ግብሮ ኬይጝ ኽሳንቴ አላፍቶ ፊትጝጝ አኽጝ ጌሌፅስትኾ

አጌር አቕ ጊፅሴካማ፣ ጝኖስታ ንብሬቶ ክራይፄካማ፣ አሬሴካማስታ፣ ካሌቕቶ ዋይካማኪ ያኻ ቴኬምስትካማ አግፃኑ ሚፂዴስ እግ ፌኬዳው ዳድስ ግብሮ ኬይጝ ግዴቲያኽ እስትኾ::

ምንግስትኪላ ግብሮ ኬያንትካዋ ክሬቴ ፌቴራቲው አግልግሎቴ እይጚው ሴልስ ግብሮ ኬይፅጝ፣ ኩፕኑኽ ሚፂስ ዴሜካ ፋይፃውሳ ስሩሳ ልማቶ ዋኽትጝፅጝ ማንዲስታዊያኽ::

“ይጉዋቲውሳ ጊዛያስ ሲፋን” እስታው ታሪካዊ ዙሚትጚታጊ አቒ ዝኩዊኒዳ ወክትስ ፋይፃውሳ ጉዳዮ አኮሜችጝ ፋይፃንቲ አኽጝዴስ ጃላ ይጉዋቲውሳ እዶ ኬይጝ ዴሜካ ኽሳንቴ አላፍቶ ፊትጝጝ አኽⶓ ካንትፃዊያኽ::

ግብር ንጝ ዋታ ንጚይ? ናው ካሲስኪላ ዙርሚ ምንግስት እግስታ ዴምብዳ ጉሽፃ ፄዋማ እዝብዴስስታ አችትካዴስ ጌንዜቦ ኩፕፃው ሴሊያኽ::

እሊውስ ዴሜካ ምንግስት ኩፕንኽ ግብርስ እምፕልታቕስ ሊሊቶ ፌቴራውላ እይስታው አግልግሎትስስታ ስሩሳ ልማቶ እሳንጝፅጝስ እሽፃው ጌንዜቤያኽ::

ግብር ጛርት አቑ እሌት ቺፋሱ ልቕልቕቲሊ አጉሌልጛቲው አኽጝስ እያው ትክምኪላ እንዙራ እስታቲዊያኽ:: እኒጛዴስ ልቓዋ ካንትኑኒ አጌር አቑ ክችዳ ፍታዊ አብቱው ቢንጚ ዝኩዋታ ፄውጝስ፣ ክንቲ ጝናሳ፣ ሆስፒታሎ፣ ኤሌክትሪክ አይሉሳ ዲግስጜ እሳንጝፅጝስ፣ ባይሉ ልግስስ፣ አጌራውሳ ዴክቶ ማንዲፅጝስ፣አጌር አቑሳ ዴክቶስታ ሰላሞ ማንዲፅጝስስታ ፄጌርጙንኩ ጉዳይካዋ አኮሜችጝስ እሼው ባጄቱ ጉሽፃ ያኻማ አጌላጌሌ::

ግብሮ ኬይጝ አጌራው ልግሱስታ አጌር አቕቱ ክብሩ ጊሊፅፂያኽ::

ቻግኒ ኬቴሙ ቺፅጝፂዳ አሪው ጊፅዳ ፍካዶ ፍሽካማ ጊፅስጝዳ አሴሜርጙንኩ አቶ አለማየሁ ገብረህይወት አውጚው ቴርት ቤናው እጎ ትኾሉ ቴርትዳ ስልኪስ እይኑ አሳብዳ ግብሮ ኬይጝ አጌር አቕቱ ግዴቲ አኽጞ እርዳትስትካማ ወክትስስታ ክችክቺስ ጌቤራንኩ ጌፄንዴስ ቶኬምስታና:: አጌራዋ እንካናውስታ ሌጌስታታ ፋያው ግብሮ ኬይጙ ግዴቲ ዝኩኽ አቒጊ ግብር ቤፍፃውላ ሜሜሬ ጉሽፃ ፄዋማ ኬይጝ ፋይፄ ንካማኪላ አምናና::

አጌራውሳ እንካኖ ጌሌፅጝስ ካሊስታው ግዴቴ ፊትጛኒያኽ::

