አንኩሊዴስ ድሳቲት ጅማንታ

ታደለ አጋጄ

አዊው ባይሉስታ ኪነ ትቬቩ ኬችዳ ጅማንታስታ ጎዴባንታኽ:: አጎላጎሌውሳስታ ሜስኬል ባሉሳ ጅሜ ጅምጝስ አዊውሳ ባይሎ አቕትጝፄ:: አጐላጐሌ፣ ድሩፃስስታ እሊኩጊ ሞሌቔሳዋ ኩብሊ ሻኽፃንኩ ጅምካዋ ጅምቱስ ዝሮ ኹያትያኽ:: ሊሊትጙንኩ ዙራሙርካሾ ካስጝስ አዊው ባይል ኬፍናማ አቕስታታ ፄውታ ጅማንታስታ ጎዴባንታ ምንታምር የኔአባት:: አቕትጝኔስ ቼፍ እምፕልዳስታ ላጛዳ ጛርትስስታ እምፕልትስ አኽጝስ ጅምካዋ ዝሮ ድⶓዉ ድምፅስ ጅምጝስ ሚንችካው አንኩሊዳ ዜኔግስታቲት ባይልቲ አምባሳደራኽ::

ቻግኒ ኬቴሙ ቺፅጝፂ 01 ኬቤሊዳ ካሚንስቴታ ሌጌስቱት አርቲስት ምንታምር እንፃኺቱ ጊዝዳ ጄሜራማ ጅምጙ ፋይ እሺት አኽⶓ ዲብስታ::

ክምካዋ ማንዲስ፣ አኾ ችምቢስስታ ዳዶ እንዜጝቱስ ጚው ኽምቢ ፉራላ:: ሊሊትጙንኩ አሜትባልካዳስታ ብሽታን ፋው ጊዝዳ አፄብካሊ ጅምቴ:: ኻስ ጝናዳስታ እሊኩ ክብርኩ ባልካዳጊ እንፃኻሪሊ አብርቱ ጅምቱስ ሌጌስቱት አኽⶓ ዙሜ::

ጌና እንፃኺቱ ጊዝዳ ጚቹሳ ክሪስ አቲት ምንታምር ጚቹስቹሊ ሌጌስትኹ ጊዝዳ ጅማቲታ ጅፊፄሽቲት አኽⶓ ዲብስታ::

ጅማንታ ምንታምር ጅሚሾ ትይኹሳ አጋታሜ እንክርፂስ ጉዋንጉዊ ወረዳዳ አራሹ ሴጛ ባይሉስታ ኪነ ትቬቡ ኬች ቲሪትጛው ጉዝማ ጅምጙስታ ጎዲብጙ ካሌቕት ዝኩክሳ አቖ ፋየካማጊ ኩፕፃሺⶓ ታክስቴ:: አንዴስኪ አራሹ ሴጛ ባይሉሳስታ ኪነ ትቬቩሳ ኬቾ ቲሪትጝፁንኩዴስ እምፕል አርቲስት የኔአለም በሪሁን ምንታምር ታላሱላ ሹማጌሎ እንፃኼ:: ምንታምርታላ ዎክትስ እምቢታማ ፍካዴና ያኻያላ እሺኾ:: ምክንያቲኪላ ምንታምር ጝንዳ ሚንቾ እንፅኼ እርዳቴትስታ ጝኖ እምቴታ ዝኪቲ ጄራ አኽጝስ:: ያኼስጉ ምንታምርታላሳ አምንፅጝስ አራሹ ሴጛ ባይሉስታ ኪነ ትቤቡ ኬቹ አባላ አኽⶓ ድኹታ::

አራሹ ሴጛ ባይሉስታ ኪነ ትቬቩ ኬችዳ ጅምጝስስታ ጎዴብጝስ ሚንችካስ እንካንስቴ:: ጀምጙሳ ካሌቕቶ ካንትፄ:: እንዴስ ፋሌንጋ ኩፅኒ አዊው ባይሉስታ ኪነ-ትቬቩ ኬች ቲሪትጛው ጊዝዳ ሊሊትጙንኩ ወረዳኩ ባይልኩ ኬችካዴስ ጎሌልስትካማ ካስጝ ግድ እሺኾ::

አርቲስት ምንታምርኪላ ጅምጙስታ ጎዴብጙ ካሌቕትስ ጉሊልስቴታ አቕትጝኔስ ቼፉ እምፕልዳስታ ላጛዳ ጅምካዋ ጅምታታ ፄውስታ:: አቕትጝኔስ ቼፍ እምፕልዳስታ ላጛዳ ሚንችካ ጅምካዋ ጛርትስስታ እምፕልትስ ጅምታ:: “አጎላጎሌ”፣ ድሩፃ፣ ዙራሙራስታ ሞኔጂ ናንኩ ጅምካዋ ጅምጝስ አቕስቲ፤ ጎዴብጙ ካሌቕትስ ዴሜካ ሊሊታኽ::

ጅማንታ ምንታምር አዊው ባይሉስታ ኪነ ትቬቩሳ ኬቾ ዎኬልጝስ ብሄር ብሄረሰብካው ባል ኬቤርስታው ዙራሙሪዳጊ ካስጝስ አዊውሳ ባይሎስታ ታሪኮ አቕትጝፄ::

