ክንታንትካ ኬሻንቴ ዋይሜ ሜዜጌብፃንታ እንፃኽስስታማጊያኽ

ንግስቴ ተስፋ

ክንቴ እክድስ ክንትጝስ ኬፍቲኔ ዋይሜ ሜዜጌብፅጝስ ቴርቴካማጊ አኽⶓ ፋግቲ ለኮማ ወረዳው ክንታንትካ ዙሙና:: ወረዳው ክንቲ ፅ/ጝናኪላ ሰላሙ ችግር ዝኩኒውላ ክንታንትካስ አሜቻውሳ ክንቲውሳ ድሎ አሜችጝፅጝስ ፌቴንፅጝስ ቤዴራ ቴርቶ ፄውⶓ አቕፃ::

ፋግቲ ለኮማ ወረዳዳ ፌዩንኩ ላጛ አሜትካስ ክንቲ ጝንካ ልምትካማ እጂጝ ታክስስታዊያኽ:: እንጚስኪላ ክንታንትካው ክንትጙ ሜብት ታሲስታማ ሚንችካ ድማ ጋቲታ ኽይስቴካ፤ ጌርኩሳ እንፅኼ እንፃኽስታንታ ጌዴድስትካ፤ አጌሮ ባይፅካማ ፌኔኬልጙንኩ ክንታንትካው ቼፍኪላ ልቓ ጋቲዊያኽ::

12ንቲስታ 8ንቲቤኑ ብሄራዌ እንቲታኪ 6ንቲ ቤኑ ክልላዌ ፍታኔ ፌቴንስታንኩ ክንታንትካዋ ፌቴንፅጝስኪላ ቤዴራ ቴርት ካስጛማጊያኽ::

ፌቴንስታንትካ ክንታንትካዴስ 8ንቲ ቤኑ ክንታንታ አዳነች ደሳለው እክዶ ፍሽታታ ክንቴስታ ፅናቶ ካስጝፄታጊ አግስቲ:: ላጛ አሜታስ ክንቴ ኬውጝፄታ እጂቲኹ ጊዝ አፄብካዴስ እንግርግራ ቲጉዋታ ፄውኽ ያኹኒውላ ናካዳ 8ንቲ ቤኑሳ ፍታኔ ፌቴንስትጝስ ቴርትጝስ ዴስቴና አኽⶓ ዲብስታ::

“ሰላሙ ችግር ምክንያታስ ክንቲ ጝና ልምታኒ ሚንችካ ይኩ አፄብካ ድማ ጋቲታ ኽይስቴካ” ኔት ክንታንታ አዳነች ወክትስ ጌቴምኹሳ ችግሮ ቲሪትጝታታ ክንቴ ሲፍጝስ ካሊጝ ኽሳንቲ ድል አኽⶓ ጉሽታ:: እንሳ ድሎ ቲኪምስቴታ 8ንቲ ቤኑ ብሄራዊ ፍታኒዴስ ኬሻንቴ ዋይሜ ሜዜጌብፅጝስኪላ ኩርፄና አኽⶓ ድኹታ::

በየነ ምትኩኪላ ዋልታንቲ ቤኑ ክንታንቲ ያኹስ እንዳ አሜትዳ ቛሪ አቫላምቲስታ ክቻክቺ ክንቲ ጝናዳ 6ንቲ ቤኑ ክልላዊ ፍታኒው ፌቴንስታንቲያኽ:: ክንቲ ጝናዳ አቫላምቲ ጊዝስ ፍታኒ እይስታው አኽጝታጊ ኬሻንቴ ዋይሜ ሜዜጌብፅጝስ ይሳማ ፂኒማጊ አኽⶓ ዲብሳ:: አፄብካ ጛው ካሌቕትታጊ እርዳትጚስስታ ኬችስ ያኼካማ ፂኒሳኑ ቴርት ዝኩⶓ ድኹዋ:: ክንትፃንትካው ክንትፅጙ ሴልኪላ ሳሴርስ እርዳትስትጝስ አጌዛው አኽጝስ ናኪኒ ወክትስ ሞዴሉ ፍታኒስ ቴርቴካማጊያኽ::

ክንትፃንቲ በላቸው አምሳሉ ጛሾስ ክንታንትካ ኬሻንቴ ዋይሜ ሜዜጌብፃንታ ክዳማ አድጉዌ ዴሜካማ ሊሊትጙኽሳ ፍታኒውሳ ወሬኬቶስታ እርዳታንቴ ሜፃፎ  ክንትፄካማጊ አኽⶓ ጉሽካ:: ፂኒስጙሳስታ ፍታኒስ ቴርትጙሳ ሴሎኪላ ካንትፅካማጊያኽ:: ክንታንትካው ክንቲው ቻቤልጚስታ ፍታኒስ ቴርትጙ ዴስኪላ ይስጝፃው አኽⶓ ዙሜካ::

ክንትፃንቲ በላቸው ናኑውስታጊ ክንታንትካ ፍታኒ እስታኒ ጅፍንቱ እንኮኽስትሾ ቱዋቲንታ ሼውፅንታስ ይስጝፅጝስታ እክድስ አንቤባንታ ፄውጝኪላ ፋይፃንቲ አኽⶓ ቶኬምካ::