12 አሜታስ ጊፂኒው ኮሚቴ ያኼካማ እንፃኽስትⶓ ጉሹንኩ አቶ አለማየሁ ግብር ወክትስስታ ክችክቺስ ኬይስታታ ታምቦ ፊትጛሺንኩ አኽⶓ ቶኬምካ:: ፍታዊስታ አግስታውሳ እንፅኺውሳ ፊቴ ጉሽፃ ፄውኽ ግብር ኬይስታታ ፌይንኩ አሜትካዳ እሺኹ ልቕልቕቲኪላ ክርፂ አኽⶓ ታክስፅካ::

አቶ አለማየሁ ናኑውስታጊ ንጙዊኒ ግብሮ ድርብጙ ሴል ኩፅኒ ኬፍቲኒስታ እንፃኽስታኑ እንፅኺሊ ሜቴቴንጛቲው አኽⶓ ጉሽካ:: ኬያንታ ዋሴንስትኹ ግብርኪላ ሜቴንዴስ ጃላ አኽጝስ ክሬቴ ፌቴሩክ አኽⶓ ዙሜካ:: ጌርክ ቺፋ አግፃኑሳ ሚፄኪላ ፂኒሳያሱስታ አክምዴስ ጃላ ያኹኺያኽ ንካ::

አኽጝስኪ ትኩታው ቤን ዲግኹሳ ክሬቴ ካንታማ ፂኒስጝስ ኽዮ ፋያታ ካሴ ዲግስካ::

ዊዛሩ ይፍቱስራ ትላሁን ኪላ ቻግኒ ኬቴምዳ ሆቴሎ ብስካማ ጊፁ እንፅኺዳ እታጆውሻንኩዴስ ቶኬምስታንኩዊያኽ:: ፌይንኩ አሜትካዳ ጊፁ እንፅኺስ ፃሬጋሬካማ አግፃኑ እሌቱ ሚፂዴስ ግብሮ ኬይጝስ አጌራዌ ግዴቴ ፊትጜካ:: ግብሮ ኬያኑኪላ ግብሮ ኬይፃንትካ ውማይቴን እንፅኺውሳ ልቕልቕቴ ሜሜሬ ጉሽፃ ፄዌካማ ፂኒስጝስ ድርባኑሳ ፍታዌ ግብር አኽⶓ ድኹዌካ::

ፌይንኩ አሜትካዳ ሆቴል ጝና አኽጝታጊ ኩርሱ፣ ምሳኹ አኹኪ እርባቱ ሳትዳ ዝኩኽሳ እፅኺውሳ ልቕልቕቴ ውማይቴን እንጅኩዋ ካንትካማ ሜቴቴንጙኽሳ ግብር ኬታታ ወሴናኒ ኬያሺኑ ወክት እሺⶓ ዊዛሩ ይፍቱስራ ዲብስካ:: እን ያኼስጉ ናንኩ ዊዛሩ ይፍቱስራ 2018 ባጄት አሜትዳ ኩፅኒ አክምዴስ ጃላ ግብሮ ኬያንታ ኬፍቲኒ ግብሩ ሜቴን ድኹስትⶓ ጉሽካ:: ግብሩ ሜቴን ጛውሳ እንፅኼ ክችክቺስ ፂኒሳያሱስታ ቴስፌ አቲሳው አኽⶓ ቶኬምካ::

“ግብር ሚንቻኒ አቒ አጌሮ ባይፃማ ሴዴድስትጞ ቓሊቴ” ናኒስ ዝኩኹሳ ቻኒስቶስታ ክሬቴ ጉሻንኩ ዊዛሩ ይፍቱስራ፣ ናካዳ ግብሩሳ ኪንዴ ኬዬካማ ኬታን እስቱኑ ግብር ካብስ ካንትስታታስታ ክቼታ ግብሩሳ ክሬቴ ሚፅካማ ዙርሜ ማንዲትጜካማጊ አግስታና::

ፌዴራሉ ሚፂው አግልግሎቱ ኬቹ ቴቬቬርጝፃንቲ አቶ አሰፊ ለምነው በኩር ጋዚቲስ እይኑ ኽይትጝፂዳ ዋሺኒኪ ሚፄ አግፃው አቒ ክልሉ ሚፂው ግብሩስታ ታክሱ

ቺፅጝፂው አዋጅ ስሬትስ ግብሮ ኬይጝ ግዴቲ አኽⶓ ጉሽካ::

