ሼዎ ፉሪሳው እሚ

ንግስቴ ተስፋ

ፌዴራሉ ፍርድ ጝና ቲሪትጝፅኹ አዋጅ ቼፍ 25/88 ድንጋጊዳ ፌዴራሉ አችስ አግስታንኩ ፍርድ ጝንካ፣ አቫላምቲ አች ፍርድ ጝና፣ ኬፍቲኒ ፍርድ ጝናስታ ተክላይ ፍርድ ጝና አኽⶓ ግልፅስ እንኩራ:: እኒ ፍርድ ጝንካ አቫላምቲ አች ስልታኒስኪ ያኻ ይግባኙ አችስ ጉዳዮ ቻቤላማ ካንትጝስስታ ካራካርጝፃማ ውሳኔ እይጝስ ካላኑሳ ጉዳዮ ዝርዝርስ ዴንጌጋ::

ፍርድ ጝንካ ዲጋውሳ ጉዳዮ ካንትጝስ ካላኑ ስልታንታ እምቢትንኹሳ ፍቶስታ አግልግሎቴ እይጝስ ካላንታ ዋሺኒኪ ፍርድ ጝና እንፁኒ ሹኻ ችሎት እኒጛኪላ ፍታብሔሩ፣ ወንጄሉስታ እንፅኺው ክርክሪው ችሎት ዝኩጝ ቱስታው አኽⶓ ዴንጌጋ:: ዲብ ኩፅኒ ፍርድ ጝና አግስታው ዙራሙሪታ፣ አጌላጌልስታንትካው ሚንቺትታስታ አይኔትታ ፍርድ ጝና ችሎቶ እሳንጝፃማ ፍቱሳ አግልገሎቴ እይጝ ካላው አኽⶓ ኬሽጙኽ ፌዴራል ፍ/ጝናሱ አዋጅ 454/97ዳ እንኩርስታ::

አዊ ብሄረሰቡ ቺፅጝፂታኪላ እምፕል ኬፍቲኒ ፍርድ ጝናስታ ፅክራ እምፕላ ፍርድ ጝና እንቲታኪ ኪስጛማጊ እይስታው ዜዌዌርጛንቲ ችሎቱ ፍርድ ጝናሱ አገልግሎቴ እያንትካ ኾትካ አግስታና::

እኒጛዴስ ፋግቲ ለኮማ ወረዳ ፍርድ ጝና 26 ኬቤልካዳ አግስታንኩ አጌር አቕስስታ አዲሰ ክዳም ኬቴሙ ቺፅጝፂው ዝኩዋንትካስ ፍቱሳ አግልግሎቴ እያማጊ አግስታውያኽ::

አንኩዋ አሜታዴስ ቤዴራ ሞግዚትነቱ ውክልኒውሳ ስልታኖ ጚቹዴስ ካፅጝስ አብት ንብሬቱሳ ክርክሬ ጄሜርታታ ፍቶ አግፅጝስ ፍርድ ጝና ዙራዙራንኩ ጉዳይ ዌንካዴስ እምፕላ ክንትፃንታ ማንተግቦሽ ትላሁንያኽ::

ስልኪስ ዙሙኑውስታጊ አሱ ምስክራስታ አሱ ንቫር ፍርድ ጝናዴስ አግፃኑ አግልግሎቲዳ ቻኒስቶ ቺፁኒውላ ፋግቲ ለኮማ ወረዳ ፍርድ ጝናሱ እንፃኽስትጚስ ኩፅኒ ክችክቼ ፍቶ አግፅጝስ ሜብቶ ኬቤርፅጝስ ካሌካ:: አብት ንብሬቱ ጉዳይ ውትኽትኺ አኽጝዴስ ፌያማ አሱ ምስክርታ ኩፅኒ ሊጊሲሚ አሜትስ ፍርድ ጝና ዙራዙራንታ ፄውⶓ ጉሽካ::

ፋግቲ ለኮማ ፍርድ ጝና ቲሪትጙኽሳ አላሜ ሳኪትጝፅጝስ አጌላጌልስታንትካ ወክትስስታ ጊዝስ ሌንጌድታንታ ፄውስታው ቴግበርስኪላ ዴስቴንካ አኽⶓ ዲብስካ:: ኹንዳ፣ አክማ ጋቲንኩዳ፣ ሹማጌልካዳስታ ሰራስሪዳ ታምባው ቤዴል ኔኬታታ ኽቴ ናቴ /ሌዋፃንጌኻ/ ምርማሪ ካስጛማ ሜብት ኬቤርስታታ ፍርድ ጝና እንፃኽስታው አኽጝስ ጛኪላ ክችክቼ ፍቶ አግፅጝስ ፍርድ ጝናዳ ዝኩኽ እምኔት ይሴን አኽⶓ ጉሽካ::

ኹንስ፣ ሼርካ ቹትካስ ሹማጌልካስ፣ አካል ጉዳቴንካስስታ እቺ ኬቤሊዴስ አግስቱንኩ ጉዳይ ዌንካስ ቢዲሪ እይስታማ ፍታዊ አገልግሎት ካስጛው አኽⶓ ቶኬምካ::

