ልኺትጛንቲ ዝኩዋኒያኽ እንፅኺ እንፃኽስስታው

ንግስቴ ተስፋ

ዲሞክራሴ ቴግባርስ ካንትፁንኩ አኽጝ ድኹስታያኩ  አሜሪካው ፕሬዝዳንት አብርሃም ሊንከን “ጉላሊው ዋይሚ ትይትዴስ ኽሴ፣ ጉላሊ ዴሜካ እዝቡዊያኽ” ናኒስ ጉላሊውሳ ፍሼስታ ትክሞ ጌሌፅካሺና::

ጉላሊ ዲሞክራሲው ጊሊፅፂ አኽⶓ ጉሽጝስ ዲሞክራሲ እዝቡ፣ እዝብስታ ምንግስት ቼሜትጝፃው ስልታኒው ጊሊፅፂ አኽⶓኪላ ወክትዳ አሳቦ ጌሌፅካ::

ኢፌድሪው እጋ ምንግስትዳ እንኩርስትኹስታ እን አጌራ ትክላሌ ጉላሌ አንኩዋ አሜት ቺፋ ካስጝፂ:: እንጚስኪላ 7ንቴ ትክላሌ ጉላሌ ካስጝፅጝስ እሳን ቤዴራ ቴርት ካስጙስ እጄማ ጉንቤት 24 ጌርክ 2018 ም/አ ጉሌላንትካ ፋያኑ ልኺትጛንቲ ፖለቲካው ፓርቲስ ድምፆ እይጝስ አሊዴ አግፃ::

ጉላሊኪላ ሰላምስ አሌድስታማ ትክላሊ ጉላሊው ዋይሚ አጌርታ ይፋስ አቕስቴምባ እዝብ ዲሞክራሲው ዳድስ ማንዲትጛማጊ አግስቴ:: 42 ልኺትጛንትካ ፖለቲካው ፓርትካኪላ ጉላሊው ካስትዳ ሰላማዌ ጉላሊውሳ ልቕልቕቴ ካስጝፃኒስ እጂካማ ዋይሚ ጌሌፅስትምባ ማንዲትጜካማጊያኽ:: እንጚሊ እምትጙኽስ ጉላሊስ ድምፆ እይጙ ወክትዳ ካንትስትኹ ሰላማዊ ጉላሊው ቴግባር ጉላሊዳስ ፋሌንጋኪላ ይስጝማ ሲፋታ አዴስ እንዳር ማንዲስቴ ናውሳ አሳቦ ታምብዌን አካልካዴስ ቻቤልናኽ::

ክንትፃንቲ አላምነህ ሰለሞን ጃዊ ወረዳዴስ እይኑ አሳብዳ ጉላሊውሳ አሊዴ ዋይሜ አቕፃው ስልታንዌና ጌሌፃውሳ ዋይሜ ፄጊስ ቻቤልጝ ፋይፃው አኽⶓ ጉሽካ:: ልኺትጛንትካ ፓርትካ ልኺትጛሺኑ አጌርስስታ እዝብስ ኬሻንቴ እንፅኼ እንፃኽስትጝስ አኽጝስ ጎላሊው ዋይሚዴስ ፋሌንጋኪላ አጌራው ልማትስ ይጋሪስ እንፃኽስትጝ ማንዲስታው አኽⶓ ዙሜካ::

ጉላሊው ዋይሚ ዋሺኒኪ ያኼስ ዋሺኒ ዋይሜ ፄጊስ ቻቤልጝስ ዲሞክራሲውሳ ባይሎ ሌጌፅጝስታ አጌራው ልማትስ ይጋሪስ እንፃኽስትጝ ቴኬማንቲ ጉዳይ አኽⶓ ዲብስካ:: ልኺትጛንትካ ፖለቲካው ፓርትካ አጌራስስታ እዝብስ ፍሽጝፄስታ አጌራውሳ ዴክቶ ቼሜትጝፄ ናውሳ አሳቦ ኻስካማ ዲጋሺንኩ አኽጝታጊ ግድስ ጉስጝኪ ያኻ ጉስስትጝ ዝኩኹ አኽጝስ ጉላሊዴስ ፋሌንጋኪላ አጌራስ ፊትጛሺኑሳ ታምቦ ሰላማዊ ዳድስ ይስጝፄካማ ሲፍፃንታ እዝቡ ፋይ አኽⶓ ቶኬምካ::

