ክንታንትካ ኬሻንቴ ዋይሜ አግጝስ ቤዴራ ቴርቶ ፄዌካማጊያኽ

ታደለ አጋጄ

አጌር አቡቑ ፍታኒዴስ ኬሽኹሳ ዋይሜ ሜዜጌብፅጝስ ቴርትካማጊ አኽⶓ አዚኒ ትክላሊ ላጛንቲ አች ክንቲ ጝናዳ ፅክራ ላጛንቲ ቤንኩ ክንታንትካ ዙሙና::

2018 ም/አታሱ ፅክራ ላጛንቲ ቤኑ አጌር አቡቑ ፍታኒ ሴኒ 24/2018 ም/አታስ እይስታው አኽⶓ ክንቲው ሚኒስትር ይፋ ፄውጝ ታክስስቴ:: እን ሲፋማኪላ ሊሊትጙንኩ ዙራሙርካዳ አጌር አቡቑሳ ፍታኔ ፌቴንስታንኩ ክንታንትካ ዝኩኽ ዴዴጝ ጊዛኻዳ ፍታኒስ ቤዴራ ቴርቶ ፄዌካማጊ አግስታና::

አዚኒ ትክላሊ ላጛንቲ አች ክንቲ ጝናዳ 12 ቤኑ ማይቤራዊ ሳይንሱ ክንታንቲ ትላዬ አላምረው አጌር አቡቑ ፍታኒስ ቴርታማጊ አኽⶓ ዙማ::

ውላ ክንቲውሳ እሜ ፂኒሳማ አሌድጝዳ አግስታው አኽⶓ  ጌሌፅኹ ክንታንቲ ናካዳ ፂኒስኹሳ ክንቲውሳ አይኔቶ ጋምቢጝስ ቴርታማጊ አኽⶓ ድኹዋ::

ክንታንቲ ትላዬ 11ንቲ ስታ 12ንቲ ቤንዳ እምፕላንቴ አቾ እሚጝ ሼሌምስታንቲ ክንታንቲ አኽⶓ ቶኬማ:: አጌር አቡቑ ፍታኒዳኪላ ኬሽኹሳ ዋይሜ ሜዜጌብፅጝስ ሼሌምስትጝስ እክዶ እሜማ ፂኒሳው አኽⶓ እንክርፃ:: አጌር አቡቑ ፍታኒዴስ 500ዴስ ጃላ ዋይሜ ሜዜጌብፅጝስ እክድ ዝኩኽ አኽⶓ ድኹዋ:: አኬድኹሳ እክዶ ሳኪትጝፃማ ኬሽኹሳ ዋይሜ ያጉኒጊ እጉሳ ክንቴ ክንትጝስ ፋያው አኽⶓ ዲብሳ:: ክንታንቲ ትላዬ ክንቲ ጝናዳ ክንትፃንትካ ፄዋኑ እርዳቲ ፍታኒዳ ኬሽኹሳ ዋይሜ አግጝስ ካሊፃው አኽⶓ ድኹዋ::

ክንትፃንትካ ክንቲጝናዳ ፍሽካማ ፌቴንፃኑ ፍታኒዴስ ኪቻ አጌር አቡቑ አችስ ይንታው ፍታኒ ሳሴር አኽⶓ ጉሻ:: ክንታንትካ አጌር አቡቑ ፍታኒዳ ጛጛርትጛሳ ቼኔክፃኑላስ ፍታኒስ ቴርትጝ ቱስታው አኽⶓ ቶኬማ::

ፌይኹ ችኽዳ ክንታንትካ ጎሌሉንኩ ክንትፃንትካስ ክንታኒስ እጂⶓ ጉሽኹ ክንታንቲ ትላዬ ጝሺሱ ጊዝዳኪላ ፌይኹ አሜቱሳ ፍታኒውሳ ካስካዋ እንፃኽስትጝስ እርዳትካማጊ አኽⶓ ዙማ::

እሊት ማይቤራዊ ሳይንሱ ክንታንታ ትሩነሽ ብርሃኑ ስልኪስ ዙሚትጝፅንኹ ጊዝዳ ሜፃፍ ጝናዳ አንቬቭታታጊ ፍታኒስ ቴርቴታታጊ አኽⶓ ድኹታ:: ፌይኹ ችኽዳ ክንትፃንትካኪላ እርዳታኒስ እጂⶓ ዙሜ::

ቹዋ ታብልኪላ ጊዞ ቱስቲስ ቴኬምስታንታስታ ፂኒሳንታ ፄዌካማጊ አኽⶓ ዲብስታ:: ጚኪላ አጌር አቡቑ ፍታኒዴስ ኪንዲዴስ ጃላ ዋይሜ ሜዜጌብፅጝስ ዩንቨርስቲሾ ቱጙ እክድ ዝኩⶓ ድኹታ::

