ቴሮ እሚኹ አግልግሎቴ እይጚ

ንግስቴ ተስፋ

እምፕል ጌፄሩ ሌጌሳንቲ ኬቴምኪ ያኻ ኬቴሙሳ ሊኪፄ ዋኽትጝፁኽ ኬቴም አቾ ማንዱኽስታ ዝኩዋንትካስ አሜቻው ያኻታ ፄውጝስ ጋያኪ አጌር አቑሳ ልማቱሳኪ ያኻ ማቤራዊ አግልግሎቲውሳ ቴኬምስታንቶ ቼሜትጝፅጝስ ግልፅ፣ ፍታዊስታ አምንስታንት ዝኩኽሳ አግልግሎቴ እይጝ ምንግስቱ አላፍቲያኽ::

ኬቴሙ ዝኩዋንትካ ዴሜካ አግፃኑ አግልግሎቲስ ሜብቶስታ ግዴቴ ማሌካማ ግብሮ ኬይጝስታ ታምቦ ፊትጝጝ ኬቴምካው ልግስስታ ፍታዊ ቴኬምስታንትስ ኬፍቲኒ ፍሺ ዝኩኽያኽ::

ኬቴም ቺፋ አግስታው ሌጌሳንቲ ማዘጋጂ ጝና፣ እንፂ ማዘጋጂ ጝና እንቲታኪ ቹዋ ማዘጋጂ ጝናዳ እይስታው አግልግሎቲኪላ ግልፅስታ ፍታዊ ያኹኒጊ ኬቴምካ አቾ ማንዴካማ ሌጌስጝስታ ዝኩዋንትካስ አሜቹንኩ አኽጝ ማንዲስታው ጉዳያኽ::

ኬቴምካዳ እይስታውሳ አግልግሎቴ እይጜ ካንትኹስ ባንጂ ወረዳዳ አግስታንኩ አንኩዋ ጌፄርኩ ኬቴምካዴስ ዲንካራ ኬቴም እምፕልያኽ:: ዲንካራ ኬቴም ቲሪትጙኽ 1955 ም/አሜታዳ አኽጝ ዱኹስቴ:: ጌፄሩ ኬቴም ዲንካራ ናካዳ ሌጌሳንቲ ማዘጋጂ ጝናስ ጉስስታማጊያኽ::

ኬቴሙ ዝኩዋንትካ ሌጌሳንቲ ማዘጋጂ ጝናዴስ አግፃኑሳ አግልግሎቴ ካንትኹስ ስልኪስ ካንቴ እዩንኩ አቶ ጌትነት መኮነን ኬቴም ቲሪትጙኒዴስ ሊጊሲሜ አሜቶ ቼፍፅኹ ያኹኒውላ ኬቴማው ልግስስታ እምፕልታቑ አግልግሎቲው ፋይ እንግርግራ ይጉዋሺኹ ወክት እሺⶓ ዙሜካ::

ፅክራ ላጛ አሜታዴስ ናቴ ኩፅኒ ኬቴም አቾ ማንዳማ ሌጌስጝስ ካሊፃውስታ ዝኩዋንትካስ ፋይፃው አግልግሎቲ ጄሜርስትⶓ ጉሽካ:: እንጚስኪላ ኬቴምዳ ግቢትስትኹ ጝንስታ ብቲ ፕላንስታ ሴንድ እላቲው እሺኹ እጋዊ ያኻማ ቴኬምስትጝስ ካሊⶓ ዲብስካ:: ሌጌሳንቲ ማዘጋጂ ጝና እንፅኼ ጄሜሩኒዴስ አግፃኑ አግልግሎቲስ ዴስቴንካ አኽⶓ ድኹዌካ::

አቶ ጌትነት እዩኑ ካንቲዳ ዲንካራ ኬቴምዳ አግልግሎቲ ፅ/ጝና ቲሪትጙኒዴስ ኬቴሙ ዝኩዋንትካስ ፅንኩት ዝቒው አኹ ውላ ዝኩዋንትካስ ታምብስታንታ አኽⶓ ዙሜካ:: ካርቲስታ ፕላን ዝኩኽሳ ጝና እምፅካማ ጉሼ ጉሽትጝስ እንፅኼ ፌቴርካማ እንፅኺውሳ እድሎ አግፅጝስ ከሊⶓ ጉሽካ::

አቶ ጌትነት ናኑውስታጊ ዲንካራ ኬቴም ቲሪትጙኒዴስ ሊጊሲሜ አሜቶ ቼፍፃ::  ኬቴምስ ሜቴናውሳ አግልግሎቴ አግፅጝስ ኩፅኒ ሌጌሳንቲ ማዘጋጂ ጝናዴስ እንፂ ማዘጋጂ ጝናሾ ሌጌሳማ ዋኽትጙኽሳ አግልግሎቴ አግፅጝስ ካላንታ ምንግስት ካሴ ኽይጝ ፋይፃንቲ አኽⶓ ጉሽካ::

