ግባት ታምባታ ፄውስታማጊያኽ

ንግስቴ ተስፋ

ምርቱሳ ድምክኔ ቼሜትጝፅጝስ ግባቶ ቱስቲስ ዲግስጝስታ ቴኬምስትጝ አቫላምቲ ቴግባር አኽጝ ቱስቴ እስትኾ::

አሌም አቡቑ እርሺው አቺቱ ኾቱ ንቫር ናውስታጊ አውሮፓው ዘቤኑ ቼፍታ 2050ዳ አሌሙ እዝቡ ምግቡ ፋይ ሊኽዴስ 30 ታፋ ዴሜኬ፤ እንሱ ጉሽፂ ምክንያት ዴሜካ አሌም አቡቑ አችስ ካንትስታው እዝቡ ቼፉ ድምክኒ አኽⶓ ቶኬማ::

እዝቡ ቼፍ ዴሜካማጊ ካሳኒ ዴሜካ እሌቱ ኬሌብዴስስታ ዝኩፂ ጝንዴስ ጉሽፃማ እሊው ፋይ ኬፍቲኒ አችስ ዴሜካማጊ ካሴ:: እርሺስ እሼው ብቲኪላ ድሳማጊ ካሴ:: እን ዴሜካ ምግቡሳ ፋዩ ዋኽትጝፅጝስ ፍታና ያኼ::

እሳ ችግሮስታ ፍታኔ ቲሪትጝጝስ ዴሜካ ግብርኒውሳ እንፃኽስትጜ ዝቤንፅጝስስታ ግባቱሳ ዲግስጜ ኬሽጝፅጝስ ልቓ ብቲዴስ ሚንቾ ምርቶ አግፅጙሳ ሴሎ ቴግባርዳ እሽፅጝ ፋይፃው አኽⶓ አቺት ቴንኬክፃ::

ግብርኒው እንፃኽስስትጚ ዝቤንታያስኩ አጌርካዴስ ይቶፒያኪላ ቱኪምስቲ::እሳ ችግሮ ኽይጝስ ኩፅኒ ጄሜርስትኹ ቴግባር ዝኮ::

33 ታፋ ሊኽዴስ አጌራው ግብርኒ ምርቱሳ ዲግስጜ እሜው አማኻሪ ክልልኪላ ዜርፎ ኬሽጝፅጝስ ትኩት እይስትⶓ ግብርኒው ቢሩዴስ አግፅኑኽ ንቫር ካንትፄ::

እሳ ጉሽፃ ፄውጝስ አዊ ብሄረሰቡ ቺፅጝፂዳ 2018/2019 ችኹ እርሺውሳ ኩምችኔስታ ግቦቱሳ ዲግስጜ ካንትኹስ ትኩታንኩሳ ዙሚትጝፅና::

አንኪሺ ጉዋጉሲ ወረዳ ቱልቲ ኬቤሊው ዝኩዋንቲ አቶ ካኘው መኮንን ናኒውስታጊ ናካዳ እርሼ ላሳላፅካማጊ አኽⶓ ድኹዌካ:: እርሼ አሬሳኒስ ፍትሬቱሳ ማዳባሬ /ኮንፖስቶ/ ቴኬምስትጝዴስ ድምክና አቓ ግብሬ ኽብፂውሳ ማዳባሬኪላ ቴኬምስታኒ አሜትዴስ አሜቶ ምርት ዴሜካማጊ አኽⶓ ጉሽካ::

አሜትዴስ አሜቶ አቓ ግብሪ ኽብፂው ማዳባሪው ክብርናቲ ሌጎ ሴይኑላ አግፃኑ ምርትሊ ካንትጛኒስታ ብቲው አሉምት ችንችጙስትጝሊ እምትጛማ ኩፅኒ ኽብፂውሳ ማዳባሬ ቴኬምስትጝ ግድ አኽⶓ ውማቴንካዴስ ኩስጜ አግፅⶓ ድኹዌካ:: እንጚስኪላ ኬሻንቴ ምርቴ አግፄካማጊ አኽጝስ ግባት ዲግስጚሊ እምትጛማ ካንትስታውሳ ዳንጉኔ ክችስጝ ምንግስቱ አላፍት አኽⶓ ቶኬምካ:: ግባቱ ክብርናቲዴስ ጃላ ፋያኑ ሜቴንስ አግፅጝስ ቼጌርስታንኩ አኽⶓ አቶ ካኘው ዲብስካ::

