አሼግስታማ ዋይስታው ምግብ ቲንስ

ታደለ አጋጄ

አሼግስቱንኩ ምግብካ ሊጊሲሜ ጊዞ አቤሌሽስታኑላስ እጄንታ እሺግፂዳ ቴርትካማ እንኩርስቱንኩ ምግብካኽ:: እኒ ምግብካ ፋብሪኪዳ አኹኪ ምግቦ ቴርሳንኩ ኾትካዳ ፕላስቲክስ፣ ኮርኮሩሳ፣ ካርቱንስስታ እሊኩ ዲብካስ አሼግስትካማ ዲጋና::  ኾሺ፣ ችማኪ፣ ብስኩት፣ ፖስታስታ ፄጌርጛንኩ ምግብካ ምሳሊታ ቶኬምስታና::

ምግብ ባክቴሪያስ፣ ሶኼንትስስታ እሊኩ ዲብካስ አቤሌሽስታውላስ ሊጊሲሜ ጊዞ እጄታ፣ ፃንኩቶ ማንዲስታማ እንኩርስታታስታ እንዜጝትጝፅጝስ ሳሴር ያኻታ እስታማ  አሼግስቴ:: እኒ አሼግስቱንኩ ምግብካዋ እምፕልታቕ ጄዌካማ ቴኬምስታኒስ ዋታኮውሳ ትንካኬ ፄዋንኩ አኽⶓ ካስና::

እንጃቢሪ ኬቴሙ ዝኩዋንታ ገነት ታምር ሱክዳ አሼግስትካማ ዋይስታንኩ ምግብካዋ ጄውታታ ቲኪምስቲ:: አሼግስታማ ዋይስታውሳ ምግቦ ጄውቱስ ቴኬምስትጙ  ጊዝ ፌይⶓስታ ፌያያሱ አኽⶓ እንቲታኪ አሺግፂ ቔድⶓስታ ቔዲያሱ አኽⶓ ትንካኪስ ካንቴታ ጄውታት አኽⶓ ድኹታ::አሼግስትካማ ዋይስታንኩ ምግብካ ሚንቺትስ ስራስሪስ ጄውስታማ እይስቱስ ቲኪምፂ ጊዝ ፌይኹ ያኹኒጊ  ቲንዳ ኬፍቲኔ ችግሮ ሲፍፃው አኽጝስ ትንካኬ ፄውጝ ቱስታው አኽⶓ ዲብስታ:: አሼግስታንኩሳ ምግብካዋ ስራስሪስ ጄዋማ እይጝ ማልጛ ፋይፃንቲ ጋቲው ያኹኒውላ አሺግፂ ብስስትⶓስታ ብስስታያሱ አኽⶓ አዊዳ እሺኹስታ እሽያሱ አኽⶓ ትንካኪስ ካንትጝስ ጄውጝ ፋይፃው አኽⶓ ዲብስታ::

እሊት እንጃቢሪ ኬቴሙ ዝኩዋንታ ዊዛሩ አስማረች ቦጋለ አሼግስትካማ ዋይስታንኩሳ ምግብካዋ ጄውቱስ ቲኪምፂ ጊዝ ፌይⶓስታ ፌሼያሱ አኽⶓ፣ አሺግፂ ብስስትኹስታ ብስስታያሱ አኽⶓ ሼውኔታ ካንቴውላስ ጄውታት አኽⶓ ዙሜካ:: አሼግስታንኩ ምግብካ ስራስሪስ እይስታኑ ጉዝማ ምግቦ ኹጙሳ እንጐ ኔኬታው ያኹኒውላ እምፕላቺ እምፕላቺ አሼግስትኹሳ ምግቦ ጄውታታ  እይታታ አኽⶓ ድኹዌካ::

ባርዳር ዩኒቨርስቲዳ ምግቡ ምንድስኒው ክንቲው ቤንዳ ክንትፃንቲስታ ማራማርጛቲ ቴቤቤርጛቲ ፕሮፌሰር ቢረሳው ደመላሽ ምግቦ ምንድስኒው ክንቲ ፋብሪኪው አችስ  አሜሬትስትጝዴስ ጄሜራማ፣ ምግብ አሼግስታማ ቴኬምስታንትካውሳ  ታምብምባ ኺስታ ዝኩኹሳ ካስቶ እሜው ያኹስ ግብርኒው ምርትዴስ አሜሬትስትኹ ምግብ ቴኬምስታንትካውሳ ፃንኩትስታ ዴክት ማንዲስታማ ዲግምባኺስታ ዝኩኽስ ካስቶ አቡቓው ክንቲው ዜርፍ አኽⶓ እርዳትፅካ::

አሼግስትኹ ምግብ አሜሬትስቱስ ፄኬስካ ዲብካስ ዋኽትጛማ ቴርስስትጝ አቤሌሽስታያሱ፣ ፃንኩት ዝኩኹስታ ዊዳፊ አኽጝ ፋይፃንቲ አኽⶓ ቶኬሙንኩ ባርዳር ዩንቨርስቲው ክንትፃንቲስታ ማራማርጛንቲ   እምፕልታቑ ቲንስ አስሜምጛው ምግብ ቴርስስቱስ ግብርኒው እንፅኺዳ ክችክቺስ  አሜሬትስቱኑዴስ ፋሌንጋ  ዎክትስ ኩፕናማ ጝንሾ ቱዌምባ ኺስታ ዝኩኹ ካስትዳ ትንካኪስ አሜሬትስትⶓ ፋያው አኽⶓ ኽይትጝፄካ::

