ልኻኽዴስ ብራንሾ

እምፕላ አጌራው ማይቤራዊው፣ ይኮኖሚውስታ ፖለቲካው ልግስስ ክንቲ ቹዋ ስርያኽ:: አጌራው ልግስኒ ቼሜትጛው ክንትኹሳ እምፕልታቖ ፌቴርጝስያኽ:: አሌምዳ ሚንችካ ሌጌሳንኩ አጌርካ ክንቲዳ እንፃኽስቱኑ ይሴን እንፅኺስ ድኽትዴስ ፊጝስ ካሌካ:: እምፕልታቑሳ ዝኩዊኔ ኬሽጝፅጝስ ክንቴ ኽሳንቲ ችግሩ ኽይፂ ኩልፍ ፄውጝስ እንፃኽስቴካ::

ዲሞክራሲውሳ ልግሶ ቼሜትጝፅጝስ ካሊስታውኪላ ክንትኹሳ እምፕልታቖ ፌቴርጝስያኽ:: እምፕልታቖ አቕትስ፣ ካሌቕትስስታ ሼው ፅንታስ ክንቲዳ እሳኖ እንፅኼ እንፃኽስትጝ ፋይፃንቲያኽ::

ፌይንኩ አሜትካዳ ክንቲው ሚኒስቴር እስካዊ ክንቲውሳ ፍኖተ ካርቴ ቴርስጝስ ክንቲውሳ ፃንኩቶ ማንዲፅጝስታ ክንቲስ ማቤርአቖ አፌርጝስ ይሴን ልቕልቕቲዳ አግስቴ:: አጌርታ ፌይንኩ አሜትካዳ ክንቲው ፃንኩትዳ እሺኹሳ ችግሮ ኽይጝስ ሚንችካ ቴግባርካ አኮሜችስትካማጊ ያኹኒውላ ክንቲው ታምብስታንትዳ እሊው ችግር ኬሴትስታማ ሚንችካ ክንታንትካ ክንቲው ማንድዴስ ሴጋ ያኼካ::

አማኻሪ ክልልዳ ኬሴትስትኹ ፄትቲው ችግር ሚንችካ ክንታንትካ ክንቲዴስ ሴጋ ፄዋማ እጄ:: ክንታንትካ ዎክትስ አግፃኑሳ ክንቴ ክንታኑላስ ይጉጝስ ኬፍቲኔ ችግሮ ሲፍፃ:: 2016 ክንቲው ዝቤንዳ ፄትቲው ችግሩ ምክኒያትስ 2 ትኩሚ 6 ሚሊዮንዴስ ጃላ ክንታንትካ ክንቲዴስ ሴጋ ያኼካማ እጂካ:: 3ሻይዴስ ጃላ ክንቲ ጝናካ ዴሜካ ክንትጝ ክንትፅጙሳ ካስቶ ካስጝፃኑላስ እጂⶓ ክልሉ ክንቲው ንቫር ምልኻቴ:: ሰላሙስታ ፄትቲው አኺኒ ኬሽጝጙኽ ዙራሙርካዳ ኩፅኒ ክንትጝ ክንትፅጙ ካስት ካስጝጙስ እጄ::

አዊ ብሄረሰቡ ቺፅጝፂዳ ፌዩንኩ አሜትካዳ ፄትቲው ችግር ኬፍቲኒ ቻኒስቶ ታምፃ:: ፌዩንኩ ሹኻ አሜትካዳ ክንቲዴስ ሴጋ ያኼካማ እጂንኩ ስራስሪው ቼፍ ልቓ ጋቲዊያኽ:: ፄትቲው ችግርስ ክንቲው ዜርፍዳ ማልጛ ጉዳት ታምብኹ ወረዳዴስ ጃዊ ወረዳ አባላምቲዳ ቶኬምስቴ:: ሹኻ ሲፍጝጚኩ አሜትካዳ ሚንችካ ክንታንትካ ክንቴ አግፄካያ:: ያኼስጉ ሹኻ አሜታሱ ክንቲው ጊዝ ባኬኑኒዴስ ፋሌንጋ ውላ ክንቲ ጝንካዳ ክንትጝ ክንትፅጙ ካስት ካስጝጛማጊያኽ::ክንቲ ጝናስኩ ክንታንትካስታ ክንትፃንትካ አውጚው ቴሌቢጅንሊ ፄውኑ እጂጚዳ ክንትጝ ክንትፅጙሳ ካስቶ ካንትኹስ እይኑሳ ኽይትጝፄ ንባብስ ዲግስና::