አሬሳቻንቲ እይኑ አሳብዳ ኽብፂው ማዳባሪስታ ጉልሊ ዜር ጌፄንካው ታፍዳ ዝኮስኩስ ምንግስትሾስ ዲጋው ዩኔንካዳስታ እምፕልቱ እንፅኺው ማቤርካው ኾትዳ እላኪያኽ እስታው እንፃኽስትጜኪላ ምንግስት ክችስጝስ አላፍቶ ፊትጝጛኒ አሬሳቻንትካስ ሚንች ትክም ዝኩⶓ ዙሜካ::

ዴናትኮሽቲ ኬቤሊዴስ ዊዛሩ አለሙሽ ምህረትኪላ ኽብፂው ማዳባሪው ክብርናቲሊ እምትጛማ ችግርስ ኽይ ያኼ ኑኑሳ ኮንፖስቶ ቴርሱኒውላ ጛዳ ዝኩኹ ውላ እርሺው ብቲዳ ታምፅጝስ ኩፅኒ ቼግርስትካማጊያኽ:: አሬሳቻንትካ አክምታ ፋያኑ ሜቴንስ አቓ ግብሬ ኽብፂውሳ ማዳባሬ አግፅጝ ቱስቱስ እንግልቪችስ ጌዴብ እንኩርስታማ እንዙራኽ ጄውጝስ ካሌኑ እስትጝኪላ ምርቱ ድምክኒዳስታ ዝኩኽሳ ብቴጊ አሬሳማ ሴብልስ ሾፌንጝስ ፍታና አኽⶓ ድኹዌካ:: እጋፊ ጌፄንኪላ አቓ ግብሪ ኽብፂው ማዳባሪ አሬሳቻንትካስ ታምባቲታ ፅንጋኻ አኽⶓ ቶኬምካ::

2018/2019 ምርቱ ዝቤንዳ ላጛ ኩንታላ ዩርያዋስታ ሹኻ ኩንታላ ዳፓ ካፅጝስ አቓ ግብሬ ኽብፂውሳ ማዳባሬ ቱስቲስ ቴኬምስትካማ ኬሻንቴ ምርቶ አግፅጝስ እክዶ እሚካሺንኩ አኽⶓ ዙሙንኩ አሬሳቻንታ አለሙሽ ኽብፂው ማዳባሪው ክብርናቲስታ ዲግስጚው እንፂት ኩፅኒ እክዶ ሳኪትጝፃቲንታ ፅንጋኻ አኽⶓ ዲብስካ::

ትኩታው ቤንኪላ ችግሮ ኽይጝስ ግብርኒውሳ ዜርፎ ዝቤንፅጝዳስታ ምርቱሳ ድምክኔ አግጝዳ ታምቦ ፊትጝጝ ፋይፃው አኽⶓ ካንቴ እይካ::

አንኪሺ ጉዋጉሲ ወረዳው ግብርኒ ፅፌት ጝናሱ አላፊ አቶ አስፋው ሁነኛው 2018/2019 ምርቱ ዝቤንስ 52  ሻይ 540 ኩንታልዴስ ጃላ ችኹ ሴብሉ ዜርስ ያኻው አቓ ግብሪ ኽብፂው ማዳባሪ ወረዳሾ ቱዋማ አሬሳቻንትካስ ታምባታ ፄውጝስ እቅድ እምስትⶓ ጌሌፅካ:: ወረዳታ እክድስ እምስትኹዴስ 25 ሻይዴስ ጃላ ወረዳሾ ዲጋማ 15 ሻይ 490 ዴስ ጃላ ኽብፂው ማዳባሪ አሬሳቻንትካስ ታምብⶓ ኽይትጝፄካ:: 6ሊኻ 16 ኩንታል ሹምቢው ጉልሊ ዜርኪላ ዲጋማ 4ሊኻ ኩንታልዴስ ጃላ አሬሳቻንትካስ ታምብⶓ ጉሽካ::