እምፕልታቕ ግብርኒስ አሜሬትስታንኩ ፋብሪኪስ ኩፒ አክኽካ ያኻንኩ ምርትካ   አሜሬትስቱኒዴስ ፋሌንጋ ጌቤልዳ ኬሽኹሳ ዋይሜ ፍሻታ ንካማ ሊሊትጙንኩ ዲብካዋ ፄውጝዴስ ቴንኬክስትጝ ቱስታው አኽⶓ ቶኬምካ::

አሼግስቱንኩ ምግብካ እስታንኩ ፋብሪኪዳ ትንካኪስ አሜሬትስቱኑዴስ ፋሌንጋ ምግብ ፃንኩቶ ማንዱኹ ዳድስ ሊሊትጙንኩ ዲብካስ አሼግስቱንኩያኽ ኑንኩ ክንትፃንቲስታ ማራማርጛንቲ ቢረሳው  ምግብ ፋብሪኪዳ አሼግስቱስ ትንካኪስ አሼግስትጝ ፋይፃው አኽⶓ ድኹዌካ::

አሼግስትኹሳ ምግቦ ጄዋኒስ አሺግፂዳ ምግቡ ቴኪምስትጙ ጊዝ ፌይⶓስታ ፌያያሱ አኽⶓ፣ ምግብ ዋዳ አሜሬትስትኹ አኽⶓ፣ ምግብ እሚኩ ፄኬስካ ዲብካ እንዳርካ እንዳርካይ ናውሳ አሼግስትኹዴስ ግልፅስ አንቤብካማ እርዳትስትጝስ ጄውጝ ፋይፃው አኽⶓ እርዳትፅካ::

አሼግስትኹሳ ምግቦ ቴርሳንኩ ፋብሪክካ አሺግፂዳ ምግቡ ቴኬምስትጙሳ ጊዞ፣ ምግብ ዋዳ ቴርስስትⶓ፣ እንዳርካ እንዳርካ ፄኬስካ ዲብካዋ እሜ ናውሳ አሺግፂዳ ግልፅስ ቴኬምስታንትካ ካንታንታ እንኩርጝ ፋይፃው  አኽⶓ ቶኬምካ::

አሼግስትካማ ዋይስታንኩ ምግብካ እሊኩሊ አክኽካሊ አሌቔትጜካማ ዋይስትጝ ፋይፃቲው አኽⶓ ዙሙንኩ ቴቤቤርጛንቲ ፕሮፌሰር እምፕልታቕ አሼግስቱንኩሳ ምግብካዋ ጄዋኒስ ትንካኪስ ካንትካማ ጄዋቲንኩ ያኹኒጊ አሺግፂ ቔዱኽ፣ ቲኪምፂ ጊዝ ፌይኹ ምግብ  እምፕልታቑ ቲንዳ ኬፍቲኒ ጉዳቶ ታምፅጝስ ካላዉ አኽⶓ እርዳትፅካ::

አሼግስቱንኩ ምግብካ ፋብሪኪዴስ ፌካማ ምግቦ ቴኬምስታንትካውላስ ታምብምባ ኺስታ ሊሊትጙንኩ ምክኒያትካስ ችግር ታምባው አኽጝስ አይኪ አቒ አሼግስትኹሳ ምግቦ ጄውኒስ ትንካኪስ ካንትካማ አኽጝ ቱስታው አኽⶓ ጌሌፅካ::

ምግብ አቤሌሽስታውላስ ሊጊሲሜ ጊዞ እጄታ ሊሊትጙንኩ ዲብካዋ ቴኬምስትጝስ እጂፅጝስ ካሊስታው አኽⶓ ቶኬምካማ ምግቦ ቓቔፅጝስታ ካግስጝ ምግብ እጄታ ፄውጝስ ካሊፃው አኽⶓ ድኹዌካ::

ምግቦ ሊጊስሜ ጊዞ እጂፅጝስ ሽኩዋሮስታ አሼቦ ዴሜክጝስ ካሊስታው አኽⶓ ቶኬምካማ ምግብዳ ዴሜክስታው ጊዛይ ትንካኪስ ፄውስትጝ ቱስታው አኽⶓ ኩስጝፄካ::

ሊሊትጙንኩ ፄኬስካ ዲብካስ ቴርስስትኹሳ ምግቦ እምፕልታቕ ሜጌብስታኒ ቲንዌና አኽጝስ ካሊፃው አኽⶓ ሸውፅካ::

አሼግስትካማ ዋይስታንኩ ምግብካ አሜሬትስቱኑ ስፍሬ አቕስታቲኩ ሜሴልፅካማ ጝንዳ እንፃኽስትጝስ ጌቤልዳ ዲጋንኩ ምግብካ ጂውስ (ፄሜቕስትኹ ዝቒ) ፄጌራው ያኻማ ጂውስ ያኻያሱ፣ ጛርጌ ፄጌራው ያኻውጃማ ጛርጊ ያኻያሱስታ ፄጌርጛንኩ ዲብካዴስ እምፕልታቕ ትንካኬ ፄውጝ ቱስታው አኽⶓ ታክስፅካ:: አሜሬታንቲ አቕስታያስኩ ምግብካዋ እምፕልታቕ ትንካኪስ ካንትጝስ ጄውጝ ፋይፃው አኽⶓ እርዳትፅካ:: ምግቦ ቴኬምስታንትካ ዋሺኔኪ ምግቦ ጄዋኒስ ትንካኪስ አኽጝ ቱስታው አኽⶓ እንፅኼንቶ ፌያፌይጝፄካ::