ክንታንታ ሙሉሴት ወንድዬ ጃዊ ወረዳ ትክትሊ እምፕላንቲስታ ክቻክቺ አቹ ክንታንታኽ:: ሹኻ አሜትካስ ክንቲ ጝናዴስ እቺቴታ እጂቴ:: ናካ ኩፅኒ ጚኩ አፄብካሊ አኽጝስ ክንቴ ሲፍጝታታጊያኽ:: ክንታንታ ዙሚኹስታ  ክንቲ ልምትጝስ ሚንችካ ክንታንትካ እሊውሳ እንፅኼ እንፃኽስታንታ ፄውⶓ ዲብስታ:: ክንቲ ጝናዳ ሜፃፍካ ዋኽትጜካያስኩ አኽⶓ ቶኬምጝስ ዋኽትጛማ ክንትጝ ክንትፅጙ ካስት ይስጛማ ሲፋያታ ካስቴ:: ክንቲ ጝና ይንቴካያስኩሳ ጚኩሳ አፄብካዋ ክንቲ ጝና ይንታንታ ፄውታት አኽⶓኪላ ዲብስታ:: ክንቲ  እላቲው ጊዝዳ ቹዋ ታብሎ እንፅኺስ እርዳትጝስ ሹኻ አሜትካስ ፌይፅⶓ ቶኬምታ:: ናካ ክንቲ ጝና ካስጝስ  ጚኩ አፄብካሊ ታምትጝታኒ ማልጛ ዴስቲ እንኮኽስትⶓ ዙሜ:: ክንቲዳ ይስታታ ክንትጝስ ፋታት አኽⶓ ድኹታ::

ትክሊ እምፕላንቲስታ ክቻክቺ አቹ ክንቲ ጝናዳ ሳይንሱ ክንትፃንቲ አለነ እንየው ክንቲ ጝና ሹኻ አሜታሳ ክንትጝ ክንትፅጙ ካስትዴስ ሴጋ ያኻማ እጂኒዴስ ፋሌንጋ ክንት-ክንትፅጙሳ ካስቶ ጄሜርኹ አኽⶓ ዙሜካ:: ሹኻ አሜትካስ ክንታንትካ ክንቴ አግፄካያስኩ አኽጝስ እምፕላንቲ ቤንዴስ ሴዛንቲ ቤኖኺስታ ዝኩንኩ ክንታንትካው ቼፍ ሚንቺⶓ ቶኬምካ::

አንኮንቲዴስ ሶኼታንቲ ቤኖኺስታ ዝኩንኩ ክንታንትካው ቼፍ ዴሜካ ልቓ አኽⶓ ጉሽካ:: እንሱ ምክንያትኪላ ድሚስ ኬፍኑንኩ ክንታንትካ እሊው እንፅኺዳ አሴሜርጝⶓ ድኹዌካ:: ክንቲ ልምትጝስ ሚንችካ ክንታንትካ ትዳሮ  እሚⶓኪላ ዙሜካ::

ክንቴ ኬውጝፁንኩ ክንታንትካ ክንቲ ጝና ሲፍጜካማ ክንታንታ ቹዋ ታብል ኩስጝፄካማጊ አኽⶓ ዲብስካ:: ክንታንትካው ፍንሾሱ አላሚ ሳኪትጛው ክንቲ ሲፍጜካማ ክንታኒ አኽጝስ ሼውቴ ፌቴርካማጊ አኽⶓ ድኹዌካ::

አማረ ሽቱ ጃዊ ወረዳ ትክሊ እምፕላንቲስታ ክቻክቺ አቹ ክንቲ ጝናሱ ጛሪያኽ:: ሹኻ አሜታ ልምታማ እጂኹ ክንቲ ጝና ንⶓ ክንትጝ ክንትፅጙሳ እንፅኼ ጄሜርⶓ ዙሜካ::

