ጉላሊ አጌር አቕ ቺትጛኑሳ ምንግስቶ ኔፃኔትስ ጐሌላኑ ወኬልስታንትካዋ ሴየማኑ ዲሞክራሲያዊ ቴርትያኽ:: ትክምኪላ ሰላማዊ ሰልታኑሳ ካይጝጜ ቼሜትጝፅጝስ፣ ምንግስቱሳ ካሲሰታንታ አኽⶓ ሴፌንፅጝ፣ እዝቡሳ ፋዮ ዋርቕፅጝስታ አመራሩ ዳሊጝትስታ ፖሊሲው ጉላልካዋ እዝብስ ዲግስጝያኽ:: ክችክቺስታ ፍታዋ ጉላሊ ክርፂ ቺፅጝፂው ፖለቲካው አሪጊግጚው ኩልፍያኽ::
ጉላሊ አጌር አቕ አሳቦ ጌሌፃኑስታ አጌራዊ ጉዳይዳ ወሴንጙሳ ሜብቶ ቴኬምስታኑ ቹዋ ዳድያኽ::
ሉዋላውት ቼሜትጛታ፣ ካሲስታንታ ሴፌናታ፣ ሰላማዊ ስልታኑ ካይጝጚ ዝኩዋታስታ ፖሊሲውሳ ጉላሌ አግፅጝስኪላ ውላጊ አጌር አቕ ምዝጋቢው ጊዝ ፌያውላ ምንግስቶ ጐሌልጝስ ካሊፃውሳ ጉላሊውሳ ካርዶ ፍሽጝ ፋይፃንቲያኽ:: ካርዶ ፍሻማ ጊዝ ታንቡስ ፋናውሳ ምንግስቶ አኹኪ ቺፅጝፄ ጐሌልጝስኪላ ድል ታፍዳኽ ዝኩኽ:: እንሳ ቴኬምስትጝስኪላ እይስትኹሳ ሜብቶ ቱስቲ ዝኩኽ ዳድዳ እሽፅጝ ቱሰቴ::
ዲሞከራሲው ቴርት ሌጌሳማጊ አንትጝስ ካላው ዴሜካ እሌት ቺፋ እይስታንኩ ድልካዋ ቴኬምስታማ ቴግባራዋ ፄውጝስያኽ:: ዳሪዳ ያኻማ ካንትጝስስታ ዙሚጝስ ይቪቻ ዲሞከራሲው ቴርት አንትጝስ ካላቲው አኽⶓኪላ አምንጝ ቱስቴ:: ዋሼንካኪ ሌጌሱንኩ አጌርካኪላ ናካዳ ታምብጝስ ካሉኑ እምፕልታቕ እይስትኹሳ ሜብቶ ቴኬምስትካማ ጉላሊው ጊዝ ታንቡኽ ቺፋ ጉላሊው ቴርትዳ ካስጝፃኑ ቴሳትፉሰያኽ:: እኖጂኪላ ሌጌሱንኩ አጌርካው ቴርዳ ታምጝስ ካሊናው እይስታውሳ ድሎ ቴኬምስትጝስ ቺፅጝፂውሳ ምንግስቶ ጐሌልጝስ ካሊኑስያኽ:: ዳሪዳ አኽናና ዙሚጝስስታ ቲቺጝስ ይንታው ኪሲ እላቲው አኽⶓ እርዳትስትጝስ ጊዝ አሌድስታውላ ጉላሊውሳ ካርዶ ፍሻማ ጌርኮ ማንዲጝ ቱስቴ:: እንካንናኪ ባናኪ ጉላው ቴርት ካስጛውላ ይንታው ምንግስት አኹኪ ቺፅጝፃንቲ ዝኩዋቲው አኽⶓ ሼውንጝ ፋይፄ:: ውላጊ እይስትኹሳ ጊዞ ቴኬምስትጝስ ሜዜጌብስታማ ካርዶ ፍሽጝ ቱስታውያኽ:: እሊኩ አጌርካዳ ካንትስትኹስታ ዲሞክራሲ ሌጌሳው አጌራቑ ቴሳትፉሲያኽ::