አጌር አቩቑ ፍታኒስ ቤዴራ ቴርቶ ፄዌካማጊያኽ

ታደለ አጋጄ

ኬሽኹሳ ዋይሜ ሜዜጌብፅካማ ዩንቨርስቲሾ ቱጝስ ይስካማ ፂኒስጝስ ፍታኒስ ቴርትካማጊ አኽⶓ ፂሪጊ ትክላሊ ላጛንቲ አች ክንቲ ጝናስኩ ክንታንትካ ዙሙና::

ክንታንቲ ምስጋናው ትላሁን ፂሪጊ ትክላሊ ላጛንቲ አች ክንቲ ጝናዳ 12 ቤኑ ፍትሬት ሳይንሱ ክንታንቲያኽ:: ፅክራ ላጛንቲ ቤኑ አጌር አቡቑ ፍታኒ ታምባማጊ አኽጝስ ይሳማ ፂኒስጝስ ቴርቶ ፄዋማጊ አኽⶓ ድኹዋ:: ክንትጝ ክንትፅጙ አኺኒ አሌድስታማጊ አኽⶓ ቶኬሙኽ ክንታንቲ ምስጋናው ክንትፃንትካ ፌይኹ አሜቱሳ ፍታኒውሳ ወሬኬቶ እንፃኽስትጝስ እርዳቴ ፄዌካማጊ አኽⶓ ዲብስካ:: ክንቲ ጝናዳ እይስታው ፍታኒዳ ኬሽኹሳ ዋይሜ ሜዜጌብፅⶓ ዙሙኽ ክንታንቲ ምስጋናው አጌር አቡቑ ፍታኒዳ ኬሽኹሳ ዋይሜ ሜዜጌብፅጝስ እክዶ ፍሻማ ፂኒሴ::

“ክንታንትካ እክድስ ፂኒስጝ ፍታኒስ ጉድጛ ቴርታንታ እርዳታዊያኽ” ንኹ ክንታንቲ እክድ ስሬታስ ሜፃፍ ጝናዳ ፂኒስጙ ዴስ ዝኩⶓ ጉሽካ::

ክንታንቲ ምሰጋናው ዙሙኽስታጊ ክንትፃንትካ ክንትጝ፣ ክንትፅጙ ካስትዴስ ሴጋ ክንታንትካስ እርዳቴ ፄዋና:: ክንታንትካ ዋትጛ ፂኒሳንኩ አኽⶓ  ኩስጝፅⶓ ድኹዋ::

አጌር አቡቑ ፍታኒዴስ 4 ሊኻዴስ ጃላ ዋይሜ ሜዜጌብፅጝስ እክዶ እሚጝስ ኬሽኹሳ ዋይሜ ያጋማ እክምኒ ክንቲውሳ ዜርፎ ክንትጙ አላሚ ዝኩⶓ ድኹዋ::

እሊት ፂሪጊ ትክላሊ ላጛንቲ አች ክንቲ ጝናዳ 12 ቤኑ ክንታንታ መክደስ ሙሉነህ ክንትፃትካ ፅክራ ላጛንቲ ቤንኩ ክንታንትካስ ላጛ ሽፍትስ ክንትፅጝስ   እርዳቴ ፄዌካማጊ አኽⶓ ድኹታ:: ክንታንታ መክደስ ክንትጝ ክንትፅጙ ካስትዴስ ሴጋ ሜፃፍ ጝናዳ ፂኒስጙ ዴስ ዝኩጝ ቶኬምታ:: ኬሽኹሳ ዋይሜ ሜዜጌብፅጝስ እክዶ ፍሸታታ ፂኒስታት አኽⶓ ዙሜ::

ክንቲ ጝናስኩ ክንትፃንትካ ክንታንትካዋ ሼው ፅንታስ ቴርታንታ ፄዌካማጊ አኽⶓ ጊሊፄ:: ኮምፒዉተር ውላ ክንታንትካስ ታምባቲው ያኹኒውላ ፍታኒ ኦንላይንስ ዋትጛ ፌቴንስትጝስ ካላንኩ አኽⶓ ዴስጝጜ ፄውⶓ ድኹታ:: ጚኪላ 450ዴስ ጃላ ዋይሜ ሜዜጌብፅጝስ እክዶ እምቴ:: ዋይሚ ሳኪትጛማ ዩንቨርስቲሾ ትይኒ እክምኒውሳ ክንቴ ክንትጝስ አላሚ ዝኩት አኽⶓ ዙሜ::

ክንታንታ መክደስ ክንቲ ጝናሱ ሜፃፍ ጝናዳ እስካዊ ክንቲው ቴርትስ ቴርትኹ እርዳቲው ሜፃፍካ ዋኽትጛያንታ ካስቴ::

ክንትፃንቲ አለሙ ዳኘው ፂሪጊ ትክላሊ ላጛንቲ አች ክንቲ ጝናሱ ታሪኩ ክንትፃንቲያኽ:: አጌር አቡቑሳ ፍታኔ ፌቴንስታንትካ ክንታንትካስ ሊሊቲ አክም ዝኩክ ክንትፃንትካዋ ሜዴብጝስ እሊው ሽፍትስ ክንታንትካስ እርዳቲ ፄውስታማጊ አኽⶓ ጌሌፅካ:: ፅክራ ላጛንቲ ቤንኩ ክንትፃንትካ ክንትጝ-ክንትፅጙሳ ካስቶ አሌድጝስ እንዴስ ቤዴራ ፌቴንስቱኑሳ ፍታኒውሳ ወሬኬቶ እንፃኽስቴካማጊ አኽⶓ ጉሽካ::