ጚቹሱ ክሪው ምክንያቲስ ክንቴ ፅካንቲ ቤንዳ ኬውጝፂት ምንታምር አዊው ባይልዳ እንፃኽስቲኹ እንፅኺስ ኔፃ ክንቲውሳ ድሎ አግፄታ ኮሌጅዳ ሰርቲፌኬቱሳ ስልታኔ ካፅⶓ ድኹታ:: ልቓ ጊዝካዳ ኩፅኒ ክምንቱ ምክንያቲስ ጅምጝዴስ እቼቴታ እጂⶓ ቶኬምታ::

ናካዳ አዊው ባይልስታ ኪነ ትቬቩ ኬችዳ ጅማንታስታ ጎዴባንታ ምንታምር የኔአባት አዊው ባይል፣ ኮንኪስታ ታሪክ ኬፍናማ አቕስታታ ፄውንኩ ክቻዴስ እምፕላኽ:: ኮግሚስታ ሜስኬሉ ባል ይንትኹ ቺፋ ጚው ጅሚስ ታክስስቲ:: ጅምካዳኪላ ባይሎስታ ወጎ አቕትጝፄ:: ባሎ እምፕልትስ ኬቤርፅⶓስታ አኺኔስታ እንካኖ ጊሊፄ::”ናካኪላ እሊው ጅሚስ ቴርታታጊያኽ” ኒስ ጅማንታ ምንታምር እንዴስ ፍናሱዴስ ኬሽኹሳ ጅምጝስ ጅምካዋ እዝብሾ ታምፄት አኽⶓ ዲብስታ::

“አዊ እዝቡ ኮንኪው፣ ባይሉስታ ታሪኩ ልግስስ ሚንቾ እንፃኽስታው ዝኮ” ኒት ምንታምር አዊውሳ ባይሉሳ ምግቦ፣ ዝቕስታውሳስታ እሊኩሳ ዲብካዋ አቕትጝፅጝስ አክም ፌኬዳውስጊ እንፃኽስቴት አኽⶓ ጊሊፄ::

አገው ፌሬስቴንካው ባይልዳ ትኩትኹሳ ጅሜ ክሊፕስ  ታምፅጝስ ቴርትⶓ ድኹቱት ምንታምር ግትሞስታ ዜሜ ዴሜካ ጅማንቲ ወልደማርያም ጌታሁንስታ ጅማንቲ ደመከ ቢተውስ ቴርትⶓ ጉሽታ::

ጅማንታ ምንታምር ጅሚው አኺኒዳ ዝኪስ ሚንችካ ችግርካ ጌቴሙኒውላ፣ ችግርካ ጜዋ አላሚዴስ እንግርግራ ፄዌካያላኪ::

ጜዋ ጝኖኺስታ ይንታማ ጅማንታ ታኻታ ፄውኽ የኔአለም በሪሁንስ ኬፍንኹሳ ምስጋኔ ዲግስታ ምንታምር አዊ ባይሉ ኬችዳ ሚንቾ እርዳትኹ ለይኩን ሲሳይስ ኬፍንኹ ምስጋኒ ታምባያታ ዲብስታ::

ጅማንቲ የኔአለም በሪሁን ምንታምር ጅሚሾ ትይኹሳ አኺኒ ካንትኹስኪላ አራሹ ሴጛ ባይሉስታ ኪነ ትቬቩሳ ኬቾ ቲሪትጝፁስ  ጅምጙ ካሌቕት ዝኩክሳ ዎታትካዋ ቶኬማኒ ጝን ጝና እንዜጛማጊ ጎሌልⶓ ጄሜርⶓ ድኹዋ:: ጚታላሱላ ካስጝስ ባይሉ ኬቹ አባላ ታኻታ ካስⶓስታ እንስኪላ አራሹ ሴጛ ባይሉ ኬችዳ አባላ ታኻታ ጅምⶓ ጄሜርⶓ ዲብሳ:: “ምንታምር ዲብስስትኹሳ እሜ እምቴታ ፣ሼጊ ድምፅ ዝኩት፣ ጎዴብጙ ካሌቕትስ ዴሜካ ማልጛ ጎቤዛ ጅማንታ አኽⶓ ድኹዋ::

አዊው ባይሉስታ ኪነ-ትቬቩ ኬችዳ ሚንችካ ጅምካዋ ጅምጝስ ካሊት አኽⶓ ቶኬማ::

አዊው ባይሉስታ ኪነ-ትቬቭ  ኬቹ ቴቬቬርጝፃንቲ ደመከ ቢተው ምንታምር አዊ ባይሉስታ ኪነ-ትቬቩ ኬች ቲሪትጙኽዴስ ጊዝዴስ ጄሜራማ አውጚው ጅሚስ ባይሎ አቕትጝፄታጊ ላንቡሳኺስታ አጌላጌልታታጊ አግስቴት ጐቤዛ ጅማንታ አኽⶓ ዲብሳ:: እሊኩ ቲኪስታንትካ ዎታትካስ ምሳላ ታኻት ጅማንታ አኽⶓኪላ ዙማ:: ባይሎ አቕጝስስታ እንካንጝስ ይሴን ጁትጚ ዝኩት ባይልቲ አምባሳደራ አኽⶓኪላ እንክርፃ::

እስካዌ እንፅኼ እዝብስ ታምፅጝስ ፅሬቶ ፄውታታጊ አኽⶓ ዙሙኽ ደመከ ዜማዋስታ ግትሞ ኔፃስ ጚ ቴርሳማ እይⶓ ጉሻ::

አዊው ባይል፣ ኮንኪስታ ታሪክ ኬፍናታ ካሊንኹሳጊ እርዳትጝስ እንግርግራ ናቲንኩ አኽⶓ ድኹዋ::