ኩሪ ታምፃው ኬሴትዴስ ቤዴራማ ቴንኬክስትጝ ቱስቴ

ታደለ አጋጄ

ችኽ ቱኽ ቺፋ ኩሪ ቼጌርፃማጊያኽ ናኒስ ክላጅ ኬቴምኩ ዝኩዋንትካ ዙሙና::

ዚጋሚ ወረዳዉ ክላጅ ኬቴሙ ዝኩዋንቲ አቶ እንግዳው በላይ አሜት ቺፋ እምፕልታቕ ኩሪው ኬሴትስ ቼጌርስታንኩ አኽⶓ ዙሜካ::

“ኬሌኽናኒ እንኮኻውሳ አቲንኾ፣ ቻ ኬሻዉ ቻ ኬሻው እናኒ ዙርሜ እያውሳ አቲንኾ” ናኒስ ኩሪ እምፕልታቕዳ ኬፍቲኔ ቻኒስቶ ታምፃማጊ አኽⶓ ዲብስካ::

ክላጅ ኬቴምዴስ ኩክራ ሙሪ እስታውዳ ዝኩንኩ እምፕልታቕዳ ኩሪ ማልጛ ይሳማጊ እምፕልታቖ ቼጌርፅⶓ ቶኬሙንኩ አቶ እንግዳው ምንግስት እምፕልታቑሳ ችግሮ እርዳትስትጝስ ዙርሜ እያታ ካሲካ::

እንዴስ ቤዴራ ግሽስታሺኹ ኩሪው  ባይ ዙራማ ዴፌንጝስ “ኩሪዳ ዳሴቕስትናናኽ” ዝኩንኹ ኑንኩ አቶ እንግዳው ሰላሞ ኬቤርፅጝ ቢዲሪ እይስታው እንፅኺ ንጝስ ውላ ሰላሞ ማንዲፅጝዳ ዝኩንኩ አኽⶓ እርዳትፅካ::

ፌዩንኩ አሜትካዳ ፌያፌያማ ግቢትስታሺኹ ኩሪው  ባይ ዲፒስ ዋኻማ ኩሪ ካሳው ስፍሪ እላቲው አኽⶓ ዙሙንኩ አቶ እንግዳው እንሱ ምክኒያቲስ ምንድራሺው ቑንዚ ኬሴትስታማ እምፕልታቕ ቑንዳስትጝስ ቲንዳ ችግሮ ታምፃማጊ አኽⶓ ዲብስካ::

ፌይኹዳ ኩሪው እንዚጝፂ ባይ ግቢትስትኹ ጊዝዳ እምፕልታቕ ቴቤቤርጝጝስ ግቢትⶓ ቶኬሙንኩ አቶ እንግዳው ይንታውስኪላ እምፕልታቕ ዋሺኒኪ ልማትዳ ቴቤቤርጝጛንኩ አኽⶓ ዲብስካ::

እሊው ክላጅ ኬቴሙ ዝኩዋንቲ የሽዋስ ሽቲ እንዴስ ቤዴራ ግቢትስታሺኹ ኩሪው እንዚጝፂ ባይ አቾ ማንዳያሱ አኽጝስ ዲፒስ ልምታማ እምፕልትቖ ኩሪ ማልጛ ቼጌርፃማጊ አግስታዉ አኽⶓ ዙሜካ::

እምፕልታቑ ዝኩፂ ጝንዳ ኩሪ ቱዋማ እዝቦ ጛስጛዋ ጌውስጝፃማጊ እሊውሳ ችግሮ ፌቴርⶓ ዙሙንኩ አቶ የሽዋስ እምፕልታቕ አስሜምጜካማ ዝኩዋቲንታ ክርፂ ቺፅጝፂውሳ ችግሮ ፌቴራማጊ አኽⶓ ድኹዌካ::

