ጉላሊውሳ ዋይሜ ዴስቲስ ቻቤልጝ ቱስታውያኽ እስቱኻ

ንግስቴ ተስፋ

ጉላሊው ወክትዳኪ ያኻ ዋይሚ ጌሌፅስቱኒዴስ ችግር ኬሴትስቱኒላ ኩስጚስስታ እጋዊ ዳድስ ኽይጝጉ ጋቻሾ ቱጝ ፋይፃቲው አኽⶓ ልኺትጛንትካ ፖለቲካው ፓርትካስታ እንጃቢሪ ኬቴሙ ዝኩዋንትካ ዙሙና::

ላጜታንቲ ትክላሊ ጉላሊካ ጎሌላንትካ ፋዩኑሳ ፖለቲካውሳ ፓርቴ ጎሌልካ፡፡ ጉላሊው ዋይሚ ጌሌፅስቱኒዴስ ፋሌንጋ ጉላሊውሳ ዋይሜ ያኼስናማ ቻቤልጝስ ሲፋው ፖለቲካው ቡንካው ቤንሾ እላፎ ዙርፅጝ እምፕል ሴሌቴንኹ ፖለቲካው ሴል አኽጝ ጌሌፅስቴ::

ጎሌልጝስ አሴቴፍጙኽ ይቶፒያው እዝብ፣ ሊሊትጙኽ አላፍቱ ብቲዳ አግስታንኩ አካልካስታ ውላጊ ታምብዌን ጉላሊውሳ ዋይሜ ሰላማዊ ዳድስ ቻቤልጝ አጌራውሳ ፍንሾሱሳ ሰላሞ ቼሜትጝፅጙ አላፍት ዝኩክ አኽⶓ ጉላሊው ሜሜሪ ዴንጌጌ::

ጉላሌስታ ጉላሊውሳ ዋይሜ ካንትኹስ ካንቴ እዩንኩ እንጃቢሪ ኬቴሙ ዝኩዋንታ ዊዛሩ ማስተዋል ካሳሁን 7ንቴ ትክላሌ ጉላሌ ሰላምስስታ ዲሞክራሲው ሜብቶ ቴኬምስትካማ ጎሌልጝስ ካሊⶓ ድኹዌካ:: ጉላሊዴስ ፋሌንጋ ዊፅጝስታ ዊፅስትጝ ግዴቲ አኽጝታጊ ጉላሊውሳ ዋይሜኪላ ፄጊስ ቻቤልጝ ፋይፃው አኽⶓ ቶኬምካ:: ጉላሊው ዋይሚስ ዊፅስትኹኪ ይንታው ጉላሊስ ኬሻንቴ ፖሊሲውሳስታ ማኒፌስቶውሳ እክዶ እሜማ ልኺትጝጝስ አምናማ ፍንሾስ ቴርትጝ ማንዲስቴ ንካ::

ጉላሌ ዊፃንቲ ፓርቲ ዴሜካ እዝብስ ቱኽሳ ካሎ ቴግባርሾ ኪሳታ ቴስፊስ ማንዳንኩ አኽⶓ ዊዛሩ ማስተዋል ድኹዌካ:: እዝብ ናካዳ እንዙራኽ እስታቲው ይኮኖሚው፣ ማቤራዊስታ ፖለቲካው ችግራኻዳ አግስታው አኽጝታጊ አጌር አቖ ክችክቺስ ቴኬምጝስስታ አጌላጌልጝስ ኩርፄንትስ እንፃኽስትⶓ ፋይፃው አኽⶓ ቶኬምካ:: ዋሺኒኪ ፓርቲ ልኺትጛሺኹ አጌራስስታ አጌር አቑ ትክምስ ናማ አኽጝታጊ ጉላሊዴስ ፋሌንጋኪላ ሰላማዊ ልቕልቕቲ ዝኩዋታ ፋያንኩ አኽⶓ ድኹዌካ::

እሊው እንጃቢሪ ኬቴሙ ዝኩዋንቲ አቶ ተሰማ ወርኩኪላ 7ንቲ ትክላሊ ጉላሊ ውላዋ አሴቴፍጝፁኽስታ ዲሞክራሲውሳ ሜብቶ ቴኬምስትካማ ጎሌልጝስ ካሉኑ እሺኽ አኽⶓ አሳቦ እይካ:: ጛ ጎሌሉኑ ጉላሊው ጉትፕዳ ሰላምስ ጉላሊ አሌድስትⶓኪላ ጉሽካ::

አቶ ተሰማ ናኑውስታጊ ጉላሊዴስ ፋሌንጋ ጌሌፅስታውሳ ዋይሜ ሰላምስ ቻቤልጝ፣ ዊፅጝ፣ ዊፅስትጝ ጉላሊዳ ዝኩኽ አኽⶓ አምናማ ፍንሾሱ ፖለቲካው ልኺትጚስ ቴርትጝኪላ እዝብዴስኪ ያኻ ሊሊትጙንኩ ፖለቲካኩ ፓርትካዴስ ማንዲስታው አኽⶓ ካንቴ እይካ::

ጉላሊስ ዊፅስትኹ ዋሺኒኪ ፖለቲካው ፓርቲ ሰላማዊ ዳድስ ዋይሜ ቻቤላማ ይንታው ጉላሊስ ክችክቼ ቴርቶ ካስጝፅጝ እዝብስ ቴኬማው ሴሌቴንኹ ዲሞክራሲው እንዝጚ አኽⶓ ጉሽካ::