አቶ አስፋው ኑኑውስታጊ ቤዴርካማ ዜርስታንኩ ሴብልካስ ኽብፂው ማዳባሪ አሬሳቻንትካስ እይስታ:: ኽብፂው ማዳባሪ እጋፊ ጌፄንስ ታምባቲታ፤ አሬሳቻንትካስ ዴሜካ ክችክቺስስታ ፍታዊ ዳድስ ታምባታ ትኩታኩ ቤንካሊ እንፃኽስስታማጊ አኽⶓ ጌለፅካ:: ፌይኹ አሚቱ ግባቱ ዲግስጚሊስታ ቴኬምስትጚሊ ካንትጛኒኪላ ኬሻንቲ ፊፂምጚዳ አኽⶓ ጉሽካ::

አዊ ብሄረሰቡ ቺፅጝፂ ግብርኒው ሜምሪዳ ግብርኒ ግባቱ ዲግስጚው ኬቹ ጉሳንታ ዊዛሩ አበራሽ አስማረ ጛሾስ በጀት አሜትዳ 841 ሻይ ኩንታልዴስ ጃላ ዳፖስታ ዩሪያዋ ዲግስጝስ አኬድስታማ እንፅኺ ጄሜርስትⶓ ኽይትጝፄካ:: እንጚዴስኪላ እን ዜጌቢ ቴርትኹሳ ወክቶ ኺስታ 341 ሻይ ኩንታልዴስ ጃላ ዲግⶓ ጌሌፅካ::

ዊዛሩ አበራሹ ጊሊፂታጊ ግባቱ ዲግስጚ ፌይኹ አሜቱ ምስሊ ወክትሉ ካንትጛኒ ግርቦ ይስፃው ፊፂምጚዳ አኽⶓ አቕፄካ:: ግባቶ አሬሳቻንትካውሳ ዝኩፄ ኺታ ታምፅጝስኪላ ትኩትስ እንፃኽስስታማጊ አኽⶓ ቶኬምካ:: ብሄረሰቡ ቺፅጝፂታ ቤዴራማ ዜርስታው ሴብልካስ ኽብፂውሳ ማዳባሬ ታምብስታንታ ፄውጝስኪላ ትኩትስ እንፃኽስስታማጊ አኽⶓ ጉሽካ:: እንጚስኪላ 75 ሻይዴስ ጃላ ኩንታል ዳፕስታ 40 ሻይ ኩንታልዴስ ጃላ ዩሪያ አሬሳቻንትካስ ታምባታ ፄውስትⶓ አቕፄካ::

ፍንሾስኪላ ኽብፂውሳ ማዳባሬ ወክትስ አሬሳቻንትካስ ታምፅጝስ ትኩትስ እንፃኽስታማጊ አኽⶓ ጉሹንኩ ቴቬቬርጝፃንታ ኽብፂው ማዳባሪዴስ ድምክና 28 ሻይ ኩንታልዴስ ጃላ ጉልሊ ዜር አሬሳቻንትካስ ታምባታ ፄውስታማጊ አኽⶓ ጌሌፅካ::

ፌይኹ አሜትዳ አማኻሪ ክልልታ 187 ሚሊዮን ኩንታል ምርቶ ችኹ እርሺስ ሾፌንስታው ሴብልዴስ ኩፕፅጝስ አኬድስታማ 188 ሚሊዮን ኩንታል ምርቶ ኩፕፅጝስ ካሊጝ ታክስስቴ::

2018/2019 ችኹ ምርቱ ዝቤንዳኪላ አንኩዋ ትኩሚ 58 ሚሊዮን ሄክታር ብቴ አሬስጝስ 205 ሚሊዮን ኩንታል ምርቶ አሜሬትጝስ አኬድስትⶓ ግብርኒው ቢሩዴስ አግፅንኹ ንቫር ምልኻቴ::