ክንቲ ጝና 446 ክንታንትካዋ ሜዜጌባማ ክንትፅጝስ አኬዱኒውላ ላንቡሳኺስታ 338 ክንታንትካዋ ሜዜጌብጝስ ክንትፃማጊ አግስታው አኽⶓ ጌሌፅካ:: ጌርክ ቺፋ ክንታንትካ ክንቲ ጝና ካስጝስ ክንቴ ሲፍጜካማጊ አኽⶓ ዲብስካ:: ክንቲ ጝናስኩ ክንትፃንትካ፣ ክንታንትካስታ ቹዋ ታብል ክንቲ ጄሜርጝስ ማልጛ ዴስቴንካ አኽⶓ ክንቲ ጝናሱ ጛሪ ዙሜካ::

ክንቲ ጝናሱ ጛሪ ዙሙኑውስታጊ ክንቲ ጝናዳ ሚንችካ ችግርካ ዝኩካ:: ክንትፃንትካው ዝኩፂ ጝን ፌሬሳ:: ክንትጝ ክንትፅጝስ ያኻው ግባት ዋኽትጛያ:: ክንትፃንትካ ውላ ዲፓርትመንትስ ከንቲው አይኔትስ ዋኽትጜካያ ያኼስጉ ፋይስታው አችስ ክንት ክንትፅጙሳ እንፅኼ ይስጝፄካማ ሲፋንኩ አኽⶓ ዙሜካ:: ቾ ታብልዴስ ሚፄ ኩፕፅጝስ ዳንጉዊትጙንኩሳ ዲብካዋ ዋኽትጝፅጝስ ፅሬቶ ፄዋንኩ አኽⶓ ዲብስካ::

ጃዊ ወረዳው ክንቲው ፅፌት ጝናሱ አላፊ ሀይለኢየሱስ መኩሪያው ወረዳዳ ፌይንኩ ሹኻ አሜትካዳ ሰላሙ ችግርስ ሚንችካ ክንታንትካ ክንትጝ-ክንትፅጙ ካስትዴስ ሴጋ ያኼካማ እጂⶓ ዙሜካ:: ወረዳታ ትክላሊስ 56 ሻይ 188 ክንታንትካዋ ሜዜጌብጝስ አኬድካማ 32 ሻይ 207 ክንታንትካዋ ሜዜጌብጝስ ክንትጝ-ክንትፅጙሳ ካስቶ ውላ ክንቲ ጝንካዳ ጄሜርስትⶓ ቶኬምካ::

ወረዳታ 66 እምፕላንቲ አች ክንቲ ጝንካስታ 4 ላጛንቲ አች ክንቲ ጝንካ 2019 ክንቲው ዝቤንዳ ክንትጝ-ክንትፅጙ ካስት ካስጝጛማጊ አግስታው አኽⶓ ዙሜካ::

ፌዩንኩ አሜትካዴስ ንጙዊኒ አሜት ማልጛ ኬሽኹ አኽⶓ ቶኬምካማ ክንቲ ጝና ብስስታማ ክንትጝ-ክንትፅጙ ካስት ጄሜራታ ውላጊ ቲቪቪርጜ ፄውⶓ ጉሽካ::

አቶ ሀይለኢየሱስ ወረዳዳ አግስታንኩ ውላ ክንቲ ጝንካዳ ክንትፃንትካ ቱጝስ እንፅኼ ጄሜርⶓ ዙሜካ:: ሜፃፍካ ክንቲ ጝናስ ታምባታ ፄዉስታማጊ አኽⶓ ጉሽካ:: ልምትካማ እጂንኩ ክንቲ ጝንካ እምፕልታቑ ቲቪቪርጚስ ፄጌንስታንታ ፄውስታማጊ አኽⶓ ዲብስካ:: ክንቲ ጝንካ ፋይፃንኩሳ ግባትካዋ ዋኽትጝፅጝስ ፅሬት ፄውስታማጊ አኽⶓ ጉሽካ:: ክንቲስ እይስትኹ ሊሊቲ ትኩትስ ውላጊ  ቲቬቬርጜካማጊ አኽⶓ ዙሜካ::

ክንቲ ጝና ይንቴካያስኩ ክንታንትካዋ ክንቲ ጝና ይንታንታ ፄውጝስ እንፃኽስታንኩ አኽⶓ ጌሌፅካ:: እንዴስ ድምክና ፄትቲው ችግርስ ጉዳት ታምቡክ ክንቲ ጝንካዋስታ ቤዴራ እምፕላንቲስ ያኻውሳ ቤኖ ግቢትጝ ቢዲሪዳ እክድ እምስታማ እንፃኽስታው ቴግባር አኽⶓ ጌሌፅካ::

ታደለ አጋጄ