ኹን ሜብቶ ኬቤርፅጝስ ካስጝፃኑ ክርክሪዳ እይስታው አገልግሎቲኪላ ሚንችካው ሴንቲ አሴስስታማ ፍቶ አግፃንታ ፍርድ ጝና ትኩትስ እንፃኽስስታማጊ አኽⶓ ዲብስካ::

እሊው ፍርድ ጝናሱ አጌላጌልስታንቲ አቶ ወንድሜነህ አዘለ ኪላ ጋብቺው ንብሬቱ ክርክሪው ጉዳይዳ ዙራዙራንኩ አኽⶓ ቶኬምካ:: ፍርድ ጝናዳ ዋትጜስታ ዋኒ እንቲታኪ ዎታኮው ዳድስ ዳኝኔቱሳ አገልግሎቴ አግፅጝስ ካላንኩስታ ችሎት ጄሜርጝዴስ ቤዴራ 30 ደኪካስ ክንቲ እይስታው አኽⶓ ጉሽካ::

ሜዝጌብ ጝናዴስ ጉሽፃማ ፍርድ እይስታውሳ ችሎቶ ኺስታ እይስታው አገልግሎቲኪላ ክርፂ አኽጝስ እንፃኽስትጚ ይስጛማ ሲፋታ ካንቴ ዲግስካ::

ፋግቲ ለኮማ ወረዳዳ ፌቴርስትኹ ሰላሙ ችግር ምክንያታስ ፋዩንኩ ላጛ አሜታስ ፍርድ ጝና ልምታኒ አጌላጌልስታንትካ ፍቶ አቴካማ ግርቢስቲውስታ ዎንጄሌንካው እሳንጚስ ቼጌርስታሺንኩ አኽⶓ ዙሜካ::

2018 ምሬት አሜታዳ ኩፅኒ ዋኽስ ዋኾ ፍርድ ጝናዳ እይስታው አገልግሎቲስ ዴስቴንካ አኽⶓ ጉሽካ::

ፋግቲ ለኮማ ፍርድ ጝናዳ ፍታብሄሩሳ ሜዝጌቦ አችትጝፅጙ ውማይቲኒ አቶ አሰፋ ንጉስ ውማዩ ምግባር ፅንታስስታ ጜዋንቱ እንኩዋኽስትስ ፍርድ ጝናሱ አጌላጌልስታንትካዋ ሌንጌድፄካማጊ አኽጞ ጉሽካ:: ጌርክ ቹፋ ክቻከቺስ ማዲቢኒ፣ ውርሱ፣ ስም ኪይስታይስ፣ ሞግዚታ አኽጝ፣ ታብላ አኹኪ ቹዋ አኽጝ ቼሜትጛይስስታ እሊኩሳጊ ሜዝጌብካዋ ዴሜካማ 25-30ኺስታ ፍታብሄሩ እስካዊ ሜዝጌብ ብስስታው አኽⶓ ኽይትጝፄካ::

ውሳኒውሳ ግልባቾ፣ ይግባኞስታ ሜዝጌቦ ልቕልቕፅⶓ ፋያንኩስጊ ኬፄሮ እይጝዴስ ኪቻ እሌት ቺፋ እይጝስ እንፃኽስስቴካማጊ አኽⶓ ውማይቲኒ ጉሽካ::

ፋግቲ ለኮማ ፍርድ ጝናዳ ፍታብሄር ጉዳይካው ዳኚ ጌታነህ ኢያሱ ጛሾስ ወረዳዳ ፌቴርስትኹ ሰላሙ ችግር ሚንችካ ፍቶ አግፃኑላ ችግራኻዳ እጄንታ ፄውⶓ ጉሽካ:: ፌይንኩ ላጛ አሜታስ ፍርድ ጝና  ልምታማ እጄኒ ሚንችካ ቹትካ ጄርካውሳ ኬሌቦ ካሲጝሰ ካላቲንታ ፅንጋኻ ያኻማ እጂⶓ ቶኬምካ::

ናኪኒ ወክትስ ኩፅኒ ቢዲሪዳ አገልግሎቴ ፋያንኩሳ አካልካዋ ጎሌልጝስ ጊዝ እይስታቲውሳ ጉዳዮ እምቢትንኹሳ ውሳኔ እይካማጊ አኽⶓ ጌሌፅካ::

ወረዳ ዋኽስዋኾ ሰላማ ያኻውላ ይጉጝ ፍርዱ እንፅኺዳ ቻኒስቶ ቺፅⶓ ጉሸካ:: ፍርድ ጝና እያውሳ ትዛዞ እምቢታማ ፌፄምጝስ ቺጌርፂ አኺኒ ፌያፌያማ ኬሴትስታው አኽጝስ አገልግሎቲዳ ቻኒስቶ ፌቴራው ወክት ዝኩⶓ ዳኚ ጌታነህ ኽይትጝፄካ::

