ኽብፂኪላ ቲኖ ፋዬ

ኽብፂ አሲድስ ፂኪስትጝ ምርትዳ ኬፍቲኔ ጉዳቶስታ ቑንዚስ ፂኪስትⶓ ሲፍፄ:: አሌሙ እርሺው አችቱ ንቫር ቶኬማውስታጊ አሌም አቡቑ አችስ ሴዛ ቢሊዮን ሄክታር ያኻው ብቲው ኽብፂ አሲድ ፂኪስትኹያኽ:: እንጚኪላ ሊኽዴስ 30 ዴስ 40 ታፋ ያኻው ብቲ እርሺው እንፅኺስ አኽጝስ ካላውሳ ሜቴኖ እሚ::

እን አጌራዳኪላ ችግር ባስጛማጊ ካስⶓ ይቶፒያው ግብርኒ ሚኒስቴሩ ንቫር እርዳትፄ:: ችግር እሳንጛማጊ ካስኹ ዴሜካ ኬፍቲኔ ምርቶ አሜሬታንኩ ዙራሙርካዳ አኽጝ ምርት ኔኬታታ ምክንያታ ያኻማጊያኽ::

አዊ ብሄረሰቡ ቺፅጝፂዳ አግስታንኩ ወረድካዴስ ጃዊ ወረዳዴስ ይጎ እሊኩ ወረድካው ዙራሙርካዳ አግስታው ብቲ አሲድስ ፂኪስቱኽ አኽⶓ ግብርኒው ሜምሪዴስ አግፅንኹ ንቫር ቶኬሜ::

ባንጂ ወረዳ ኪፂቺውሲ ኬቤሊው ዝኩዋንታ ዊዛሩ ወርኬ ቢተው ዙሙኑውስታጊ አግስታኑ ዙራሙሪ ዴሬኽ አይር አግልታስ አዴልስትኹስታ እሪ አግሌልጛንቲው አኽጝታጊ ችኽዴስ ሳኖ አሜሬታኑ ሴብል ዝኩኽ አኽⶓ ድኹዌካ::

ንጙዊኒ ችኹ ወክትስኪላ ቤዴርካማ ችኹ እሪስ አሜሬትስታውሳ ዱኒዜ ሜጋቢትዳ ዜሬካማ ናኪኒ ወክትስ ዴሜካ ታፌስታ ስንዳዮ ዜራኑሳ ማሴ ቴርሴካማጊያኽ:: ሊሊትጙኽሳ ኽብፂውሳ አሉምቶ ዙርፃውሳስታ ምርቶ ዴሜካውሳ ግባቶ ቴኬምስትካማ ሊጊሲሚ አሜትስ ኬሻንቴ ምርቶ አግፅጝስኪላ ፅሬቶ ፄዌካማጊ አኽⶓ ድኹዌካ::

ዊዛሩ ወርኬ ናኑውስታጊ ፅካ አሜታዴስ ቤዴራ ጉሽፃማ ኩፅኒ ብቲ ኽብፂው አሲድስ ፂኪስታማ አግፃኑ ምርት ኔኬታማጊ አኽⶓ ጉሽካ:: ብቲ ሼጌታማ ሞሌግጝዴስ ይጎ ሴብሎኪ ያኻ ክምካስ ያኻውሳ ክራሬ ዋግፃላ ናማ ቼጌርስታሺኑ ዎክት እሺⶓ ታክስካ:: ችግሮ ኽይጝስ ኩፅኒ ውማይቴንካው ኩስጚስ ኽብፄ ማራማርፅጝስ ካሊⶓ ጉሽካ::

ብቲ አሲድስ ጉዲስትጝስ ምርቶ አሜሬትጝስ ቼጌርስትካሺኑሳ ችግሮ ኽይጝስ ካላውሳ ቴግባሮ አኮሜቻንታ ውማይቴንካ ኩስጝፅⶓ ድኹዌካ:: ላጛ ኩፃ ብቲዳ ላይሞ አኹኪ ኖራዋስታ ኮንፖስቶ ቱስቲስ ቴኬምስትጝስ ኽብፂው አሉምት ዙራታ ፄውጝስ ካሊⶓ እንክርፄካ:: ምርትኪላ እፅፍስ ዴሜክⶓ ጉሽካ:: ኖራው ዲግስጚኪላ ይስጛማ ሲፍታ አሳቦ ዲግስካ::