ልኺትጛንትካ ፖለቲካው ፓርትካ ጉላሊስ ልኺትጛኒስ አጌራስ ቴኬሜናኑሳ አሳቦ ዲግሳሺንኩ ያኻኑላ ይጉዋማ ያኻውላ ዝኩንኩዴስ ኬሻው ጎሌልስትጝ ማንዲስታው አኽⶓ ሼውንጝስ ናካኪላ አይጛስታ ሰላማዊ ዳድስ አጌራዋ አጌላጌላንታ ፋያንኩ አኽⶓ ክንትፃንቲ አላምነህ አሳቦ እይካ::

እሊው አውጚው አብንሊ እጂጜ ፄውኽ ጉዋንጉዊ ወረዳ ፂሪጊ ኬቤሊው ዝኩዋንቲ ክንትፃንቲ ያረጋል ታደለ 7ንቲ ትክላሌ ጉላሌ እንዴስ ቤዳራሱ ጉላሊዴስ ዲሞክራሲውስታ ሰላሙ ፋይ ቼሜትጛታ እዝብ ኩርፄንትሳ አሴቴፍጙኽ አኽⶓ ካንቴ እይካ::

7ንቲ ትክላሊ ጉላሊዳ ልኺትጛሺንኩ ፖለቲካው ፓርትካ አጌራዋ ፍንሾ ካይፅጝስስታ ዲሞክራሴስታ ሰላማዌ ስልታኑሳ ካይጜ ካስጝፅጝስ ፄውኑሳ ፅሬቶኪላ ጋሻንኩ አኽⶓ ቶኬምካ:: ጛኪላ ኬሻንቴ ፖሊሴ ኻሳማ ዲጋ ንካማ አምኑኑሳ ፓርቴ ጎሌልጝስ ድምፆ እይካማ ዋይሜ ማንዲትጜካማጊ አኽⶓ ጉሽካ:: ጛው ግምጋሚስ ልኺትጚስ ዲጋሺንኩ ፖለቲካ ፓርትካው ፖሊሲዴስ ሚንች አጌራስ ፋይፃውስታ አጌር አቑሳ ሰላሞስታ ዴክቶ ቼሜትጝፅጝስ ቢዲሪ እያው አሳብ ዲግⶓ ዙሜካ::

ፍንሾስኪላ ዋይሚ ጌሌፅስታኒ ዊፅኹ ፓርቲ ኬሻንቴ ፖሊሴጊ አሌቔትጝፃማ አጌርስ እንፃኽስትጝ ማንዲስታው አኽⶓ ክንትፃንቲ ያረጋል ዙሜካ:: ቻኪላ ናካ ልኺትጛሺንኩ ኬሻንቴ አሳቦ እሚንኩ አካልካዋ ስልታኖ እይጝስ ዲሞክራሴ ቼሜትጝፅጝ ይቶፒያስ ፋይፃው አኽⶓ ቶኬምካ::

እንዴስ ቤዳራ ኪሲው ምንግስት ጄሜርኹ ልኺትጛንትካዋ አሌቔትጝፃማ ስልታኖ ቤንጝፅጝስ አጌር አቑስታ አጌራው ትክምስ እንፃኽስስትጝ ዊፃንቲ ፓርቲዴስ ማንዲስታው ቴግባር አኽⶓ ክንትፃንቲ ያረጋል ቶኬምካ:: ዊፃንቲ ልኺትጜ ዊፃኽ ናማ ኩሪጝ ፋይፃላኪያኽ ኑንኩ ያረጋል እዝብስ ቱኑውሳ ካሎስታ ቻቤሉኑውሳ አዴሮ ቱስቲስ ፊትጝጝ ዊፃንቲ ፓርቲዴስ እዝብ ማንዳው ቴግባርያኽ ናኒስ አሳቦ እይካ::