ጌርክ ቺፋ እምፕል ዳኚ እንፁኒ ሜዝጌቦ ማራማራማ ትዛዝስታ ውሳኔ እይጝስ እምፕልታቕ አንጌሌትስታቲንታ ፄውስታው እንፃኽስትጚ አገልግሎቲዳ ክሬቲ ፌቴርስታቲታ ፄዋማጊ አኽⶓ ጌሌፅካ::

ፍርድ ጝና ዋሺኒኪ ጉዳይዴስ ጊሊሊቲኒ አኽጝስ ናካዳ እንፅኼ ይስጝፃማ ሲፍፅጝስ ዳኝካ ዴሜካ ውማዩ ምግባር ፅንታስ አጌላጌልስታንትካስ ፍቶ እይጝስ እንፃኽስስቴካማጊ አኽⶓ ጉሽካ::

ዳኚ ጌታነህ ፍርድ ጝናሳ አምንስታንታ ፄዋው ግልፅ ችሎቱ እንፃኽስትጚ ወረዳታ ጄሜራውላ እጂጝ ኩፅኒ ክችክቻ ጋቲው አኽⶓ ጉሽካ:: ዳኝነትሰ ሴየምስታንኩ ዳኝካውሳ ችሎታ እይፄ ብቴ ዝቤንፃማ ግቢትጝዳስታ ግልፆ ችሎቶ ቴግባርዳ እሽፅጝዳ ፍርድ ጝናስታ ትኩታኩ ቤንካ ትኩትስ እንፃኽስታንታ ካንቴ ዲግስካ::

ፋግቲ ለኮማውሳ ፍርድ ጝናሱ ፕሬዝዳንት አብዬ ተቻነ ጛሾስ ኩርማን አሜት ቺፋ 350-400 ኺስታ ፍርድ ጝናሱ አጌላጌልስታንትካ ፍቶ አግፅጝስ ፍርድ ጝናሾ ካስንኩ አኽⶓ ጌሌፅካ::

ወረዳው ፍርድ ጝናታጊ ዳኝካሰታ ውማይቴንካ ውማዩ አላፍትስሰታ ጌሌልቴና አኽጝስ አገልግሎቴ እያንታ ፄውስታማጊ አኽⶓ ጉሽካ:: ፍርድ ጝና ዝቤናዊ እንፃኽስትጚሾ ቱጝስኪላ ዳኝካ ፍርዱሳ አኺኔ ፃፋንኩስታ እምቢትንኹሳ አግልግሎቴ እይጝስ ካላኑሳ ላቭቶፖ ውላስጊ ዲግስⶓ ኽይትጝፄካ:: እንጚኪላ ይግባኝዳስታ ፋይል ድስጝዳ ታምባሺኹሳ ክሬቴ ይጉፅⶓ ቶኬምካ::

አጌር አቑ ፋይል ሊጊሲሚ ጊዝስ እጄታኪላ ዳታቤዙስታ ባካፑ እንፃኽስትጚ ቴግባርዳ እሼማ አገልግሎቲዳ ዲጋሺኹ ክሬቲ ኔኬታታ ፄውስትⶓ አቕፄካ:: ዳኝካ ውማዩ ምግባር ፅንታስ ጌሌልቴናስታ አምንስታንታ ያኼካማ ዳኝኔቱሳ አገልግሎቴ እያንታ ጊዝቺፋ ኩስጜስታ ስልታኔ ካስጝፃንኩ አኽⶓ ጉሽካ::

ፍርድ ጝናሱ ፕሬዝዳንት አብዬ ናኑውስታጊ ወረዳው ፍርድ ጝና ዝኩኽሳ አክሞጊ ቴኬምስትጝስ አገልግሎቴ እይጚዳ ችግር ፌቴርስታቲታ እንፃኽስስቱኒውላ ፍንሾስ ኽዮ አግፅጝ ቱስታኩ ጉዳይካዋ ኩፅኒ ትኩታው ቤንስ ካሴ ዲግስⶓ ጉሽካ:: እኒጛዴሰ ወረዳው እዝብ አውጚ ኮንኪው ዙማንቲ አኽጝታጊ ክችክቼ ክርክሬ ካሰጝፅጝስ ኮንኬ ካላው ቶሬጌምፃንቲ ውማይቲኒ እላ አኽጝ፣ ሜዝጌብ ጝናሱ ውማይቴንካው እንፂጝስታ እሉኩጊ ኽይስታንታ ጊዝቺፋ ካሴ ዲግሳንኩ አኽⶓ አቕፄካ:: ፂኒስስታማ ውማይቴንካ ኬፄርስታንኩያኽ ናው ዙርሚ እይስትⶓኪላ ጉሽካ::

ወረዳ ፍርድ ጝና ግልፆ ችሎቶ ካሰጝፅጝስኪ ያኻ ዝቤን ካሴውሳ አገልግሎቴ እይጝስ ካሊፃቲው እንፃኽፂ ብቲ አኽጝታጊ ክልሉ ምንግስት እይኹ ዳብዚስ ወረዳውስታ እዝቡ ቴሳትፉስ ፍርድ ጝና ግቢትስታታ ወረዳው ኩስጚ ጝናስ ካሴ ዲግስካማ ዙርሜ ማንዲትጜካማጊ አኽⶓ አቕፄካ::