አቶ አማረ ባይነሳኝ አዚኒ ትክላሊ ላጛንቲ አች ክንቲ ጝናዳ ወመህ  /ቾ ታብሉስት ክንትፃንትካው እምፕልቱ አባል/ ያኻኒስ ክንቲ ጝና ክንታንትካ ኬሽኹሳ ዋይሜ ሜዜጌብፃንታ ፄውጝስ ሚንችካ እንፅኽካ እንፃኽስስትካማጊ አኽⶓ ዙሜካ:: ቼካማ ክንታንኩ ክንታንትካስ ፋይፃንኩሳ ሜሳርካዋ ዋኽትጝፅⶓስታ ክንታንትካ ጎሌሉንኩ ክንትፃንትካስ ፊቲ ሳትስስታ እሊው ሽፍትስ ክንቲ እይስታታ ፄውⶓ ዲብስካ::

ጄርካ ክንቲስ ኬሽኹሳ ዋይሜ ያጋንታ ክንታንትካው ቹዋ ታብል ኩስጝፃንኩ አኽⶓ ቶኬምካ:: ክንቲ ጝናዳ ሜብራት ካሳኒ ሶላሮ ጄውጝስ ክንታንትካ ፂኒሳንታ ፄውስታማጊ አኽⶓ አቶ አማረ ዙሜካ::

ክንታንትካ  ጊዞ ቱስቲስ ቴኬምስትጝስ ፂኒሳንታ ቹዋ ታብል እርዳትጝ ፋይፃው አኽⶓ ድኹዌካ::

አዚኒ ትክላሊ ላጛንቲ አች ክንቲጝናዳ ክንትፃንቲ ደረጀ ሽቱ ናካዳ ወረዳታጊ ሰላሙ ችግር ሲጊፃው አኽⶓ ጉሽካ:: አጌር አቡቑ ፍታኒስ ቴርታንታ ሼው ፅንታሱሳ ኩስጜ እይጝስስታ ወርክ ሽትካዋ እንፃኽስትጝስ እርዳትካማጊ አኽⶓ ድኹዌካ:: ፌይኹ አሜትዳ ፌቴንስቱኑሳ ሽቶ ዋትጛ እንፃኽስትጝስ ካላንኩ አኽⶓ ፍታኔ ዙርፅጙሳ ሴሎ ክንትፅማጊ አኽⶓኪላ ዲብስካ::

ፍታኒዳ እንዳርማኪ ጅፍንታ ጋቲታ እንፃኽስታንታ ኩስጝፃንኩ አኽⶓ ቶኬምካ:: ኬሽኹሳ ዋይሜ ያጋንኩ ክንታንትካስ ሽልማቴ እይጝስ ጁትጝፃንኩ አኽⶓ ዲብስካ::

አዮ ጉዋጉሲ ወረዳ ክንቲ ፅፌት ጝናሱ አላፊ ወረደ በየነ ወረዳታ 2018 ም/አታዳ አጌር አቡቑሳ ፍታኔ ፌቴንስታንኩ 605 ክንታንትካ ፍታኒስ ቤዴራ ቴርቶ ፄዌካማጊ አኽⶓ ጌሌፅካ::

ክንቲ  ጝናሱ እክድታ ፍታኔ ፌቴንስታንኩ ክንታንትካዴስ 20 ታፋ 5 ሊኻዴስ ጃላ፣ 80 ታፋ ዴሜካ ኪንዲዴስ ጃላ ዋይሜ ሜዜጌብፅጝስ ዩንቨርስቲሾ ቱዋንታ ፄውጙሳ እክዶ ፍሽጝስ እንፃኽስስታማጊ አኽⶓ እርዳትፅካ:: እንስኪላ ውላ ላጛንቲ አች ክንቲ ጝናዳ ቼካማ ክንታኑሳ ፕሮግራሞ ፍሽጝስ ክንታንትካስ እርዳቲ ፄውስታማጊ አኽⶓ ጉሽካ::

ሜብራት እላቲው ክንቲ ጝናዳኪላ ሶላር ጄውስታማ ክንታንትካ ፂኒሳንታ ፄውስታማጊ አኽⶓ ቶኬምካ:: ውላ ክንቲ ጝናዳ ኬሽኹ አቕትስታ ክንትፅጙ ሴል ዝኩክ ክንትፃንትካዋ ክንታንትካ ጎሌልጝስ ክንታንታ ፄውስትⶓ ቶኬምካ:: ናካ ዝኩኽ ዴዴጝ ጊዝዳ ክንታንትካዋ ሼው ፅንታስ ቴርስጝ፣ ወርክሽቶ እንፃኽስትጝስስታ ሜፃፍ ጝናስ ቴኬምስታንታ እርዳቲ ፄውስታማጊ አኽⶓ ጉሽካ::