ዊዛሩ አስናከች ዘላለም ብሄረሰቡ ቺፅጝፂዴስ ብልፅግኔ ፓርቴ ዎኬልካማ ክልሉ ኩስጚ ጝናስ ልኺትጜካ:: 7ንቲ ትክላሊ ጉላሊኪላ ዲሞክራሲስታ ሰላምስ አሌድስትጝ ይቶፒያውሳ ልግስኔ ካንትፅኹያኽ ንካ:: ጛ ልኺትጛኑ ዙራሙሪዳ ላጜታ ፖለቲካው ፓርትካ ጛውሳ አሳቦ ዲግስካማ ልኺትጜ ሰላምስ አሌድⶓ ጉሽካ::

ዊዛሩ አስናከች እይኑ ካንቲዳ ዋሺኒኪ ፓርቴ ወኬላማ ልኺትጛሺኹ አቒው ፋይ ይቶፒያስ ፋይፃውሳ ሰላሞ ፣ ልማቶ፣ ዲፕሎማሲውሳ ልቕልቕቴ ኬሻንታ ፄዋማ ጉስጝስ አኽጝታጊ እዝብ እይኹ ጉላሊው ድምፁ ዋይሚስኪላ ዳኚስትጝ ግዲያኽ ንካ:: እዝብ ጉላሊው ወክትዳ ሰላምስ ጉላሊውሳ ድምፆ እይኹስታጊ ልኺትጛንትካ ፖለቲካው ፓርትካ ዴሜካ ድምፆ ፄጊስ ቻቤልካማ ዲሞክራሴ ቼሜትጝፅጝስ ቴርትⶓ ዊዛሩ አስናከች ቶኬምካ:: ዊፃንቲኪ ያኻ ዊፅስታንቲ እዝብሊ እሚኹሳ ውሎ ፊፄምጝስ ሰላማዌ ዲሞክራሲውሳ ቡንካዋ ቴግባርስ ካንትፅጝ ማንዲስታው አኽⶓ ጉሽካ::

7ንቲ ትክላሊ ጉላሊዳ ብሄረሰቡ ቺፅጝፂ ኮሰበር ጉላሊው ጉትፕዳ ኢዜማ ዌኬልካማ ልኺትጛሺንኩ አቶ ካሳሁን ንጋቱ እዩኑ ጊሊፂዳ ስልታኖ እሚኹ አቒ ኹሉቺፋ ጚጛርትጛሳ ሼጌኽ፣ እንፃኽስታታጊያኽ ንጝ ይጎዋቲው አኽጝስ ልኺትጛንትካ ፖለቲካው ፓርትካ ዴሜካ አጌራዋ ጉሳንቲ ፓርቲዳ ዝኩኹሳ ዳንጉኔ ካንትፅጝስስታ ኬሻንቴ አሳቦስታ ፖሊሴ ኻሳማ ዲግጝስ ካሊፃው እጉ እንፃኽስትጚ ይቶፒያዳ ቴግባርዳ እሼማጊ አኽⶓ 7ንቴ ትክላሌ ጉላሌ ካንትፂታ ጉሽካ::

አቶ ካሳሁን ናኒውስታጊ ክልልዳ ዝኩኹ ሰላሙ ችግር ስጋታ ያኹኒውላ እዝብ ፋያውሳ ጎላሊውሳ ፖሊሴ አቕትጝፅጝዳ እንፃኽስቱኑ እንፅኺስ እዝብ ፋያው ፓርቲስ ድምፆ እይጝስ ካላው እድል እሺⶓ ታክስካ:: ጉላሊዴስ ፋሌንጋ ዝኩኹ ሰላማዊ ልቕልቕቲኪላ ልኺትጛንትካ ፖለቲካኩ ፓርትካ ሼውታ ልቕልቕንካማ እዝብሊ ታምትጛኑ እድል እሳን አኽⶓ ቶኬምካ:: እዝብ እይኹሳ ጉላሊውሳ ዋይሜ ጉሽፂታ ቴኬምስትካማ አጌራስ ኬሻንቴ እንፃኽስትጝስ እክዶ እሚⶓ ጌሌፅካ:: ሰላምስስታ ዲሞክራሲስ ጉላሊ ካስጙኽስታጊ ጉላሊው ቦርድ አቕፃውሳ ጉላሊውሳ ዋይሜኪላ ሰላምስ ቻቤልጝስ እዝቡሳ አዴሮ ፊትጝጝስ ቴርትⶓ ጉሽካ::