ኪፂ ቺውሲ ኬቤሊው አሬሳቻንቲ አለሙ ምስክርኪላ ጛ ፃዩኑ እርሺው ብቲዴስ ላጛ ሄክታራ ያኻው ብቲ አሲድስ ጉዲስታማ አሉምት ችንችጙስትጝስ አግፃኑ ምርት እሌቱ ኬሌብሱላ አኻላ ናማ ቼጌርስታሺንኩ አኽⶓ ዙሜካ:: 201ዐ ምሬት አሜታዴስ ጉሽፃማ ኩፅኒ ኽብፂውሳ ናሙኔ ማራማርፅካማ ውማይቴንካው ኩስጚው ጉሽፂስ ኖራዋ ቴኬምስትጝስ ብቴ አኬምካማ ኬሻንቴ ምርቶ አግፅጝስ ካሌካ:: እምፕል ኩፅ ብቲዴስ ሴዛ ኩንታላዴስ ጃላ አግፅጝስ ካላንታ ቢኪፃ::

አሬሳቻንቲ አለሙ ናኑውስታጊ ኽብፂው አሲድትጙ ችግር ብቲ ምርቶ እያቲት ፄዋሺኹ አችዳ ታምባሺኹ አኽⶓ ዙሜካ:: ኖራስ አኬሙኒዴስ ፋሌንጋ ኩፅኒ ምርቶ ካቢትጝፄካማ አሜሬትጝስ ካሌካ:: ላይምስ አኹኪ ኖራስ አኬምስትኹ ብቲ ላጛ አሜታስስታ እንዴስ ጃላ ምርቶ እይጝስ ዝኩዊኔ ኬሽጝፅጝስ ካሊፁክ አኽⶓ ዴስቲስ ዲብስካ::

“አሲድስ ጉዲስትኹ ብቲ ሴብሎ ዋግፃላ፤ ምርቶ እያላ ንጝዴስ ጃላ እንሴስካስ ያኻውሳ ክዮላ ዋግፃላ እሺኾ” ናንኩ አሬሳቻንቲ አለሙ አሬሳቻንትካ አሲድስ ታራታርስታውሳ ብቴ ኽብፂውሳ ናሙኔ ማራማርፅጝስ ችግሮ ማላማ ኽዮ አግፅጝስ ካላኑሳ ሴሎ ቴኬምስትጝ ቱስታው አኽⶓ ጉሽካ::

ኔፃስ ካፅካማ ቴኬምስትካማ ኖራዋ ጄሜሩንኩ ያኹኒውላ ናካዳ ጄዌካማጊ ቴኬምስታኒስ እጂካ:: ንጙዊኒ ዎክትዳ ኩፅኒ ፅካ ኩንታላ ኖራዋ ፋዩኒላ ላምቡሳ ኺስታ ኩፅኒ ዲጋያሱ አኽⶓ ቶኬምካ:: ትኩታው ቤንኪላ ወክትስ ዲግሳታ ካሲካ::

ኪፂ ቺውሲ ኬቤሊው ግብርኒ ፅፌት ጝናሱ አላፊ ከፋለ ሞሴ ኬቤሊታጊ አሜቶ ዋኾ እሪ ድሳቲው ዙራሙሪ አኽጝሊ እምትጛማስታ ዝቤንካስ እርሺስ እሺኹ ብቲ አኽጝታጊ አሉምት ችንችጙስታማ አግስታው ምርት ዴሜካ ኔኬታማጊ ካስⶓ ጉሽካ::

ኬቤሊታ እርሺስ ያኻው 540 ሄክታር ብቲዴስ ሊኽዴስ 45 ታፋ አሲድስ ጉዲስትኹ ብቲ አኽⶓ ምርማሪስ ቼሜትጝⶓ ጌሌፅካ::

እሳ ዜጌቤ ቴርስንኹሳ ዎክቶ ኺስታ ሌኽዴስ 35 ታፋ ኽብፂው አኺኒ ማራማርስታማ አሲድስ ፂኪስትኹሳ ብቴ አኬምጝስ ኖራዋ ቴኬምስትⶓ አቕፄካ:: አሜትዴስ አሜቶ ኔኬታማጊ ካስኹሳ ኽብፂውሳ አሉምቶ ዙርፅጝስኪላ ኮንፖስቶ፣ ክሴሎ ኬሴልፃኑሳ ኽብፄስታ ኖራዋ ቴኬምስትጝስ ዜርስትኹ ሴብልካዴስ ኬሻንቴ ምርቶ አግፅጝስ እንፃኽስስታማጊ አኽⶓ አቕፄካ::

አቶ ከፋአለ እዩኑ አሳብዳ ኬቤሊታ ሹኻ ሊኻ ኩንታልዴስ ጃላ ኖራ ዲጋያታ ወረዳስ አቕፄካማ ላምቡሳኺስታ ዲጋያሱ አኽⶓ ጉሽካ:: ባንጂ ወረዳ ግብርኒ ፅፌት ጝናዳ ኽብፂው አሉምቱ ውማይቴና ዊዛሩ ቤተልሄም ገነት ባንጂ ወረዳታ አግስታንኩ ዙራሙርካዳ ኽብፂውሳ አሉምቶ ዙርፅጝስ አሲድስ ፂክስትኹሳ ብቴ ማራማርፅጝስ ኖራዋ ቴኬምስታንታ አሬሳቻንትካስ ሼውቴ ፌቴርጝስ ኪሴ ሜዜጌብፅካማጊ አኽⶓ ጌሌፅካ::

