ዎንጀሎ ቤዴራማ ካላካልጝጝስ ካሊስታማጊያኽ

አለሚቱ የኔት

ሰላም ዳንጉዊⶓ ምክንያትታ ቴኬምስትጝስ ዙራሙሪ ቺፋ ኬሴትስታንኩ ዎንጀልካዋ ቤዴራማ ካላካልጝጝስ ካሊስታታ እምፕልታቕ አችትጜካማ ሮንዶ ማንዴካማጊ አኽⶓ ባንጂ ወረዳው ዝኩዋንትካ ዙሙና::

አቶ ደምረው ሽባባው ክዳማጃ ኬቴሙ ዝኩዋንቲ አውጚው ቴሌቪዥንስ ስልኪስ ዙሙኑውስታጊ ዙራሙሪዳ ኬሴትስታውሳ ዎንጀሎ ቤዴርካማ ካላካልጝጝስ ካሊስታታ አችትጜካማ ሮንዶ ማንዳና::

ዙራሙሪዳ ኬሴትስታውሳ ወንጀሎ ካላካልጝ  ፄትቲ አይልካው እንፅኺ ይቪቺ ጋቲው አኽⶓ ማሊጝስ እምፕልታቕ ዎታትካዋጊ አሴቴፍጝፅጝስ ይስጙኽሳ ሮንዶ ማንዲጙሳ ቴግባሮ አኮሜችካማጊ አኽⶓኪላ ጉሽካ:: ቤዴራ ኬሴትስታውሳ ክሜ፣ ጝኖ ዱንፃማ ዳዴኽጝ ይጉዋታ ፄውⶓስታ ዙራሙሪውሰላም ማንዲስትኹ ያኻታኪላ እምፕልታቕ ኩስጚስ ሮንዶ ማንዲጝስ ሰላሞ ማንዲፃንኩ አኽⶓ ዲብስካ::

ዊ/ሮ ውዴ አረጋኪላ ክዳማጃ ኬቤሊው ዝኩዋንታኽ:: ቤዴራ ሙሪዳኪላ ጝኖ ልሜካማ እንፅኺዳ ካሳኒስ ጝን ብስስታማ ዳዴኹ ወንጄል ፌፄምስታሺኹ አኽⶓ ዙሜካ:: ናካዳ ኩፅኒ ሙሪዳ ኹን ባኔባኔ ማንዲጝስስታ ኬቤሊዳ ዝኩኽ ሚሊሻኪላ እርዳታው አኽጝስ ፌፄምስቱስ እሺኹ ወንጄል ይጉⶓ ዲብስካ::

ጝርጃ ኻራ ሮንዶ ማንዲጛ ፌካማ ቻኒስኪላ ኹን ጝንዳ ዝኩኽሳ ቴንኬክስትካማ ማንዲጝስ ወንጀል ፌፄምስታቲታ ካላካልጛንኩ አኽⶓ ድኹዌካ::

ጝናኻዳ ዝኩዋንኩ ዎንጄሎ ፌፄምጝዳ አሴቴፍጛንኩ ጄርካ አግስቱኒኪላ ኩስጝፅጝስ እን ኬርትኹ ቴግባርዴስ ፋንታ ፄዋንኩ አኽⶓ ጉሽካ:: ጝናቕዴስ ጃላ ያኻንኩ ዝኩኒ ዴሜከ ሹማጊሊስ ኩስጝስታታ ፄዋንኩ አኽⶓ ዙሜካ::

አቶ እምቢያለ ተሻለኪላ እሊው ኬቤሊው ዝኩዋንቲ ያኻኒስ ኬቤሊዳ ዎሌን ኬቤልካዴስ ይንቴካማ ዎንጄሎ ፌፄማቲንታ አችትጜካማ ሚፅፄ ቤሮ ይስጙኽ ሮንድስ ማንዳንኩ አኽⶓ ዲብስካ:: ዳድዳ መኪናዋ ቲሪፅጝስ እምፕልታቖ ዜሬፋንኩ እሺንኩ ወንጄሌንካዋኪላ ማንዲጙሳ አኺኔ ይስጝፅካማ ካስጝፅጝስ ፌፄምስታሺኹ ወንጄል ኬውጛታ ፄውንኩ አኽⶓ ድኹዌካ:: ሊሊትጙንኩ ዙራሙርካዴስ ኬቤሊሾ ይንቴካማ ዝኩንኩ አቖኪላ ንባሮ ፃንኩፅጝስ ዝኩዋንታ ፄዋንኩ አኽⶓ እንክርፄካ::