ቛሪ እምፕላንቲስታ ክቻክቺ ክንቲ ጝናሱ ጛሪ አሳዬ አይኔዋ ክንቲ ጝናዳ 64 ክንታንትካ ሶኼታንቲ ቤኑሳ ብሄራዌስታ 44 ክንታንትካ ዋልታንቲ ቤኑሳ ክልላዌ ፍታኔ ፌቴንስትጝስ ካላኑ ቤዴራ ቴርት ካስጛማጊ አኽⶓ አቕፄካ::

ፋግቲ ለኮማ ወረዳው ክንቲ ፅፌት ጝናሱ አላፊ ደሴ ነጋ ጛሾስ 2018 ክንቲው ዝቤንዳ ወረዳዳ አግስታንኩ ክንቲ ጝንካዳጊ 8ንቲ ቤኑ ብሄራዊስታ 6ንቲ ቤኑ ክልላዊ ፍታኒ እይስታታ እክድ እምስታሺኹ ያኹኒውላ ሰላሙ ችግር ኩፅኒ እክዶ ሳኪትጝፅጝስ ፅንጋኻ አኽⶓ ጌሌፅካ::

እንጚስኪላ ወረዳዳ አግስታንኩ 39 ክንቲ ጝንካዳ 1ሻይ 699 ሶኼታንቲ ቤኑ ክንታንትካ ብሄራዌ ፍታኔ ፌቴንስታንታ እክድ እምስትስኹ አኽⶓ ጌሌፅካ:: ላጛንቲ ድንቤራ ክንቲዴስ ፋሌንጋ ኩፅኒ ፌቴርስትኹ ሰላሙ ችግር ምክንያታስ  ክንቴ ኬውጝፄካማ 358 ክንታንትካ ይቪችካ ፌቴንስትጝስ ቤዴራ ቴርቶ ፄውⶓ አቕፄካ::

1ሻይ 866 ዋልታንቲ ቤኑ ክልላዊ ፍታኒው ፌቴንስታንትካ ክንታንትካ ፌቴንስታንታ እክድ እምስታማ እንፅኺሾ ቱስታሺኹ ያኹኒውላ 386 ክንታንትካ ይቪችካ ፌቴንስታንኩ አኽⶓ ቶኬምካ::

“እምፕላንቲ ድንቤራ ክንቲዳ ክንትጝ ክንትፅጙ እንፅኺ ወረዳታ ይስጝፃው አችዳ እሺኾ” ናንኩ አቶ ደሴ ይካቲትዴስ ጉሽፃማ ኩፅኒ ክንታንትካ ክንቴ ኬውጝፅጙ ሜቴን ኬፍ ንⶓ ጉሽካ:: ችግሮ ኽይጝስ ጄሜርስትኹ ቴግባር ዝኩኒውላ እክዶ ሳኪትጝፅጝስ ኩፅኒ ቼጌርስትⶓ ቶኬምካ::

ወረዳታ ክንታንትካ ክንትጙሳ ድሎ አታቲንታ ሰላም ዝኩኽስታ አሜቻው ዙራሙሪሾ ክንታንትካ ካሳንታ ፄውጝስ ክንቴ አግፃንታ ፄውስትⶓ ኽይትጝፄካ:: ወረዳዳ ዝኩንኩ ክንቲ ጝንካዋ ክላስተርስ አችትጝፅጝስ እርዳትጜካማ ክንቴ አግፃንታ ፄውስቱኽ እንፅኺስኪላ ክንቴ ሲፍፅⶓ አቕፄካ::

ክንታንትካው ቼፍ ሰላሙ ችግር ምክንያቲስ ኔኬትስጉ ክንቲ ኩፅኒ እይስታማጊ አኽጝስ 8ንቲስታ 6ንቲ ቤኑ ክንታንትካዋ ፌቴንፅጝስ ካሊፃው ቤዴራ ቴርት ይስጛማ ሲፍⶓ ኪላ ጉሽካ::

ሰላሰላማዋ ያኹንኩስታ ስጋት ዝኩክ ዙራሙርካዳ አግስታንኩ 8ንቲስታ 6ንቲ ቤኑ ክንታንትካ ክንቴ ጄሜሩኑ ፍና እንግርቴካማ አኽጝስ ፌቴንስታኑኪላ ፍና እንግርቴካማኽ ናው እክድ ክልልዴስ እይስትጝ ወረዳው ወክታዊ አኺኒሊ እምትጛማ ቻኒስቶ ፌቴሬ ናው ስጋት ዝኩⶓ አቶ ደሴ ጉሽካ::

እንጚሳኪላ ትኩታኩ ቤንካ ፍታኒ እምፕላኒስ ወረዳታ እይስትጝስ ካላታ ፄውስቱኒ ናውሳ ካሴ ትኩታው ቤንስ ዲግስካማ ዙርሜ ማንዴካማጊ አኽⶓ ቶኬምካ::

ክንቲ ውላውሳጊ ቲቪቪርጜ ካሴው አኽጝታጊ 8ንቲስታ 6ንቲ ቤኑ ክንታንትካ ኬሻንቴ ዋይሜ ሜዜጌብፃንታስታ ፍታኒ ሰላምስ አሌድስታታ ታምቦ ፊትጝጝ ፋይፃው አኽⶓ ታክስፅካ::