂኒስጝስ ሙዚየማኻዳ እንኩርስትⶓ ዲብስካ::

ሙዝየም ዴዴጝ ጊዝዳ ቲሪትጙኽ ያኹኒውላ ፅናቶስታ ምርምሬ ካስጝፃንኩ ክንታንትካስታ ክንትፃንትካ እንቲታኪ እምፕልታቕ ጎቤንጝስ ካላኑ አኽⶓ ድኹዌካ:: አዊው እዝቡ ባይል፣ ታሪኮስታ ኮንኬ ካንትኹስ ሙዝየምዴስ ካንትጝስ አቕቶ አግፅጝስ ካላንኩ አኽⶓ ቶኬምካ::

እንጃቢሪ ዩንቨርስቲው ትክትሊ ፕሬዝዳንት ዶ/ር ክንዴ ብርሃን ዩንቨርስቲ አገው እዝቡ ባይሎ፣ ኮንኬስታ ታሪኮ ፂኒስጝስ ባይል ድሳቲታ ማንዲጝስታ ክምንትዴስ ክምንትሾ ፌያፌይጝፅጝስ እንፃኽስስታማጊ አኽⶓ ዙሜካ:: ሊሊትጙንኩ ባይልኩ ማኼትካ ሙዝየማኻዳ እንኩርስትጝ ምርምሪስስታ ክንትጝ ክንትፅጙ ካስትስ እርዳታው አኽⶓ ጉሽካ::

ሙዝየም ሊሊትጙንኩሳ ማኼትካዋ እሚጝስ ክምንትዴስ ክምንትሾ ፌያፌይጛታ ፄዋው አኽⶓኪላ ቶኬምካ:: ዩንቨርስቲ  ፍንሾስ ጛርቶ ካሉኽሳ ህንፃ ግቢትጝስ ባይሎ፣ ኮንኬስታ ታሪኮ ጌሌፃንኩ ዲብካዋ ሙዝየምዳ ኩፕፅጝስ እንፃኽስታንኩ አኽⶓ ዲብስካ::

ታደለ አጋጄ