ወረዳታ 2018/2019 ምርቱ ዝቤንዳ 7 ሻይ 512 ሄክታር ብቲ ሴብልስ ሾፌንስታውዴስ 1ሻይ 400ዴስ ጃላ ኽብፂው ናሙኒ ምርማሪስ ዲጋማ ላምቡሳኺስታ 73 ሄክታር ብቲ አሲድስ ፂኪስትኹ አኽⶓ ቶኬምካ:: እን ንጝ ዴሜካ አሜት ቺፋ ኽብፂው አሉምቱ ሜቴን ኔኬታማጊ አኽጝስ ሚንቾ እንፃኽስስትጝ ማንዲስታው አኽⶓ አቕፄካ::

ወረዳታ አሬሳቻንትካ ፋያኑ ኖራው ዲግስጚኪላ ፌይንኩ አሜትካዳ ክርፂ ፊፂምጚ እሺኹ ያኹኒውላ 2018/2019 ምርቱ ዝቤንዳ ኩፅኒ ዳማኪ ዲጋያሱ አኽⶓ ጌሌፅካ:: ትኩታው ቤንኪላ ወክትስ ዲግሳታ አሳቦ ዲግስካ::

አዊ ብሄረሰቡ ቺፅጝፂ ግብርኒው ሜምሪዳ ፍትሬት አብት ማንዲጛው ልማቱ ቴቬቬርጝፃንቲ አቶ ነጋ መከተ ጛሾስ ብሄረሰቡ ቺፅጝፂታ አግስታንኩ ወረዳካዴስ ጃዊ ወረዳዴስ ይጎ እሊኩ ወረድካዳ አግስታው እርሺስ ያኻው ብቲ አሲድስ ጉዲስታማ ምርት ኔኬታማጊ አኽⶓ ጌሌፅካ:: ችግሮ ኽይጝስ ኩፅኒ ትኩትስ እንፃኽስስታማጊ አኽⶓ ቶኬምካ::

ቴቬቬርጝፃንቲ ጌሌፁኒውስታጊ 1ሻይ 800 ሄክታር ብቲዴስ ኽብፂው ናሙኒ ካፅስታማ 10 ሻይ 500 ያኻው ማራማርስታማ ኽብፂው አሲድስ ፂኪስትኹ አኽጝ ቼሜትጝⶓ ጉሽካ:: ችግሮ ኽይጝስስታ ጉዳቶ ኔኬትጝስ እሳን ቴግባር አኮሜችስታማጊ አኽⶓ ጌሌፅካ::

ብሄረሰቡ ቺፅጝፂታጊ 14 ሻይ ኩንታልዴስ ጃላ ኖራዋ ዲግስጝስ እክድ እምስታማ እርዳታንቲ አችቱ ምክንያቲስ እክድስ እምስትኹጊ ዲጋማ አዮ ጉዋጉሲ፣ ፋግቲ ለኮማ፣ ጉዋጉሲ ሽኩዳድስታ ዳንግሊ ወረዳዳ አሬሳቻንትካስ እይስታታ ፄውስትⶓ አቶ ነጋ አቕፄካ:: ላምቡሳኺስታኪላ 6ሻይ ኩንታልዴስ ጃላ አሬሳቻንትካ ትክምዳ እሽፅⶓ ቶኬምካ::

ፌዩንኩ አሜትካዳ ኖራው ዲግስጚ ኬሻንቴ እሺⶓስታ 2018/2019 ምርቱ ዝቤንዳ ኩፅኒ ዲግስጚው እንፂጝ ዝኩኽ አኽጝስ ፋይስታው ሜቴንስ ታምብስታንታ ፄውጝስ ቼጌርስትⶓ ጌሌፅካ:: ኖራዋ እርሺው ዎክትዳ እሪስታ ሶኼንቱ ሜቴን ሚንቻውላ ቱስታው ሴልስ ቴኬምስትጝ ኩስጝስታው አኽⶓ ታክስፅካ::

ብሄረስብ ቺፅጝፂታ ኖራዋ ዲግስጚው ሜቴን እንፂጝ ዝኩኽ ያኹኒውላ ኽብፂውሳ አሉምቶ ዴሜክጝስ ካላውሳ ሴሎ አኮሜችጝ ፋይፃው አኽⶓ ኩስጝፄካ:: ክልሉ ግብርኒው ቢሩኪላ ካሴ ዎክትስ ዙርፃታ ፅሬቶ ፄዌካማጊ ዙርሜ ማንዲትጛንኩ አኽⶓ ቶኬምካ::

ንግስቴ ተስፋ