ጉላሊስ ስልታኖ እሚጝስ ዊፃው ዋሺኒኪ ፓርቲ ሰላሙሳ ዳዶ ቢዲሪዳ ሲፍጝ ፋይፃው አኽⶓ ዲብስካ:: ዊፃንቲ ፓርቲ ዊፅስታንትካ ፓርትካዴስ አሳብስኪ ያኻ ካሌቕትስ ኬሻንትካ ያኹንኩ ልኺትጛንትካ አካልካዋ ስልታኖ እይጝስ አጌርስ ውሌቴ እሽጝስ እዝቡሳ ፋዮ ዋኽትጝፅጝስ አላፍቶ እይጝ ማንዲስታው አኽⶓ ካንቴ ታምፅካ:: ልኺትጛንትካ ፓርትካ ዲግሳሺኑሳ ሜኒፌስቶዋኪላ ጉሽፂታ ካፅጝስ እዝብስስታ አጌርስ ቴኬማውሳ ጎሌላማ እክዱ አካላ ፄውጝስ እዝቡ ትክምስ እንፃኽስትጝ ዊፃንቲ ፓርቲዴስ ማንዲስታው አኽⶓ ቶኬምካ::

አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ብሄረሰቡ ቺፅጝፂዳ ሰላሙ ችግር ጉላሊ ካስጛቲታ ፅንጋኻ አኻቲታ ቤዳራማ እንፃኽስስቱኽ ቴግባርስ 7ንቲ ትክላሊ ጉላሊ ሰላምስ አሌድስትⶓ አቕፄካ:: እዝብኪላ ዲሞክራሲስታ ሰላምስ ቢዲሬ እይጝስ ፊትጙኽ ታምብስ ምስጋኔ ዲግስካ::

እዝብስታ ልኺትጛንትካ ፖለቲካው ፓርትካ ሰላማዊ ፖለቲካው ቡንካስ ካንትፁኑሳ ኩርፄንቶ ጉላሊው ዋይሚ ጌሌፅስታኒኪላ ሲፍፃንታ ቹዋ ቺፅጝፃንቲ ታክስፅካ:: ምንግስት እይስትኹሳ አላፍቶ ፊትጝጝስኪላ ጉላሊ ዲሞክራሲያዊ፣ ፍታዊ፣ አሴቴፍጝፁኽስታ ኔፃ ያኻማ አሌድስታታ ትኩትስ እንፃኽስስትⶓ ጉሽካ:: ጉላሊ ካስጛቲታ አጌር አቕ ሜብቶ ቴኬምስታቲንታ፣ እዝቡ ድምፅስ ጎሌልስትኹ ምንግስት ቲሪትጛቲታ ችግሮ ፌቴርⶓ ፋያንኩ አይልካ ስጋቶ ፌቴሩኒውላ እዝቡ ጄግንትስስታ ፄትቲው አይልካው ኩርፄንትስ እዝቡሳ ፋዮ ሳኪትጝፅጝስ ካሊስትⶓ ቼሜትጝፄካ:: ጉላሊው ዋይሚ ጌሌፅስቱኒዴስ ፋሌንጋኪላ ስላማዌ ፖለቲካውሳ ቡንካዋ ልኺትጛንትካ ፖለቲካው ፓርትካስታ ጉላሊስ ድምፆ እይኹ እዝብ ይስጝፃማ ሲፍፃታ እንፅኼንቶ ፌይጝፄካ::