እግዳ ዝርዝርስ እንኩርስቱኽ ስሬትስ ሚፂው ሚኒስቴር እያው ታክሱ ውሳኒዳ ክሬቲ ዝኩኽ ግብሮ ኬያንቲ ግብሩ ውሳኒ እይስትኹ 21 ጌርካኻዳ ክሬቴ ዲግስጝስ ካላው አኽⶓ ፌዴራሉ ታክሱ ቺፅጝፂው አዋጅ ቼፍ 983/2008 ቱንዚ 54 ዴንጌግስታ::

ክሬቴ ዲግሳንቲ ክሬቴ ካንታንቲ እያው ውሳኒዳ አስሜምጛውላ ይጉኒ ዴሜካ 30 ጌርካኻዳ ፌዴራሉ ታክሱ ይግባኙ ኮሚሽንስ ይግባኞ ዲግስጝስ ካላው አኽⶓ አቶ አሰፋ ኽይትጝፄካ::

ግብሮ ኬያንቲ ታክስ ይግባኝ ኮሚሽን እያው ውሳኒዳኪላ ክሬቲ ዝኩኒ አች ቺፋ ፍርድ ጝናዳ ይግባኞ ዲግሳማ ካራካርጛማ ፍታዊ ግብር እታታ ፄውጝስ ካላው ሜብት ዝኩኹ አኽጝ ቱንዚ 57 እንፂ ቱንዚ እምፕልዳ እግ ዝኩⶓ ቶኬምካ::

ግብሮ ኬያንትካ ኬይጙ ግዴቲ ዝኩኽስታጊ ሜብቶ ኬቤርፃኑስታ ክሬቴ ኽያኑ ሜብት እይስትⶓ ሼውፅካ::

ቻግኒ ኬቴም ሚፂው ፅፌት ጝናሱ አላፊ አቶ ሙሉሰው ሉል ዴሜካ 2018 ባጄት አሜትዳ ኬቴሙ ቺፅጝፂ ግብሮ ኬይፅጝስ እሚኹሳ እክዶ ሳኪትጝፅጝስ ካፅኹ ኩርፄንት ይስጝፃው አኽⶓ ጌሌፅካ::

እንጚስኪላ 430 ሚሊዮን ብር ሚፄ ኩፕፅጝስ አኬድስታማ 398 ሚሊዮን ብር ሚፄ ኩፕፅጝስ ካሊስታ:: እንጚኪላ 72 ታፋ ሊኽዴስ አኮሜችስታ:: ፌይኹ አሜቱ ምስሊ ወክትሊ ካንትጛኒኪላ 130 ሚሊዮን ብርስ ኬፍናማ ሜዜጌብስትⶓ ጉሽካ:: እንኩዋጛዴስ ንⶓ 42 ታፋ ሊኽዴስ ሚፄ ኩፕፅጙ እንፅኺ ኬፍንⶓ ቶኬምካ::

ግብሮ ኬያንትካዴስ ዲግኹ ክሬቲው ካሲስኪላ አቶ ሙሉሰው እይኑ ዙርሚዳ ግብሩሳ ውሳኔ እያው ኬች ቲሪትጛማ ሌዋ ፃንጌኻ ካንታማስታ ሜሜሬ ጉሽፃ ፄዋማ ፂኒሳው ፅናቱ ጉሽፂስ ግብር ዋሴንትⶓ ቶኬምካማ ፅናት ካስጙስ ኬርት ፌቴርስታው አኽጝስ ግብሮ ኬያንትካ ክሬቴ ዲግስጝስ ካላኑሳ ሜብቶ ቴኬምስታንታ ፄውስታማጊ አኽⶓ ሼውፅካ::

ኬቴም ቺፅጝፂታ 7 ሊኻ ግብሮ ኬያንትካ ክሬቴ ዲግስⶓ አቕፄካ:: እኒጛስኪላ ካብስ ግብሮ ዋሴንጙ ፅናትስታ ሊሊትጙኽ ክሬቴ ኽይጙ እግስታ ሜሜሪ ካንትስታማጊ ውሳኔ አግፃንታ እንፃኽስስታማጊ አኽⶓ ጌሌፅካ::

ፍንሾስኪላ ፍታዌስታ ፂኒስስትኹሳ ግብሩሳ ውሳኔ አይጝስ አጌር አቕ ግዴቴ ፊትጛኑሳ እንፃኽስትጜ ይስጝፃማ ሲፍፅጝስ እክድ አምስትⶓ አቕፄካ::

ንግስቴ ተስፋ