ፋዝጋስታ ኪቢርጝጚ

ታደለ አጋጄ

ፋዝጋው ባል ክስታንቱሳ እምኔቶ ሲፋንትካስ ብሩኽስ ኬቤርስታንኩ ባልካ ክቻዴስ እምፕልያኽ:: እን ባል ኢየሱስ ክርስቶስ ክርⶓ ድላ ፄዋማ ጁⶓ ታክስጝስ ኬቤርስታው ያኹስ እምኔትኩ ሲፋንትካ 55 ጌርክካዋ ፁማኒስ፣ ፆሌታኒስስታ ሴጌዳኒስ ፌይፁኒዴስ ፋሌንጋ ኬቤርፃኑ ኽሳንቲ ባልያኽ:: ፋዝጋ ባሉ ኬቤርጝጚው አኺኒ ምንጊሱዳስታ ናኪኒሱ ጊዝዳ ዋትጛይ ኬቤርስታማጊ አግስታው አክም እላቲንኩስ ፄውስታው እርዳቲስታ ባል ማይቤራዌ እምፕልቶ ይስጝፅጝስ ዝኩኽሳ ፍሼ ካንትኹስ ስልኪስ እጂጜ ፄውንኹሳ አንቤብፅጝስ ፋኑኻ::

አቶ አደመ ጌታሁን ጉዋንጊ ወረዳ ሉንፅ ዲጊሪ ኬቤሊው ዝኩዋንትካ ያኻኒስ ፋዝጋው ባል አሜትስ ኬቤርስታው ኽሳንቲ ባል አኽⶓ ቶኬምካማ ፅልካ ያኻ ኽሳንትካ እምፕልትስ ኬቤርፃኑ አሜቱ ባል አኽⶓ ደኹዌካ:: አቶ አደመ ዙሙኑውስታጊ ምንጊስኩ ቹዋ ታብል ታዮስታ  ቢሬ አሬድጝስ፣ ምሼ ምሽጝስ ብሩኽ አኺኒስ ኬቤርፃሺኑ ባልያኽ:: ናካኪላ ያኹኒ ኹስታውስታ ዝቕስታው  ምንጊሱ ዝቤንታ ያኻውላስ ይጉኒውላ ዴስቲስ ኬቤርፃኑ ባል አኽⶓ ዙሜካ::

ቤዴራስኩ ቹዋ ታብል ባል ታምብጝዴሰ ቤዴርካማ ቤዴራ ቴርቶ ፄዋና:: ናካኪላ ያኹኒ ባል ታምብጝዴስ ፍና ኹን ስልኼ ዜኬትጝስ ቺዌ ዶኬስጝስስታ አሪኬ ፍሸጝስ ቴርታና::

ጝርጃ ዴሜካ ፋዝጋው ባልስ ያኻውሳ ታዮ ያኻ ቢሬ ጄዌካማ ቴርታና:: ባል እምፕልትስ ኬቤርስታው አኽጝታጊ ጝን ጝና ዙሬካማጊ ዴስቲስ ፌይፃኑ ኽሳንቲ ባልያኽ:: አቶ አደም እንፃኺቱሳ ጊዞ ታክስጝስ ካዌንዴስ ካኔ ኬውጝስ ዞንቔሮ ቴርስካማ ሙሬ ዙሬካማጊ ቱሼ ይማሺንኩ አኽⶓ ዲብስካ:: እን ባይል ናካኪላ ሲፍⶓ ቶኬምካ:: ስራስሪ አጎላጎሌ ታምብምባ ማልጛ ቓሊትስ ማንዳንኩ አኽⶓኪላ ድኹዌካ:: ስራስሪ ጛው ድሚው አችታ ጝርጃ ጛውሳ ኹን ጛውስ ያኼካማ ይማኑ ቴርት ዝኮ:: ውላ ጝኖ ይሜካማ ታምፁኒዴስ ፋሌንጋ ቻኑ ጝንዳ ስልኺ ባፃባፅስታማ እይስቴ:: ብቲ ቻኒ ዴሜካ ይሙኑሳ ቱሼ ቤንጜካማ ዳቔርስትጝስ ጝና ካስና:: እንታኮው ባይል ናካኪላ ይስጛማ ሲፍⶓ አቶ አደመ ድኹዌካ::

ምንጊሱ ጊዝዳ ቹዋታብል ብሸታንዴስ ዙሩኒዴስ ፋሌንጋ ዶንዶርስታ ዱራ ብንዴስ አሴ ሞፄድካማ ዚዝልጝስ ካጋማ እጂኹስ አሴ ግቢትጝስ ማጌብስታሺⶓ አቶ አደመ ታክስፅካ:: ኽሳንቲ አሲ ሞፄድስታማ አምስትኹሳ ልንጉኺው ዘይትስ ልሻኹዊስ ግቢትስታማ አምፕልትስ ሜጌብስትጝ እሺⶓ ጉሽካ::

እንዴስ ድምክና ምሺ፣ ጉዝጉዝስታ እሊኩ ኹሳታንኩስታ ዝቕሰታንኩ ዲግካማ ባሎ ኬቤርፃሺንኩ አኽⶓ እንክርፄካ:: ናካኪላ ያኹኒ እንታኮው ባሉ ኬቪርጚ ሲፉታ አኽⶓ ድኹዌካ::