ኩሪ ይሳማጊ ካሳኒ አቕዳኪ ያኻ ንብሬትዳ ችግሮ ታምፅጝስ ካላው አኽⶓ ዙሙንኩ አቶ የሽዋስ እምፕልታቕ ችግርዳ ቱዋቲንታ ቤዴራማ ካላካልጝጝ ፋይፃው አኽⶓ ዲብስካ::

ምንግስት እምፕልታቑሳ ችግሮ እርዳትስታማ ኩሪው ኬሴትስ ጉዳት ታምባቲታ ፄውጝስ እምፕልታቖ ልማትስ ቴቤቤርጝፅጝ ፋይፃው አኽⶓ አሳቦ እይካ::

ኬቴምዳ ኩሪ ባስኹሳ ጉዳቶ ታምፃውላስ ኩሪ እንዜጛው ባይ ግቢትስታማ እምፕልታቕ ቼጌርስታቲንታ ፄውጝ ቱስቴ ንካ::

እንዴስ ቤዴራ ግቢትስታሺኹ ኩሪው እንዚጝፂ ባይ ትንካኪስ እምስታውላስ ይጉዋማ ዲፒስ ልምታማ አግልግሎቶ እያቲው አኽⶓ ቶኬምካ::

ዚጋሚ ወረዳው ኬሴቱ ዙርፅጙስታ ዙርሜ እይⶓ ውማይቲኒ ኪሲ እሱባለው ከበደ እምፕልትቕዳ አዲጊ ሊሊትጙንኩ ምክኒያትካስ ኬሴትስትጝስ ካላው አኽጝስ እምፕልታቕ ቤዴርካማ ካላካልጛንታ ሼውቴ ፌቴርካማጊ አግስታንኩ አኽⶓ ዙሜካ::

ኩሪ ብቲውሳ አሉምቶ ኔኬታቲታ፤ እምፕልታቕዳ ኬፍቲኒ ጉዳቶ ታምፃቲታ ፄውጝስ ኩሪ ኬሴትስታንኩ ዙራሙርካዋ ፂኒስጝስ ኩሪው እንዚጝፂ ባይ ግሽስታታ ፄውስታማጊ አኽⶓ አቕፄካ::

ክላጅ ኬቴምዳ ብቲው እንኩሪ ማልጛ ቼጌርፃውስታ ጃላ ኩክሪ አኽጝስ ኩሪው አዳጊ ኬሴትስታቲታ እምፕልታቕ ትንካኬ ፄውጝ ቱስታው አኽⶓ ታክስፅካ::

ላንቡሳ ኺስታ ኩሪው እንዚጝፂ ባይ ግሽስታያሱ አኽⶓ ዙሚጝስ ይንታውስ እክድስ እምስታማ ኩሪው እንዚጝፂ ባይ ግሽስትጝ ቱስታው አኽⶓ ጌሌፅካ::

አዊ ብሄረሰቡ ቺፅጝፂው ኬሴቱ ስጋቱ እንፅኺ አመራር እቑስታንቲ ፅፌት ጝናሱ አላፋ ዊዛሩ ስርካለም አያሌዉ ብሄረሰቡ ቺፅጝፂዳ ኩሪ ኬሴትስትጝስ ካላንኩ ዙራሙርካዋ ጎሌልጝስ ካላካልጝጙ እንፅኺ አኮሜችስታማጊ አኽⶓ ኽይትጝፄካ::

ኩሪስ ታስስትጝስ ካላንኩ ዋልታ ወረድካዳ አማኻሪ ክልሉ ኬሴቱ እንፅኺው አመራር ኮሚሽንሊ ፃምርትጚስ ቢዲሪዳ እይስታንኩሳ እንፅኽካዋ እንፃኽስትካማጊ አኽⶓ ጌሌፅካማ እምፕልታቕ ኩሪዉ ኬሴትካዋ ካላካልጝጛንታ ካሊፃንኩ ዳድካዋ ካንትኹስ ሼውቲ ፌቴርስታማጊ አኽⶓ ዙሜካ::