ቹኒትጝጜ ፋያዉ ጉዳይ

እን አጌራ ይቶፒያ አሳቡ ሊሊት ምክንያታስ ትይኹሳ ኪፊፃንቴ ጋቻዋ ካንትናኒ አጌርታ ታምብኹ አቕቱ፣ አክኺዉ ፣ሼዉ ፅንታዉስታ ማቤራዊዉ ክሳሪ ማልጜ ሚንቺያኽ:: አጌራዉ ኩስጝጚዉ አሊዲ ታምብኪላ አቒጄራሳ ክሪዴስ ይጉፃማ ቱትጚዳ ታምብጚያኽ::

አጌራዊ ኩስጝጚ አጌር አቕ ቹኒትጛኒስ አምንጝጜ አዴሳና፣ አጌር አቕ ዙሚትጛኒስ ሰላሞ ጌምፃና እንኪላ አጌር አቕ አጌራዳ ዝኩዋዉሳ ጜዋንቱሳ ታክስጜ አድርፄ ናዉ ታክስጚስ ፈቴርስትኹ ዲሞክራሲያዊ ካስጚ አኽጝ ዜኔግስትጝ ቱስታላኪ::

አጌራዊ ኩስጝጚ አጌር አቕ አጌራዉ ሰላም፣ ፍትስታ እምፕልትዳ ክችክቻ ታምብስታዳ ጜዋንት ዝኩክ አኸⶓ አቕፅጝያኽ:: አኽጝስኪላ ካስጚዳ ፍልቓንኩ ኽዩ አሳብካ ጃሊኒ አካልዴስ ይንታንኩ ያኻዉላ አጌር አቕስ አድርትኹ ኩስጝጚስስታ ቱትጚዳ ስርትካማኽ::

ይቶፒያዳ ካስጛማጊ ዝኩኽ አጌራዊ ኩስጝጚዉ ኮሚሽን ካስጝፃዉ እምፕልታቑ  ኩስጝጚ አጌራዳ ፌቴርስታዉሳ ሰላም አቲጛሳ ይጉፅጝስ ኬፍ ንኹ ፍሺ ዝኩኽያኽ እስታማ አምንስቴ::

ይቶፒያዉ ኩስጚ ኮሚሽኑ ንባርታጊ አጌራዊ ኩስጚስ ፌዩንኩ አጌርካዉ ዴስ ክንትፃዉ ካስጚ አሌምስትኹሳ  ግቦ ሳኪትጝፃቲታ ፄዋንኩ ዴስካዴስ ቶኬምስታንቲ ምክንያቲ እምፕል ታምብ ዌንካ አካልካዉ ቴሳትፉ ዜሬቕ ንጝስታ ኩስጚስ አሜቻዉ አኺኒ ፌቴርስታዉላ ይጉጝያኽ::

እን አጌራዊ ኩስጝጚዉ ኮሚሽንኪላ ላንቡሳኺስታ ዉላጊ አጌራዉ ቤንካዳ እንቲታኪ ዲያስፖራዴስጊ  ትኩታኩ ቤንካዋ ኩችፅጝስ አጀንዴ ኩችፅጝስ አቕስቴ::

እን ካስጙኽ ኩስጝጚ ዴሜካ ፌቴርስታዉሳ ሰላሙሳ ዳንጉዊኔ ይጉፅጝስ ካሊፃዉ አኽጞኪላ አግስትኹ ዋይሚ ካንትፃ አኽⶓ ኩስጝጚ ኮሚሽኑ ንባር ቶኬማ:: እን ኩስጝጚኪላ አጌር አቩቑ አችስ ካስጛማ አጌራ ሰላማ ታኻታ ፄዉጝ ዉላዉጊ ታምብ አኽጝ ቱስቴ ::

ጝሽሱ ጊዝዳኪላ ኮሚሽን አጀንዴ ኩችፅጙሳ ኩስጝጚዉሳ ፋንቲቴ አሌዳማ አጌራዊ ኩስጝጚዉ ጉባይሾ እንዝጚዳ አግስቴ::

ዉላ አጌራዉ ቤንዳ ሊሊትጙንኩ ካስካ ዝኩና ናንኩ ቤንካዉ ምክንያታስ አጌራዉ ሰላም ድሳቲታ ፄዉጝስኪላ እን ጄሜርስትኹ እንፅኺ ኽሳንቲ ኸይ አኽጞ ማላማ ካሊስታዉ አክምስጊ ጎንዳ አኽጝስ ፌቴርስታዉ ችግር  አሊዴኺስታ ኸዮ አግፃታ ፄዉጝ ዉላዉጊ አላፍትያኽ::

አጌራዉ ሰላም ዙርጝስ ካላዉ ታፍዳ ዝኩኽ ኽይኪላ አጌር አቩቑ አችስ ካስጛዉ አጌራዊ ኩስጝጚስ ይቢቺስያኽ:: እንዳ አምሊ 8/2018 ም/አ ጄሜርስታዉ አጌራዊ ኩስጝጚዳ ዴሜካ አሴቴፍጝናኻ ታምብዌን አካልካጊ  ኒኩኽሳ ቴሳትፎ ፄዉጝ ቱስቴ::