ፋዝጋው ባልታዋ ውላ እስካዌ ስዮ ሴያና:: ድሚው አችታ ኽሳንቲ አቒኾዳ ጄሜራማ ቡን ዲጌ:: ታይ አሬድስቴ:: ባኔ ባንቶ ጝን ጝና እንዜጝካማጊ ባሎ እምፕልትስ ዴስቴንካ ያኼካማ ኬቤርፃና:: ምንጊሱ ዝቤን ውላ ክቼማ ዋኽትጛማ አግስታውላስ ይጉኒውላ ባልታዋ ቡንሊ አብዚ ዲጋማ ታይ አሬድስታማ ባሎ  ኬቤርፃንኩ አኽⶓ ዙሜካ::

“ፋዝጋው ባልታዋ ብቲ ዋኒ ቻማ ዋኒ ክምጝ ማሊሰታላኽ” ኑንኩ አቶ አደመ ባሎ እምፕልትስ ኬቤርፃኑ አኽጝስ አብታሚ ያኻ ድኺ እስታውላስ ይጋሪስ ኬቤርስታው ባል አኽⶓ ቶኬምካ::

አክም እላቲንኩ አቕስ ባሎ ዴስቴንካ ያኼካማ ፌይፃንታ ዱሪ እይስታው አኽⶓ ድኹዌካ:: እሊው ጉዋንጊ ወረዳ ፃንጊኺ ኬቤሊው ዝኩዋንቲ አቶ የኔአለም መኩሪያው ፋዘጋው ባል ታምብጝዴስ ቤዴራ ጌውስጙንኩሳ አቖ አሬክጝፅጝስ ባል እምፕልትሰ ኬቤርስታታ ፄውስታው አኽⶓ ዲብስካ:: ምንጊሱ ጊዝዳ ባሎ ኬቤርፃኒስ ስኒስ ምግብ ግቢትስታማ ሜጌብስታሺንኩ አኽⶓ ታክስፅካ:: ናኪኒ ጊዝዳ ኩፅኒ ዘይትስ ግቢትስትኹሳ ምግቦ ሜጌብሰታንኩ አኽⶓ ቶኬምካ:: ቤዴራሱ ፋዝጋ ባሉ ኬቤርጝጚ ምግብስ፣ ዝቒስስታ እሊኩ ዲብካስ ኽሳንቲ ሊሊት ዝኩⶓ ቶኬምካ::

ምንጊስኩ ቹዋ ታብል ቢሬ ጛርትስ አሬዳሺና:: ናካ ኩፅኒ ጌቤሉ ኬቤርጝሊ እምትጛማ ሚንችካ እምፕልትስ እምፕሎ ቢሬ ጄዋካማ አሬድጝስ ባሎ ኬቤርፃና:: አክም ዝኩኽ ዴሜካ ቢሪውሳ እሼ አሬዳማ ሚፁኒዴስ ፋሌንጋ ጝንዳ ታዮ አሬዳንኩ ዝኩⶓ ድኹዌካ:: ዝኩዊኒው ክብርናቲ ባሎ ሼውታ ኬቤርፅጝስ ቻኒስቶ ቺፅⶓኪላ ቶኬምካ::

እሊቲ ፃንጊኻ ኬቤሊው ዝኩዋንታ እናትነሸ ብርሃኑ ፋዝጋው ባል ታምብጝዴስ ቤዴራ ኹን ስልኼ ዜኬትጝስ፣ ቤርቤሮ ዶኬስጝስስታ አሪኬ ፍሽጝስ ቴርታና:: ኹስታውስታ ዝቕስታዉ ምንጊሱ ዝቤንሊ ካንትጝፃኒ ሚንች ሊሊት ዝኩⶓ ቶኬምካ::

ምንጊሱ ጊዝዳ ምሺ ምሽታማ፣ ስኒስ ምግብ ግቢትስታማ፣ ስኒ ፄኬስስታማስታ ቡን ጌፌርስታማ ዝቕስታው አኽⶓ ታክስፅካ::

ባልታዋ እስካዊ ስይ ሴይስታማ ታይ አሬድስታው ጝንዳ ባኔ ባንቶ እንዜጝካማ ባሎ ኬቤርፃንኩ አኽⶓ ዙሜካ::

ጉዋንጊ ወረዳው ቤተ ክህነቱ ቹዋ ስራአስኪያጅ ሊከ ትጉሃን ተስፋዬ አረጋ ፋዝጋው ባል ድባን ሴኬልስታማ ጁኽሳ ዴስቴ ኬቤርፅጝስ ኹስታውስታ ዝቕስታውሳ ቤዴርካማ ቴርስጝስ ኬቤርፃኑ ባል አኽⶓ ዲብስካ::

ኢየሱስ ክርስቶስ ሚስኪሊዳ ሳንክስትኹ አቒያሳ ኬሽፅጝስ አኽⶓ ቶኬምካ:: አዳም እንፃኽስትኹ ሃቲያትዴስ ፍሽጝስ ኑስ ድንግል ማርያምዴስ ካሜንስታማ ሲኦልዴስ ፍሻኻ ናማ ካሎ ቱኽ ስሬታስ ልኻኽዴስ ብራንሾ ፍሸኹሳ ታክስጝስ ኬቤርስታው ባል አኽⶓ ጌሌፅካ::

ፋዝጋው ባልታዋ እምፕልታቕ ጉሪጛስ ጄሜርካማ እምፕልትስ ኬቤርፃኑ ባል አኽጝስ እምፕልታቕስ ማይቤራዌ እምፕልቶ ይስጝፃው ባል አኽⶓ ጉሽካ:: አኽጝስኪላ ባል ታምብጝዴስ ቤዴራ ጌውስጙንኩሳ አሬክጝፅጝስ ፄውስታው አኺኒ ዝኩⶓ ቶኬምካ::