ኬቴሙ ዝኩዋንትካ ብቲውሳ ሳይት ፕላኖስታ ካርቲውሳ ጝኖ እጋዋ ፄውጝስ ካላሺኑ እንፃኽስትጚ ናኪኒ ወክትስ አጌድስትⶓ ጉሽካ:: አቶ ጌትነት እግድ ጁዋማ ኬቴሙ ዝኩዋንትካስ ቱስቲስ አግልግሎቲ እይስቱኒ ክሬቴ ኽይጝስ ካሊፃው አኽⶓ ዲብስካ::

ዊዛሩ አለምፀሃይ ትላሁንኪላ ዲንካራ ኬቴምዳ ዝኩዊኔ ፄውኒዴስ አሜትካዋ ቼፍፅካ:: ሌጌሳንቲ ማዘጋጂ ጝና ኬቴሙ ዝኩዋንትካስ ፋይፃውሳ አግልግሎቴ እይጝዳ ፄዋው ፅሬትስ ቴኬምስትካማጊ አኽⶓ ዙሜካ::

ማቢሪስ አችትጜካማ ጝና ግቢትፄ ብቴ ፋያንኩስጊ እንዴስ ቤዴራ እይስትኹ አግልግሎቲስ ሚንችካው ችግር ኽይስቱስ ታዜብⶓ ዲብስካ::

እንፅኻ ፋይካ ጄርካስ  እንፅኼ ፌቴርጝስ ጝኖ እምፅካማ ጉሼ ካፅጝስ ካላኑሳ ካርቴስታ ፕላኖ ወክትስ ማዘጋጂ ጝና እይጝስ እዝቦ ቱስቲስ አጌላጌላማጊያኽ ንካ::

ኬቴማዳ አግስታው ዳድ እምፕል ይኹቺ እሺኹ ወክትዳ  ኬሴት ታንባሺኹ አኽⶓ  ዊዛሩ አለምፀሃይ ታክፅካ:: ሌጌሳንቲ ማዘጋጂ ጝና ኩፅኒ ኬቴማዳ እሊውሳ ዳዶ ግቢትጝስ ናካዳ ሴኬኬና ጋቲታ ዝኩካማጊ አኽⶓ ዙሜካ:: አኹሳ አግልግሎቴኪላ ኬቴሙ እዝብስ ታምብስታንታ ፄውⶓ ቶኬምካ::

ዲንካራ ኬቴሙ እንፂ ማዘጋጂ ጝናሱ ስራስኪያጅ አቶ ሰዋገኝ አንተነህ ኬቴሙ ሌጌሳንቲ ማዘጋጂ ጝናስ እይሰትኹሳ ስልታኖስታ ቴግባሮ ጉሽፃ ፄውጝስ ኬቴሙ ዝኩዋንትካስ ፋይፃውሳ አግልግሎቴ እይካማጊ አኽⶓ ጌሌፅካ::

ጌፄሩ ዙራሙሪዳ ልማቶስታ ግብርኒውሳ እንፅኼ እንፃኽስታማጊ ኬቴምዳ ዝኩፃ ፄውኩ እምፕልታቕስ አኹሳ፣ ሜብራቱሳስታ ዳድ ልማቱሳ አግልግሎቴ አግፃንታ ፄውጝስ እንፃኽስስታማጊ አኽⶓ ጉሽካ::

ዲንካራ ማዘጋጂ ጝና እንፂ ማዘጋጂ ጝናሾ ሌጌሳማ አግልግሎቴ እይጚው ስልታንስታ አላፍት ኬፍ ናታ እንቲታኪ ምንግስቱ ድጎሚው በጀትስ ኬቴማው ልማቱ አግልግሎቲ እሳንጛታ:: ትኩታው ቤን ዙርሜ እያታ ካሴ ዲግስⶓ ሰራስኪያጅ ሰዋገኝ አቕፄካ::

አቶ ሰዋገኝ ክልልታ ዝኩኽ ሰላሙ ችግር ምክንያታስ ኬቴምዳ አግስታውሳ ሴኔዳ ጋቲውሳ ብቴስታ ጝኖ ማዘጋጂ ጝና ፂኒሳማ አቕስቴ እያቲታ ጊዙሳ እግዶ እይⶓ ጉሽካ:: እምፕልታቑ አግልግሎቲው ፋይ ኽይስታቲታ ቻኒስቶ ቺፃማጊ አኽጝስ ዲንካራ ኬቴም ሰላም አኽጝስ ሚዲቢኔ አግልግሎቴ እይጚው ቴግባርሾ ዙራታ ክልሉ ምንግስት እግዶ ጉሻታ ካሴ ዲግስካማጊ አኽⶓ ዙሜካ::

እንፂ ማዘጋጂ ጝና ይስጛማ አግልግሎቴ ጄሜሩኒዴስ ዋልታ ትኩሚ አንኩዋ ኪሎ ሜትርዴስ ጃላ አኻኽታሱሳ ዳዶ ግቢትጝስ ካሊⶓ ጌሌፅካ:: ጝን ቺፋ አኹ ኮታሪውሳ አግልግሎቴ አግፃንታ ፄውስትⶓ ዙሜካ::