ጉላሊው ዋይሚስ ስልታኖ አግፃው ፓርቲ ዴሜካ እዝቦ ቱስቲስ አጌላጌልጝስ፣ ቱኽሳ ካሎ ቴግባርሾ ኪስጝ ማንዲስው ጉዳይ አኽⶓ ቶኬምካ:: ፍታዌ ልማቶ እሳንጝፃታ፣ እዝቡሳ ሰላሞስታ ዴክቶ ኬቤርፃታ እንቲታኪ ልማቶ ጄሜራማ ዎዜፍⶓ ባያማ ወክትስ አሌዳታ ዊፃንቲ ፓርቲዴስ ፋያንኩ አኽⶓ አቶ ተሰማ ዙሜካ::

ዊዛሩ ፈንታነሽ ታገልኪላ ጉላሊዳ ድምፆ እይጝስ አጌራዌ አላፍቶ ፊትጝⶓ ጉሽካ:: ጎሌላኒስኪላ ጛው ፋይስ አጌራስስታ አጌራ አቕስ ያኻው ፓርቲ ኑኑሳ ጎሌልⶓ ዲብስካ:: ኹኑሳ ሜብቶ ኬቤርፅጝስ ካሌ ንካማ አምኑኑሳ ፓርቴ ጎሌልⶓኪላ ቶኬምካ:: ዊዛሩ ፈንታነሽ እዩኑ ካንቲዳ ዳራኪ ውትኽትኺ ሰላሙ ችግራ ጋቲታ ቺፅጝፅጝስ ካሌ ንካማ አምኑኑ ፓርቲስ ድምፆ እይⶓ ጉሽካ::

ጉላሊዴስ ፋሌንጋኪላ ዊፅኹ ፓርቲ ቱስቲስ ስልታኖ ቻቤላማ አላፍቶ ፊትጝጝ፤ ዊፅስትኹ ዴሜካ ዳራኪ ጋቻ ጋቲታ ዋይሜ ቻቤልጝ ይቶፒያው እዝብስ ፋይፃንቲ አኽⶓ ቶኬምካ:: ፖለቲካው ፓርትካ ልኺትጛኒስ ዊፅጝስታ ዊፅስትጝ ዝኩኽ አኽⶓ ማሊጝስ ይሴንቶስታ ዳንጉዊኔ ጎሌላማ ይንታውስ ቴርትጝ ሴሌቴንኹ እዝብዴስ ማንዲስታው አኽⶓ አሳቦ እይካ:: እዝብኪላ ዋይሜ ፄጊስ ቻቤላማ ዲሞክራሴ ቴግባርስ ካንትፅጝ ፋይፄ ንካ::

አማኻሪ ክልልዳ ልኺትጛንኩ ፖለቲካ ፓርትካው ይጋሪው ኩስጚ ጝናሱ ኩፕፃንቲ ተስፋሁን አለምነህ አሚኮ ዲጂታልስ እዩኑ ጊሊፂዳ ጉላሊ አጌራስ ፋይፃውሳ ድሎ ኻሳማ ይንታ ናኒስ” ጌሌፅካ::

“አማኻሪ ክልሉ እዝብ ሜስዋቴ ኬያማ ካስጝፁኽ ጉላሊያኽ” ኑንኩ ኩስጚ ጝናሱ ኩፕፃንቲ ክልሉ እዝብ ፋያውሳ ፓርቴ ጉሌልጝስ እንግርግራ ናቲው አኽⶓ ቴግባርስ ካንትፅⶓ ጉሽካ:: ዲሞክራሲ ጉላላ ጋቲት አንታቲው አኽⶓ ዙሙንኩ ይጋሪው ኩስጚ ጝናሱ ኩፕፃንቲ ክልሉ እዝብኪላ ዲሞክራሴ  ቴኬምስታማ ፋያውሳ ምንግስቶ /ፓርቴ/ ጎሌልጝስ ካሊⶓ ቶኬምካ::

ላጜታንቲ ትክላሊ ጉላሊ ውላዋ አሴቴፍጝፁኽስታ ኔፃ እሺኹ አኽⶓ ጌሌፅካ:: ልኺትጛንትካ ፖለቲካኩ ፓርትካ ቱስቲስ አሴቴፍጝጝስ ካሉኑ ጉላሊ አኽⶓኪላ ቼሜትጝፄካ:: ክልልዳ ጉላሊ ካስጛቲታ ፃንጌኽፃሺንኩ አይልካ ዝኩⶓ ጉሹንኩ አቶ ተስፋሁን እንግልቢችስ ኩፅኒ እዝብ ጉላሌስታ ሰላሞ ፋያው አኽⶓ ድምፆ እይጝስ ቼሜትጝፅⶓ ኽይትጝፄካ:: ጉላሊ ሰላምስ ካስጛታ ታምቦ ፊትጝጙኽ እዝብስኪላ ምስጋኔ ዲግስካ::

ፖለቲካ ፓርትካው ይጋሪው ኩስጚ ጝናሱ ፋይስታ ቴግባር አጌራ ዊፄታ ፄውጝ፣ አጌር አቕስ ፋይፃውሳስታ ክችክቺስ እይስትኹሳ ስልታኖ ፊትጛማ እዝቦ አጌላጌላውሳ ምንግስቶ ቲሪትጝፅጝ አኽጝታጊ 7ንቲ ትክላሊ ጉላሊኪላ ሰላምስታ ኔፃስ ካስጝጝ እን አጌራኩሳ ባላንጋርካዋ ሴሜርፅኹስታ ጛሬ ዝክፅኹ አኽⶓ ቶኬምካ::