አጌር አቡቑ ፍታኒዳ ኬሽኹሳ ዋይሜ ሜዜጌብፃንኩ ክንታንትካስ ሽልማቲ እይስታው አኽⶓ ቶኬምካ:: ሽልማቲው ቴርት ክንታንትካ ኬሽኹሳ ዋይሜ ሜዜጌብፃንታ ጁትጝፃው አኽⶓ እርዳትፅካ::

ክንቲ ጝናዳ ክንታንትካስ ሊሊቲ እርዳቲ ፄውስታማጊ አኽⶓ ዙሙንኩ ክንትፃንቲ ኹንስ ጛርትስ እርዳቲ ፄውስታማጊ አግስታው አኽⶓ ጉሽካ:: ታሪኩ ክንቲው አይኔትስ ውላ ክንታንትካ 50ዴስ ጃላ ዋይሜ ያጋንታ እክዶ እሜ:: ክንቲ ጝና ባጀቶ ሜዴባማ ክንታንትካስ እርዳቴ ፄውስታታ እንፃኽስታማጊ አኽⶓ ጉሽካ::

ፂሪጊ ትክላሊ ላጛንቲ አች ክንቲ ጝናሱ ጛሪ ያረጋል ታደለ 12ንቲ ቤንኩ ክንታንትካስ ላጛንቲ ዲግሪ ዝኩክሳ ክንትፃንትካዋ ሜዴብጝስ ክንትጝ-ክንትፅጙ ካስት ካስጛታ ፄውⶓ ቶኬምካ:: አጌር አቡቑሳ ፍታኔ ፌቴንስታንኩ ክንታንትካ ኬሽኹሳ ዋይሜ ሜዜጌብፃንታ ሊሊቲ እርዳቲ ፄውስትጝ ፋይፃው አኽⶓ ቶኬምካ:: ኮሚቴ ቲሪትጛማ እሊው ሽፍትስ ክንትፃንኩ ክንትፃንትካዋ ሜዴብጝስ ክንታንትካስ እርዳቴ ፄውስታማጊ አኽⶓ ጉሽካ:: 12ንቲ ቤንኩ ክንታንትካስ 9-12 ቤኖ ኺስታ ዝኩኽሳ ክንቲውሳ አይኔቶ ክንትፃታ ፄውስትⶓ ጉሽካ::

ፌይኹ አሜትዳ 239 ክንታንትካዋ ፌቴንፅኹ ፂሪጊ ትክላሊ ላጛንቲ አች ክንቲ ጝና 87 ክንታንትካ ዩንቨርስቲውሳ ሚፅፄ ዋይሜ አግጝስ ካሊⶓ አቶ ያረጋል ጌሌፅካ::

አጌር አቡቑ ፍታኒዴስ ኬሽኹሳ ዋይሜ ሜዜጌብፃንኩ ክንታንትካስ ሽልማቲ እይስትጝ እሊኩ ክንታንትካ ጉዶ ዋይሜ ሜዜጌብፃንታ ጁትጝፃው አኽⶓ ቶኬምካ:: አሜት ቺፋ ክንታንትካ አኬዱኑ ስሬታስ ኽስኹሳ ዋይሜ ያጋንኩ ክንታንትካስ ሽልማቲ እይስታው አኽⶓ ጉሽካ::

ፂሪጊ ትክላሊ ላጛንቲ አች ክንቲ ጝና እን አሜትስ 237 ክንታንትካዋ ፌቴንፃው አኽⶓ ጌሌፅካ::

ጉዋንጉዊ ወረዳ ክንቲ ፅፌት ጝናሱ አላፊ ይበልታል አብርሃም ወረዳታጊ አንኩዋ ላጛንቲ አች ክንቲ ጝንካዳ ሲስቲ ሊኻ ያኻንኩ ክንታንትካ አጌር አቡቑሳ ፍታኔ ፌቴንስታንኩ አኽⶓ ጌሌፅካ::

አጌር አቡቑሳ ፍታኔ ፌቴንስታንኩ 12ንቲ ቤንኩ ክንታንትካስ ጎሌልስቱንኩ ክንትፃንትካ ሜዴብስትካማ ቲቶሪያልስታ ክዳማ አድጉዊስ እርዳቲ ፄውስትጝስ ቤዴራ ቴርቶ ፄዌካማጊ አኽⶓ ጌሌፅካ::

12 ቤንኩ ክንትፃንትካስ እርዳቴ ፄዋንኩ ክንትፃንትካስ ይስጝፂ ጌንዜብ እይስትጝስ ክንታንትካስ እርዳቲ ፄውስታማጊ አኽⶓ ቶኬምካ::

ክንቲው ፅፌት ጝና ኹሉ ቺፋ ሲፍጝጜ ፄውጝስ ክንቲ ትኩትስ እይስታታ ፄውⶓ ጉሽካ::