አቶ ሽባባው የኔት ዴሜካ ክዳማጃ ኬቤሊው ቹዋ ቺፅጝፃንቲ ያኻኒስ ሮንዶ ማንዲጙ ቴግባር ቤዴራኪላ ዝኩኽ ያኼስጉ አማኻሪ ክልልታ ፌቴርስትኹ ሰላሙ ዳንጉዊኒ ጌቴሙኒዴስ ናቴ ኩፅኒ ይስጝፅካማ ማንዳንኩ አኽⶓ ዙሜካ:: ሮንዶ ማንዲጙ ቴግባር እምፕልታቑ አስሚምጚስ ጄሜርስትኹ አኽⶓ ጉሽካ:: ቴርስ ማንዲጝዳ አሴቴፍጛቲው ዝኩዋኒ ዴሜካ ፉኽ እገ ዴንብ ስሬታስ ኪፂስታንኩ አኽⶓኪላ እርዳትፅካ:: ክዳማጃ ኬቤሊታጊ ሴስታ ማንዲፅካ ቤርካ ዝኩⶓስታ ፄትቲው አይል እይኹ ሜሜሪ ስሬታስኪላ እኒ ቤርካዋ አችትጜካማ ማንዲጝስ ናካዳ ዝኩዋኑ ዙራሙሪ ሰላም አኽⶓ ጌሌፅካ:: ቤርቺፋ ዴሜካ ሹኻ ሹኻ አቕ አኽጝስ ማንዳንኩ አኽⶓኪላ ቶኬምካ::

አቶ ሽባባው ኑኑውስታጊ ኬቤሊዳ  ስስቔ ሌንጌድ አቕ ካንትስታኒኪላ ዲግስፅካማ ዙሚትጝፅጝስ አቕፄ ዲግሳንታስታ እግስ ካሊስታንታ ፄውጙ ቴግባር ካስጜ::

ክዳማጃ ኬቤሊታ ዝኩኽ ወንጀሎ ካላካልጚው እንፅኺ ኬሻንቲ አኽጝስኪላ ዋሌን ኬቤልካጊ ዴሶ ቤንጝጝስ ዙራሙሪዳ ፌፄምስታውሳ ዳዴኹሳ ወንጀሎ ኔኬታታ ፄዌካማጊ አኽⶓ አቶ ሽባባው ኽይትጝፅካ::

ባንጂ ወረዳ ፖሊስ ፅ/ጝናዳ ወንጀሎ ካላካልጚ ቤኑ አላፊ ቹዋ ኢ/ር አገኘሁ ወርክነህ ስልኪስ ጌሌፁኑውስታጊ ወረዳዳ 20 ኬቤልካ ዝኩና:: እኒዴስኪላ ክዳማጃ ኬቤሊ እምፕል አኽⶓ ዙሜካ::

ኬቤሊው እምፕልታቕ ኩስጜካማ አችትጚስ ማንዲጝስ ዎንጀሎ ካላካልጛንኩ አኽጝስ ዙራሙሪ ሰላም አኽⶓ እርዳትፅካ:: ክዳማጃ ኬቤሊዳ ላጛ ፖሊሱ ውማይቴንካስታ እሊው ፄትቲው እርዳታንትካሊጊ አኽጝስ ዎንጀሎ ካላካልጚው እንፅኺ ኬሻንቲ አኺኒስ ካስጛው ኬቤሊ አኽⶓ ጉሽካ::

ዎሌን ወረዳው ኬቤሊዴስ ክዳማጃ ኬቤሊሾ ቱጝስ ፌፄምስታንኩ ዎንጀልካዋ ካላካልጝጝስ ኽቴ ናቴ ፄትቲው መዋክር አርፊ ቺፋ ኩስጝጝስ ቤዴራ ሴግዴስ ይንታንኩ እሺንኩ ዎንጀልካዋ ካላካልጝጝስ ካሊⶓ ቹዋ ኢንስፔክተር አገኘሁ ኽይትጝፄካ::

ወረዳዳ አግስታንኩ 20 ኬቤልካዴስ 10 ኬቤልካዳ ዝኩኽ ሰላሙ አኺኒ አምንጝፃንቲ አኽⶓኪላ ጌሌፅካ:: ይጉዋንትካ ኬቤልካዳ ኩፅኒ ወክታዊ ሰላሙ ችግር ዝኩኽ አኽጝስ ዋኽስዋኾ ወንጀልዴስ ኔፃ ፄውጝስ ካሊስታያሱ አኽⶓ ጉሽካ:: ቤዴራ እሺኹዴስ ኬሻንቲ ሰላምዳ አግስታንኩ ያኹኒውላ ናካኪላ እምፕልታቕ አሬኬዝካማ ዝኩዋቲንታ ታክሲሎ አንትጝስ ታምፃኑ ችግር ዝኩጝስ ናካኪላ ሰላምዳ ፌያፌያማ ፅንጋኺ ዝኩⶓ ቶኬምካ::

ዎንጄሎ ካላካልጚስስታ ዙራሙሪውሳ ሰላሞ ማንዲፅጝስኪላ ውላጊ ፄትቲው አካልካሊ ቲቪቪርጚስ እንፃኽስትጝ ቱስታው አኽⶓ ቹዋ ኢንስፔክተር አገኘሁ ታክስፅካ::