ኬቴማዳ 26 ኮንቲነርካዋ ግቢትጝስ ወታትካ እንፅኼ ፌቴርካማ አጌላጌልስታንታ ፄውስትⶓ ቶኬምካ:: 2018 ምሬት አሜታዳ ዝኩፄ ጝኖ ግቢትፄ ብቴ አግፅጝስ ማንዲትጛንኩ ላጛ ማቤርካስ ብቴ አሬኬብፅጝስ 36 አቖ ቴኬምስታንታ ፄውጝስ እንፃኽስስታማጊ አኽⶓ አቕፄካ::

ባንጂ ወረዳው ጝኑ፣ ኬቴሙስታ ስር ልማት ፅ/ጝናሱ አላፊ ተሻለ ወርኩ ባንጂ ወረዳታ ክዳማጃ ማዘጋጂ ጝና፣ ኪፂ እንፂስታ ዲንካራ፣ ምርክቲስታ ሜሴሊ ቻይቲ ሌጌሳንቲ ማዘጋጂ ጝናዳ እምፕልታቕስ አግልግሎቲ እይስታማጊ አኽⶓ ጌሌፅካ::

ኪፂ፣ ምርኪቲስታ ሜሴሊ ቻይቲ ጌፄሩ ኬቴምካዳ እይስታሺኹ ማዘጋጂ ጝናሱ አግልግሎቲ ሰላሙ ችግር ምክንያታስ አግልግሎቲ እምፕልታቕስ እይስታማጊ ጋቲው አኽጝስ ክሬቴ ፌቴርⶓ ጉሽካ::

ዲንካራስታ ክዳማጃ ኬቴምዳ አግስታው መዘጋጂ ጝና ኩፅኒ ቱስቲስ ቴግባሮ አኮሜቻማጊ አኽⶓ ጌሌፅካ::

ሌጌሳንቲ፣ እንፂስታ መሪ መዘጋጂ ጝናሱ አግልግሎቴ እይጙስታ አቒው አይልስ አችትጝፃማ እምፕልታቕ ፋያኑሳ አግልግሎቴ አግፃንታ ፄውጝስ ይሴን ቴግባር አኮሜችስታማጊ አኽⶓ ቶኬምካ::

ኬቴሙ ዝኩዋንትካስ ልማቱ አግልግሎቲስ ያኻውሳ ሚፄ ኩፕፅጝስኪላ 2018 በጀት አሜትዳ 53 ሚሊዬንዴስ ጃላ እክድ እምስታማ ሱኺቲ አርፍካዳ 9 ሚሊዬንዴስ ጃላ ኩፕፅጝስ ካሊስቱኒውላ ፊፂምጚ ኩፅኒ ዜሬቕቲኒ አኽⶓ ኽይትጝፅካ:: እንጚሱ ምክንያትኪላ ወረዳዳ አግስታንኩ ሹኻ ጌፄሩ ኬቴምካዳ አግስታው ሌጌሳንቲ ማዘጋጂ ጝና ሰላሙ ችግር ምክንያታስ ሚፄ ኩፕፅጝስ ካላያሱ አኽⶓ ጉሽካ::

ኬቴሙ ዝኩዋንትካዋ ዳዱ ልማት፣ ፅንኩት ዝቒው አኹስስታ ሜብራትስ ቴኬምስታንታ ያኻንታ እንፃኽስስቱኒውላ ሰላሙ ችግር ኩፅኒ እንፅኺዳ ፅንጋኻ አኽⶓ ቶኬምካ::

ኬቴሙ ልግሱ አግልግሎቲዳ ዲጋው ካሲስ ዙርሜ እይጝስኪላ ሌጌሳንትካ ኬቴምካዳ ፋይፃውሳ ዋኽትጝፃማ ኬቴሙ ዝኩዋንትካ ፋያኑሳ አግልግሎቴ ወክትስ፣ ጊዝስስታ አንጌሌትስታኑላ ቴኬምስታንትካ ያኻንታ እንፃኽስስታማጊ አኽⶓ ጌሌፅካ::

ሰላሙ ችግርሊ እምትጛማ ኬቴምካዳ እጋፊ ግንባቲ እሳንጛቲታስታ አቕስታ እይስታቲታ እግድ እይስቱክ ሌጌሳንትካ ኬቴምካው ጉዳይ ኽዮ አግፃታ ክልሊ ዙሚትጜካማጊ አኽⶓ አቶ ሰዋገኝ ጉሽካ::

2018 በጀት አሜትዳ ዲንካራ ላጛ ማቢሪስ አችትጙንኩ 36 አቕስ እንቲታኪ ባንጂዳ አችትጙንኩ ጝኖ ፋያንትካ ሴዛ ማቤርካስ ዝኩፂ ጝኑ ግንባቲስ ያኻውሳ ብቴ ጉንቤት 20/2018 ም/አሜታዴስ ቤዴራ አሬኬብፅጝስ ትኩትስ እንፃኽስስታማጊ አኽⶓ አቶ ተሻለ አቕፄካ::